ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ପ୍ରଥମସ୍ସର୍ଗଃ ।

ତତୋ ରାଵଣନୀତାୟାଃ ସୀତାୟାଃ ଶତ୍ରୁକର୍ଶନଃ ।
ଇୟେଷ ପଦମନ୍ଵେଷ୍ଟୁଂ ଚାରଣାଚରିତେ ପଥି ॥ 1 ॥

ଦୁଷ୍କରଂ ନିଷ୍ପ୍ରତିଦ୍ଵଂଦ୍ଵଂ ଚିକୀର୍ଷନ୍ କର୍ମ ଵାନରଃ ।
ସମୁଦଗ୍ରଶିରୋଗ୍ରୀଵୋ ଗଵାଂପତିରିଵାବଭୌ ॥ 2 ॥

ଅଥ ଵୈଡୂର୍ୟଵର୍ଣେଷୁ ଶାଦ୍ଵଲେଷୁ ମହାବଲଃ ।
ଧୀରଃ ସଲିଲକଲ୍ପେଷୁ ଵିଚଚାର ୟଥାସୁଖମ୍ ॥ 3 ॥

ଦ୍ଵିଜାନ୍ ଵିତ୍ରାସୟନ୍ ଧୀମାନୁରସା ପାଦପାନ୍ ହରନ୍ ।
ମୃଗାଂଶ୍ଚ ସୁବହୂନ୍ନିଘ୍ନନ୍ ପ୍ରଵୃଦ୍ଧ ଇଵ କେସରୀ ॥ 4 ॥

ନୀଲଲୋହିତମାଂଜିଷ୍ଠପତ୍ରଵର୍ଣୈଃ ସିତାସିତୈଃ ।
ସ୍ଵଭାଵଵିହିତୈଶ୍ଚିତ୍ରୈର୍ଧାତୁଭିଃ ସମଲଂକୃତମ୍ ॥ 5 ॥

କାମରୂପିଭିରାଵିଷ୍ଟମଭୀକ୍ଷ୍ଣଂ ସପରିଚ୍ଛଦୈଃ ।
ୟକ୍ଷକିନ୍ନରଗଂଧର୍ଵୈର୍ଦେଵକଲ୍ପୈଶ୍ଚ ପନ୍ନଗୈଃ ॥ 6 ॥

ସ ତସ୍ୟ ଗିରିଵର୍ୟସ୍ୟ ତଲେ ନାଗଵରାୟୁତେ ।
ତିଷ୍ଠନ୍ କପିଵରସ୍ତତ୍ର ହ୍ରଦେ ନାଗ ଇଵାବଭୌ ॥ 7 ॥

ସ ସୂର୍ୟାୟ ମହେଂଦ୍ରାୟ ପଵନାୟ ସ୍ଵୟଂଭୁଵେ ।
ଭୂତେଭ୍ୟଶ୍ଚାଂଜଲିଂ କୃତ୍ଵା ଚକାର ଗମନେ ମତିମ୍ ॥ 8 ॥

ଅଂଜଲିଂ ପ୍ରାଙ୍ମୁଖଃ କୁର୍ଵନ୍ ପଵନାୟାତ୍ମୟୋନୟେ ।
ତତୋ ହି ଵଵୃଧେ ଗଂତୁଂ ଦକ୍ଷିଣୋ ଦକ୍ଷିଣାଂ ଦିଶମ୍ ॥ 9 ॥

ପ୍ଲଵଂଗପ୍ରଵରୈର୍ଦୃଷ୍ଟଃ ପ୍ଲଵନେ କୃତନିଶ୍ଚୟଃ ।
ଵଵୃଧେ ରାମଵୃଦ୍ଧ୍ୟର୍ଥଂ ସମୁଦ୍ର ଇଵ ପର୍ଵସୁ ॥ 10 ॥

ନିଷ୍ପ୍ରମାଣଶରୀରଃ ସନ୍ ଲିଲଂଘୟିଷୁରର୍ଣଵମ୍ ।
ବାହୁଭ୍ୟାଂ ପୀଡୟାମାସ ଚରଣାଭ୍ୟାଂ ଚ ପର୍ଵତମ୍ ॥ 11 ॥

ସ ଚଚାଲାଚଲଶ୍ଚାପି ମୁହୂର୍ତଂ କପିପୀଡିତଃ ।
ତରୂଣାଂ ପୁଷ୍ପିତାଗ୍ରାଣାଂ ସର୍ଵଂ ପୁଷ୍ପମଶାତୟତ୍ ॥ 12 ॥

ତେନ ପାଦପମୁକ୍ତେନ ପୁଷ୍ପୌଘେଣ ସୁଗଂଧିନା ।
ସର୍ଵତଃ ସଂଵୃତଃ ଶୈଲୋ ବଭୌ ପୁଷ୍ପମୟୋ ୟଥା ॥ 13 ॥

ତେନ ଚୋତ୍ତମଵୀର୍ୟେଣ ପୀଡ୍ୟମାନଃ ସ ପର୍ଵତଃ ।
ସଲିଲଂ ସଂପ୍ରସୁସ୍ରାଵ ମଦଂ ମତ୍ତ ଇଵ ଦ୍ଵିପଃ ॥ 14 ॥

ପୀଡ୍ୟମାନସ୍ତୁ ବଲିନା ମହେଂଦ୍ରସ୍ତେନ ପର୍ଵତଃ ।
ରୀତୀର୍ନିର୍ଵର୍ତୟାମାସ କାଂଚନାଂଜନରାଜତୀଃ ॥ 15 ॥

ମୁମୋଚ ଚ ଶିଲାଃ ଶୈଲୋ ଵିଶାଲାଃ ସମନଃଶିଲାଃ ।
ମଧ୍ୟମେନାର୍ଚିଷା ଜୁଷ୍ଟା ଧୂମରାଜୀରିଵାନଲଃ ॥ 16 ॥

ଗିରିଣା ପୀଡ୍ୟମାନେନ ପୀଡ୍ୟମାନାନି ସର୍ଵତଃ ।
ଗୁହାଵିଷ୍ଟାନି ଭୂତାନି ଵିନେଦୁର୍ଵିକୃତୈଃ ସ୍ଵରୈଃ ॥ 17 ॥

ସ ମହାସତ୍ତ୍ଵସନ୍ନାଦଃ ଶୈଲପୀଡାନିମିତ୍ତଜଃ ।
ପୃଥିଵୀଂ ପୂରୟାମାସ ଦିଶଶ୍ଚୋପଵନାନି ଚ ॥ 18 ॥

ଶିରୋଭିଃ ପୃଥୁଭିଃ ସର୍ପା ଵ୍ୟକ୍ତସ୍ଵସ୍ତିକଲକ୍ଷଣୈଃ ।
ଵମଂତଃ ପାଵକଂ ଘୋରଂ ଦଦଂଶୁର୍ଦଶନୈଃ ଶିଲାଃ ॥ 19 ॥

ତାସ୍ତଦା ସଵିଷୈର୍ଦଷ୍ଟାଃ କୁପିତୈସ୍ତୈର୍ମହାଶିଲାଃ ।
ଜଜ୍ଜ୍ଵଲୁଃ ପାଵକୋଦ୍ଦୀପ୍ତା ବିଭିଦୁଶ୍ଚ ସହସ୍ରଧା ॥ 20 ॥

ୟାନି ଚୌଷଧଜାଲାନି ତସ୍ମିନ୍ ଜାତାନି ପର୍ଵତେ ।
ଵିଷଘ୍ନାନ୍ୟପି ନାଗାନାଂ ନ ଶେକୁଃ ଶମିତୁଂ ଵିଷମ୍ ॥ 21 ॥

ଭିଦ୍ୟତେଽୟଂ ଗିରିର୍ଭୂତୈରିତି ମତ୍ତ୍ଵା ତପସ୍ଵିନଃ ।
ତ୍ରସ୍ତା ଵିଦ୍ୟାଧରାସ୍ତସ୍ମାଦୁତ୍ପେତୁଃ ସ୍ତ୍ରୀ ଗଣୈଃ ସହ ॥ 22 ॥

ପାନଭୂମିଗତଂ ହିତ୍ଵା ହୈମମାସଵଭାଜନମ୍ ।
ପାତ୍ରାଣି ଚ ମହାର୍ହାଣି କରକାଂଶ୍ଚ ହିରଣ୍ମୟାନ୍ ॥ 23 ॥

ଲେହ୍ୟାନୁଚ୍ଚାଵଚାନ୍ ଭକ୍ଷ୍ୟାନ୍ ମାଂସାନି ଵିଵିଧାନି ଚ ।
ଆର୍ଷଭାଣି ଚ ଚର୍ମାଣି ଖଡଗାଂଶ୍ଚ କନକତ୍ସରୂନ୍ ॥ 24 ॥

କୃତକଂଠଗୁଣାଃ କ୍ଷୀବା ରକ୍ତମାଲ୍ୟାନୁଲେପନାଃ ।
ରକ୍ତାକ୍ଷାଃ ପୁଷ୍କରାକ୍ଷାଶ୍ଚ ଗଗନଂ ପ୍ରତିପେଦିରେ ॥ 25 ॥

ହାରନୂପୁରକେୟୂରପାରିହାର୍ୟଧରାଃ ସ୍ତ୍ରିୟଃ ।
ଵିସ୍ମିତାଃ ସସ୍ମିତାସ୍ତସ୍ଥୁରାକାଶେ ରମଣୈଃ ସହ ॥ 26 ॥

