ශ්රීමද්වාල්මීකීය රාමායණේ අරණ්යකාංඩම් ।
අථ පංචපංචාශස්සර්ගඃ ।
සංදිශ්ය රාක්ෂසාන්ඝෝරාන් රාවණෝऽෂ්ටෞ මහාබලාන් ।
ආත්මානං බුද්ධිවෛක්ලබ්යාත්කෘතකෘත්යමමන්යත ॥ 1 ॥
ස චිංතයානෝ වෛදේහීං කාමබාණසමර්පිතඃ ।
ප්රවිවේශ ගෘහං රම්යං සීතාං ද්රෂ්ටුමභිත්වරන් ॥ 2 ॥
ස ප්රවිශ්ය තු තද්වේශ්ම රාවණෝ රාක්ෂසාධිපඃ ।
අපශ්යද්රාක්ෂසීමධ්යේ සීතාං ශෝකපරායණාම් ॥ 3 ॥
අශ්රුපූර්ණමුඛීං දීනාං ශෝකභාරාභිපීඩිතාම් ।
වායුවේගෛරිවාක්රාංතාං මජ්ජංතීං නාවමර්ණවේ ॥ 4 ॥
මෘගයූථපරිභ්රෂ්ටාං මෘගීං ශ්වභිරිවාවෘතාම් ।
අධෝමුඛමුඛීං සීතාමභ්යේත්ය ච නිශාචරඃ ॥ 5 ॥
තාං තු ශෝකපරාං දීනාමවශාං රාක්ෂසාධිපඃ ।
ස බලාද්දර්ශයාමාස ගෘහං දේවගෘහෝපමම් ॥ 6 ॥
හර්ම්යප්රාසාදසංබාධං ස්ත්රීසහස්රනිෂේවිතම් ।
නානාපක්ෂිගණෛර්ජුෂ්ටං නානාරත්නසමන්විතම් ॥ 7 ॥
දාංතකෛස්තාපනීයෛශ්ච ස්ඵාටිකෛ රාජතෛරපි ।
වජ්රවෛඩූර්යචිත්රෛශ්ච ස්තංභෛර්දෘෂ්ටිමනෝහරෛඃ ॥ 8 ॥
දිව්යදුංදුභිනිර්හ්රාදං තප්තකාංචනතෝරණම් ।
සෝපානං කාංචනං චිත්රමාරුරෝහ තයා සහ ॥ 9 ॥
දාංතකා රාජතාශ්චෛව ගවාක්ෂාඃ ප්රියදර්ශනාඃ ।
හේමජාලාවතාශ්චාසන්ස්තත්ර ප්රාසාදපංක්තයඃ ॥ 10 ॥
සුධාමණිවිචිත්රාණි භූමිභාගානි සර්වශඃ ।
දශග්රීවස්ස්වභවනේ ප්රාදර්ශයත මෛථිලීම් ॥ 11 ॥
දීර්ඝිකාඃ පුෂ්කරිණ්යශ්ච නානාවෘක්ෂසමන්විතාඃ ।
රාවණෝ දර්ශයාමාස සීතාං ශෝකපරායණාම් ॥ 12 ॥
දර්ශයිත්වා තු වෛදේහ්යාඃ කෘත්ස්නං තද්භවනෝත්තමම් ।
උවාච වාක්යං පාපාත්මා සීතාං ලෝභිතුමිච්ඡයා ॥ 13 ॥
දශ රාක්ෂසකෝට්යශ්ච ද්වාවිංශතිරථාපරාඃ ।
තේෂාං ප්රභුරහං සීතේ සර්වේෂාං භීමකර්මණාම් ॥ 14 ॥
වර්ජයිත්වා ජරාවෘද්ධාන්බාලාංශ්ච රජනීචරාන් ।
සහස්රමේකමේකස්ය මම කාර්යපුරස්සරම් ॥ 15 ॥
යදිදං රාජතංත්රං මේ ත්වයි සර්වං ප්රතිෂ්ඨිතම් ।
ජීවිතං ච විශාලාක්ෂි ත්වං මේ ප්රාණෛර්ගරීයසී ॥ 16 ॥
බහූනාංස්ත්රීසහස්රාණාං මම යෝऽසෞ පරිග්රහඃ ।
තාසාං ත්වමීශ්වරා සීතේ මම භාර්යා භව ප්රියේ ॥ 17 ॥
සාධු කිං තේऽන්යයා බුද්ධ්යා රෝචයස්ව වචෝ මම ।
භජස්වමාභිතප්තස්ය ප්රසාදං කර්තුමර්හසි ॥ 18 ॥
පරික්ෂිප්තා සමුද්රේණ ලංකේයං ශතයෝජනා ।
