শ্রীমদ্বাল্মীকীয় রামাযণে অরণ্যকাংডম্ ।
অথ সপ্ততিতমস্সর্গঃ ।
তৌ তু তত্র স্থিতৌ দৃষ্ট্বা ভ্রাতরৌ রামলক্ষ্মণৌ ।
বাহুপাশপরিক্ষিপ্তৌ কবংধো বাক্যমব্রবীত্ ॥ 1 ॥
তিষ্ঠতঃ কিং নু মাং দৃষ্ট্বা ক্ষুধার্তং ক্ষত্রিযর্ষভৌ ।
আহারার্থং তু সংদিষ্টৌ দৈবেন গতচেতসৌ ॥ 2 ॥
তচ্ছ্রুত্বা লক্ষ্মণো বাক্য়ং প্রাপ্তকালং হিতং তদা ।
উবাচাঽর্তিং সমাপন্নো বিক্রমে কৃতলক্ষণঃ ॥ 3 ॥
ত্বাং চ মাং চ পুরা তূর্ণমাদত্তে রাক্ষসাধমঃ ।
তস্মাদসিভ্য়ামস্য়াশু বাহূ ছিংদাবহৈ গুরূ ॥ 4 ॥
ভীষণোঽয়ং মহাকায়ো রাক্ষসো ভুজবিক্রমঃ ।
লোকং হ্যতিজিতং কৃত্বা হ্য়াবাং হংতুমিহেচ্ছতি ॥ 5 ॥
নিশ্চেষ্টানাং বধো রাজন্কুত্সিতো জগতীপতেঃ ।
ক্রতুমধ্য়োপনীতানাং পশূনামিব রাঘব ॥ 6 ॥
এতত্সংজল্পিতং শ্রুত্বা তয়োঃ ক্রুদ্ধস্তু রাক্ষসঃ ।
বিদার্য়াঽস্য়ং তদা রৌদ্রস্তৌ ভক্ষয়িতুমারভত্ ॥ 7 ॥
ততস্তৌ দেশকালজ্ঞৌ খড্গাভ্য়ামেব রাঘবৌ ।
অচ্ছিংদতাং সুসংবিগ্নৌ বাহূ তস্য়াংসদেশতঃ ॥ 8 ॥
দক্ষিণো দক্ষিণং বাহুমসক্তমসিনা ততঃ ।
চিচ্ছেদ রামো বেগেন সব্য়ং বীরস্তু লক্ষ্মণঃ ॥ 9 ॥
স পপাত মহাবাহুশ্ছিন্নবাহুর্মহাস্বনঃ ।
খং চ গাং চ দিশশ্চৈব নাদয়ংজলদো যথা ॥ 10 ॥
স নিকৃত্তৌ ভুজৌ দৃষ্ট্বা শোণিতৌঘপরিপ্লুতঃ ।
দীনঃ পপ্রচ্ছ তৌ বীরৌ কৌ যুবামিতি দানবঃ ॥ 11 ॥
ইতি তস্য় ব্রুবাণস্য় লক্ষ্মণশ্শুভলক্ষণঃ ।
শশংস রাঘবং তস্য় কবংধস্য় মহাত্মনঃ ॥ 12 ॥
অযমিক্ষ্বাকুদায়াদো রামো নাম জনৈশ্শ্রুতঃ ।
অস্য়ৈবাবরজং বিদ্দি ভ্রাতরং মাং চ লক্ষ্মণম্ ॥ 13 ॥
অস্য় দেবপ্রভাবস্য় বসতো বিজনে বনে ।
রক্ষসাঽপহৃতা পত্নী যামিচ্ছংতাবিহাগতৌ ॥ 14 ॥
ত্বং তু কো বা কিমর্থং বা কবংধসদৃশো বনে ।
আস্য়েনোরসি দীপ্তেন ভগ্নজংঘো বিচেষ্টসে ॥ 15 ॥
এবমুক্তঃ কবংধস্তু লক্ষ্মণেনোত্তরং বচঃ ।
উবাচ পরমপ্রীত স্তদিংদ্রবচনং স্মরন্ ॥ 16 ॥
স্বাগতং বাং নরব্য়াঘ্রৌ দিষ্ট্য়া পশ্য়ামি চাপ্যহম্ ।
দিষ্ট্য়া চেমৌ নিকৃত্তৌ মে যুবাভ্য়াং বাহুবংধনৌ ॥ 17 ॥
বিরূপং যচ্চ মে রূপং প্রাপ্তং হ্যবিনয়াদ্যথা ।
তন্মে শৃণু নরব্য়াঘ্র তত্ত্বতশ্শংসতস্তব ॥ 18 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে সপ্ততিতমস্সর্গঃ ॥
