śrīmadvālmīkīya rāmāyaṇē sundarakāṇḍam ।
atha ēkōnaṣaṣṭitamassargaḥ ।
ētadākhyāya tatsarvaṃ hanumānmārutātmajaḥ ।
bhūyassamupachakrāma vachanaṃ vaktumuttaram ॥ 1 ॥
saphalō rāghavōdyōga ssugrīvasya cha sambhramaḥ ।
śīlamāsādya sītāyā mama cha pravaṇaṃ manaḥ ॥ 2 ॥
tapasā nirdahēllōkānkruddhō vā nirdahēdapi ।
sarvadhātipravṛddhō'sau rāvaṇō rākṣasādhipaḥ ॥ 3 ॥
tasya tāṃ spṛśatō gātraṃ tapasā na vināśitam ।
na tadagniśikhā kuryātsaṃspṛṣṭā pāṇinā satī ॥ 4 ॥
janakasyātmajā kuryādyatkrōdhakaluṣīkṛtā ।
jāmbavatpramukhān sarvānanujñāpya mahāharīn ॥ 5 ॥
asminnēvaṃ gatē kāryē bhavatāṃ cha nivēditē ।
nyāyyaṃ sma saha vaidēhyā draṣṭuṃ tau pārthivātmajau ॥ 6 ॥
ahamēkō'pi paryāptassarākṣasagaṇāṃ purīm ।
tāṃ laṅkāṃ tarasā hantuṃ rāvaṇaṃ cha mahābalam ॥ 7 ॥
kiṃ puna ssahitō vīrairbalavadbhiḥ kṛtātmabhiḥ ।
kṛtāstraiḥ plavagaiśśūrairbhavadbhivijayaiṣibhiḥ ॥ 8 ॥
ahaṃ tu rāvaṇaṃ yuddhē sasainyaṃ sapurassaram ।
sahaputtraṃ vadhiṣyāmi sahōdarayutaṃ yudhi ॥ 9 ॥
brāhmamaindraṃ cha raudraṃ cha vāyavyaṃ vāraṇaṃ tathā ।
yadi śakrajitō'strāṇi durnirīkṣāṇi saṃyugē ॥ 10 ॥
tānyahaṃ vadhiṣyāmi haniṣyāmi cha rākṣasān ।
bhavatāmabhyanujñātō vikramō mē ruṇaddhi tam ॥ 11 ॥
mayātulā visṛṣṭā hi śailavṛṣṭirnirantarā ।
dēvānapi raṇē hanyātkiṃ punastānniśācharān ॥ 12 ॥
sāgarō'pyatiyādvēlāṃ mandaraḥ prachalēdapi ।
na jāmbavantaṃ samarē kampayēdarivāhinī ॥ 13 ॥
sarvarākṣasasaṅghānāṃ rākṣasā yē cha pūrvakāḥ ।
alamēkō vināśāya vīrō vālisutaḥ kapiḥ ॥ 14 ॥
panasasyōruvēgēna nīlasya cha mahātmanaḥ ।
mandarō'pyavaśīryēta kimpunaryudhi rākṣasāḥ ॥ 15 ॥
sadēvāsurayakṣēṣu gandharvōragapakṣiṣu ।
maindasya pratiyōddhāraṃ śaṃsata dvividasya vā ॥ 16 ॥
aśviputrau mahābhāgāvētau plavagasattamau ।
ētayōḥ pratiyōddāraṃ na paśyāmi raṇājirē ॥ 17 ॥
pitāmahavarōtsēkātparamaṃ darpamāsthitau ।
amṛtaprāśināvētau sarvavānarasattamau ॥ 18 ॥
aśvinōrmānanārthaṃ hi sarvalōkapitāmahaḥ ।
sarvāvadhyatvamatulamanayōrdattavānpurā ॥ 19 ॥
varōtsēkēna mattau cha pramathya mahatīṃ chamūm ।
surāṇāmamṛtaṃ vīrau pītavantau plavaṅgamau ॥ 20 ॥
ētāvēva hi saṅkṛddhau savājirathakuñjarām ।
laṅkāṃ nāśayituṃ śaktau sarvē tiṣṭhantu vānarāḥ ॥ 21 ॥
mayaiva nihatā laṅkā dagdhā bhasmīkṛtā punaḥ ।
rājamārgēṣu sarvatra nāma viśrāvitaṃ mayā ॥ 22 ॥
jayatyatibalō rāmō lakṣmaṇaścha mahābalaḥ ।
rājā jayati sugrīvō rāghavēṇābhipālitaḥ ॥ 23 ॥
ahaṃ kōsalarājasya dāsaḥ pavanasambhavaḥ ।
hanumāniti sarvatra nāma viśrāvitaṃ mayā ॥ 24 ॥
aśōkavanikāmadhyē rāvaṇasya durātmanaḥ ।
adha stāchChiṃśupāvṛkṣē sādhvī karuṇamāsthitā ॥ 25 ॥
rākṣasībhiḥ parivṛtā śōkasantāpakarśitā ।
mēghalēkhāparivṛtā chandralēkhēva niṣprabhā ॥ 26 ॥
achintayantī vaidēhī rāvaṇaṃ baladarpitam ।
pativratā cha suśrōṇī avaṣṭabdhā cha jānakī ॥ 27 ॥
anuraktā hi vaidēhī rāmaṃ sarvātmanā śubhā ।
ananyachittā rāmē cha paulōmīva purandarē ॥ 28 ॥
tadēkavāsassaṃvītā rajōdhvastā tathaiva cha ।
śōkasantāpadīnāṅgī sītā bhartṛhitē ratā ॥ 29 ॥
sā mayā rākṣasīmadhyē tarjyamānā muhurmuhuḥ ।
rākṣasībhirvirūpābhirdṛṣṭā hi pramadāvanē ॥ 30 ॥
ēkavēṇīdharā dīnā bhartṛchintāparāyaṇā ।
adhaśśayyā vivarṇāṅgī padminīva himāgamē ॥ 31 ॥
rāvaṇādvinivṛttārthā martavyakṛtaniśchayā ।
kathañchinmṛgaśābākṣī viśvāsamupapāditā ॥ 32 ॥
tataḥ sambhāṣitā chaiva sarvamarthaṃ cha darśitā ।
rāmasugrīvasakhyaṃ cha śrutvā prītimupāgatā ॥ 33 ॥
niyatassamudāchārō bhaktirbhartari chōttamā ।
yanna hanti daśagrīvaṃ sā mahātmā kṛtāgasam ॥ 34 ॥
nimittamātraṃ rāmastu vadhē tasya bhaviṣyati ।
sā prakṛtyaiva tanvaṅgī tadviyōgāchcha karśitā ॥ 35 ॥
pratipatpāṭhaśīlasya vidyēva tanumatāṃ gatā ।
ēvamāstē mahābhāgā sītā śōkaparāyaṇā ॥ 36 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkōnaṣaṣṭitamassargaḥ ॥