ଦର୍ଶୟଂତୋ ମହାଵିଦ୍ୟାଂ ଵିଦ୍ୟାଧରମହର୍ଷୟଃ ।
ସହିତାସ୍ତସ୍ଥୁରାକାଶେ ଵୀକ୍ଷାଂଚକ୍ରୁଶ୍ଚ ପର୍ଵତମ୍ ॥ 27 ॥

ଶୁଶ୍ରୁଵୁଶ୍ଚ ତଦା ଶବ୍ଦମୃଷୀଣାଂ ଭାଵିତାତ୍ମନାମ୍ ।
ଚାରଣାନାଂ ଚ ସିଦ୍ଧାନାଂ ସ୍ଥିତାନାଂ ଵିମଲେଽଂବରେ ॥ 28 ॥

ଏଷ ପର୍ଵତସଂକାଶୋ ହନୁମାନ୍ ମାରୁତାତ୍ମଜଃ ।
ତିତୀର୍ଷତି ମହାଵେଗସ୍ସମୁଦ୍ରଂ ମକରାଲୟମ୍ ॥ 29 ॥

ରାମାର୍ଥଂ ଵାନରାର୍ଥଂ ଚ ଚିକୀର୍ଷନ୍ କର୍ମ ଦୁଷ୍କରମ୍ ।
ସମୁଦ୍ରସ୍ୟ ପରଂ ପାରଂ ଦୁଷ୍ପ୍ରାପଂ ପ୍ରାପ୍ତୁମିଚ୍ଛତି ॥ 30 ॥

ଇତି ଵିଦ୍ୟାଧରାଃ ଶ୍ରୁତ୍ଵା ଵଚସ୍ତେଷାଂ ମହାତ୍ମନାମ୍ ।
ତମପ୍ରମେୟଂ ଦଦୃଶୁଃ ପର୍ଵତେ ଵାନରର୍ଷଭମ୍ ॥ 31 ॥

ଦୁଧୁଵେ ଚ ସ ରୋମାଣି ଚକଂପେ ଚାଚଲୋପମଃ ।
ନନାଦ ସୁମହାନାଦଂ ସୁମହାନିଵ ତୋୟଦଃ ॥ 32 ॥

ଆନୁପୂର୍ଵ୍ୟେଣ ଵୃତ୍ତଂ ଚ ଲାଂଗୂଲଂ ଲୋମଭିଶ୍ଚିତମ୍ ।
ଉତ୍ପତିଷ୍ୟନ୍ ଵିଚିକ୍ଷେପ ପକ୍ଷିରାଜ ଇଵୋରଗମ୍ ॥ 33 ॥

ତସ୍ୟ ଲାଂଗୂଲମାଵିଦ୍ଧମାତ୍ତଵେଗସ୍ୟ ପୃଷ୍ଠତଃ ।
ଦଦୃଶେ ଗରୁଡେନେଵ ହ୍ରିୟମାଣୋ ମହୋରଗଃ ॥ 34 ॥

ବାହୂ ସଂସ୍ତଂଭୟାମାସ ମହାପରିଘସନ୍ନିଭୌ ।
ସସାଦ ଚ କପିଃ କଟ୍ୟାଂ ଚରଣୌ ସଂଚୁକୋଚ ଚ ॥ 35 ॥

ସଂହୃତ୍ୟ ଚ ଭୁଜୌ ଶ୍ରୀମାଂସ୍ତଥୈଵ ଚ ଶିରୋଧରାମ୍ ।
ତେଜଃ ସତ୍ତ୍ଵଂ ତଥା ଵୀର୍ୟମାଵିଵେଶ ସ ଵୀର୍ୟଵାନ୍ ॥ 36 ॥

ମାର୍ଗମାଲୋକୟଂଦୂରାଦୂର୍ଧ୍ଵଂ ପ୍ରଣିହିତେକ୍ଷଣଃ ।
ରୁରୋଧ ହୃଦୟେ ପ୍ରାଣାନାକାଶମଵଲୋକୟନ୍ ॥ 37 ॥

ପଦ୍ଭ୍ୟାଂ ଦୃଢମଵସ୍ଥାନଂ କୃତ୍ଵା ସ କପିକୁଂଜରଃ ।
ନିକୁଂଚ୍ୟ କର୍ଣୌ ହନୁମାନୁତ୍ପତିଷ୍ୟନ୍ ମହାବଲଃ ।
ଵାନରାନ୍ ଵାନରଶ୍ରେଷ୍ଠ ଇଦଂ ଵଚନମବ୍ରଵୀତ୍ ॥ 38 ॥

ୟଥା ରାଘଵନିର୍ମୁକ୍ତଃ ଶରଃ ଶ୍ଵସନଵିକ୍ରମଃ ।
ଗଚ୍ଛେତ୍ତଦ୍ଵଦ୍ଗମିଷ୍ୟାମି ଲଂକାଂ ରାଵଣପାଲିତାମ୍ ॥ 39 ॥

ନ ହି ଦ୍ରକ୍ଷ୍ୟାମି ୟଦି ତାଂ ଲଂକାୟାଂ ଜନକାତ୍ମଜାମ୍ ।
ଅନେନୈଵ ହି ଵେଗେନ ଗମିଷ୍ୟାମି ସୁରାଲୟମ୍ ॥ 40 ॥

ୟଦି ଵା ତ୍ରିଦିଵେ ସୀତାଂ ନ ଦ୍ରକ୍ଷ୍ୟାମ୍ୟକୃତଶ୍ରମଃ ।
ବଦ୍ଧ୍ଵା ରାକ୍ଷସରାଜାନମାନୟିଷ୍ୟାମି ରାଵଣମ୍ ॥ 41 ॥

ସର୍ଵଥା କୃତକାର୍ୟୋଽହମେଷ୍ୟାମି ସହ ସୀତୟା ।
ଆନୟିଷ୍ୟାମି ଵା ଲଂକାଂ ସମୁତ୍ପାଟ୍ୟ ସରାଵଣାମ୍ ॥ 42 ॥

ଏଵମୁକ୍ତ୍ଵା ତୁ ହନୁମାନ୍ଵାନରାନ୍ଵାନରୋତ୍ତମଃ ॥ 43 ॥

ଉତ୍ପପାତାଥ ଵେଗେନ ଵେଗଵାନଵିଚାରୟନ୍ ।
ସୁପର୍ଣମିଵ ଚାତ୍ମାନଂ ମେନେ ସ କପିକୁଂଜରଃ ॥ 44 ॥

ସମୁତ୍ପତତି ତସ୍ମିଂସ୍ତୁ ଵେଗାତ୍ତେ ନଗରୋହିଣଃ ।
ସଂହୃତ୍ୟ ଵିଟପାନ୍ ସର୍ଵାନ୍ ସମୁତ୍ପେତୁଃ ସମଂତତଃ ॥ 45 ॥

ସ ମତ୍ତକୋୟଷ୍ଟିମକାନ୍ ପାଦପାନ୍ ପୁଷ୍ପଶାଲିନଃ ।
ଉଦ୍ଵହନ୍ନୂରୁଵେଗେନ ଜଗାମ ଵିମଲେଽଂବରେ ॥ 46 ॥

ଊରୁଵେଗୋଦ୍ଧତା ଵୃକ୍ଷା ମୁହୂର୍ତଂ କପିମନ୍ଵୟୁଃ ।
ପ୍ରସ୍ଥିତଂ ଦୀର୍ଘମଧ୍ଵାନଂ ସ୍ଵବଂଧୁମିଵ ବାଂଧଵାଃ ॥ 47 ॥

ତମୂରୁଵେଗୋନ୍ମଥିତାଃ ସାଲାଶ୍ଚାନ୍ୟେ ନଗୋତ୍ତମାଃ ।
ଅନୁଜଗ୍ମୁର୍ହନୂମଂତଂ ସୈନ୍ୟା ଇଵ ମହୀପତିମ୍ ॥ 48 ॥

ସୁପୁଷ୍ପିତାଗ୍ରୈର୍ବହୁଭିଃ ପାଦପୈରନ୍ଵିତଃ କପିଃ ।
ହନୁମାନ୍ ପର୍ଵତାକାରୋ ବଭୂଵାଦ୍ଭୁତଦର୍ଶନଃ ॥ 49 ॥

ସାରଵଂତୋଽଥ ୟେ ଵୃକ୍ଷା ନ୍ୟମଜ୍ଜନ୍ ଲଵଣାଂଭସି ।
ଭୟାଦିଵ ମହେଂଦ୍ରସ୍ୟ ପର୍ଵତା ଵରୁଣାଲୟେ ॥ 50 ॥

ସ ନାନାକୁସୁମୈଃ କୀର୍ଣଃ କପିଃ ସାଂକୁରକୋରକୈଃ ।
ଶୁଶୁଭେ ମେଘସଂକାଶଃ ଖଦ୍ୟୋତୈରିଵ ପର୍ଵତଃ ॥ 51 ॥

ଵିମୁକ୍ତାସ୍ତସ୍ୟ ଵେଗେନ ମୁକ୍ତ୍ଵା ପୁଷ୍ପାଣି ତେ ଦ୍ରୁମାଃ ।
ଅଵଶୀର୍ୟଂତ ସଲିଲେ ନିଵୃତ୍ତାଃ ସୁହୃଦୋ ୟଥା ॥ 52 ॥

ଲଘୁତ୍ଵେନୋପପନ୍ନଂ ତଦ୍ଵିଚିତ୍ରଂ ସାଗରେଽପତତ୍ ।
ଦ୍ରୁମାଣାଂ ଵିଵିଧଂ ପୁଷ୍ପଂ କପିଵାୟୁସମୀରିତମ୍ ॥ 53 ॥

