শ্রীমদ্বাল্মীকীয় রামাযণে কিষ্কিংধাকাংডম্ ।
অথ পংচবিংশস্সর্গঃ ।
সুগ্রীবং চৈব তারাং চ সাংগদং সহলক্ষ্মণঃ ।
সমানশোকঃ কাকুত্স্থ স্সাংত্বযন্নিদমব্রবীত্ ॥ 1 ॥
ন শোকপরিতাপেন শ্রেযসা যুজ্যতে মৃতঃ ।
যদত্রানংতরং কার্য়ং তত্সমাধাতুমর্হথ ॥ 2 ॥
লোকবৃত্তমনুষ্ঠেয়ং কৃতং বো বাষ্পমোক্ষণম্ ।
ন কালাদুত্তরং কিংচিত্কর্ম শক্যমুপাসিতুম্ ॥ 3 ॥
নিযতিঃ কারণং লোকে নিযতিঃ কর্মসাধনম্ ।
নিযতিস্সর্বভূতানাং নিয়োগেষ্বিহ কারণম্ ॥ 4 ॥
ন কর্তা কস্যচিত্কশ্চিন্নিয়োগে চাপিনেশ্বরঃ ।
স্বভাবে বর্ততে লোকস্তস্য় কালঃ পরাযণম্ ॥ 5 ॥
ন কালঃ কালমত্য়েতি ন কালঃ পরিহীযতে ।
স্বভাবং চ সমাসাদ্য় ন কশ্চিদতিবর্ততে ॥ 6 ॥
ন কালস্য়াস্তি বংধুত্বং ন হেতুর্ন পরাক্রমঃ ।
ন মিত্রজ্ঞাতিসংবংধঃ কারণং নাত্মনো বশঃ ॥ 7 ॥
কিং তু কালপরীণামো দ্রষ্টব্যস্সাধু পশ্যতা ।
ধর্মশ্চার্থশ্চ কামশ্চ কালক্রমসমাহিতাঃ ॥ 8 ॥
ইতস্স্বাং প্রকৃতিং বালী গতঃপ্রাপ্তঃ ক্রিয়াফলম্ ।
ধর্মার্থকাম সংয়োগৈঃ পবিত্রং প্লবগেশ্বরঃ ॥ 9 ॥
স্বধর্মস্য় চ সংয়োগাজ্জিতস্তেন মহাত্মনা ।
স্বর্গঃ পরিগৃহীতশ্চ প্রাণানপরিরক্ষতা ॥ 10 ॥
এষা বৈ নিযতিশ্শেষ্ঠা যাং গতো হরিয়ূথপঃ ।
তদলং পরিতাপেন প্রাপ্তকালমুপাস্যতাম্ ॥ 11 ॥
বচনাংতে তু রামস্য় লক্ষ্মণঃ পরবীরহা ।
অবদত্প্রশ্রিতং বাক্য়ং সুগ্রীবং গতচেতসম্ ॥ 12 ॥
কুরু ত্বমস্য় সুগ্রীব প্রেতকার্যমনংতরম্ ।
তারাংগদাভ্য়াং সহিতো বালিনো দহনং প্রতি ॥ 13 ॥
সমাজ্ঞাপয় কাষ্ঠানি শুষ্কানি চ বহূনি চ ।
চংদনাদীনি দিব্য়ানি বালিসংস্কারকারণাত্ ॥ 14 ॥
সমাশ্বাসয় চৈনং ত্বমংগদং দীনচেতসম্ ।
মা ভূর্বালিশবুদ্ধিস্ত্বং ত্বদধীনমিদং পুরম্ ॥ 15 ॥
অংগদস্ত্বানয়েন্মাল্য়ং বস্ত্রাণি বিবিধানি চ ।
ঘৃতং তৈলমথো গংধান্যচ্চাত্র সমনংতরম্ ॥ 16 ॥
ত্বং তার শিবিকাং শীঘ্রমাদায়াগচ্ছ সংভ্রমাত্ ।
ত্বরা গুণবতী যুক্তা হ্যস্মিন্কালে বিশেষতঃ ॥ 17 ॥
সজ্জীভবংতু প্লবগাশ্শিবিকাবাহনোচিতাঃ ।
সমর্থা বলিনশ্চৈব নির্হরিষ্য়ংতি বালিনম্ ॥ 18 ॥
