ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ତୃତୀୟସ୍ସର୍ଗଃ ।
ଇତ୍ୟୁକ୍ତ୍ଵା ଲକ୍ଷ୍ମଣଶ୍ଶ୍ରୀମାନ୍ଵିରାଧେ ପ୍ରହସନ୍ନିଵ ।
କୋଭଵାନ୍ଵନମଭ୍ୟେତ୍ୟ ଚରିଷ୍ୟସି ୟଥାସୁଖମ୍ ॥ 1 ॥
ଅଥୋଵାଚ ପୁନର୍ଵାକ୍ୟଂ ଵିରାଧଃ ପୂରୟନ୍ଵନମ୍ ।
ପୃଚ୍ଛତୋ ମମ ହି ବ୍ରୂତଂ କୌ ୟୁଵାଂ କ୍ଵ ଗମିଷ୍ୟଥଃ ॥ 2 ॥
. ।
ତମୁଵାଚ ତତୋ ରାମୋ ରାକ୍ଷସଂ ଜ୍ଵଲିତାନନମ୍ ।
ପୃଚ୍ଛଂତଂ ସୁମହାତେଜା ଇକ୍ଷ୍ଵାକୁକୁଲମାତ୍ମନଃ ॥ 3 ॥
କ୍ଷତ୍ରିୟୌ ଵୃତ୍ତସଂପନ୍ନୌ ଵିଦ୍ଧି ନୌ ଵନଗୋଚରୌ ।
ତ୍ଵାଂ ତୁ ଵେଦିତୁମିଚ୍ଛାଵଃ କସ୍ତ୍ଵଂ ଚରସି ଦଂଡକାନ୍ ॥ 4 ॥
ତମୁଵାଚ ଵିରାଧସ୍ତୁ ରାମଂ ସତ୍ୟପରାକ୍ରମମ୍ ।
ହଂତ ଵକ୍ଷ୍ୟାମି ତେ ରାଜନ୍ନିବୋଧ ମମ ରାଘଵ ॥ 5 ॥
ପୁତ୍ରଃ କିଲ ଜୟସ୍ୟାହଂ ମାତା ମମ ଶତହ୍ରଦା ।
ଵିରାଧ ଇତି ମାମାହୁଃ ପୃଥିଵ୍ୟାଂ ସର୍ଵରାକ୍ଷସାଃ ॥ 6 ॥
ତପସା ଚାଭିସଂପ୍ରାପ୍ତା ବ୍ରହ୍ମଣୋ ହି ପ୍ରସାଦଜା ।
ଶସ୍ତ୍ରେଣାଵଧ୍ୟତା ଲୋକେଽଚ୍ଛେଦ୍ୟାଭେଦ୍ୟତ୍ଵମେଵ ଚ ॥ 7 ॥
ଉତ୍ସୃଜ୍ୟ ପ୍ରମଦାମେନାମନପେକ୍ଷୌ ୟଥାଗତମ୍ ।
ତ୍ଵରମାଣୌ ପଲାୟେଥାଂ ନ ଵାଂ ଜୀଵିତମାଦଦେ ॥ 8 ॥
ତଂ ରାମଃ ପ୍ରତ୍ୟୁଵାଚେଦଂ କୋପସଂରକ୍ତଲୋଚନଃ ।
ରାକ୍ଷସଂ ଵିକୃତାକାରଂ ଵିରାଧଂ ପାପଚେତସମ୍ ॥ 9 ॥
କ୍ଷୁଦ୍ର ଧିକ୍ତ୍ଵାଂ ତୁ ହୀନାର୍ଥଂ ମୃତ୍ୟୁମନ୍ଵେଷସେ ଧ୍ରୁଵମ୍ ।
ରଣେ ପ୍ରାପ୍ସ୍ୟସେ ସଂତିଷ୍ଠ ନ ମେ ଜୀଵନ୍ ଗମିଷ୍ୟାସି ॥ 10 ॥
ତତଃ ସଜ୍ୟଂ ଧନୁଃ କୃତ୍ଵା ରାମସ୍ସୁନିଶିତାଂଛରାନ୍ ।
ସୁଶୀଘ୍ରମଭିସଂଧାୟ ରାକ୍ଷସଂ ନିଜଘାନ ହ ॥ 11 ॥
ଧନୁଷା ଜ୍ୟାଗୁଣଵତା ସପ୍ତ ବାଣାନ୍ମୁମୋଚ ହ ।
ରୁକ୍ମପୁଂଖାନ୍ମହାଵେଗାନ୍ସୁପର୍ଣାନିଲତୁଲ୍ୟଗାନ୍ ॥ 12 ॥
ତେ ଶରୀରଂ ଵିରାଧସ୍ୟ ଭିତ୍ତ୍ଵାବର୍ହିଣଵାସସଃ ।
ନିପେତୁଶ୍ଶୋଣିତାଦିଗ୍ଧା ଧରଣ୍ୟାଂ ପାଵକୋପମାଃ ॥ 13 ॥
ସ ଵିଦ୍ଧୋ ନ୍ୟସ୍ୟ ଵୈଦେହୀଂ ଶୂଲମୁଦ୍ୟମ୍ୟ ରାକ୍ଷସଃ ।
