ശ്രീമദ്വാല്മീകീയ രാമായണേ അരണ്യകാംഡമ് ।
അഥ സപ്തതിതമസ്സര്ഗഃ ।
തൌ തു തത്ര സ്ഥിതൌ ദൃഷ്ട്വാ ഭ്രാതരൌ രാമലക്ഷ്മണൌ ।
ബാഹുപാശപരിക്ഷിപ്തൌ കബംധോ വാക്യമബ്രവീത് ॥ 1 ॥
തിഷ്ഠതഃ കിം നു മാം ദൃഷ്ട്വാ ക്ഷുധാര്തം ക്ഷത്രിയര്ഷഭൌ ।
ആഹാരാര്ഥം തു സംദിഷ്ടൌ ദൈവേന ഗതചേതസൌ ॥ 2 ॥
തച്ഛ്രുത്വാ ലക്ഷ്മണോ വാക്യം പ്രാപ്തകാലം ഹിതം തദാ ।
ഉവാചാഽര്തിം സമാപന്നോ വിക്രമേ കൃതലക്ഷണഃ ॥ 3 ॥
ത്വാം ച മാം ച പുരാ തൂര്ണമാദത്തേ രാക്ഷസാധമഃ ।
തസ്മാദസിഭ്യാമസ്യാശു ബാഹൂ ഛിംദാവഹൈ ഗുരൂ ॥ 4 ॥
ഭീഷണോഽയം മഹാകായോ രാക്ഷസോ ഭുജവിക്രമഃ ।
ലോകം ഹ്യതിജിതം കൃത്വാ ഹ്യാവാം ഹംതുമിഹേച്ഛതി ॥ 5 ॥
നിശ്ചേഷ്ടാനാം വധോ രാജന്കുത്സിതോ ജഗതീപതേഃ ।
ക്രതുമധ്യോപനീതാനാം പശൂനാമിവ രാഘവ ॥ 6 ॥
ഏതത്സംജല്പിതം ശ്രുത്വാ തയോഃ ക്രുദ്ധസ്തു രാക്ഷസഃ ।
വിദാര്യാഽസ്യം തദാ രൌദ്രസ്തൌ ഭക്ഷയിതുമാരഭത് ॥ 7 ॥
തതസ്തൌ ദേശകാലജ്ഞൌ ഖഡ്ഗാഭ്യാമേവ രാഘവൌ ।
അച്ഛിംദതാം സുസംവിഗ്നൌ ബാഹൂ തസ്യാംസദേശതഃ ॥ 8 ॥
ദക്ഷിണോ ദക്ഷിണം ബാഹുമസക്തമസിനാ തതഃ ।
ചിച്ഛേദ രാമോ വേഗേന സവ്യം വീരസ്തു ലക്ഷ്മണഃ ॥ 9 ॥
സ പപാത മഹാബാഹുശ്ഛിന്നബാഹുര്മഹാസ്വനഃ ।
ഖം ച ഗാം ച ദിശശ്ചൈവ നാദയംജലദോ യഥാ ॥ 10 ॥
സ നികൃത്തൌ ഭുജൌ ദൃഷ്ട്വാ ശോണിതൌഘപരിപ്ലുതഃ ।
ദീനഃ പപ്രച്ഛ തൌ വീരൌ കൌ യുവാമിതി ദാനവഃ ॥ 11 ॥
ഇതി തസ്യ ബ്രുവാണസ്യ ലക്ഷ്മണശ്ശുഭലക്ഷണഃ ।
ശശംസ രാഘവം തസ്യ കബംധസ്യ മഹാത്മനഃ ॥ 12 ॥
അയമിക്ഷ്വാകുദായാദോ രാമോ നാമ ജനൈശ്ശ്രുതഃ ।
അസ്യൈവാവരജം വിദ്ദി ഭ്രാതരം മാം ച ലക്ഷ്മണമ് ॥ 13 ॥
അസ്യ ദേവപ്രഭാവസ്യ വസതോ വിജനേ വനേ ।
രക്ഷസാഽപഹൃതാ പത്നീ യാമിച്ഛംതാവിഹാഗതൌ ॥ 14 ॥
ത്വം തു കോ വാ കിമര്ഥം വാ കബംധസദൃശോ വനേ ।
ആസ്യേനോരസി ദീപ്തേന ഭഗ്നജംഘോ വിചേഷ്ടസേ ॥ 15 ॥
ഏവമുക്തഃ കബംധസ്തു ലക്ഷ്മണേനോത്തരം വചഃ ।
ഉവാച പരമപ്രീത സ്തദിംദ്രവചനം സ്മരന് ॥ 16 ॥
സ്വാഗതം വാം നരവ്യാഘ്രൌ ദിഷ്ട്യാ പശ്യാമി ചാപ്യഹമ് ।
ദിഷ്ട്യാ ചേമൌ നികൃത്തൌ മേ യുവാഭ്യാം ബാഹുബംധനൌ ॥ 17 ॥
വിരൂപം യച്ച മേ രൂപം പ്രാപ്തം ഹ്യവിനയാദ്യഥാ ।
തന്മേ ശൃണു നരവ്യാഘ്ര തത്ത്വതശ്ശംസതസ്തവ ॥ 18 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ സപ്തതിതമസ്സര്ഗഃ ॥