ତାରାଚିତମିଵାକାଶଂ ପ୍ରବଭୌ ସ ମହାର୍ଣଵଃ ।
ପୁଷ୍ପୌଘେଣାନୁବଦ୍ଧେନ ନାନାଵର୍ଣେନ ଵାନରଃ ।
ବଭୌ ମେଘ ଇଵାକାଶେ ଵିଦ୍ୟୁଦ୍ଗଣ ଵିଭୂଷିତଃ ॥ 54 ॥

ତସ୍ୟ ଵେଗସମାଧୂତୈଃ ପୁଷ୍ପୈସ୍ତୋୟମଦୃଶ୍ୟତ ॥ 55 ॥

ତାରାଭିରଭିରାମାଭିରୁଦିତାଭିରିଵାଂବରମ୍ ।
ତସ୍ୟାଂବରଗତୌ ବାହୂ ଦଦୃଶାତେ ପ୍ରସାରିତୌ ॥ 56 ॥

ପର୍ଵତାଗ୍ରାଦ୍ଵିନିଷ୍କ୍ରାଂତୌ ପଂଚାସ୍ୟାଵିଵ ପନ୍ନଗୌ ।
ପିବନ୍ନିଵ ବଭୌ ଚାପି ସୋର୍ମିମାଲଂ ମହାର୍ଣଵମ୍ ॥ 57 ॥

ପିପାସୁରିଵ ଚାକାଶଂ ଦଦୃଶେ ସ ମହାକପିଃ ।
ତସ୍ୟ ଵିଦ୍ୟୁତ୍ପ୍ରଭାକାରେ ଵାୟୁମାର୍ଗାନୁସାରିଣଃ ॥ 58 ॥

ନୟନେ ଵିପ୍ରକାଶେତେ ପର୍ଵତସ୍ଥାଵିଵାନଲୌ ।
ପିଂଗେ ପିଂଗାକ୍ଷମୁଖ୍ୟସ୍ୟ ବୃହତୀ ପରିମଂଡଲେ ॥ 59 ॥

ଚକ୍ଷୁଷୀ ସଂପ୍ରାକାଶେତେ ଚଂଦ୍ରସୂର୍ୟାଵିଵୋଦିତୌ ।
ମୁଖଂ ନାସିକୟା ତସ୍ୟ ତାମ୍ରୟା ତାମ୍ରମାବଭୌ ॥ 60 ॥

ସଂଧ୍ୟୟା ସମଭିସ୍ପୃଷ୍ଟଂ ୟଥା ତତ୍ସୂର୍ୟମଂଡଲମ୍ ।
ଲାଂଗୂଲଂ ଚ ସମାଵିଦ୍ଧଂ ପ୍ଲଵମାନସ୍ୟ ଶୋଭତେ ॥ 61 ॥

ଅଂବରେ ଵାୟୁପୁତ୍ରସ୍ୟ ଶକ୍ରଧ୍ଵଜ ଇଵୋଚ୍ଛ୍ରିତମ୍ ।
ଲାଂଗୂଲଚକ୍ରେଣ ମହାନ୍ ଶୁକ୍ଲଦଂଷ୍ଟ୍ରୋଽନିଲାତ୍ମଜଃ ॥ 62 ॥

ଵ୍ୟରୋଚତ ମହାପ୍ରାଜ୍ଞଃ ପରିଵେଷୀଵ ଭାସ୍କରଃ ।
ସ୍ଫିଗ୍ଦେଶେନାଭିତାମ୍ରେଣ ରରାଜ ସ ମହାକପିଃ ॥ 63 ॥

ମହତା ଦାରିତେନେଵ ଗିରିର୍ଗୈରିକଧାତୁନା ।
ତସ୍ୟ ଵାନରସିଂହସ୍ୟ ପ୍ଲଵମାନସ୍ୟ ସାଗରମ୍ ॥ 64 ॥

କକ୍ଷାଂତରଗତୋ ଵାୟୁର୍ଜୀମୂତ ଇଵ ଗର୍ଜତି ।
ଖେ ୟଥା ନିପତତ୍ୟୁଲ୍କା ହ୍ୟୁତ୍ତରାଂତାଦ୍ଵିନିଃସୃତା ॥ 65 ॥

ଦୃଶ୍ୟତେ ସାନୁବଂଧା ଚ ତଥା ସ କପିକୁଂଜରଃ ।
ପତତ୍ପତଂଗସଂକାଶୋ ଵ୍ୟାୟତଃ ଶୁଶୁଭେ କପିଃ ॥ 66 ॥

ପ୍ରଵୃଦ୍ଧ ଇଵ ମାତଂଗଃ କକ୍ଷ୍ୟୟା ବଧ୍ୟମାନୟା ।
ଉପରିଷ୍ଟାଚ୍ଛରୀରେଣ ଛାୟୟା ଚାଵଗାଢୟା ॥ 67 ॥

ସାଗରେ ମାରୁତାଵିଷ୍ଟା ନୌରିଵାସୀତ୍ତଦା କପିଃ ।
ୟଂ ୟଂ ଦେଶଂ ସମୁଦ୍ରସ୍ୟ ଜଗାମ ସ ମହାକପିଃ ।
ସ ସ ତସ୍ୟୋରୁଵେଗେନ ସୋନ୍ମାଦ ଇଵ ଲକ୍ଷ୍ୟତେ ॥ 68 ॥

ସାଗରସ୍ୟୋର୍ମିଜାଲାନାମୁରସା ଶୈଲଵର୍ଷ୍ମଣାମ୍ ।
ଅଭିଘ୍ନଂସ୍ତୁ ମହାଵେଗଃ ପୁପ୍ଲୁଵେ ସ ମହାକପିଃ ॥ 69 ॥

କପିଵାତଶ୍ଚ ବଲଵାନ୍ ମେଘଵାତଶ୍ଚ ନିଃସୃତଃ ।
ସାଗରଂ ଭୀମନିର୍ଘୋଷଂ କଂପୟାମାସତୁର୍ଭୃଶମ୍ ॥ 70 ॥

ଵିକର୍ଷନ୍ନୂର୍ମିଜାଲାନି ବୃହଂତି ଲଵଣାଂଭସି ।
ପୁପ୍ଲୁଵେ କପିଶାର୍ଦୂଲୋ ଵିକିରନ୍ନିଵ ରୋଦସୀ ॥ 71 ॥

ମେରୁମଂଦରସଂକାଶାନୁଦ୍ଧତାନ୍ ସ ମହାର୍ଣଵେ ।
ଅତ୍ୟକ୍ରାମନ୍ମହାଵେଗସ୍ତରଂଗାନ୍ ଗଣୟନ୍ନିଵ ॥ 72 ॥

ତସ୍ୟ ଵେଗସମୁଦ୍ଧୂତଂ ଜଲଂ ସଜଲଦଂ ତଦା ।
ଅଂବରସ୍ଥଂ ଵିବଭ୍ରାଜ ଶାରଦାଭ୍ରମିଵାତତମ୍ ॥ 73 ॥

ତିମିନକ୍ରଝଷାଃ କୂର୍ମା ଦୃଶ୍ୟଂତେ ଵିଵୃତାସ୍ତଦା ।
ଵସ୍ତ୍ରାପକର୍ଷଣେନେଵ ଶରୀରାଣି ଶରୀରିଣାମ୍ ॥ 74 ॥

ପ୍ଲଵମାନଂ ସମୀକ୍ଷ୍ୟାଥ ଭୁଜଂଗାଃ ସାଗରାଲୟାଃ ।
ଵ୍ୟୋମ୍ନି ତଂ କପିଶାର୍ଦୂଲଂ ସୁପର୍ଣ ଇତି ମେନିରେ ॥ 75 ॥

ଦଶୟୋଜନଵିସ୍ତୀର୍ଣା ତ୍ରିଂଶଦ୍ୟୋଜନମାୟତା ।
ଛାୟା ଵାନରସିଂହସ୍ୟ ଜଲେ ଚାରୁତରାଭଵତ୍ ॥ 76 ॥

ଶ୍ଵେତାଭ୍ରଘନରାଜୀଵ ଵାୟୁପୁତ୍ରାନୁଗାମିନୀ ।
ତସ୍ୟ ସା ଶୁଶୁଭେ ଛାୟା ଵିତତା ଲଵଣାଂଭସି ॥ 77 ॥

ଶୁଶୁଭେ ସ ମହାତେଜା ମହାକାୟୋ ମହାକପିଃ ।
ଵାୟୁମାର୍ଗେ ନିରାଲଂବେ ପକ୍ଷଵାନିଵ ପର୍ଵତଃ ॥ 78 ॥

ୟେନାସୌ ୟାତି ବଲଵାନ୍ ଵେଗେନ କପିକୁଂଜରଃ ।
ତେନ ମାର୍ଗେଣ ସହସା ଦ୍ରୋଣୀକୃତ ଇଵାର୍ଣଵଃ ॥ 79 ॥

ଆପାତେ ପକ୍ଷିସଂଘାନାଂ ପକ୍ଷିରାଜ ଇଵ ଵ୍ରଜନ୍ ।
ହନୁମାନ୍ ମେଘଜାଲାନି ପ୍ରକର୍ଷନ୍ ମାରୁତୋ ୟଥା ॥ 80 ॥

