શ્રીમદ્વાલ્મીકીય રામાયણે સુંદરકાંડમ્ ।
અથ એકોનષષ્ટિતમસ્સર્ગઃ ।
એતદાખ્યાય તત્સર્વં હનુમાન્મારુતાત્મજઃ ।
ભૂયસ્સમુપચક્રામ વચનં વક્તુમુત્તરમ્ ॥ 1 ॥
સફલો રાઘવોદ્યોગ સ્સુગ્રીવસ્ય ચ સંભ્રમઃ ।
શીલમાસાદ્ય સીતાયા મમ ચ પ્રવણં મનઃ ॥ 2 ॥
તપસા નિર્દહેલ્લોકાન્ક્રુદ્ધો વા નિર્દહેદપિ ।
સર્વધાતિપ્રવૃદ્ધોઽસૌ રાવણો રાક્ષસાધિપઃ ॥ 3 ॥
તસ્ય તાં સ્પૃશતો ગાત્રં તપસા ન વિનાશિતમ્ ।
ન તદગ્નિશિખા કુર્યાત્સંસ્પૃષ્ટા પાણિના સતી ॥ 4 ॥
જનકસ્યાત્મજા કુર્યાદ્યત્ક્રોધકલુષીકૃતા ।
જાંબવત્પ્રમુખાન્ સર્વાનનુજ્ઞાપ્ય મહાહરીન્ ॥ 5 ॥
અસ્મિન્નેવં ગતે કાર્યે ભવતાં ચ નિવેદિતે ।
ન્યાય્યં સ્મ સહ વૈદેહ્યા દ્રષ્ટું તૌ પાર્થિવાત્મજૌ ॥ 6 ॥
અહમેકોઽપિ પર્યાપ્તસ્સરાક્ષસગણાં પુરીમ્ ।
તાં લંકાં તરસા હંતું રાવણં ચ મહાબલમ્ ॥ 7 ॥
કિં પુન સ્સહિતો વીરૈર્બલવદ્ભિઃ કૃતાત્મભિઃ ।
કૃતાસ્ત્રૈઃ પ્લવગૈશ્શૂરૈર્ભવદ્ભિવિજયૈષિભિઃ ॥ 8 ॥
અહં તુ રાવણં યુદ્ધે સસૈન્યં સપુરસ્સરમ્ ।
સહપુત્ત્રં વધિષ્યામિ સહોદરયુતં યુધિ ॥ 9 ॥
બ્રાહ્મમૈંદ્રં ચ રૌદ્રં ચ વાયવ્યં વારણં તથા ।
યદિ શક્રજિતોઽસ્ત્રાણિ દુર્નિરીક્ષાણિ સંયુગે ॥ 10 ॥
તાન્યહં વધિષ્યામિ હનિષ્યામિ ચ રાક્ષસાન્ ।
ભવતામભ્યનુજ્ઞાતો વિક્રમો મે રુણદ્ધિ તમ્ ॥ 11 ॥
મયાતુલા વિસૃષ્ટા હિ શૈલવૃષ્ટિર્નિરંતરા ।
દેવાનપિ રણે હન્યાત્કિં પુનસ્તાન્નિશાચરાન્ ॥ 12 ॥
સાગરોઽપ્યતિયાદ્વેલાં મંદરઃ પ્રચલેદપિ ।
ન જાંબવંતં સમરે કંપયેદરિવાહિની ॥ 13 ॥
સર્વરાક્ષસસંઘાનાં રાક્ષસા યે ચ પૂર્વકાઃ ।
અલમેકો વિનાશાય વીરો વાલિસુતઃ કપિઃ ॥ 14 ॥
પનસસ્યોરુવેગેન નીલસ્ય ચ મહાત્મનઃ ।
મંદરોઽપ્યવશીર્યેત કિંપુનર્યુધિ રાક્ષસાઃ ॥ 15 ॥
સદેવાસુરયક્ષેષુ ગંધર્વોરગપક્ષિષુ ।
મૈંદસ્ય પ્રતિયોદ્ધારં શંસત દ્વિવિદસ્ય વા ॥ 16 ॥
અશ્વિપુત્રૌ મહાભાગાવેતૌ પ્લવગસત્તમૌ ।
એતયોઃ પ્રતિયોદ્દારં ન પશ્યામિ રણાજિરે ॥ 17 ॥
પિતામહવરોત્સેકાત્પરમં દર્પમાસ્થિતૌ ।
