ශ්රීමද්වාල්මීකීය රාමායණේ සුංදරකාංඩම් ।
අථ ෂෝඩශස්සර්ගඃ ।
ප්රශස්ය තු ප්රශස්තව්යාං සීතාං තාං හරිපුංගවඃ ।
ගුණාභිරාමං රාමං ච පුනශ්චිංතාපරෝऽභවත් ॥ 1 ॥
ස මුහූර්තමිව ධ්යාත්වා බාෂ්පපර්යාකුලේක්ෂණඃ ।
සීතාමාශ්රිත්ය තේජස්වී හනූමාන්විලලාප හ ॥ 2 ॥
මාන්යා ගුරුවිනීතස්ය ලක්ෂ්මණස්ය ගුරුප්රියා ।
යදි සීතාऽऽපි දුඃඛාර්තා කාලෝ හි දුරතික්රමඃ ॥ 3 ॥
රාමස්ය ව්යවසායජ්ඤා ලක්ෂ්මණස්ය ච ධීමතඃ ।
නාත්යර්ථං ක්ෂුභ්යතේ දේවී ගංගේව ජලදාගමේ ॥ 4 ॥
තුල්යශීලවයෝවෘත්තාං තුල්යාභිජනලක්ෂණාම් ।
රාඝවෝऽऽර්හති වෛදේහීං තං චේයමසිතේක්ෂණා ॥ 5 ॥
තාං දෘෂ්ට්වා නවහේමාභාං ලෝකකාංතාමිව ශ්රියම් ।
ජගාම මනසා රාමං වචනං චේදමබ්රවීත් ॥ 6 ॥
අස්යා හේතෝර්විශාලාක්ෂ්යා හතෝ වාලී මහාබලඃ ।
රාවණප්රතිමෝ වීර්යේ කබංධශ්ච නිපාතිතඃ ॥ 7 ॥
විරාධශ්ච හතඃ සංඛ්යේ රාක්ෂසෝ භීමවික්රමඃ ।
වනේ රාමේණ වික්රම්ය මහේංද්රේණේව ශංබරඃ ॥ 8 ॥
චතුර්දශ සහස්රාණි රක්ෂසාං භීමකර්මණාම් ।
නිහතානි ජනස්ථානේ ශරෛරග්නිශිඛෝපමෛඃ ॥ 9 ॥
ඛරශ්ච නිහතසංඛ්යේ ත්රිශිරාශ්ච නිපාතිතඃ ।
දූෂණශ්ච මහාතේජා රාමේණ විදිතාත්මනා ॥ 10 ॥
ඓශ්වර්යං වානරාණාං ච දුර්ලභං වාලිපාලිතම් ।
අස්යා නිමිත්තේ සුග්රීවඃ ප්රාප්තවාන් ලෝකසත්කෘතම් ॥ 11 ॥
සාගරශ්ච මයා ක්රාංතශ්ශ්රීමාන්නදනදීපතිඃ ।
අස්යා හේතෝර්විශාලාක්ෂ්යාඃ පුරී චේයමවේක්ෂිතා ॥ 12 ॥
යදි රාමඃ සමුද්රාංතාං මේදිනීං පරිවර්තයේත් ।
අස්යාඃ කෘතේ ජගච්චාපි යුක්තමිත්යේව මේ මතිඃ ॥ 13 ॥
රාජ්යං වා ත්රිෂු ලෝකේෂු සීතා වා ජනකාත්මජා ।
ත්රෛලෝක්යරාජ්යං සකලං සීතායා නාප්නුයාත්කලාම් ॥ 14 ॥
ඉයං සා ධර්මශීලස්ය මෛථිලස්ය මහාත්මනඃ ।
සුතා ජනකරාජස්ය සීතා භර්තෘදෘඪව්රතා ॥ 15 ॥
උත්ථිතා මේදිනීං භිත්ත්වා ක්ෂේත්රේ හලමුඛක්ෂතේ ।
පද්මරේණුනිභෛඃ කීර්ණා ශුභෛඃ කේදාරපාම්සුභිඃ ॥ 16 ॥
වික්රාංතස්යාර්යශීලස්ය සංයුගේෂ්න්විවර්තිනඃ ।