ପାଂଡୁରାରୁଣଵର୍ଣାନି ନୀଲମାଂଜିଷ୍ଠକାନି ଚ ।
କପିନାକୃଷ୍ୟମାଣାନି ମହାଭ୍ରାଣି ଚକାଶିରେ ॥ 81 ॥

ପ୍ରଵିଶନ୍ନଭ୍ରଜାଲାନି ନିଷ୍ପତଂଶ୍ଚ ପୁନଃ ପୁନଃ ।
ପ୍ରଚ୍ଛନ୍ନଶ୍ଚ ପ୍ରକାଶଶ୍ଚ ଚଂଦ୍ରମା ଇଵ ଲକ୍ଷ୍ୟତେ ॥ 82 ॥

ପ୍ଲଵମାନଂ ତୁ ତଂ ଦୃଷ୍ଟ୍ଵା ପ୍ଲଵଂଗଂ ତ୍ଵରିତଂ ତଦା ।
ଵଵର୍ଷୁଃ ପୁଷ୍ପଵର୍ଷାଣି ଦେଵଗଂଧର୍ଵଦାନଵାଃ ॥ 83 ॥

ତତାପ ନ ହି ତଂ ସୂର୍ୟଃ ପ୍ଲଵଂତଂ ଵାନରୋତ୍ତମମ୍ ।
ସିଷେଵେ ଚ ତଦା ଵାୟୂ ରାମକାର୍ୟାର୍ଥସିଦ୍ଧୟେ ॥ 84 ॥

ଋଷୟସ୍ତୁଷ୍ଟୁଵୁଶ୍ଚୈନଂ ପ୍ଲଵମାନଂ ଵିହାୟସା ।
ଜଗୁଶ୍ଚ ଦେଵଗଂଧର୍ଵାଃ ପ୍ରଶଂସଂତୋ ମହୌଜସମ୍ ॥ 85 ॥

ନାଗାଶ୍ଚ ତୁଷ୍ଟୁଵୁର୍ୟକ୍ଷା ରକ୍ଷାଂସି ଵିବୁଧାଃ ଖଗାଃ ।
ପ୍ରେକ୍ଷ୍ୟ ସର୍ଵେ କପିଵରଂ ସହସା ଵିଗତକ୍ଲମମ୍ ॥ 86 ॥

ତସ୍ମିନ୍ ପ୍ଲଵଗଶାର୍ଦୂଲେ ପ୍ଲଵମାନେ ହନୂମତି ।
ଇକ୍ଷ୍ଵାକୁକୁଲମାନାର୍ଥୀ ଚିଂତୟାମାସ ସାଗରଃ ॥ 87 ॥

ସାହାୟ୍ୟଂ ଵାନରେଂଦ୍ରସ୍ୟ ୟଦି ନାହଂ ହନୂମତଃ ।
କରିଷ୍ୟାମି ଭଵିଷ୍ୟାମି ସର୍ଵଵାଚ୍ୟୋ ଵିଵକ୍ଷତାମ୍ ॥ 88 ॥

ଅହମିକ୍ଷ୍ଵାକୁନାଥେନ ସଗରେଣ ଵିଵର୍ଧିତଃ ।
ଇକ୍ଷ୍ଵାକୁସଚିଵଶ୍ଚାୟଂ ନାଵସୀଦିତୁମର୍ହତି ॥ 89 ॥

ତଥା ମୟା ଵିଧାତଵ୍ୟଂ ଵିଶ୍ରମେତ ୟଥା କପିଃ ॥ 90 ॥

ଶେଷଂ ଚ ମୟି ଵିଶ୍ରାଂତଃ ସୁଖେନାତିପତିଷ୍ୟତି ।
ଇତି କୃତ୍ଵା ମତିଂ ସାଧ୍ଵୀଂସମୁଦ୍ର ଶ୍ଛନ୍ନମଂଭସି ॥ 91 ॥

ହିରଣ୍ୟନାଭଂ ମୈନାକମୁଵାଚ ଗିରିସତ୍ତମମ୍ ।
ତ୍ଵମିହାସୁରସଂଘାନାଂ ପାତାଲତଲଵାସିନାମ୍ ॥ 92 ॥

ଦେଵରାଜ୍ଞା ଗିରିଶ୍ରେଷ୍ଠ ପରିଘଃ ସନ୍ନିଵେଶିତଃ ।
ତ୍ଵମେଷାଂ ଜାତଵୀର୍ୟାଣାଂ ପୁନରେଵୋତ୍ପତିଷ୍ୟତାମ୍ ॥ 93 ॥

ପାତାଲସ୍ୟାପ୍ରମେୟସ୍ୟ ଦ୍ଵାରମାଵୃତ୍ୟ ତିଷ୍ଠସି ।
ତିର୍ୟଗୂର୍ଧ୍ଵମଧଶ୍ଚୈଵ ଶକ୍ତିସ୍ତେ ଶୈଲ ଵର୍ଧିତୁମ୍ ॥ 94 ॥

ତସ୍ମାତ୍ସଂଚୋଦୟାମି ତ୍ଵାମୁତ୍ତିଷ୍ଠ ଗିରିସତ୍ତମ ।
ସ ଏଷ କପିଶାର୍ଦୂଲସ୍ତ୍ଵାମୁପର୍ୟେତି ଵୀର୍ୟଵାନ୍ ॥ 95 ॥

ହନୂମାନ୍ରାମକାର୍ୟାର୍ଥଂ ଭୀମକର୍ମା ଖମାପ୍ଲୁତଃ ।
ଅସ୍ୟ ସାହ୍ୟଂ ମୟା କାର୍ୟମିକ୍ଷ୍ଵାକୁକୁଲଵର୍ତିନଃ ॥ 96 ॥

ମମ ହୀକ୍ଷ୍ଵାକଵଃ ପୂଜ୍ୟାଃ ପରଂ ପୂଜ୍ୟତମାସ୍ତଵ ।
କୁରୁ ସାଚିଵ୍ୟମସ୍ମାକଂ ନ ନଃ କାର୍ୟମତିକ୍ରମେତ୍ ॥ 97 ॥

କର୍ତଵ୍ୟମକୃତଂ କାର୍ୟଂ ସତାଂ ମନ୍ୟୁମୁଦୀରୟେତ୍ ।
ସଲିଲାଦୂର୍ଧ୍ଵମୁତ୍ତିଷ୍ଠ ତିଷ୍ଠତ୍ଵେଷ କପିସ୍ତ୍ଵୟି ॥ 98 ॥

ଅସ୍ମାକମତିଥିଶ୍ଚୈଵ ପୂଜ୍ୟଶ୍ଚ ପ୍ଲଵତାଂ ଵରଃ ।
ଚାମୀକରମହାନାଭ ଦେଵଗଂଧର୍ଵସେଵିତ ॥ 99 ॥

ହନୁମାଂସ୍ତ୍ଵୟି ଵିଶ୍ରାଂତସ୍ତତଃ ଶେଷଂ ଗମିଷ୍ୟତି ।
କାକୁତ୍ସ୍ଥସ୍ୟାନୃଶଂସ୍ୟଂ ଚ ମୈଥିଲ୍ୟାଶ୍ଚ ଵିଵାସନମ୍ ॥ 100 ॥

ଶ୍ରମଂ ଚ ପ୍ଲଵଗେଂଦ୍ରସ୍ୟ ସମୀକ୍ଷ୍ୟୋତ୍ଥାତୁମର୍ହସି ।
ହିରଣ୍ୟନାଭୋ ମୈନାକୋ ନିଶମ୍ୟ ଲଵଣାଂଭସଃ ॥ 101 ॥

ଉତ୍ପପାତ ଜଲାତ୍ତୂର୍ଣଂ ମହାଦ୍ରୁମଲତାୟୁତଃ ।
ସ ସାଗରଜଲଂ ଭିତ୍ତ୍ଵା ବଭୂଵାଭ୍ୟୁତ୍ଥିତସ୍ତଦା ॥ 102 ॥

ୟଥା ଜଲଧରଂ ଭିତ୍ତ୍ଵା ଦୀପ୍ତରଶ୍ମିର୍ଦିଵାକରଃ ।
ସ ମହାତ୍ମା ମୁହୂର୍ତେନ ସର୍ଵତଃ ସଲିଲାଵୃତଃ ॥ 103 ॥

ଦର୍ଶୟାମାସ ଶୃଂଗାଣି ସାଗରେଣ ନିୟୋଜିତଃ ।
ଆଦିତ୍ୟୋଦୟସଂକାଶୈରାଲିଖଦ୍ଭିରିଵାଂବରମ୍ ।
ଶାତକୁଂଭମୟୈଃ ଶୃଂଗୈଃ ସକିନ୍ନରମହୋରଗୈଃ ॥ 104 ॥

ତପ୍ତଜାଂବୂନଦୈଃ ଶୃଂଗୈଃ ପର୍ଵତସ୍ୟ ସମୁତ୍ଥିତୈଃ ॥ 105 ॥

ଆକାଶଂ ଶସ୍ତ୍ରସଂକାଶମଭଵତ୍କାଂଚନପ୍ରଭମ୍ ।
ଜାତରୂପମୟୈଃ ଶୃଂଗୈର୍ଭ୍ରାଜମାନୈଃ ସ୍ଵୟଂପ୍ରଭୈଃ ॥ 106 ॥

ଆଦିତ୍ୟଶତସଂକାଶଃ ସୋଽଭଵଦ୍ଗିରିସତ୍ତମଃ ।
ତମୁତ୍ଥିତମସଂଗେନ ହନୁମାନଗ୍ରତଃ ସ୍ଥିତମ୍ ॥ 107 ॥

ମଧ୍ୟେ ଲଵଣତୋୟସ୍ୟ ଵିଘ୍ନୋଽୟମିତି ନିଶ୍ଚିତଃ ।
ସ ତମୁଚ୍ଛ୍ର୍ରତମତ୍ୟର୍ଥଂ ମହାଵେଗୋ ମହାକପିଃ ॥ 108 ॥

