ශ්රීමද්වාල්මීකීය රාමායණේ අරණ්යකාංඩම් ।
අථ සප්තතිතමස්සර්ගඃ ।
තෞ තු තත්ර ස්ථිතෞ දෘෂ්ට්වා භ්රාතරෞ රාමලක්ෂ්මණෞ ।
බාහුපාශපරික්ෂිප්තෞ කබංධෝ වාක්යමබ්රවීත් ॥ 1 ॥
තිෂ්ඨතඃ කිං නු මාං දෘෂ්ට්වා ක්ෂුධාර්තං ක්ෂත්රියර්ෂභෞ ।
ආහාරාර්ථං තු සංදිෂ්ටෞ දෛවේන ගතචේතසෞ ॥ 2 ॥
තච්ඡ්රුත්වා ලක්ෂ්මණෝ වාක්යං ප්රාප්තකාලං හිතං තදා ।
උවාචාऽර්තිං සමාපන්නෝ වික්රමේ කෘතලක්ෂණඃ ॥ 3 ॥
ත්වාං ච මාං ච පුරා තූර්ණමාදත්තේ රාක්ෂසාධමඃ ।
තස්මාදසිභ්යාමස්යාශු බාහූ ඡිංදාවහෛ ගුරූ ॥ 4 ॥
භීෂණෝऽයං මහාකායෝ රාක්ෂසෝ භුජවික්රමඃ ।
ලෝකං හ්යතිජිතං කෘත්වා හ්යාවාං හංතුමිහේච්ඡති ॥ 5 ॥
නිශ්චේෂ්ටානාං වධෝ රාජන්කුත්සිතෝ ජගතීපතේඃ ।
ක්රතුමධ්යෝපනීතානාං පශූනාමිව රාඝව ॥ 6 ॥
ඒතත්සංජල්පිතං ශ්රුත්වා තයෝඃ ක්රුද්ධස්තු රාක්ෂසඃ ।
විදාර්යාऽස්යං තදා රෞද්රස්තෞ භක්ෂයිතුමාරභත් ॥ 7 ॥
තතස්තෞ දේශකාලජ්ඤෞ ඛඩ්ගාභ්යාමේව රාඝවෞ ।
අච්ඡිංදතාං සුසංවිග්නෞ බාහූ තස්යාංසදේශතඃ ॥ 8 ॥
දක්ෂිණෝ දක්ෂිණං බාහුමසක්තමසිනා තතඃ ।
චිච්ඡේද රාමෝ වේගේන සව්යං වීරස්තු ලක්ෂ්මණඃ ॥ 9 ॥
ස පපාත මහාබාහුශ්ඡින්නබාහුර්මහාස්වනඃ ।
ඛං ච ගාං ච දිශශ්චෛව නාදයංජලදෝ යථා ॥ 10 ॥
ස නිකෘත්තෞ භුජෞ දෘෂ්ට්වා ශෝණිතෞඝපරිප්ලුතඃ ।
දීනඃ පප්රච්ඡ තෞ වීරෞ කෞ යුවාමිති දානවඃ ॥ 11 ॥
ඉති තස්ය බ්රුවාණස්ය ලක්ෂ්මණශ්ශුභලක්ෂණඃ ।
ශශංස රාඝවං තස්ය කබංධස්ය මහාත්මනඃ ॥ 12 ॥
අයමික්ෂ්වාකුදායාදෝ රාමෝ නාම ජනෛශ්ශ්රුතඃ ।
අස්යෛවාවරජං විද්දි භ්රාතරං මාං ච ලක්ෂ්මණම් ॥ 13 ॥
අස්ය දේවප්රභාවස්ය වසතෝ විජනේ වනේ ।
රක්ෂසාऽපහෘතා පත්නී යාමිච්ඡංතාවිහාගතෞ ॥ 14 ॥
ත්වං තු කෝ වා කිමර්ථං වා කබංධසදෘශෝ වනේ ।
ආස්යේනෝරසි දීප්තේන භග්නජංඝෝ විචේෂ්ටසේ ॥ 15 ॥
ඒවමුක්තඃ කබංධස්තු ලක්ෂ්මණේනෝත්තරං වචඃ ।
උවාච පරමප්රීත ස්තදිංද්රවචනං ස්මරන් ॥ 16 ॥
ස්වාගතං වාං නරව්යාඝ්රෞ දිෂ්ට්යා පශ්යාමි චාප්යහම් ।
දිෂ්ට්යා චේමෞ නිකෘත්තෞ මේ යුවාභ්යාං බාහුබංධනෞ ॥ 17 ॥
විරූපං යච්ච මේ රූපං ප්රාප්තං හ්යවිනයාද්යථා ।
තන්මේ ශෘණු නරව්යාඝ්ර තත්ත්වතශ්ශංසතස්තව ॥ 18 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තතිතමස්සර්ගඃ ॥
