śrīmadvālmīkīya rāmāyaṇē araṇyakāṇḍam ।
atha pañchapañchāśassargaḥ ।
sandiśya rākṣasānghōrān rāvaṇō'ṣṭau mahābalān ।
ātmānaṃ buddhivaiklabyātkṛtakṛtyamamanyata ॥ 1 ॥
sa chintayānō vaidēhīṃ kāmabāṇasamarpitaḥ ।
pravivēśa gṛhaṃ ramyaṃ sītāṃ draṣṭumabhitvaran ॥ 2 ॥
sa praviśya tu tadvēśma rāvaṇō rākṣasādhipaḥ ।
apaśyadrākṣasīmadhyē sītāṃ śōkaparāyaṇām ॥ 3 ॥
aśrupūrṇamukhīṃ dīnāṃ śōkabhārābhipīḍitām ।
vāyuvēgairivākrāntāṃ majjantīṃ nāvamarṇavē ॥ 4 ॥
mṛgayūthaparibhraṣṭāṃ mṛgīṃ śvabhirivāvṛtām ।
adhōmukhamukhīṃ sītāmabhyētya cha niśācharaḥ ॥ 5 ॥
tāṃ tu śōkaparāṃ dīnāmavaśāṃ rākṣasādhipaḥ ।
sa balāddarśayāmāsa gṛhaṃ dēvagṛhōpamam ॥ 6 ॥
harmyaprāsādasambādhaṃ strīsahasraniṣēvitam ।
nānāpakṣigaṇairjuṣṭaṃ nānāratnasamanvitam ॥ 7 ॥
dāntakaistāpanīyaiścha sphāṭikai rājatairapi ।
vajravaiḍūryachitraiścha stambhairdṛṣṭimanōharaiḥ ॥ 8 ॥
divyadundubhinirhrādaṃ taptakāñchanatōraṇam ।
sōpānaṃ kāñchanaṃ chitramārurōha tayā saha ॥ 9 ॥
dāntakā rājatāśchaiva gavākṣāḥ priyadarśanāḥ ।
hēmajālāvatāśchāsanstatra prāsādapaṅktayaḥ ॥ 10 ॥
sudhāmaṇivichitrāṇi bhūmibhāgāni sarvaśaḥ ।
daśagrīvassvabhavanē prādarśayata maithilīm ॥ 11 ॥
dīrghikāḥ puṣkariṇyaścha nānāvṛkṣasamanvitāḥ ।
rāvaṇō darśayāmāsa sītāṃ śōkaparāyaṇām ॥ 12 ॥
darśayitvā tu vaidēhyāḥ kṛtsnaṃ tadbhavanōttamam ।
uvācha vākyaṃ pāpātmā sītāṃ lōbhitumichChayā ॥ 13 ॥
daśa rākṣasakōṭyaścha dvāviṃśatirathāparāḥ ।
tēṣāṃ prabhurahaṃ sītē sarvēṣāṃ bhīmakarmaṇām ॥ 14 ॥
varjayitvā jarāvṛddhānbālāṃścha rajanīcharān ।
sahasramēkamēkasya mama kāryapurassaram ॥ 15 ॥
yadidaṃ rājatantraṃ mē tvayi sarvaṃ pratiṣṭhitam ।
jīvitaṃ cha viśālākṣi tvaṃ mē prāṇairgarīyasī ॥ 16 ॥
bahūnāṃstrīsahasrāṇāṃ mama yō'sau parigrahaḥ ।
tāsāṃ tvamīśvarā sītē mama bhāryā bhava priyē ॥ 17 ॥
sādhu kiṃ tē'nyayā buddhyā rōchayasva vachō mama ।
bhajasvamābhitaptasya prasādaṃ kartumarhasi ॥ 18 ॥
parikṣiptā samudrēṇa laṅkēyaṃ śatayōjanā ।
nēyaṃ dharṣayituṃ śakyā sēndrairapi surāsuraiḥ ॥ 19 ॥
na dēvēṣu na yakṣēṣu na gandharvēṣu pakṣiṣu ।
ahaṃ paśyāmi lōkēṣu yō mē vīryasamō bhavēt ॥ 20 ॥
rājyabhraṣṭēna dīnēna tāpasēna gatāyuṣā ।
kiṃ kariṣyasi rāmēṇa mānuṣēṇālpatējasā ॥ 21 ॥
bhajasva sītē māmēva bhartāhaṃ sadṛśastava ।
yauvanaṃ hyadhruvaṃ bhīru ramasvēha mayā saha ॥ 22 ॥
darśanē mākṛthā buddhiṃ rāghavasya varānanē ।
kāsya śaktirihāgantumapi sītē manōrathaiḥ ॥ 23 ॥
na śakyō vāyurākāśē pāśairbaddhuṃ mahājavaḥ ।
dīpyamānasya vāpyagnērgṛhītuṃ vimalāṃ śikhām ॥ 24 ॥
trayāṇāmapi lōkānāṃ na taṃ paśyāmi śōbhanē ।
vikramēṇa nayēdyastvāṃ madbāhuparipālitām ॥ 25 ॥
laṅkāyāṃ sumahadrājyamidaṃ tvamanupālaya ।
tvatprēṣyā madvidhāśchaiva dēvāśchāpi charācharāḥ ॥ 26 ॥
abhiṣēkōdakaklinnā tuṣṭā cha ramayasva mām ।
duṣkṛtaṃ yatparā karma vanavāsēna tadgatam ॥ 27 ॥
yaścha tē sukṛtō dharmastasyēha phalamāpnuhi ।
iha mālyāni sarvāṇi divyagandhāni maithili ॥ 28 ॥
bhūṣaṇāni cha mukhyāni sēvasva cha mayā saha ।
puṣpakaṃ nāma suśrōṇi bhrāturvaiśravaṇasya mē ॥ 29 ॥
vimānaṃ sūryasaṅkāśaṃ tarasā nirjitaṃ mayā ।
viśālaṃ ramaṇīyaṃ cha tadvimānamanuttam ॥ 30 ॥
tatra sītē mayā sārdhaṃ viharasva yathāsukham ।
vadanaṃ padmasaṅkāśamamalaṃ chārudarśanam ।
śōkārtantu varārōhē na bhrājati varānanē ॥ 31 ॥
ēvaṃ vadati tasmitsā vastrāntēna varāṅganā ।
pidhāyēndunibhaṃ sītā mukhamaśrūṇyavartayat ॥ 32 ॥
dhyāyantīṃ tāmivāsvasthāṃ dīnāṃ chintāhataprabhām ।
uvācha vachanaṃ pāpō rāvaṇō rākṣasēśvaraḥ ॥ 33 ॥
alaṃ vrīḍēna vaidēhi dharmalōpakṛtēna cha ॥ 34 ॥
ārṣō'yaṃ daivaniṣyandō yastvāmabhigamiṣyati ।
ētau pādau mayā snigdhau śirōbhiḥ paripīḍitau ॥ 35 ॥
prasādaṃ kuru mē kṣipraṃ vaśyō dāsō'hamasmitē ।
imāśśūnya mayā vāchaśśuṣyamāṇēna bhāṣitāḥ ॥ 36 ॥
na chāpi rāvaṇaḥ kāñchinmūrdhnā strīṃ praṇamēta ha ।
ēvamuktvā daśagrīvō maithilīṃ janakātmajām ॥ 37 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē pañchapañchāśassargaḥ ॥
