ශ්රීමද්වාල්මීකීය රාමායණේ අරණ්යකාංඩම් ।
අථ තෘතීයස්සර්ගඃ ।
ඉත්යුක්ත්වා ලක්ෂ්මණශ්ශ්රීමාන්විරාධේ ප්රහසන්නිව ।
කෝභවාන්වනමභ්යේත්ය චරිෂ්යසි යථාසුඛම් ॥ 1 ॥
අථෝවාච පුනර්වාක්යං විරාධඃ පූරයන්වනම් ।
පෘච්ඡතෝ මම හි බ්රූතං කෞ යුවාං ක්ව ගමිෂ්යථඃ ॥ 2 ॥
. ।
තමුවාච තතෝ රාමෝ රාක්ෂසං ජ්වලිතානනම් ।
පෘච්ඡංතං සුමහාතේජා ඉක්ෂ්වාකුකුලමාත්මනඃ ॥ 3 ॥
ක්ෂත්රියෞ වෘත්තසංපන්නෞ විද්ධි නෞ වනගෝචරෞ ।
ත්වාං තු වේදිතුමිච්ඡාවඃ කස්ත්වං චරසි දංඩකාන් ॥ 4 ॥
තමුවාච විරාධස්තු රාමං සත්යපරාක්රමම් ।
හංත වක්ෂ්යාමි තේ රාජන්නිබෝධ මම රාඝව ॥ 5 ॥
පුත්රඃ කිල ජයස්යාහං මාතා මම ශතහ්රදා ।
විරාධ ඉති මාමාහුඃ පෘථිව්යාං සර්වරාක්ෂසාඃ ॥ 6 ॥
තපසා චාභිසංප්රාප්තා බ්රහ්මණෝ හි ප්රසාදජා ।
ශස්ත්රේණාවධ්යතා ලෝකේऽච්ඡේද්යාභේද්යත්වමේව ච ॥ 7 ॥
උත්සෘජ්ය ප්රමදාමේනාමනපේක්ෂෞ යථාගතම් ।
ත්වරමාණෞ පලායේථාං න වාං ජීවිතමාදදේ ॥ 8 ॥
තං රාමඃ ප්රත්යුවාචේදං කෝපසංරක්තලෝචනඃ ।
රාක්ෂසං විකෘතාකාරං විරාධං පාපචේතසම් ॥ 9 ॥
ක්ෂුද්ර ධික්ත්වාං තු හීනාර්ථං මෘත්යුමන්වේෂසේ ධ්රුවම් ।
රණේ ප්රාප්ස්යසේ සංතිෂ්ඨ න මේ ජීවන් ගමිෂ්යාසි ॥ 10 ॥
තතඃ සජ්යං ධනුඃ කෘත්වා රාමස්සුනිශිතාංඡරාන් ।
සුශීඝ්රමභිසංධාය රාක්ෂසං නිජඝාන හ ॥ 11 ॥
ධනුෂා ජ්යාගුණවතා සප්ත බාණාන්මුමෝච හ ।
රුක්මපුංඛාන්මහාවේගාන්සුපර්ණානිලතුල්යගාන් ॥ 12 ॥
තේ ශරීරං විරාධස්ය භිත්ත්වාබර්හිණවාසසඃ ।
නිපේතුශ්ශෝණිතාදිග්ධා ධරණ්යාං පාවකෝපමාඃ ॥ 13 ॥
ස විද්ධෝ න්යස්ය වෛදේහීං ශූලමුද්යම්ය රාක්ෂසඃ ।
අභ්යද්රවත්සුසංකෘද්ධස්තදා රාමං සලක්ෂ්මණම් ॥ 14 ॥
ස විනද්ය මහානාදං ශූලං ශක්රධ්වජෝපමම් ।
ප්රගෘහ්යාශෝභත තදා ව්යාත්තානන ඉවාංතකඃ ॥ 15 ॥
අථ තෞ භ්රාතරෞ දීප්තං ශරවර්ෂං වවර්ෂතුඃ ।
විරාධේ රාක්ෂසේ තස්මින් කාලාංතකයමෝපමේ ॥ 16 ॥
ස ප්රහස්ය මහාරෞද්රඃ ස්ථිත්වාජෘංභත රාක්ෂසඃ ।
ජෘංභමාණස්ය තේ බාණාඃ කායාන්නිෂ්පේතුරාශුගාඃ ॥ 17 ॥
ස්පර්ශාත්තු වරදානේන ප්රාණාන්සම්රෝධ්ය රාක්ෂසඃ ।
විරාධඃ ශූලමුද්යම්ය රාඝවාවභ්යධාවත ॥ 18 ॥
තච්ඡූලං වජ්රසංකාශං ගගනේ ජ්වලනෝපමම් ।
ද්වාභ්යාං ශරාභ්යාං චිච්ඡේද රාමඃ ශස්ත්රභෘතාංවරඃ ॥ 19 ॥
තද්රාමවිශිඛච්ඡින්නං ශූලං තස්යකරාද්භුවි ।
පපාතාශනිනා ඡින්නං මේරෝරිව ශිලාතලම් ॥ 20 ॥
තෞ ඛඩ්ගෞ ක්ෂිප්රමුද්යම්ය කෘෂ්ණසර්පෝපමෞශුභෞ ।
තූර්ණමාපේතතුස්තස්ය තදා ප්රහරතාං බලාත් ॥ 21 ॥
ස වධ්යමානඃ සුභෘශං භුජාභ්යාං පරිරභ්යතෞ ।
අප්රකංප්යෞ නරව්යාඝ්රෞ රෞද්රඃ ප්රස්ථාතුමෛච්ඡත ॥ 22 ॥
තස්යාභිප්රායමාජ්ඤාය රාමෝ ලක්ෂ්මණමබ්රවීත් ।
වහත්වයමලං තාවත්පථාऽනේන තු රාක්ෂසඃ ॥ 23 ॥
යථා චේච්ඡති සෞමිත්රේ තථා වහතු රාක්ෂසඃ ।
අයමේව හි නඃ පංථා යේන යාති නිශාචරඃ ॥ 24 ॥
ස තු ස්වබලවීර්යේණ සමුත්ක්ෂිප්ය නිශාචරඃ ।
බාලාවිව ස්කංධගතෞ චකාරාතිබලෝද්ධතඃ ॥ 25 ॥
තාවාරෝප්ය තතඃ ස්කංධං රාඝවෞ රජනීචරඃ ।
විරාධෝ විනදන්ඝෝරං ජගාමාභිමුඛෝ වනම් ॥ 26 ॥
වනං මහාමේඝනිභං ප්රවිෂ්ටෝ ද්රුමෛර්මහද්භිර්විවිධෛරුපේතම් ।
නානාවිධෛඃ පක්ෂිකුලෛර්විචිත්රං ශිවායුතං ව්යාලමෘගෛර්විකීර්ණම් ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ තෘතීයස්සර්ගඃ ॥