ଉରସା ପାତୟାମାସ ଜୀମୂତମିଵ ମାରୁତଃ ।
ସ ତଥା ପାତିତସ୍ତେନ କପିନା ପର୍ଵତୋତ୍ତମଃ ॥ 109 ॥

ବୁଦ୍ଧ୍ଵା ତସ୍ୟ କପେର୍ଵେଗଂ ଜହର୍ଷ ଚ ନନଂଦ ଚ ।
ତମାକାଶଗତଂ ଵୀରମାକାଶେ ସମୁପସ୍ଥିତଃ ॥ 110 ॥

ପ୍ରୀତୋ ହୃଷ୍ଟମାନା ଵାକ୍ୟମବ୍ରଵୀତ୍ପର୍ଵତଃ କପିମ୍ ।
ମାନୁଷଂ ଧାରୟନ୍ ରୂପମାତ୍ମନଃ ଶିଖରେ ସ୍ଥିତଃ ॥ 111 ॥

ଦୁଷ୍କରଂ କୃତଵାନ୍କର୍ମ ତ୍ଵମିଦଂ ଵାନରୋତ୍ତମ ।
ନିପତ୍ୟ ମମ ଶୃଂଗେଷୁ ଵିଶ୍ରମସ୍ଵ ୟଥାସୁଖମ୍ ॥ 112 ॥

ରାଘଵସ୍ୟ କୁଲେ ଜାତୈରୁଦଧିଃ ପରିଵର୍ଧିତଃ ।
ସ ତ୍ଵାଂ ରାମହିତେ ୟୁକ୍ତଂ ପ୍ରତ୍ୟର୍ଚୟତି ସାଗରଃ ॥ 113 ॥

କୃତେ ଚ ପ୍ରତିକର୍ତଵ୍ୟମେଷ ଧର୍ମଃ ସନାତନଃ ।
ସୋଽୟଂ ତ୍ଵତ୍ପ୍ରତିକାରାର୍ଥୀ ତ୍ଵତ୍ତଃ ସମ୍ମାନମର୍ହତି ॥ 114 ॥

ତ୍ଵନ୍ନିମିତ୍ତମନେନାହଂ ବହୁମାନାତ୍ପ୍ରଚୋଦିତଃ ।
ତିଷ୍ଠ ତ୍ଵଂ କପିଶାର୍ଦୂଲ ମୟି ଵିଶ୍ରମ୍ୟ ଗମ୍ୟତାମ୍ ॥ 115 ॥

ତଵ ସାନୁଷୁ ଵିଶ୍ରାଂତଃ ଶେଷଂ ପ୍ରକ୍ରମତାମିତି ।
ୟୋଜନାନାଂ ଶତଂ ଚାପି କପିରେଷ ସମାପ୍ଲୁତଃ ॥ 116 ॥

ତଦିଦଂ ଗଂଧଵତ୍ସ୍ଵାଦୁ କଂଦମୂଲଫଲଂ ବହୁ ।
ତଦାସ୍ଵାଦ୍ୟ ହରିଶ୍ରେଷ୍ଠ ଵିଶ୍ରାଂତୋଽନୁ ଗମିଷ୍ୟସି ॥ 117 ॥

ଅସ୍ମାକମପି ସଂବଂଧଃ କପିମୁଖ୍ୟ ତ୍ଵୟାସ୍ତି ଵୈ ।
ପ୍ରଖ୍ୟାତସ୍ତ୍ରିଷୁ ଲୋକେଷୁ ମହାଗୁଣପରିଗ୍ରହଃ ॥ 118 ॥

ଵେଗଵଂତଃ ପ୍ଲଵଂତୋ ୟେ ପ୍ଲଵଗା ମାରୁତାତ୍ମଜ ।
ତେଷାଂ ମୁଖ୍ୟତମଂ ମନ୍ୟେ ତ୍ଵାମହଂ କପିକୁଂଜର ॥ 119 ॥

ଅତିଥିଃ କିଲ ପୂଜାର୍ହଃ ପ୍ରାକୃତୋଽପି ଵିଜାନତା ।
ଧର୍ମଂ ଜିଜ୍ଞାସମାନେନ କିଂ ପୁନସ୍ତ୍ଵାଦୃଶୋ ମହାନ୍ ॥ 120 ॥

ତ୍ଵଂ ହି ଦେଵଵରିଷ୍ଠସ୍ୟ ମାରୁତସ୍ୟ ମହାତ୍ମନଃ ।
ପୁତ୍ରସ୍ତସ୍ୟୈଵ ଵେଗେନ ସଦୃଶଃ କପିକୁଂଜର ॥ 121 ॥

ପୂଜିତେ ତ୍ଵୟି ଧର୍ମଜ୍ଞ ପୂଜାଂ ପ୍ରାପ୍ନୋତି ମାରୁତଃ ।
ତସ୍ମାତ୍ତ୍ଵଂ ପୂଜନୀୟୋ ମେ ଶୃଣୁ ଚାପ୍ୟତ୍ର କାରଣମ୍ ॥ 122 ॥

ପୂର୍ଵଂ କୃତୟୁଗେ ତାତ ପର୍ଵତାଃ ପକ୍ଷିଣୋଽଭଵନ୍ ।
ତେ ହି ଜଗ୍ମୁର୍ଦିଶଃ ସର୍ଵା ଗରୁଡାନିଲଵେଗିନଃ ॥ 123 ॥

ତତସ୍ତେଷୁ ପ୍ରୟାତେଷୁ ଦେଵସଂଘାଃ ମହର୍ଷିଭିଃ ।
ଭୂତାନି ଚ ଭୟଂ ଜଗ୍ମୁସ୍ତେଷାଂ ପତନଶଂକୟା ॥ 124 ॥

ତତଃ କ୍ରୁଦ୍ଧଃ ସହସ୍ରାକ୍ଷଃ ପର୍ଵତାନାଂ ଶତକ୍ରତୁଃ ।
ପକ୍ଷାନ୍ ଚିଚ୍ଛେଦ ଵଜ୍ରେଣ ତତ୍ର ତତ୍ର ସହସ୍ରଶଃ ॥ 125 ॥

ସ ମାମୁପାଗତଃ କ୍ରୁଦ୍ଧୋ ଵଜ୍ରମୁଦ୍ୟମ୍ୟ ଦେଵରାଟ୍ ।
ତତୋଽହଂ ସହସା କ୍ଷିପ୍ତଃ ଶ୍ଵସନେନ ମହାତ୍ମନା ॥ 126 ॥

ଅସ୍ମିନ୍ଲଵଣତୋୟେ ଚ ପ୍ରକ୍ଷିପ୍ତଃ ପ୍ଲଵଗୋତ୍ତମ ।
ଗୁପ୍ତପକ୍ଷସମଗ୍ରଶ୍ଚ ତଵ ପିତ୍ରାଭିରକ୍ଷିତଃ ॥ 127 ॥

ତତୋଽହଂ ମାନୟାମି ତ୍ଵାଂ ମାନ୍ୟୋ ହି ମମ ମାରୁତଃ ।
ତ୍ଵୟା ମେ ହ୍ୟେଷ ସଂବଂଧଃ କପିମୁଖ୍ୟ ମହାଗୁଣଃ ॥ 128 ॥

ଅସ୍ମିନ୍ନେଵଂଗତେ କାର୍ୟେ ସାଗରସ୍ୟ ମମୈଵ ଚ ।
ପ୍ରୀତିଂ ପ୍ରୀତମନାଃ କର୍ତୁଂ ତ୍ଵମର୍ହସି ମହାକପେ ॥ 129 ॥

ଶ୍ରମଂ ମୋକ୍ଷୟ ପୂଜାଂ ଚ ଗୃହାଣ କପିସତ୍ତମ ।
ପ୍ରୀତିଂ ଚ ବହୁମନ୍ୟସ୍ଵ ପ୍ରୀତୋଽସ୍ମି ତଵ ଦର୍ଶନାତ୍ ॥ 130 ॥

ଏଵମୁକ୍ତଃ କପିଶ୍ରେଷ୍ଠସ୍ତଂ ନଗୋତ୍ତମମବ୍ରଵୀତ୍ ।
ପ୍ରୀତୋଽସ୍ମି କୃତମାତିଥ୍ୟଂ ମନ୍ୟୁରେଷୋଽପନୀୟତାମ୍ ॥ 131 ॥

ତ୍ଵରତେ କାର୍ୟକାଲୋ ମେ ଅହଶ୍ଚାପ୍ୟତିଵର୍ତତେ ।
ପ୍ରତିଜ୍ଞା ଚ ମୟା ଦତ୍ତା ନ ସ୍ଥାତଵ୍ୟମିହାଂତରେ ॥ 132 ॥

ଇତ୍ୟୁକ୍ତ୍ଵା ପାଣିନା ଶୈଲମାଲଭ୍ୟ ହରିପୁଂଗଵଃ ।
ଜଗାମାକାଶମାଵିଶ୍ୟ ଵୀର୍ୟଵାନ୍ ପ୍ରହସନ୍ନିଵ ॥ 133 ॥

ସ ପର୍ଵତସମୁଦ୍ରାଭ୍ୟାଂ ବହୁମାନାଦଵେକ୍ଷିତଃ ।
ପୂଜିତଶ୍ଚୋପପନ୍ନାଭିରାଶୀର୍ଭିରନିଲାତ୍ମଜଃ ॥ 134 ॥