ଅଭ୍ୟଦ୍ରଵତ୍ସୁସଂକୃଦ୍ଧସ୍ତଦା ରାମଂ ସଲକ୍ଷ୍ମଣମ୍ ॥ 14 ॥
ସ ଵିନଦ୍ୟ ମହାନାଦଂ ଶୂଲଂ ଶକ୍ରଧ୍ଵଜୋପମମ୍ ।
ପ୍ରଗୃହ୍ୟାଶୋଭତ ତଦା ଵ୍ୟାତ୍ତାନନ ଇଵାଂତକଃ ॥ 15 ॥
ଅଥ ତୌ ଭ୍ରାତରୌ ଦୀପ୍ତଂ ଶରଵର୍ଷଂ ଵଵର୍ଷତୁଃ ।
ଵିରାଧେ ରାକ୍ଷସେ ତସ୍ମିନ୍ କାଲାଂତକୟମୋପମେ ॥ 16 ॥
ସ ପ୍ରହସ୍ୟ ମହାରୌଦ୍ରଃ ସ୍ଥିତ୍ଵାଜୃଂଭତ ରାକ୍ଷସଃ ।
ଜୃଂଭମାଣସ୍ୟ ତେ ବାଣାଃ କାୟାନ୍ନିଷ୍ପେତୁରାଶୁଗାଃ ॥ 17 ॥
ସ୍ପର୍ଶାତ୍ତୁ ଵରଦାନେନ ପ୍ରାଣାନ୍ସମ୍ରୋଧ୍ୟ ରାକ୍ଷସଃ ।
ଵିରାଧଃ ଶୂଲମୁଦ୍ୟମ୍ୟ ରାଘଵାଵଭ୍ୟଧାଵତ ॥ 18 ॥
ତଚ୍ଛୂଲଂ ଵଜ୍ରସଂକାଶଂ ଗଗନେ ଜ୍ଵଲନୋପମମ୍ ।
ଦ୍ଵାଭ୍ୟାଂ ଶରାଭ୍ୟାଂ ଚିଚ୍ଛେଦ ରାମଃ ଶସ୍ତ୍ରଭୃତାଂଵରଃ ॥ 19 ॥
ତଦ୍ରାମଵିଶିଖଚ୍ଛିନ୍ନଂ ଶୂଲଂ ତସ୍ୟକରାଦ୍ଭୁଵି ।
ପପାତାଶନିନା ଛିନ୍ନଂ ମେରୋରିଵ ଶିଲାତଲମ୍ ॥ 20 ॥
ତୌ ଖଡ୍ଗୌ କ୍ଷିପ୍ରମୁଦ୍ୟମ୍ୟ କୃଷ୍ଣସର୍ପୋପମୌଶୁଭୌ ।
ତୂର୍ଣମାପେତତୁସ୍ତସ୍ୟ ତଦା ପ୍ରହରତାଂ ବଲାତ୍ ॥ 21 ॥
ସ ଵଧ୍ୟମାନଃ ସୁଭୃଶଂ ଭୁଜାଭ୍ୟାଂ ପରିରଭ୍ୟତୌ ।
ଅପ୍ରକଂପ୍ୟୌ ନରଵ୍ୟାଘ୍ରୌ ରୌଦ୍ରଃ ପ୍ରସ୍ଥାତୁମୈଚ୍ଛତ ॥ 22 ॥
ତସ୍ୟାଭିପ୍ରାୟମାଜ୍ଞାୟ ରାମୋ ଲକ୍ଷ୍ମଣମବ୍ରଵୀତ୍ ।
ଵହତ୍ଵୟମଲଂ ତାଵତ୍ପଥାଽନେନ ତୁ ରାକ୍ଷସଃ ॥ 23 ॥
ୟଥା ଚେଚ୍ଛତି ସୌମିତ୍ରେ ତଥା ଵହତୁ ରାକ୍ଷସଃ ।
ଅୟମେଵ ହି ନଃ ପଂଥା ୟେନ ୟାତି ନିଶାଚରଃ ॥ 24 ॥
ସ ତୁ ସ୍ଵବଲଵୀର୍ୟେଣ ସମୁତ୍କ୍ଷିପ୍ୟ ନିଶାଚରଃ ।
ବାଲାଵିଵ ସ୍କଂଧଗତୌ ଚକାରାତିବଲୋଦ୍ଧତଃ ॥ 25 ॥
ତାଵାରୋପ୍ୟ ତତଃ ସ୍କଂଧଂ ରାଘଵୌ ରଜନୀଚରଃ ।
ଵିରାଧୋ ଵିନଦନ୍ଘୋରଂ ଜଗାମାଭିମୁଖୋ ଵନମ୍ ॥ 26 ॥
ଵନଂ ମହାମେଘନିଭଂ ପ୍ରଵିଷ୍ଟୋ ଦ୍ରୁମୈର୍ମହଦ୍ଭିର୍ଵିଵିଧୈରୁପେତମ୍ ।
ନାନାଵିଧୈଃ ପକ୍ଷିକୁଲୈର୍ଵିଚିତ୍ରଂ ଶିଵାୟୁତଂ ଵ୍ୟାଲମୃଗୈର୍ଵିକୀର୍ଣମ୍ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ତୃତୀୟସ୍ସର୍ଗଃ ॥