અમૃતપ્રાશિનાવેતૌ સર્વવાનરસત્તમૌ ॥ 18 ॥
અશ્વિનોર્માનનાર્થં હિ સર્વલોકપિતામહઃ ।
સર્વાવધ્યત્વમતુલમનયોર્દત્તવાન્પુરા ॥ 19 ॥
વરોત્સેકેન મત્તૌ ચ પ્રમથ્ય મહતીં ચમૂમ્ ।
સુરાણામમૃતં વીરૌ પીતવંતૌ પ્લવંગમૌ ॥ 20 ॥
એતાવેવ હિ સંકૃદ્ધૌ સવાજિરથકુંજરામ્ ।
લંકાં નાશયિતું શક્તૌ સર્વે તિષ્ઠંતુ વાનરાઃ ॥ 21 ॥
મયૈવ નિહતા લંકા દગ્ધા ભસ્મીકૃતા પુનઃ ।
રાજમાર્ગેષુ સર્વત્ર નામ વિશ્રાવિતં મયા ॥ 22 ॥
જયત્યતિબલો રામો લક્ષ્મણશ્ચ મહાબલઃ ।
રાજા જયતિ સુગ્રીવો રાઘવેણાભિપાલિતઃ ॥ 23 ॥
અહં કોસલરાજસ્ય દાસઃ પવનસંભવઃ ।
હનુમાનિતિ સર્વત્ર નામ વિશ્રાવિતં મયા ॥ 24 ॥
અશોકવનિકામધ્યે રાવણસ્ય દુરાત્મનઃ ।
અધ સ્તાચ્છિંશુપાવૃક્ષે સાધ્વી કરુણમાસ્થિતા ॥ 25 ॥
રાક્ષસીભિઃ પરિવૃતા શોકસંતાપકર્શિતા ।
મેઘલેખાપરિવૃતા ચંદ્રલેખેવ નિષ્પ્રભા ॥ 26 ॥
અચિંતયંતી વૈદેહી રાવણં બલદર્પિતમ્ ।
પતિવ્રતા ચ સુશ્રોણી અવષ્ટબ્ધા ચ જાનકી ॥ 27 ॥
અનુરક્તા હિ વૈદેહી રામં સર્વાત્મના શુભા ।
અનન્યચિત્તા રામે ચ પૌલોમીવ પુરંદરે ॥ 28 ॥
તદેકવાસસ્સંવીતા રજોધ્વસ્તા તથૈવ ચ ।
શોકસંતાપદીનાંગી સીતા ભર્તૃહિતે રતા ॥ 29 ॥
સા મયા રાક્ષસીમધ્યે તર્જ્યમાના મુહુર્મુહુઃ ।
રાક્ષસીભિર્વિરૂપાભિર્દૃષ્ટા હિ પ્રમદાવને ॥ 30 ॥
એકવેણીધરા દીના ભર્તૃચિંતાપરાયણા ।
અધશ્શય્યા વિવર્ણાંગી પદ્મિનીવ હિમાગમે ॥ 31 ॥
રાવણાદ્વિનિવૃત્તાર્થા મર્તવ્યકૃતનિશ્ચયા ।
કથંચિન્મૃગશાબાક્ષી વિશ્વાસમુપપાદિતા ॥ 32 ॥
તતઃ સંભાષિતા ચૈવ સર્વમર્થં ચ દર્શિતા ।
રામસુગ્રીવસખ્યં ચ શ્રુત્વા પ્રીતિમુપાગતા ॥ 33 ॥
નિયતસ્સમુદાચારો ભક્તિર્ભર્તરિ ચોત્તમા ।
યન્ન હંતિ દશગ્રીવં સા મહાત્મા કૃતાગસમ્ ॥ 34 ॥
નિમિત્તમાત્રં રામસ્તુ વધે તસ્ય ભવિષ્યતિ ।
સા પ્રકૃત્યૈવ તન્વંગી તદ્વિયોગાચ્ચ કર્શિતા ॥ 35 ॥
પ્રતિપત્પાઠશીલસ્ય વિદ્યેવ તનુમતાં ગતા ।
એવમાસ્તે મહાભાગા સીતા શોકપરાયણા ॥ 36 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે એકોનષષ્ટિતમસ્સર્ગઃ ॥