ଅଥୋର୍ଧ୍ଵଂ ଦୂରମୁତ୍ପ୍ଲୁତ୍ୟ ହିତ୍ଵା ଶୈଲମହାର୍ଣଵୌ ।
ପିତୁଃ ପଂଥାନମାସ୍ଥାୟ ଜଗାମ ଵିମଲେଽଂବରେ ॥ 135 ॥

ଭୂୟଶ୍ଚୋର୍ଧ୍ଵଂ ଗତିଂ ପ୍ରାପ୍ୟ ଗିରିଂ ତମଵଲୋକୟନ୍ ।
ଵାୟୁସୂନୁର୍ନିରାଲଂବେ ଜଗାମ ଵିମଲେଽଂବରେ ॥ 136 ॥

ତଦ୍ ଦ୍ଵିତୀୟଂ ହନୁମତୋ ଦୃଷ୍ଟ୍ଵା କର୍ମ ସୁଦୁଷ୍କରମ୍ ।
ପ୍ରଶଶଂସୁଃ ସୁରାଃ ସର୍ଵେ ସିଦ୍ଧାଶ୍ଚ ପରମର୍ଷୟଃ ॥ 137 ॥

ଦେଵତାଶ୍ଚାଭଵନ୍ ହୃଷ୍ଟାସ୍ତତ୍ରସ୍ଥାସ୍ତସ୍ୟ କର୍ମଣା ।
କାଂଚନସ୍ୟ ସୁନାଭସ୍ୟ ସହସ୍ରାକ୍ଷଶ୍ଚ ଵାସଵଃ ॥ 138 ॥

ଉଵାଚ ଵଚନଂ ଧୀମାନ୍ ପରିତୋଷାତ୍ସଗଦ୍ଗଦମ୍ ।
ସୁନାଭଂ ପର୍ଵତଶ୍ରେଷ୍ଠଂ ସ୍ଵୟମେଵ ଶଚୀପତିଃ ॥ 139 ॥

ହିରଣ୍ୟନାଭ ଶୈଲେଂଦ୍ର ପରିତୁଷ୍ଟୋଽସ୍ମି ତେ ଭୃଶମ୍ ।
ଅଭୟଂ ତେ ପ୍ରୟଚ୍ଛାମି ତିଷ୍ଠ ସୌମ୍ୟ ୟଥାସୁଖମ୍ ॥ 140 ॥

ସାହ୍ୟଂ କୃତଂ ତେ ସୁମହଦ୍ଵିକ୍ରାଂତସ୍ୟ ହନୂମତଃ ।
କ୍ରମତୋ ୟୋଜନଶତଂ ନିର୍ଭୟସ୍ୟ ଭୟେ ସତି ॥ 141 ॥

ରାମସ୍ୟୈଷ ହିତାୟୈଵ ୟାତି ଦାଶରଥେର୍ହରିଃ ।
ସତ୍କ୍ରିୟାଂ କୁର୍ଵତା ତସ୍ୟ ତୋଷିତୋଽସ୍ମି ଦୃଢଂ ତ୍ଵୟା ॥ 142 ॥

ତତଃ ପ୍ରହର୍ଷମଗମଦ୍ଵିପୁଲଂ ପର୍ଵତୋତ୍ତମଃ ।
ଦେଵତାନାଂ ପତିଂ ଦୃଷ୍ଟ୍ଵା ପରିତୁଷ୍ଟଂ ଶତକ୍ରତୁମ୍ ॥ 143 ॥

ସ ଵୈ ଦତ୍ତଵରଃ ଶୈଲୋ ବଭୂଵାଵସ୍ଥିତସ୍ତଦା ।
ହନୁମାଂଶ୍ଚ ମୁହୂର୍ତେନ ଵ୍ୟତିଚକ୍ରାମ ସାଗରମ୍ ॥ 144 ॥

ତତୋ ଦେଵାଃ ସଗଂଧର୍ଵାଃ ସିଦ୍ଧାଶ୍ଚ ପରମର୍ଷୟଃ ।
ଅବ୍ରୁଵନ୍ ସୂର୍ୟସଂକାଶାଂ ସୁରସାଂ ନାଗମାତରମ୍ ॥ 145 ॥

ଅୟଂ ଵାତାତ୍ମଜଃ ଶ୍ରୀମାନ୍ପ୍ଲଵତେ ସାଗରୋପରି ।
ହନୁମାନ୍ନାମ ତସ୍ୟ ତ୍ଵଂ ମୁହୂର୍ତଂ ଵିଘ୍ନମାଚର ॥ 146 ॥

ରାକ୍ଷସଂ ରୂପମାସ୍ଥାୟ ସୁଘୋରଂ ପର୍ଵତୋପମମ୍ ।
ଦଂଷ୍ଟ୍ରାକରାଲଂ ପିଂଗାକ୍ଷଂ ଵକ୍ତ୍ରଂ କୃତ୍ଵା ନଭଃ ସମମ୍ ॥ 147 ॥

ବଲମିଚ୍ଛାମହେ ଜ୍ଞାତୁଂ ଭୂୟଶ୍ଚାସ୍ୟ ପରାକ୍ରମମ୍ ।
ତ୍ଵାଂ ଵିଜେଷ୍ୟତ୍ୟୁପାୟେନ ଵିଷାଦଂ ଵା ଗମିଷ୍ୟତି ॥ 148 ॥

ଏଵମୁକ୍ତା ତୁ ସା ଦେଵୀ ଦୈଵତୈରଭିସତ୍କୃତା ।
ସମୁଦ୍ରମଧ୍ୟେ ସୁରସା ବିଭ୍ରତୀ ରାକ୍ଷସଂ ଵପୁଃ ॥ 149 ॥

ଵିକୃତଂ ଚ ଵିରୂପଂ ଚ ସର୍ଵସ୍ୟ ଚ ଭୟାଵହମ୍ ।
ପ୍ଲଵମାନଂ ହନୂମଂତମାଵୃତ୍ୟେଦମୁଵାଚ ହ ॥ 150 ॥

ମମ ଭକ୍ଷଃ ପ୍ରଦିଷ୍ଟସ୍ତ୍ଵମୀଶ୍ଵରୈର୍ଵାନରର୍ଷଭ ।
ଅହଂ ତ୍ଵାଂ ଭକ୍ଷୟିଷ୍ୟାମି ପ୍ରଵିଶେଦଂ ମମାନନମ୍ ॥ 151 ॥

ଏଵମୁକ୍ତଃ ସୁରସୟା ପ୍ରାଂଜଲିର୍ଵାନରର୍ଷଭଃ ।
ପ୍ରହୃଷ୍ଟଵଦନଃ ଶ୍ରୀମାନିଦଂ ଵଚନମବ୍ରଵୀତ୍ ॥ 152 ॥

ରାମୋ ଦାଶରଥିର୍ନାମ ପ୍ରଵିଷ୍ଟୋ ଦଂଡକାଵନମ୍ ।
ଲକ୍ଷ୍ମଣେନ ସହ ଭ୍ରାତ୍ରା ଵୈଦେହ୍ୟା ଚାପି ଭାର୍ୟୟା ॥ 153 ॥

ଅନ୍ୟକାର୍ୟଵିଷକ୍ତସ୍ୟ ବଦ୍ଧଵୈରସ୍ୟ ରାକ୍ଷସୈଃ ।
ତସ୍ୟ ସୀତା ହୃତା ଭାର୍ୟା ରାଵଣେନ ୟଶସ୍ଵିନୀ ॥ 154 ॥

ତସ୍ୟାଃ ସକାଶଂ ଦୂତୋଽହଂ ଗମିଷ୍ୟେ ରାମଶାସନାତ୍ ।
କର୍ତୁମର୍ହସି ରାମସ୍ୟ ସାହ୍ୟଂ ଵିଷୟଵାସିନି ॥ 155 ॥

ଅଥଵା ମୈଥିଲୀଂ ଦୃଷ୍ଟ୍ଵା ରାମଂ ଚାକ୍ଲିଷ୍ଟକାରିଣମ୍ ।
ଆଗମିଷ୍ୟାମି ତେ ଵକ୍ତ୍ରଂ ସତ୍ୟଂ ପ୍ରତିଶୃଣୋମି ତେ ॥ 156 ॥

ଏଵମୁକ୍ତା ହନୁମତା ସୁରସା କାମରୂପିଣୀ ।
ଅବ୍ରଵୀନ୍ନାତିଵର୍ତେନ୍ମାଂ କଶ୍ଚିଦେଷ ଵରୋ ମମ ॥ 157 ॥

ତଂ ପ୍ରୟାଂତଂ ସମୁଦ୍ଵୀକ୍ଷ୍ୟ ସୁରସା ଵାକ୍ୟମବ୍ରଵୀତ୍ ।
ବଲଂ ଜିଜ୍ଞାସମାନା ଵୈ ନାଗମାତା ହନୂମତଃ ॥ 158 ॥

ପ୍ରଵିଶ୍ୟ ଵଦନଂ ମେଽଦ୍ୟ ଗଂତଵ୍ୟଂ ଵାନରୋତ୍ତମ ।
ଵର ଏଷ ପୁରା ଦତ୍ତୋ ମମ ଧାତ୍ରେତି ସତ୍ଵରା ॥ 159 ॥

ଵ୍ୟାଦାୟ ଵିପୁଲଂ ଵକ୍ତ୍ରଂ ସ୍ଥିତା ସା ମାରୁତେଃ ପୁରଃ ।
ଏଵମୁକ୍ତଃ ସୁରସୟା କ୍ରୁଦ୍ଧୋ ଵାନରପୁଂଗଵଃ ॥ 160 ॥

