শ্রীমদ্বাল্মীকীয় রামাযণে সুংদরকাংডম্ ।
অথ একচত্বারিংশস্সর্গঃ ।
স চ বাগ্ভিঃ প্রশস্তাভির্গমিষ্যন্পূজিতস্তয়া ।
তস্মাদ্দেশাদপক্রম্য় চিংতয়ামাস বানরঃ ॥ 1 ॥
অল্পশেষমিদং কার্য়ং দৃষ্টেযমসিতেক্ষণা ।
ত্রীনুপায়ানতিক্রম্য় চতুর্থঃ ইহ বিদ্যতে ॥ 2 ॥
ন সাম রক্ষস্সু গুণায় কল্পতে ন দানমর্থোপচিতেষু যুজ্যতে ।
ন ভেদসাধ্য়া বলদর্পিতা জনাঃ পরাক্রমস্ত্বেব মমেহ রোচতে ॥ 3 ॥
ন চাস্য় কার্যস্য় পরাক্রমাদৃতে বিনিশ্চয়ঃ কশ্চিদিহোপপদ্যতে ।
হতপ্রবীরা হি রণে হি রাক্ষসাঃ কথংচিদীয়ুর্যদিহাদ্য় মার্দবম্ ॥ 4 ॥
কার্য়ে কর্মণি নির্দিষ্টে যো বহূন্যপি সাধয়েত্ ।
পূর্বকার্য়াবিরোধেন স কার্য়ং কর্তুমর্হতি ॥ 5 ॥
ন হ্য়েকস্সাধকো হেতুস্স্বল্পস্য়াপীহ কর্মণঃ ।
যো হ্যর্থং বহুধা বেদ স সমর্থোঽর্থসাধনে ॥ 6 ॥
ইহৈব তাবত্কৃতনিশ্চয়ো হ্যহং যদি ব্রজেয়ং প্লবগেশ্বরালযম্ ।
পরাত্মসম্মর্দবিশেষতত্ত্ববিত্ততঃ কৃতং স্য়ান্মম ভর্তৃশাসনম্ ॥ 7 ॥
কথং নু খল্বদ্য় ভবেত্সুখাগতং প্রসহ্য় যুদ্ধং মম রাক্ষসৈঃ সহ ।
তথৈব খল্বাত্মবলং চ সারবত্সম্মানয়েন্মাং চ রণে দশাননঃ ॥ 8 ॥
ততস্সমাসাদ্য় রণে দশাননং সমংত্রিবর্গং সবলপ্রয়ায়িনম্ ।
হৃদি স্থিতং তস্য় মতং বলং চ বৈ সুখেন মত্ত্বাঽহমিতঃ পুনর্ব্রজে ॥ 9 ॥
ইদমস্য় নৃশংসস্য় নংদনোপমমুত্তমম্ ।
বনং নেত্রমনঃকাংতং নানাদ্রুমলতায়ুতম্ ॥ 10 ॥
ইদং বিধ্বংসয়িষ্য়ামি শুষ্কং বনমিবানলঃ ।
অস্মিন্ভগ্নে ততঃ কোপং করিষ্যতি দশাননঃ ॥ 11 ॥
ততো মহত্সাশ্বমহারথদ্বিপং বলং সমাদেক্ষ্যতি রাক্ষসাধিপঃ ।
ত্রিশূলকালাযসপট্টিসায়ুধং ততো মহদ্য়ুদ্ধমিদং ভবিষ্যতি ॥ 12 ॥
অহং তু তৈঃ সংযতি চংডবিক্রমৈ স্সমেত্য় রক্ষোভিরসহ্য় বিক্রমঃ ।
নিহত্য় তদ্রাবণচোদিতং বলং সুখং গমিষ্য়ামি কপীশ্বরালযম্ ॥ 13 ॥
ততো মারুতবত্কৃদ্ধো মারুতির্ভীমবিক্রমঃ ।
ঊরুবেগেন মহতা দ্রুমান্ক্ষেপ্তুমথারভত্ ॥ 14 ॥
ততস্তু হনুমান্বীরো বভংজ প্রমদাবনম্ ।
মত্তদ্বিজসমাঘুষ্টং নানাদ্রুমলতায়ুতম্ ॥ 15 ॥
তদ্বনং মথিতৈর্বৃক্ষৈর্ভিন্নৈশ্চ সলিলাশয়ৈঃ ।
চূর্ণিতৈঃ পর্বতাগ্রৈশ্চ বভূবাপ্রিযদর্শনম্ ॥ 16 ॥
নানাশকুংতবিরুতৈঃ প্রভিন্নৈস্সলিলাশয়ৈঃ ।
তাম্রৈঃ কিসলয়ৈঃ ক্লাংতৈঃ ক্লাংতদ্রুমলতায়ুতম্ ॥ 17 ॥
ন বভৌ তদ্বনং তত্র দাবানলহতং যথা ।
ব্য়াকুলাবরণা রেজুর্বিহ্বলা ইব তা লতাঃ ॥ 18 ॥
লতাগৃহৈশ্চিত্রগৃহৈশ্চ নাশিতৈর্মহোরগৈর্ব্য়ালমৃগৈশ্চ নির্ধুতৈঃ ।
শিলাগৃহৈরুন্মথিতৈস্তথা গৃহৈঃ প্রণষ্টরূপং তদভূন্মহদ্বনম্ ॥ 19 ॥
সা বিহ্বলাঽশোকলতাপ্রতানা বনস্থলী শোকলতাপ্রতানা ।
জাতা দশাস্যপ্রমদাবনস্য় কপের্বলাদ্ধি প্রমদাবনস্য় ॥ 20 ॥
স তস্য় কৃত্বার্থপতের্মহাকপির্মহদ্ব্যলীকং মনসো মহাত্মনঃ ।
যুয়ুত্সুরেকো বহুভির্মহাবলৈশ্শিয়া জ্বলংস্তোরণমাস্থিতঃ কপিঃ ॥ 21 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে একচত্বারিংশস্সর্গঃ ॥
