ശ്രീമദ്വാല്മീകീയ രാമായണേ അരണ്യകാംഡമ് ।
അഥ തൃതീയസ്സര്ഗഃ ।
ഇത്യുക്ത്വാ ലക്ഷ്മണശ്ശ്രീമാന്വിരാധേ പ്രഹസന്നിവ ।
കോഭവാന്വനമഭ്യേത്യ ചരിഷ്യസി യഥാസുഖമ് ॥ 1 ॥
അഥോവാച പുനർവാക്യം വിരാധഃ പൂരയന്വനമ് ।
പൃച്ഛതോ മമ ഹി ബ്രൂതം കൌ യുവാം ക്വ ഗമിഷ്യഥഃ ॥ 2 ॥
. ।
തമുവാച തതോ രാമോ രാക്ഷസം ജ്വലിതാനനമ് ।
പൃച്ഛംതം സുമഹാതേജാ ഇക്ഷ്വാകുകുലമാത്മനഃ ॥ 3 ॥
ക്ഷത്രിയൌ വൃത്തസംപന്നൌ വിദ്ധി നൌ വനഗോചരൌ ।
ത്വാം തു വേദിതുമിച്ഛാവഃ കസ്ത്വം ചരസി ദംഡകാന് ॥ 4 ॥
തമുവാച വിരാധസ്തു രാമം സത്യപരാക്രമമ് ।
ഹംത വക്ഷ്യാമി തേ രാജന്നിബോധ മമ രാഘവ ॥ 5 ॥
പുത്രഃ കില ജയസ്യാഹം മാതാ മമ ശതഹ്രദാ ।
വിരാധ ഇതി മാമാഹുഃ പൃഥിവ്യാം സർവരാക്ഷസാഃ ॥ 6 ॥
തപസാ ചാഭിസംപ്രാപ്താ ബ്രഹ്മണോ ഹി പ്രസാദജാ ।
ശസ്ത്രേണാവധ്യതാ ലോകേഽച്ഛേദ്യാഭേദ്യത്വമേവ ച ॥ 7 ॥
ഉത്സൃജ്യ പ്രമദാമേനാമനപേക്ഷൌ യഥാഗതമ് ।
ത്വരമാണൌ പലായേഥാം ന വാം ജീവിതമാദദേ ॥ 8 ॥
തം രാമഃ പ്രത്യുവാചേദം കോപസംരക്തലോചനഃ ।
രാക്ഷസം വികൃതാകാരം വിരാധം പാപചേതസമ് ॥ 9 ॥
ക്ഷുദ്ര ധിക്ത്വാം തു ഹീനാര്ഥം മൃത്യുമന്വേഷസേ ധ്രുവമ് ।
രണേ പ്രാപ്സ്യസേ സംതിഷ്ഠ ന മേ ജീവന് ഗമിഷ്യാസി ॥ 10 ॥
തതഃ സജ്യം ധനുഃ കൃത്വാ രാമസ്സുനിശിതാംഛരാന് ।
സുശീഘ്രമഭിസംധായ രാക്ഷസം നിജഘാന ഹ ॥ 11 ॥
ധനുഷാ ജ്യാഗുണവതാ സപ്ത ബാണാന്മുമോച ഹ ।
രുക്മപുംഖാന്മഹാവേഗാന്സുപര്ണാനിലതുല്യഗാന് ॥ 12 ॥
തേ ശരീരം വിരാധസ്യ ഭിത്ത്വാബര്ഹിണവാസസഃ ।
നിപേതുശ്ശോണിതാദിഗ്ധാ ധരണ്യാം പാവകോപമാഃ ॥ 13 ॥
സ വിദ്ധോ ന്യസ്യ വൈദേഹീം ശൂലമുദ്യമ്യ രാക്ഷസഃ ।
അഭ്യദ്രവത്സുസംകൃദ്ധസ്തദാ രാമം സലക്ഷ്മണമ് ॥ 14 ॥
സ വിനദ്യ മഹാനാദം ശൂലം ശക്രധ്വജോപമമ് ।
പ്രഗൃഹ്യാശോഭത തദാ വ്യാത്താനന ഇവാംതകഃ ॥ 15 ॥
അഥ തൌ ഭ്രാതരൌ ദീപ്തം ശരവര്ഷം വവര്ഷതുഃ ।
വിരാധേ രാക്ഷസേ തസ്മിന് കാലാംതകയമോപമേ ॥ 16 ॥
സ പ്രഹസ്യ മഹാരൌദ്രഃ സ്ഥിത്വാജൃംഭത രാക്ഷസഃ ।
ജൃംഭമാണസ്യ തേ ബാണാഃ കായാന്നിഷ്പേതുരാശുഗാഃ ॥ 17 ॥
സ്പര്ശാത്തു വരദാനേന പ്രാണാന്സമ്രോധ്യ രാക്ഷസഃ ।
വിരാധഃ ശൂലമുദ്യമ്യ രാഘവാവഭ്യധാവത ॥ 18 ॥
തച്ഛൂലം വജ്രസംകാശം ഗഗനേ ജ്വലനോപമമ് ।
ദ്വാഭ്യാം ശരാഭ്യാം ചിച്ഛേദ രാമഃ ശസ്ത്രഭൃതാംവരഃ ॥ 19 ॥
തദ്രാമവിശിഖച്ഛിന്നം ശൂലം തസ്യകരാദ്ഭുവി ।
പപാതാശനിനാ ഛിന്നം മേരോരിവ ശിലാതലമ് ॥ 20 ॥
തൌ ഖഡ്ഗൌ ക്ഷിപ്രമുദ്യമ്യ കൃഷ്ണസര്പോപമൌശുഭൌ ।
തൂര്ണമാപേതതുസ്തസ്യ തദാ പ്രഹരതാം ബലാത് ॥ 21 ॥
സ വധ്യമാനഃ സുഭൃശം ഭുജാഭ്യാം പരിരഭ്യതൌ ।
അപ്രകംപ്യൌ നരവ്യാഘ്രൌ രൌദ്രഃ പ്രസ്ഥാതുമൈച്ഛത ॥ 22 ॥
തസ്യാഭിപ്രായമാജ്ഞായ രാമോ ലക്ഷ്മണമബ്രവീത് ।
വഹത്വയമലം താവത്പഥാഽനേന തു രാക്ഷസഃ ॥ 23 ॥
യഥാ ചേച്ഛതി സൌമിത്രേ തഥാ വഹതു രാക്ഷസഃ ।
അയമേവ ഹി നഃ പംഥാ യേന യാതി നിശാചരഃ ॥ 24 ॥
സ തു സ്വബലവീര്യേണ സമുത്ക്ഷിപ്യ നിശാചരഃ ।
ബാലാവിവ സ്കംധഗതൌ ചകാരാതിബലോദ്ധതഃ ॥ 25 ॥
താവാരോപ്യ തതഃ സ്കംധം രാഘവൌ രജനീചരഃ ।
വിരാധോ വിനദന്ഘോരം ജഗാമാഭിമുഖോ വനമ് ॥ 26 ॥
വനം മഹാമേഘനിഭം പ്രവിഷ്ടോ ദ്രുമൈര്മഹദ്ഭിർവിവിധൈരുപേതമ് ।
നാനാവിധൈഃ പക്ഷികുലൈർവിചിത്രം ശിവായുതം വ്യാലമൃഗൈർവികീര്ണമ് ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ തൃതീയസ്സര്ഗഃ ॥
