śrīmadvālmīkīya rāmāyaṇē araṇyakāṇḍam ।
atha saptatitamassargaḥ ।
tau tu tatra sthitau dṛṣṭvā bhrātarau rāmalakṣmaṇau ।
bāhupāśaparikṣiptau kabandhō vākyamabravīt ॥ 1 ॥
tiṣṭhataḥ kiṃ nu māṃ dṛṣṭvā kṣudhārtaṃ kṣatriyarṣabhau ।
āhārārthaṃ tu sandiṣṭau daivēna gatachētasau ॥ 2 ॥
tachChrutvā lakṣmaṇō vākyaṃ prāptakālaṃ hitaṃ tadā ।
uvāchā'rtiṃ samāpannō vikramē kṛtalakṣaṇaḥ ॥ 3 ॥
tvāṃ cha māṃ cha purā tūrṇamādattē rākṣasādhamaḥ ।
tasmādasibhyāmasyāśu bāhū Chindāvahai gurū ॥ 4 ॥
bhīṣaṇō'yaṃ mahākāyō rākṣasō bhujavikramaḥ ।
lōkaṃ hyatijitaṃ kṛtvā hyāvāṃ hantumihēchChati ॥ 5 ॥
niśchēṣṭānāṃ vadhō rājankutsitō jagatīpatēḥ ।
kratumadhyōpanītānāṃ paśūnāmiva rāghava ॥ 6 ॥
ētatsañjalpitaṃ śrutvā tayōḥ kruddhastu rākṣasaḥ ।
vidāryā'syaṃ tadā raudrastau bhakṣayitumārabhat ॥ 7 ॥
tatastau dēśakālajñau khaḍgābhyāmēva rāghavau ।
achChindatāṃ susaṃvignau bāhū tasyāṃsadēśataḥ ॥ 8 ॥
dakṣiṇō dakṣiṇaṃ bāhumasaktamasinā tataḥ ।
chichChēda rāmō vēgēna savyaṃ vīrastu lakṣmaṇaḥ ॥ 9 ॥
sa papāta mahābāhuśChinnabāhurmahāsvanaḥ ।
khaṃ cha gāṃ cha diśaśchaiva nādayañjaladō yathā ॥ 10 ॥
sa nikṛttau bhujau dṛṣṭvā śōṇitaughapariplutaḥ ।
dīnaḥ paprachCha tau vīrau kau yuvāmiti dānavaḥ ॥ 11 ॥
iti tasya bruvāṇasya lakṣmaṇaśśubhalakṣaṇaḥ ।
śaśaṃsa rāghavaṃ tasya kabandhasya mahātmanaḥ ॥ 12 ॥
ayamikṣvākudāyādō rāmō nāma janaiśśrutaḥ ।
asyaivāvarajaṃ viddi bhrātaraṃ māṃ cha lakṣmaṇam ॥ 13 ॥
asya dēvaprabhāvasya vasatō vijanē vanē ।
rakṣasā'pahṛtā patnī yāmichChantāvihāgatau ॥ 14 ॥
tvaṃ tu kō vā kimarthaṃ vā kabandhasadṛśō vanē ।
āsyēnōrasi dīptēna bhagnajaṅghō vichēṣṭasē ॥ 15 ॥
ēvamuktaḥ kabandhastu lakṣmaṇēnōttaraṃ vachaḥ ।
uvācha paramaprīta stadindravachanaṃ smaran ॥ 16 ॥
svāgataṃ vāṃ naravyāghrau diṣṭyā paśyāmi chāpyaham ।
diṣṭyā chēmau nikṛttau mē yuvābhyāṃ bāhubandhanau ॥ 17 ॥
virūpaṃ yachcha mē rūpaṃ prāptaṃ hyavinayādyathā ।
tanmē śṛṇu naravyāghra tattvataśśaṃsatastava ॥ 18 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē saptatitamassargaḥ ॥