ଅବ୍ରଵୀତ୍କୁରୁ ଵୈ ଵକ୍ତ୍ରଂ ୟେନ ମାଂ ଵିଷହିଷ୍ୟସେ ।
ଇତ୍ୟୁକ୍ତ୍ଵା ସୁରସାଂ କ୍ରୁଦ୍ଧୋ ଧଶୟୋଜନମାୟତା ॥ 161 ॥

ଦଶୟୋଜନଵିସ୍ତାରୋ ବଭୂଵ ହନୁମାଂସ୍ତଦା ।
ତଂ ଦୃଷ୍ଟ୍ଵା ମେଘସଂକାଶଂ ଦଶୟୋଜନମାୟତମ୍ ॥ 162 ॥

ଚକାର ସୁରସା ଚାସ୍ୟଂ ଵିଂଶଦ୍ୟୋଜନମାୟତମ୍ ।
ହନୁମାଂସ୍ତୁ ତତଃ କ୍ରୁଦ୍ଧସ୍ତ୍ରିଂଶଦ୍ୟୋଜନମାୟତଃ ॥ 163 ॥

ଚକାର ସୁରସା ଵକ୍ତ୍ରଂ ଚତ୍ଵାରିଂଶତ୍ତଥୋଚ୍ଛ୍ରିତମ୍ ।
ବଭୂଵ ହନୁମାଵନୀରଃ ପଂଚାଶଦ୍ୟୋଜନୋଚ୍ଛ୍ରିତଃ ॥ 164 ॥

ଚକାର ସୁରସା ଵକ୍ତ୍ରଂ ଷଷ୍ଟିୟୋଜନମାୟତମ୍ ।
ତଥୈଵ ହନୁମାଵନୀରଃ ସପ୍ତତୀୟୋଜନୋଚ୍ଛ୍ରିତଃ ॥ 165 ॥

ଚକାର ସୁରସା ଵକ୍ତ୍ରମଶୀତୀୟୋଜନାୟତମ୍ ।
ହନୁମାନଚଲପ୍ରଖ୍ୟୋ ନଵତୀୟୋଜନୋଚ୍ଛ୍ରିତଃ ॥ 166 ॥

ଚକାର ସୁରସା ଵକ୍ତ୍ରଂ ଶତୟୋଜନମାୟତଂ ତଵ ସାନୁଷୁ ଵିଶ୍ରାଂତଃ ଶେଷଂ ପ୍ରକ୍ରମତାମିତି ।
ତଦ୍ଦୃଷ୍ଟ୍ଵା ଵ୍ୟାଦିତଂ ତ୍ଵାସ୍ୟଂ ଵାୟୁପୁତ୍ରଃ ସୁବୁଦ୍ଧିମାନ୍ ।
ଦୀର୍ଘଜିହ୍ଵଂ ସୁରସୟା ସୁଘୋରଂ ନରକୋପମମ୍ ॥ 167 ॥

ସୁସଂକ୍ଷିପ୍ୟାତ୍ମନଃ କାୟଂ ବଭୂଵାଂଗୁଷ୍ଠମାତ୍ରକଃ ।
ସୋଽଭିପତ୍ୟାଶୁ ତଦ୍ଵକ୍ତ୍ରଂ ନିଷ୍ପତ୍ୟ ଚ ମହାବଲଃ ।
ଅଂତରିକ୍ଷେ ସ୍ଥିତଃ ଶ୍ରୀମାନିଦଂ ଵଚନମବ୍ରଵୀତ୍ ॥ 168 ॥

ପ୍ରଵିଷ୍ଟୋଽସ୍ମି ହି ତେ ଵକ୍ତ୍ରଂ ଦାକ୍ଷାୟଣି ନମୋଽସ୍ତୁ ତେ ।
ଗମିଷ୍ୟେ ୟତ୍ର ଵୈଦେହୀ ସତ୍ୟଂ ଚାସୀଦ୍ଵରସ୍ତଵ ॥ 169 ॥

ତଂ ଦୃଷ୍ଟ୍ଵା ଵଦନାନ୍ମୁକ୍ତଂ ଚଂଦ୍ରଂ ରାହୁମୁଖାଦିଵ ।
ଅବ୍ରଵୀତ୍ସୁରସା ଦେଵୀ ସ୍ଵେନ ରୂପେଣ ଵାନରମ୍ ॥ 170 ॥

ଅର୍ଥସିଦ୍ଧ୍ୟୈ ହରିଶ୍ରେଷ୍ଠ ଗଚ୍ଛ ସୌମ୍ୟ ୟଥାସୁଖମ୍ ।
ସମାନୟସ୍ଵ ଵୈଦେହୀଂ ରାଘଵେଣ ମହାତ୍ମନା ॥ 171 ॥

ତତ୍ତୃତୀୟଂ ହନୁମତୋ ଦୃଷ୍ଟ୍ଵା କର୍ମ ସୁଦୁଷ୍କରମ୍ ।
ସାଧୁ ସାଧ୍ଵିତି ଭୂତାନି ପ୍ରଶଶଂସୁସ୍ତଦା ହରିମ୍ ॥ 172 ॥

ସ ସାଗରମନାଧୃଷ୍ୟମଭ୍ୟେତ୍ୟ ଵରୁଣାଲୟମ୍ ।
ଜଗାମାକାଶମାଵିଶ୍ୟ ଵେଗେନ ଗରୁଡୋପମଃ ॥ 173 ॥

ସେଵିତେ ଵାରିଧାରାଭିଃ ପତଗୈଶ୍ଚ ନିଷେଵିତେ ।
ଚରିତେ କୈଶିକାଚାର୍ୟୈରୈରାଵତନିଷେଵିତେ ॥ 174 ॥

ସିଂହକୁଂଜରଶାର୍ଦୂଲପତଗୋରଗଵାହନୈଃ ।
ଵିମାନୈଃ ସଂପତଦ୍ଭିଶ୍ଚ ଵିମଲୈଃ ସମଲଂକୃତେ ॥ 175 ॥

ଵଜ୍ରାଶନିସମାଘାତୈଃ ପାଵକୈରୁପଶୋଭିତେ ।
କୃତପୁଣ୍ୟୈର୍ମହାଭାଗୈଃ ସ୍ଵର୍ଗଜିଦ୍ଭିରଲଂକୃତେ ॥ 176 ॥

ଵହତା ହଵ୍ୟମତ୍ୟର୍ଧଂ ସେଵିତେ ଚିତ୍ରଭାନୁନା ।
ଗ୍ରହନକ୍ଷତ୍ରଚଂଦ୍ରାର୍କତାରାଗଣ ଵିଭୂଷିତେ ॥ 177 ॥

ମହର୍ଷିଗଣଗଂଧର୍ଵନାଗୟକ୍ଷସମାକୁଲେ ।
ଵିଵିକ୍ତେ ଵିମଲେ ଵିଶ୍ଵେ ଵିଶ୍ଵାଵସୁନିଷେଵିତେ ॥ 178 ॥

ଦେଵରାଜଗଜାକ୍ରାଂତେ ଚଂଦ୍ରସୂର୍ୟପଥେ ଶିଵେ ।
ଵିତାନେ ଜୀଵଲୋକସ୍ୟ ଵିତତେ ବ୍ରହ୍ମନିର୍ମିତେ ॥ 179 ॥

ବହୁଶଃ ସେଵିତେ ଵୀରୈର୍ଵିଦ୍ୟାଧରଗଣୈର୍ଵରୈଃ ।
ଜଗାମ ଵାୟୁମାର୍ଗେ ତୁ ଗରୁତ୍ମାନିଵ ମାରୁତିଃ ॥ 180 ॥

ପ୍ରଦୃଶ୍ୟମାନଃ ସର୍ଵତ୍ରଃ ହନୁମାନ୍ମାରୁତାତ୍ମଜଃ ।
ଭେଜେଽଂବରଂ ନିରାଲଂବଂ ଲଂବପକ୍ଷ ଇଵାଦ୍ରିରାଟ୍ ॥ 181 ॥

ପ୍ଲଵମାନଂ ତୁ ତଂ ଦୃଷ୍ଟ୍ଵା ସିଂହିକା ନାମ ରାକ୍ଷସୀ ।
ମନସା ଚିଂତୟାମାସ ପ୍ରଵୃଦ୍ଧା କାମରୂପିଣୀ ॥ 182 ॥

ଅଦ୍ୟ ଦୀର୍ଘସ୍ୟ କାଲସ୍ୟ ଭଵିଷ୍ୟାମ୍ୟହମାଶିତା ।
ଇଦଂ ହି ମେ ମହତ୍ସତ୍ତ୍ଵଂ ଚିରସ୍ୟ ଵଶମାଗତମ୍ ॥ 183 ॥

ଇତି ସଂଚିଂତ୍ୟ ମନସା ଛାୟାମସ୍ୟ ସମାକ୍ଷିପତ୍ ।
ଛାୟାୟାଂ ଗୃହ୍ୟମାଣାୟାଂ ଚିଂତୟାମାସ ଵାନରଃ ॥ 184 ॥

ସମାକ୍ଷିପ୍ତୋଽସ୍ମି ସହସା ପଂଗୂକୃତପରାକ୍ରମଃ ।
ପ୍ରତିଲୋମେନ ଵାତେନ ମହାନୌରିଵ ସାଗରେ ॥ 185 ॥

ତିର୍ୟଗୂର୍ଧ୍ଵମଧଶ୍ଚୈଵ ଵୀକ୍ଷମାଣସ୍ତତଃ କପିଃ ।
ଦଦର୍ଶ ସ ମହତ୍ସତ୍ତ୍ଵମୁତ୍ଥିତଂ ଲଵଣାଂଭସି ॥ 186 ॥