এবমুক্ত্বা তু সুগ্রীবং সুমিত্রানংদবর্ধনঃ ।
তসৌ ভ্রাতৃসমীপস্থো লক্ষ্মণঃ পরবীরহা ॥ 19 ॥
লক্ষ্মণস্য় বচশ্শ্রুত্বা তারস্সংভ্রাংতমানসঃ ।
প্রবিবেশ গুহাং শীঘ্রং শিবিকাসক্তমানসঃ ॥ 20 ॥
আদায় শিবিকাং তারস্স তু পর্য়াপতত্পুনঃ ।
বানরৈরুহ্যমানাং তাং শূরৈরুদ্বহনোচিতৈঃ ॥ 21 ॥
দিব্য়াং ভদ্রাসনয়ুতাং শিবিকাং স্য়ংদনোপমাম্ ।
পক্ষিকর্মভিরাচিত্রাং দ্রুমকর্মবিভূষিতাম্ ॥ 22 ॥
আচিতাং চিত্রপত্তীভি স্সুনিবিষ্টাং সমংততঃ ।
বিমানমিব সিদ্ধানাং জালবাতাযনান্বিতাম্ ॥ 23 ॥
সুনিয়ুক্তাং বিশালাং চ সুকৃতাং বিশ্বকর্মণা ।
দারুপর্বতকোপেতাং চারুকর্মপরিষ্কৃতাম্ ॥ 24 ॥
বরাভরণহারৈশ্চ চিত্রমাল্য়োপশোভিতাম্ ।
গুহাগহনসংছন্নাং রক্তচংদনভূষিতাম্ ॥ 25 ॥
পুষ্পৌঘৈস্সমভিচ্ছন্নাং পদ্মমালাভিরেব চ ।
তরুণাদিত্যবর্ণাভির্ভ্রাজমানাভিরাবৃতাম্ ॥ 26 ॥
ঈদৃশীং শিবিকাং দৃষ্ট্বা রামো লক্ষ্মণমব্রবীত্ ।
ক্ষিপ্রং বিনীযতাং বালী প্রেতকার্য়ং বিধীযতাম্ ॥ 27 ॥
ততো বালিনমুদ্যম্য় সুগ্রীবশ্শিবিকাং তদা ।
আরোপযত বিক্রোশন্নংগদেন সহৈব তু ॥ 28 ॥
আরোপ্য় শিবিকাং চৈব বালিনং গতজীবিতম্ ।
অলংকারৈশ্চ বিবিধৈর্মাল্য়ৈর্বস্ত্রৈশ্চ ভূষিতম্ ॥ 29 ॥
আজ্ঞাপযত্তদা রাজা সুগ্রীব প্লবগেশ্বরঃ ।
ঔর্ধ্বদৈহিকমার্যস্য় ক্রিযতামনুরূপতঃ ॥ 30 ॥
বিশ্রাণয়ংতো রত্নানি বিবিধানি বহূন্যপি ।
অগ্রতঃ প্লবগা যাংতু শিবিকা সমনংতরম্ ॥ 31 ॥
রাজ্ঞামৃদ্দিবিশেষা হি দৃশ্য়ংতে ভুবি যাদৃশাঃ ।
তাদৃশৈরিহ কুর্বংতু বানরা ভর্তৃসত্ক্রিয়াম্ ॥ 32 ॥
তাদৃশং বালিনঃ ক্ষিপ্রং প্রাকুর্বন্নৌর্ধ্বদৈহিকম্ ।
অংগদং পরিগৃহ্য়াঽশু তারপ্রভৃতযস্তদা ॥ 33 ॥
ক্রোশংতঃ প্রযয়ুস্সর্বে বানরা হতবাংধবাঃ ।
ততঃ প্রণিহিতাঃ সর্বা বানর্য়োস্য় বশানুগাঃ ॥ 34 ॥
চুক্রুশু র্বীর বীরেতি ভূয়ঃ ক্রোশংতি তাঃ স্ত্রীয়ঃ ।
তারাপ্রভৃতযস্সর্বা বানর্য়ো হরিয়ূথপাঃ ।
অনুজগ্মুর্হি ভর্তারং ক্রোশংত্য়ঃ করুণস্বনাঃ ॥ 35 ॥
তাসাং রুদিতশব্দেন বানরীণাং বনাংতরে ।
বনানি গিরযশ্চৈব বিক্রোশংতীব সর্বতঃ ॥ 36 ॥
