ශ්රීමද්වාල්මීකීය රාමායණේ සුංදරකාංඩම් ।
අථ ඒකචත්වාරිංශස්සර්ගඃ ।
ස ච වාග්භිඃ ප්රශස්තාභිර්ගමිෂ්යන්පූජිතස්තයා ।
තස්මාද්දේශාදපක්රම්ය චිංතයාමාස වානරඃ ॥ 1 ॥
අල්පශේෂමිදං කාර්යං දෘෂ්ටේයමසිතේක්ෂණා ।
ත්රීනුපායානතික්රම්ය චතුර්ථඃ ඉහ විද්යතේ ॥ 2 ॥
න සාම රක්ෂස්සු ගුණාය කල්පතේ න දානමර්ථෝපචිතේෂු යුජ්යතේ ।
න භේදසාධ්යා බලදර්පිතා ජනාඃ පරාක්රමස්ත්වේව මමේහ රෝචතේ ॥ 3 ॥
න චාස්ය කාර්යස්ය පරාක්රමාදෘතේ විනිශ්චයඃ කශ්චිදිහෝපපද්යතේ ।
හතප්රවීරා හි රණේ හි රාක්ෂසාඃ කථංචිදීයුර්යදිහාද්ය මාර්දවම් ॥ 4 ॥
කාර්යේ කර්මණි නිර්දිෂ්ටේ යෝ බහූන්යපි සාධයේත් ।
පූර්වකාර්යාවිරෝධේන ස කාර්යං කර්තුමර්හති ॥ 5 ॥
න හ්යේකස්සාධකෝ හේතුස්ස්වල්පස්යාපීහ කර්මණඃ ।
යෝ හ්යර්ථං බහුධා වේද ස සමර්ථෝऽර්ථසාධනේ ॥ 6 ॥
ඉහෛව තාවත්කෘතනිශ්චයෝ හ්යහං යදි ව්රජේයං ප්ලවගේශ්වරාලයම් ।
පරාත්මසම්මර්දවිශේෂතත්ත්වවිත්තතඃ කෘතං ස්යාන්මම භර්තෘශාසනම් ॥ 7 ॥
කථං නු ඛල්වද්ය භවේත්සුඛාගතං ප්රසහ්ය යුද්ධං මම රාක්ෂසෛඃ සහ ।
තථෛව ඛල්වාත්මබලං ච සාරවත්සම්මානයේන්මාං ච රණේ දශානනඃ ॥ 8 ॥
තතස්සමාසාද්ය රණේ දශානනං සමංත්රිවර්ගං සබලප්රයායිනම් ।
හෘදි ස්ථිතං තස්ය මතං බලං ච වෛ සුඛේන මත්ත්වාऽහමිතඃ පුනර්ව්රජේ ॥ 9 ॥
ඉදමස්ය නෘශංසස්ය නංදනෝපමමුත්තමම් ।
වනං නේත්රමනඃකාංතං නානාද්රුමලතායුතම් ॥ 10 ॥
ඉදං විධ්වංසයිෂ්යාමි ශුෂ්කං වනමිවානලඃ ।
අස්මින්භග්නේ තතඃ කෝපං කරිෂ්යති දශානනඃ ॥ 11 ॥
තතෝ මහත්සාශ්වමහාරථද්විපං බලං සමාදේක්ෂ්යති රාක්ෂසාධිපඃ ।
ත්රිශූලකාලායසපට්ටිසායුධං තතෝ මහද්යුද්ධමිදං භවිෂ්යති ॥ 12 ॥
අහං තු තෛඃ සංයති චංඩවික්රමෛ ස්සමේත්ය රක්ෂෝභිරසහ්ය වික්රමඃ ।
නිහත්ය තද්රාවණචෝදිතං බලං සුඛං ගමිෂ්යාමි කපීශ්වරාලයම් ॥ 13 ॥
තතෝ මාරුතවත්කෘද්ධෝ මාරුතිර්භීමවික්රමඃ ।
ඌරුවේගේන මහතා ද්රුමාන්ක්ෂේප්තුමථාරභත් ॥ 14 ॥
තතස්තු හනුමාන්වීරෝ බභංජ ප්රමදාවනම් ।
මත්තද්විජසමාඝුෂ්ටං නානාද්රුමලතායුතම් ॥ 15 ॥
තද්වනං මථිතෛර්වෘක්ෂෛර්භින්නෛශ්ච සලිලාශයෛඃ ।
චූර්ණිතෛඃ පර්වතාග්රෛශ්ච බභූවාප්රියදර්ශනම් ॥ 16 ॥
නානාශකුංතවිරුතෛඃ ප්රභින්නෛස්සලිලාශයෛඃ ।
තාම්රෛඃ කිසලයෛඃ ක්ලාංතෛඃ ක්ලාංතද්රුමලතායුතම් ॥ 17 ॥
න බභෞ තද්වනං තත්ර දාවානලහතං යථා ।
ව්යාකුලාවරණා රේජුර්විහ්වලා ඉව තා ලතාඃ ॥ 18 ॥
ලතාගෘහෛශ්චිත්රගෘහෛශ්ච නාශිතෛර්මහෝරගෛර්ව්යාලමෘගෛශ්ච නිර්ධුතෛඃ ।
ශිලාගෘහෛරුන්මථිතෛස්තථා ගෘහෛඃ ප්රණෂ්ටරූපං තදභූන්මහද්වනම් ॥ 19 ॥
සා විහ්වලාऽශෝකලතාප්රතානා වනස්ථලී ශෝකලතාප්රතානා ।
ජාතා දශාස්යප්රමදාවනස්ය කපේර්බලාද්ධි ප්රමදාවනස්ය ॥ 20 ॥
ස තස්ය කෘත්වාර්ථපතේර්මහාකපිර්මහද්ව්යලීකං මනසෝ මහාත්මනඃ ।
යුයුත්සුරේකෝ බහුභිර්මහාබලෛශ්ශියා ජ්වලංස්තෝරණමාස්ථිතඃ කපිඃ ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකචත්වාරිංශස්සර්ගඃ ॥