ତଦ୍ଧୃଷ୍ଟ୍ଵା ଚିଂତୟାମାସ ମାରୁତିର୍ଵିକୃତାନନମ୍ ।
କପିରାଜେନ କଥିତଂ ସତ୍ତ୍ଵମଦ୍ଭୁତଦର୍ଶନମ୍ ॥ 187 ॥

ଛାୟାଗ୍ରାହି ମହାଵୀର୍ୟଂ ତଦିଦଂ ନାତ୍ର ସଂଶୟଃ ।
ସ ତାଂ ବୁଦ୍ଧ୍ଵାର୍ଥତତ୍ତ୍ଵେନ ସିଂହିକାଂ ମତିମାନ୍କପିଃ ॥ 188 ॥

ଵ୍ୟଵର୍ଧତ ମହାକାୟଃ ପ୍ରାଵୃଷୀଵ ଵଲାହକଃ ।
ତସ୍ୟ ସା କାୟମୁଦ୍ଵୀକ୍ଷ୍ୟ ଵର୍ଧମାନଂ ମହାକପେଃ ॥ 189 ॥

ଵକ୍ତ୍ରଂ ପ୍ରସାରୟାମାସ ପାତାଲାଂତରସନ୍ନିଭମ୍ ।
ଘନରାଜୀଵ ଗର୍ଜଂତୀ ଵାନରଂ ସମଭିଦ୍ରଵତ୍ ॥ 190 ॥

ସ ଦଦର୍ଶ ତତସ୍ତସ୍ୟା ଵିଵୃତଂ ସୁମହନ୍ମୁଖମ୍ ।
କାୟମାତ୍ରଂ ଚ ମେଧାଵୀ ମର୍ମାଣି ଚ ମହାକପିଃ ॥ 191 ॥

ସ ତସ୍ୟା ଵିଵୃତେ ଵକ୍ତ୍ରେ ଵଜ୍ରସଂହନନଃ କପିଃ ।
ସଂକ୍ଷିପ୍ୟ ମୁହୁରାତ୍ମାନଂ ନିଷ୍ପପାତ ମହାବଲଃ ॥ 192 ॥

ଆସ୍ୟେ ତସ୍ୟା ନିମଜ୍ଜଂତଂ ଦଦୃଶୁଃ ସିଦ୍ଧଚାରଣାଃ ।
ଗ୍ରସ୍ୟମାନଂ ୟଥା ଚଂଦ୍ରଂ ପୂର୍ଣଂ ପର୍ଵଣି ରାହୁଣା ॥ 193 ॥

ତତସ୍ତସ୍ୟା ନଖୈସ୍ତୀକ୍ଷ୍ଣୈର୍ମର୍ମାଣ୍ୟୁତ୍କୃତ୍ୟ ଵାନରଃ ।
ଉତ୍ପପାତାଥ ଵେଗେନ ମନଃ ସଂପାତଵିକ୍ରମଃ ॥ 194 ॥

ତାଂ ତୁ ଦୃଷ୍ଟ୍ଵା ଚ ଧୃତ୍ୟା ଚ ଦାକ୍ଷିଣ୍ୟେନ ନିପାତ୍ୟ ଚ ।
ସ କପିପ୍ରଵରୋ ଵେଗାଦ୍ଵଵୃଧେ ପୁନରାତ୍ମଵାନ୍ ॥ 195 ॥

ହୃତହୃତ୍ସା ହନୁମତାପପାତ ଵିଧୁରାଂଭସି ।
ତାଂ ହତାଂ ଵାନରେଣାଶୁ ପତିତାଂ ଵୀକ୍ଷ୍ୟ ସିଂହିକାମ୍ ॥ 196 ॥

ଭୂତାନ୍ୟାକାଶଚାରୀଣି ତମୂଚୁଃ ପ୍ଲଵଗୋତ୍ତମମ୍ ।
ଭୀମମଦ୍ୟ କୃତଂ କର୍ମ ମହତ୍ସତ୍ତ୍ଵଂ ତ୍ଵୟା ହତମ୍ ॥ 197 ॥

ସାଧୟାର୍ଥମଭିପ୍ରେତମରିଷ୍ଟଂ ପ୍ଲଵତାଂ ଵର ।
ୟସ୍ୟ ତ୍ଵେତାନି ଚତ୍ଵାରି ଵାନରେଂଦ୍ର ୟଥା ତଵ ॥ 198 ॥

ଧୃତିର୍ଦୃଷ୍ଟିର୍ମତିର୍ଦାକ୍ଷ୍ୟଂ ସଃ କର୍ମସୁ ନ ସୀଦତି ।
ସ ତୈଃ ସଂଭାଵିତଃ ପୂଜ୍ୟଃ ପ୍ରତିପନ୍ନପ୍ରୟୋଜନଃ ॥ 199 ॥

ଜଗାମାକାଶମାଵିଶ୍ୟ ପନ୍ନଗାଶନଵତ୍କପିଃ ।
ପ୍ରାପ୍ତଭୂୟିଷ୍ଠପାରସ୍ତୁ ସର୍ଵତଃ ପ୍ରତିଲୋକୟନ୍ ॥ 200 ॥

ୟୋଜନାନାଂ ଶତସ୍ୟାଂତେ ଵନରାଜିଂ ଦଦର୍ଶ ସଃ ।
ଦଦର୍ଶ ଚ ପତନ୍ନେଵ ଵିଵିଧଦ୍ରୁମଭୂଷିତମ୍ ॥ 201 ॥

ଦ୍ଵୀପଂ ଶାଖାମୃଗଶ୍ରେଷ୍ଠୋ ମଲୟୋପଵନାନି ଚ ।
ସାଗରଂ ସାଗରାନୂପଂ ସାଗରାନୂପଜାନ୍ ଦ୍ରୁମାନ୍ ॥ 202 ॥

ସାଗରସ୍ୟ ଚ ପତ୍ନୀନାଂ ମୁଖ୍ୟାନ୍ୟପି ଵିଲୋକୟନ୍ ।
ସ ମହାମେଘସଂକାଶଂ ସମୀକ୍ଷ୍ୟାତ୍ମାନମାତ୍ମଵାନ୍ ॥ 203 ॥

ନିରୁଂଧଂତମିଵାକାଶଂ ଚକାର ମତିମାନ୍ ମତିମ୍ ।
କାୟଵୃଦ୍ଧିଂ ପ୍ରଵେଗଂ ଚ ମମ ଦୃଷ୍ଟ୍ଵୈଵ ରାକ୍ଷସାଃ ॥ 204 ॥

ମୟି କୌତୂହଲଂ କୁର୍ୟରିତି ମେନେ ମହାକପିଃ ।
ତତଃ ଶରୀରଂ ସଂକ୍ଷିପ୍ୟ ତନ୍ମହୀଧରସନ୍ନିଭମ୍ ॥ 205 ॥

ପୁନଃ ପ୍ରକୃତିମାପେଦେ ଵୀତମୋହ ଇଵାତ୍ମଵାନ୍ ।
ତଦ୍ରୂପମତିସଂକ୍ଷିପ୍ୟ ହନୁମାନ୍ ପ୍ରକୃତୌ ସ୍ଥିତଃ ॥ 206 ॥

ତ୍ରୀନ୍ କ୍ରମାନିଵ ଵିକ୍ରମ୍ୟ ବଲିଵୀର୍ୟହରୋ ହରିଃ ।
ସ ଚାରୁନାନାଵିଧରୂପଧାରୀ ପରଂ ସମାସାଦ୍ୟ ସମୁଦ୍ରତୀରମ୍ ।
ପରୈରଶକ୍ୟଃ ପ୍ରତିପନ୍ନରୂପଃ ସମୀକ୍ଷିତାତ୍ମା ସମଵେକ୍ଷିତାର୍ଧଃ ॥ 207 ॥

ତତଃ ସ ଲଂବସ୍ୟ ଗିରେଃ ସମୃଦ୍ଧେ ଵିଚିତ୍ରକୂଟେ ନିପପାତ କୂଟେ ।
ସକେତକୋଦ୍ଦାଲକନାଲିକେରେ ମହାଦ୍ରିକୂଟପ୍ରତିମୋ ମହାତ୍ମା ॥ 208 ॥

ତତସ୍ତୁ ସଂପ୍ରାପ୍ୟ ସମୁଦ୍ରତୀରଂ ସମୀକ୍ଷ୍ୟ ଲଂକାଂ ଗିରିଵର୍ୟମୂର୍ଧ୍ନି ।
କପିସ୍ତୁ ତସ୍ନିନ୍ନିପପାତ ପର୍ଵତେ ଵିଧୂୟ ରୂପଂ ଵ୍ୟଥୟନ୍ମୃଗଦ୍ଵିଜାନ୍ ॥ 209 ॥

ସ ସାଗରଂ ଦାନଵପନ୍ନଗାୟୁତଂ ବଲେନ ଵିକ୍ରମ୍ୟ ମହୋର୍ମିମାଲିନମ୍ ।
ନିପତ୍ୟ ତୀରେ ଚ ମହୋଦଧେସ୍ତଦା ଦଦର୍ଶ ଲଂକାମମରାଵତୀମିଵ ॥ 210 ॥

ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ପ୍ରଥମସ୍ସର୍ଗଃ ॥