නේයං ධර්ෂයිතුං ශක්යා සේංද්රෛරපි සුරාසුරෛඃ ॥ 19 ॥
න දේවේෂු න යක්ෂේෂු න ගංධර්වේෂු පක්ෂිෂු ।
අහං පශ්යාමි ලෝකේෂු යෝ මේ වීර්යසමෝ භවේත් ॥ 20 ॥
රාජ්යභ්රෂ්ටේන දීනේන තාපසේන ගතායුෂා ।
කිං කරිෂ්යසි රාමේණ මානුෂේණාල්පතේජසා ॥ 21 ॥
භජස්ව සීතේ මාමේව භර්තාහං සදෘශස්තව ।
යෞවනං හ්යධ්රුවං භීරු රමස්වේහ මයා සහ ॥ 22 ॥
දර්ශනේ මාකෘථා බුද්ධිං රාඝවස්ය වරානනේ ।
කාස්ය ශක්තිරිහාගංතුමපි සීතේ මනෝරථෛඃ ॥ 23 ॥
න ශක්යෝ වායුරාකාශේ පාශෛර්බද්ධුං මහාජවඃ ।
දීප්යමානස්ය වාප්යග්නේර්ගෘහීතුං විමලාං ශිඛාම් ॥ 24 ॥
ත්රයාණාමපි ලෝකානාං න තං පශ්යාමි ශෝභනේ ।
වික්රමේණ නයේද්යස්ත්වාං මද්බාහුපරිපාලිතාම් ॥ 25 ॥
ලංකායාං සුමහද්රාජ්යමිදං ත්වමනුපාලය ।
ත්වත්ප්රේෂ්යා මද්විධාශ්චෛව දේවාශ්චාපි චරාචරාඃ ॥ 26 ॥
අභිෂේකෝදකක්ලින්නා තුෂ්ටා ච රමයස්ව මාම් ।
දුෂ්කෘතං යත්පරා කර්ම වනවාසේන තද්ගතම් ॥ 27 ॥
යශ්ච තේ සුකෘතෝ ධර්මස්තස්යේහ ඵලමාප්නුහි ।
ඉහ මාල්යානි සර්වාණි දිව්යගංධානි මෛථිලි ॥ 28 ॥
භූෂණානි ච මුඛ්යානි සේවස්ව ච මයා සහ ।
පුෂ්පකං නාම සුශ්රෝණි භ්රාතුර්වෛශ්රවණස්ය මේ ॥ 29 ॥
විමානං සූර්යසංකාශං තරසා නිර්ජිතං මයා ।
විශාලං රමණීයං ච තද්විමානමනුත්තම් ॥ 30 ॥
තත්ර සීතේ මයා සාර්ධං විහරස්ව යථාසුඛම් ।
වදනං පද්මසංකාශමමලං චාරුදර්ශනම් ।
ශෝකාර්තංතු වරාරෝහේ න භ්රාජති වරානනේ ॥ 31 ॥
ඒවං වදති තස්මිත්සා වස්ත්රාංතේන වරාංගනා ।
පිධායේංදුනිභං සීතා මුඛමශ්රූණ්යවර්තයත් ॥ 32 ॥
ධ්යායංතීං තාමිවාස්වස්ථාං දීනාං චිංතාහතප්රභාම් ।
උවාච වචනං පාපෝ රාවණෝ රාක්ෂසේශ්වරඃ ॥ 33 ॥
අලං ව්රීඩේන වෛදේහි ධර්මලෝපකෘතේන ච ॥ 34 ॥
ආර්ෂෝऽයං දෛවනිෂ්යංදෝ යස්ත්වාමභිගමිෂ්යති ।
ඒතෞ පාදෞ මයා ස්නිග්ධෞ ශිරෝභිඃ පරිපීඩිතෞ ॥ 35 ॥
ප්රසාදං කුරු මේ ක්ෂිප්රං වශ්යෝ දාසෝऽහමස්මිතේ ।
ඉමාශ්ශූන්ය මයා වාචශ්ශුෂ්යමාණේන භාෂිතාඃ ॥ 36 ॥
න චාපි රාවණඃ කාංචින්මූර්ධ්නා ස්ත්රීං ප්රණමේත හ ।
ඒවමුක්ත්වා දශග්රීවෝ මෛථිලීං ජනකාත්මජාම් ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචපංචාශස්සර්ගඃ ॥
