શ્રીમદ્વાલ્મીકીય રામાયણે અરણ્યકાંડમ્ ।
અથ સપ્તતિતમસ્સર્ગઃ ।
તૌ તુ તત્ર સ્થિતૌ દૃષ્ટ્વા ભ્રાતરૌ રામલક્ષ્મણૌ ।
બાહુપાશપરિક્ષિપ્તૌ કબંધો વાક્યમબ્રવીત્ ॥ 1 ॥
તિષ્ઠતઃ કિં નુ માં દૃષ્ટ્વા ક્ષુધાર્તં ક્ષત્રિયર્ષભૌ ।
આહારાર્થં તુ સંદિષ્ટૌ દૈવેન ગતચેતસૌ ॥ 2 ॥
તચ્છ્રુત્વા લક્ષ્મણો વાક્યં પ્રાપ્તકાલં હિતં તદા ।
ઉવાચાઽર્તિં સમાપન્નો વિક્રમે કૃતલક્ષણઃ ॥ 3 ॥
ત્વાં ચ માં ચ પુરા તૂર્ણમાદત્તે રાક્ષસાધમઃ ।
તસ્માદસિભ્યામસ્યાશુ બાહૂ છિંદાવહૈ ગુરૂ ॥ 4 ॥
ભીષણોઽયં મહાકાયો રાક્ષસો ભુજવિક્રમઃ ।
લોકં હ્યતિજિતં કૃત્વા હ્યાવાં હંતુમિહેચ્છતિ ॥ 5 ॥
નિશ્ચેષ્ટાનાં વધો રાજન્કુત્સિતો જગતીપતેઃ ।
ક્રતુમધ્યોપનીતાનાં પશૂનામિવ રાઘવ ॥ 6 ॥
એતત્સંજલ્પિતં શ્રુત્વા તયોઃ ક્રુદ્ધસ્તુ રાક્ષસઃ ।
વિદાર્યાઽસ્યં તદા રૌદ્રસ્તૌ ભક્ષયિતુમારભત્ ॥ 7 ॥
તતસ્તૌ દેશકાલજ્ઞૌ ખડ્ગાભ્યામેવ રાઘવૌ ।
અચ્છિંદતાં સુસંવિગ્નૌ બાહૂ તસ્યાંસદેશતઃ ॥ 8 ॥
દક્ષિણો દક્ષિણં બાહુમસક્તમસિના તતઃ ।
ચિચ્છેદ રામો વેગેન સવ્યં વીરસ્તુ લક્ષ્મણઃ ॥ 9 ॥
સ પપાત મહાબાહુશ્છિન્નબાહુર્મહાસ્વનઃ ।
ખં ચ ગાં ચ દિશશ્ચૈવ નાદયંજલદો યથા ॥ 10 ॥
સ નિકૃત્તૌ ભુજૌ દૃષ્ટ્વા શોણિતૌઘપરિપ્લુતઃ ।
દીનઃ પપ્રચ્છ તૌ વીરૌ કૌ યુવામિતિ દાનવઃ ॥ 11 ॥
ઇતિ તસ્ય બ્રુવાણસ્ય લક્ષ્મણશ્શુભલક્ષણઃ ।
શશંસ રાઘવં તસ્ય કબંધસ્ય મહાત્મનઃ ॥ 12 ॥
અયમિક્ષ્વાકુદાયાદો રામો નામ જનૈશ્શ્રુતઃ ।
અસ્યૈવાવરજં વિદ્દિ ભ્રાતરં માં ચ લક્ષ્મણમ્ ॥ 13 ॥
અસ્ય દેવપ્રભાવસ્ય વસતો વિજને વને ।
રક્ષસાઽપહૃતા પત્ની યામિચ્છંતાવિહાગતૌ ॥ 14 ॥
ત્વં તુ કો વા કિમર્થં વા કબંધસદૃશો વને ।
આસ્યેનોરસિ દીપ્તેન ભગ્નજંઘો વિચેષ્ટસે ॥ 15 ॥
એવમુક્તઃ કબંધસ્તુ લક્ષ્મણેનોત્તરં વચઃ ।
ઉવાચ પરમપ્રીત સ્તદિંદ્રવચનં સ્મરન્ ॥ 16 ॥
સ્વાગતં વાં નરવ્યાઘ્રૌ દિષ્ટ્યા પશ્યામિ ચાપ્યહમ્ ।
દિષ્ટ્યા ચેમૌ નિકૃત્તૌ મે યુવાભ્યાં બાહુબંધનૌ ॥ 17 ॥
વિરૂપં યચ્ચ મે રૂપં પ્રાપ્તં હ્યવિનયાદ્યથા ।
તન્મે શૃણુ નરવ્યાઘ્ર તત્ત્વતશ્શંસતસ્તવ ॥ 18 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે સપ્તતિતમસ્સર્ગઃ ॥