ස්නුෂා දශරථස්යෛෂා ජ්යේෂ්ඨා රාජ්ඤෝ යශස්විනී ॥ 17 ॥
ධර්මජ්ඤස්ය කෘතජ්ඤස්ය රාමස්ය විදිතාත්මනඃ ।
ඉයං සා දයිතා භාර්යා රාක්ෂසීවශමාගතා ॥ 18 ॥
සර්වාන් භෝගාන්පරිත්යජ්ය භර්තෘස්නේහබලාත්කෘතා ।
අචිංතයිත්වා දුඃඛානි ප්රවිෂ්ටා නිර්ජනං වනම් ॥ 19 ॥
සංතුෂ්ටා ඵලමූලේන භර්තෘශුශ්රූෂණේ රතා ।
යා පරාං භජතේ ප්රීතිං වනේऽऽපි භවනේ යථා ॥ 20 ॥
සේයං කනකවර්ණාංගී නිත්යං සුස්මිතභාෂිණී ।
සහතේ යාතනාමේතාමනර්ථානාමභාගිනී ॥ 21 ॥
ඉමාං තු ශීලසංපන්නාං ද්රෂ්ටුමර්හති රාඝවඃ ।
රාවණේන ප්රමථිතාං ප්රපාමිව පිපාසිතඃ ॥ 22 ॥
අස්යා නූනං පුනර්ලාභාද්රාඝවඃ ප්රීතිමේෂ්යති ।
රාජා රාජ්යපරිභ්රෂ්ටඃ පුනඃ ප්රාප්යේව මේදිනීම් ॥ 23 ॥
කාමභෝගෛඃ පරිත්යක්තා හීනා බංධුජනේන ච ।
ධාරයත්යාත්මනෝ දේහං තත්සමාගමකාංක්ෂිණී ॥ 24 ॥
නෛෂා පශ්යති රාක්ෂස්යෝ නේමාන්පුෂ්පඵලද්රුමාන් ।
ඒකස්ථහෘදයා නූනං රාමමේවානුපශ්යති ॥ 25 ॥
භර්තා නාම පරං නාර්යා භූෂණං භූෂණාදපි ।
ඒෂා තු රහිතා තේන භූෂණාර්හා න ශෝභතේ ॥ 26 ॥
දුෂ්කරං කුරුතේ රාමෝ හීනෝ යදනයා ප්රභුඃ ।
ධාරයත්යාත්මනෝ දේහං න දුඃඛේනාවසීදති ॥ 27 ॥
ඉමාමසිතකේශාංතාං ශතපත්රනිභේක්ෂණාම් ।
සුඛාර්හාං දුඃඛිතාං දෘෂ්ට්වා මමාපි ව්යථිතං මනඃ ॥ 28 ॥
ක්ෂතික්ෂමා පුෂ්කරසන්නිභාක්ෂී යා රක්ෂිතා රාඝවලක්ෂ්මණාභ්යාම් ।
සා රාක්ෂසීභිර්විකෘතේක්ෂණාභිඃ සංරක්ෂ්යතේ සංප්රති වෘක්ෂමූලේ ॥ 29 ॥
හිමහතනලිනීව නෂ්ටශෝභා ව්යසනපරංපරයා නිපීඩ්යමානා ।
සහචරරහිතේව චක්රවාකී ජනකසුතා කෘපණාං දශාං ප්රපන්නා ॥ 30 ॥
අස්යා හි පුෂ්පාවනතාග්රශාඛාඃ ශෝකං දෘඪං වෛ ජනයංත්යශෝකාඃ ।
හිමව්යපායේන ච ශීතරශ්මි රභ්යුත්ථිතෝ නෛකසහස්රරශ්මිඃ ॥ 31 ॥
ඉත්යේවමර්ථං කපිරන්වවේක්ෂ්ය සීතේයමිත්යේව නිවිෂ්ටබුද්ධිඃ ।
සංශ්රිත්ය තස්මින්නිෂසාද වෘක්ෂේ බලී හරීණාමෘෂභස්තරස්වී ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ෂෝඩශස්සර්ගඃ ॥