পুলিনে গিরিনদ্য়াস্তু বিবিক্তে জলসংবৃতে ॥ 37 ॥
চিতাং চক্রুস্সুবহবো বানরাশ্শোককর্শিতাঃ ।
অবরোপ্য় ততস্স্কংধাচ্ছিবিকাং বাহনোচিতাঃ ।
তস্থুরেকাংতমাশ্রিত্য় সর্বে শোকসমন্বিতাঃ ॥ 38 ॥
ততস্তারা পতিং দৃষ্ট্বা শিবিকাতলশায়িনম্ ॥ 39 ॥
আরোপ্য়াংকে শিরস্তস্য় বিললাপ সুদুঃখিতা ।
হা বানর মহারাজ হা নাথ মম বত্সল ॥ 40 ॥
হা মহার্হ মহাবাহো হা মম প্রিয় পশ্য় মাম্ ।
জনং ন পশ্যসীমং ত্বং কস্মাচ্ছোকাভিপীডিতম্ ॥ 41 ॥
প্রহৃষ্টমিব তে বক্ত্রং গতাসোরপি মানদ আস্তার্কসমবর্ণং চ লক্ষ্যতে জীবতো যথা ॥ 42 ॥
এষ ত্বাং রামরূপেণ কালঃ কর্ষতি বানর ।
যেন স্ম বিধবাস্সর্বাঃ কৃতা একেষুণা বনে ॥ 43 ॥
ইমাস্তাস্তব রাজেংদ্র বানর্য়োবল্লভাস্সদা ।
পাদৈর্বিকৃষ্ট মধ্বানমাগতাঃ কিং ন বুধ্যসে ॥ 44 ॥
তবেষ্টা ননু নামৈতা ভার্য়াশ্চংদ্রনিভাননাঃ ।
ইদানীং নেক্ষসে কস্তাত্সুগ্রীবং প্লবগেশ্বরম্ ॥ 45 ॥
এতে হি সচিবা রাজং স্তারপ্রভৃতযস্তব ।
পুরবাসী জনশ্চায়ং পরিবার্য়াসতেঽনঘ ॥ 46 ॥
বিসর্জয়ৈতান্ প্লবগান্যথোচিতমরিংদম ।
ততঃ ক্রীডামহে সর্বা বনেষু মদনোত্কটাঃ ॥ 47 ॥
এবং বিলপতীং তারাং পতিশোকপরিপ্লুতাম্ ।
উত্থাপয়ংতি স্ম তদা বানর্যশ্শোককর্শিতাঃ ॥ 48 ॥
সুগ্রীবেণ ততস্সার্ধংমংগদঃ পিতরং রুদন্ ।
চিতামারোপয়ামাস শোকেনাভিহতেংদ্রিয়ঃ ॥ 49 ॥
ততোঽগ্নিং বিধিবদ্দত্ত্বা সোঽপসব্য়ং চকার হ ।
পিতরং দীর্ঘমধ্বানং প্রস্থিতং ব্য়াকুলেংদ্রিয়ঃ ॥ 50 ॥
সংস্কৃত্য় বালিনং তে তু বিধিপূর্বং প্লবংগমাঃ ।
আজগ্মুরুদকং কর্তুং নদীং শুভজলাং শিবাম্ ॥ 51 ॥
ততস্তে সহিতাস্তত্র হ্য়ংগদং স্থাপ্য় চাগ্রতঃ ।
সুগ্রীবতারাসহিতাস্সিষিচুর্বালিনে জলম্ ॥ 52 ॥
সুগ্রীবেণেব দীনেন দীনো ভূত্বা মহাবলঃ ।
সমানশোকঃ কাকুত্স্থঃ প্রেতকার্য়াণ্যকারযত্ ॥ 53 ॥
ততস্তু তং বালিনমগ্র্যপৌরুষং প্রকাশমিক্ষ্বাকুবরেষুণা হতম্ ।
প্রদীপ্য় দীপ্তাগ্নিসমৌজসং তদা সলক্ষ্মণং রামমুপেয়িবান্হরিঃ ॥ 54 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে পংচবিংশস্সর্গঃ ॥
