ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ସପ୍ତତିତମସ୍ସର୍ଗଃ ।
ତୌ ତୁ ତତ୍ର ସ୍ଥିତୌ ଦୃଷ୍ଟ୍ଵା ଭ୍ରାତରୌ ରାମଲକ୍ଷ୍ମଣୌ ।
ବାହୁପାଶପରିକ୍ଷିପ୍ତୌ କବଂଧୋ ଵାକ୍ୟମବ୍ରଵୀତ୍ ॥ 1 ॥
ତିଷ୍ଠତଃ କିଂ ନୁ ମାଂ ଦୃଷ୍ଟ୍ଵା କ୍ଷୁଧାର୍ତଂ କ୍ଷତ୍ରିୟର୍ଷଭୌ ।
ଆହାରାର୍ଥଂ ତୁ ସଂଦିଷ୍ଟୌ ଦୈଵେନ ଗତଚେତସୌ ॥ 2 ॥
ତଚ୍ଛ୍ରୁତ୍ଵା ଲକ୍ଷ୍ମଣୋ ଵାକ୍ୟଂ ପ୍ରାପ୍ତକାଲଂ ହିତଂ ତଦା ।
ଉଵାଚାଽର୍ତିଂ ସମାପନ୍ନୋ ଵିକ୍ରମେ କୃତଲକ୍ଷଣଃ ॥ 3 ॥
ତ୍ଵାଂ ଚ ମାଂ ଚ ପୁରା ତୂର୍ଣମାଦତ୍ତେ ରାକ୍ଷସାଧମଃ ।
ତସ୍ମାଦସିଭ୍ୟାମସ୍ୟାଶୁ ବାହୂ ଛିଂଦାଵହୈ ଗୁରୂ ॥ 4 ॥
ଭୀଷଣୋଽୟଂ ମହାକାୟୋ ରାକ୍ଷସୋ ଭୁଜଵିକ୍ରମଃ ।
ଲୋକଂ ହ୍ୟତିଜିତଂ କୃତ୍ଵା ହ୍ୟାଵାଂ ହଂତୁମିହେଚ୍ଛତି ॥ 5 ॥
ନିଶ୍ଚେଷ୍ଟାନାଂ ଵଧୋ ରାଜନ୍କୁତ୍ସିତୋ ଜଗତୀପତେଃ ।
କ୍ରତୁମଧ୍ୟୋପନୀତାନାଂ ପଶୂନାମିଵ ରାଘଵ ॥ 6 ॥
ଏତତ୍ସଂଜଲ୍ପିତଂ ଶ୍ରୁତ୍ଵା ତୟୋଃ କ୍ରୁଦ୍ଧସ୍ତୁ ରାକ୍ଷସଃ ।
ଵିଦାର୍ୟାଽସ୍ୟଂ ତଦା ରୌଦ୍ରସ୍ତୌ ଭକ୍ଷୟିତୁମାରଭତ୍ ॥ 7 ॥
ତତସ୍ତୌ ଦେଶକାଲଜ୍ଞୌ ଖଡ୍ଗାଭ୍ୟାମେଵ ରାଘଵୌ ।
ଅଚ୍ଛିଂଦତାଂ ସୁସଂଵିଗ୍ନୌ ବାହୂ ତସ୍ୟାଂସଦେଶତଃ ॥ 8 ॥
ଦକ୍ଷିଣୋ ଦକ୍ଷିଣଂ ବାହୁମସକ୍ତମସିନା ତତଃ ।
ଚିଚ୍ଛେଦ ରାମୋ ଵେଗେନ ସଵ୍ୟଂ ଵୀରସ୍ତୁ ଲକ୍ଷ୍ମଣଃ ॥ 9 ॥
ସ ପପାତ ମହାବାହୁଶ୍ଛିନ୍ନବାହୁର୍ମହାସ୍ଵନଃ ।
ଖଂ ଚ ଗାଂ ଚ ଦିଶଶ୍ଚୈଵ ନାଦୟଂଜଲଦୋ ୟଥା ॥ 10 ॥
ସ ନିକୃତ୍ତୌ ଭୁଜୌ ଦୃଷ୍ଟ୍ଵା ଶୋଣିତୌଘପରିପ୍ଲୁତଃ ।
ଦୀନଃ ପପ୍ରଚ୍ଛ ତୌ ଵୀରୌ କୌ ୟୁଵାମିତି ଦାନଵଃ ॥ 11 ॥
ଇତି ତସ୍ୟ ବ୍ରୁଵାଣସ୍ୟ ଲକ୍ଷ୍ମଣଶ୍ଶୁଭଲକ୍ଷଣଃ ।
ଶଶଂସ ରାଘଵଂ ତସ୍ୟ କବଂଧସ୍ୟ ମହାତ୍ମନଃ ॥ 12 ॥
ଅୟମିକ୍ଷ୍ଵାକୁଦାୟାଦୋ ରାମୋ ନାମ ଜନୈଶ୍ଶ୍ରୁତଃ ।
ଅସ୍ୟୈଵାଵରଜଂ ଵିଦ୍ଦି ଭ୍ରାତରଂ ମାଂ ଚ ଲକ୍ଷ୍ମଣମ୍ ॥ 13 ॥
ଅସ୍ୟ ଦେଵପ୍ରଭାଵସ୍ୟ ଵସତୋ ଵିଜନେ ଵନେ ।
ରକ୍ଷସାଽପହୃତା ପତ୍ନୀ ୟାମିଚ୍ଛଂତାଵିହାଗତୌ ॥ 14 ॥
ତ୍ଵଂ ତୁ କୋ ଵା କିମର୍ଥଂ ଵା କବଂଧସଦୃଶୋ ଵନେ ।
ଆସ୍ୟେନୋରସି ଦୀପ୍ତେନ ଭଗ୍ନଜଂଘୋ ଵିଚେଷ୍ଟସେ ॥ 15 ॥
ଏଵମୁକ୍ତଃ କବଂଧସ୍ତୁ ଲକ୍ଷ୍ମଣେନୋତ୍ତରଂ ଵଚଃ ।
ଉଵାଚ ପରମପ୍ରୀତ ସ୍ତଦିଂଦ୍ରଵଚନଂ ସ୍ମରନ୍ ॥ 16 ॥
ସ୍ଵାଗତଂ ଵାଂ ନରଵ୍ୟାଘ୍ରୌ ଦିଷ୍ଟ୍ୟା ପଶ୍ୟାମି ଚାପ୍ୟହମ୍ ।
ଦିଷ୍ଟ୍ୟା ଚେମୌ ନିକୃତ୍ତୌ ମେ ୟୁଵାଭ୍ୟାଂ ବାହୁବଂଧନୌ ॥ 17 ॥
ଵିରୂପଂ ୟଚ୍ଚ ମେ ରୂପଂ ପ୍ରାପ୍ତଂ ହ୍ୟଵିନୟାଦ୍ୟଥା ।
ତନ୍ମେ ଶୃଣୁ ନରଵ୍ୟାଘ୍ର ତତ୍ତ୍ଵତଶ୍ଶଂସତସ୍ତଵ ॥ 18 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ସପ୍ତତିତମସ୍ସର୍ଗଃ ॥
