ശ്രീമദ്വാല്മീകീയ രാമായണേ സുംദരകാംഡമ് ।
അഥ ഏകോനഷഷ്ടിതമസ്സര്ഗഃ ।
ഏതദാഖ്യായ തത്സർവം ഹനുമാന്മാരുതാത്മജഃ ।
ഭൂയസ്സമുപചക്രാമ വചനം വക്തുമുത്തരമ് ॥ 1 ॥
സഫലോ രാഘവോദ്യോഗ സ്സുഗ്രീവസ്യ ച സംഭ്രമഃ ।
ശീലമാസാദ്യ സീതായാ മമ ച പ്രവണം മനഃ ॥ 2 ॥
തപസാ നിര്ദഹേല്ലോകാന്ക്രുദ്ധോ വാ നിര്ദഹേദപി ।
സർവധാതിപ്രവൃദ്ധോഽസൌ രാവണോ രാക്ഷസാധിപഃ ॥ 3 ॥
തസ്യ താം സ്പൃശതോ ഗാത്രം തപസാ ന വിനാശിതമ് ।
ന തദഗ്നിശിഖാ കുര്യാത്സംസ്പൃഷ്ടാ പാണിനാ സതീ ॥ 4 ॥
ജനകസ്യാത്മജാ കുര്യാദ്യത്ക്രോധകലുഷീകൃതാ ।
ജാംബവത്പ്രമുഖാന് സർവാനനുജ്ഞാപ്യ മഹാഹരീന് ॥ 5 ॥
അസ്മിന്നേവം ഗതേ കാര്യേ ഭവതാം ച നിവേദിതേ ।
ന്യായ്യം സ്മ സഹ വൈദേഹ്യാ ദ്രഷ്ടും തൌ പാര്ഥിവാത്മജൌ ॥ 6 ॥
അഹമേകോഽപി പര്യാപ്തസ്സരാക്ഷസഗണാം പുരീമ് ।
താം ലംകാം തരസാ ഹംതും രാവണം ച മഹാബലമ് ॥ 7 ॥
കിം പുന സ്സഹിതോ വീരൈര്ബലവദ്ഭിഃ കൃതാത്മഭിഃ ।
കൃതാസ്ത്രൈഃ പ്ലവഗൈശ്ശൂരൈര്ഭവദ്ഭിവിജയൈഷിഭിഃ ॥ 8 ॥
അഹം തു രാവണം യുദ്ധേ സസൈന്യം സപുരസ്സരമ് ।
സഹപുത്ത്രം വധിഷ്യാമി സഹോദരയുതം യുധി ॥ 9 ॥
ബ്രാഹ്മമൈംദ്രം ച രൌദ്രം ച വായവ്യം വാരണം തഥാ ।
യദി ശക്രജിതോഽസ്ത്രാണി ദുര്നിരീക്ഷാണി സംയുഗേ ॥ 10 ॥
താന്യഹം വധിഷ്യാമി ഹനിഷ്യാമി ച രാക്ഷസാന് ।
ഭവതാമഭ്യനുജ്ഞാതോ വിക്രമോ മേ രുണദ്ധി തമ് ॥ 11 ॥
മയാതുലാ വിസൃഷ്ടാ ഹി ശൈലവൃഷ്ടിര്നിരംതരാ ।
ദേവാനപി രണേ ഹന്യാത്കിം പുനസ്താന്നിശാചരാന് ॥ 12 ॥
സാഗരോഽപ്യതിയാദ്വേലാം മംദരഃ പ്രചലേദപി ।
ന ജാംബവംതം സമരേ കംപയേദരിവാഹിനീ ॥ 13 ॥
സർവരാക്ഷസസംഘാനാം രാക്ഷസാ യേ ച പൂർവകാഃ ।
അലമേകോ വിനാശായ വീരോ വാലിസുതഃ കപിഃ ॥ 14 ॥
പനസസ്യോരുവേഗേന നീലസ്യ ച മഹാത്മനഃ ।
മംദരോഽപ്യവശീര്യേത കിംപുനര്യുധി രാക്ഷസാഃ ॥ 15 ॥
സദേവാസുരയക്ഷേഷു ഗംധർവോരഗപക്ഷിഷു ।
മൈംദസ്യ പ്രതിയോദ്ധാരം ശംസത ദ്വിവിദസ്യ വാ ॥ 16 ॥
അശ്വിപുത്രൌ മഹാഭാഗാവേതൌ പ്ലവഗസത്തമൌ ।
ഏതയോഃ പ്രതിയോദ്ദാരം ന പശ്യാമി രണാജിരേ ॥ 17 ॥
പിതാമഹവരോത്സേകാത്പരമം ദര്പമാസ്ഥിതൌ ।
അമൃതപ്രാശിനാവേതൌ സർവവാനരസത്തമൌ ॥ 18 ॥
അശ്വിനോര്മാനനാര്ഥം ഹി സർവലോകപിതാമഹഃ ।
സർവാവധ്യത്വമതുലമനയോര്ദത്തവാന്പുരാ ॥ 19 ॥
വരോത്സേകേന മത്തൌ ച പ്രമഥ്യ മഹതീം ചമൂമ് ।
സുരാണാമമൃതം വീരൌ പീതവംതൌ പ്ലവംഗമൌ ॥ 20 ॥
ഏതാവേവ ഹി സംകൃദ്ധൌ സവാജിരഥകുംജരാമ് ।
ലംകാം നാശയിതും ശക്തൌ സർവേ തിഷ്ഠംതു വാനരാഃ ॥ 21 ॥
മയൈവ നിഹതാ ലംകാ ദഗ്ധാ ഭസ്മീകൃതാ പുനഃ ।
രാജമാര്ഗേഷു സർവത്ര നാമ വിശ്രാവിതം മയാ ॥ 22 ॥
ജയത്യതിബലോ രാമോ ലക്ഷ്മണശ്ച മഹാബലഃ ।
രാജാ ജയതി സുഗ്രീവോ രാഘവേണാഭിപാലിതഃ ॥ 23 ॥
അഹം കോസലരാജസ്യ ദാസഃ പവനസംഭവഃ ।
ഹനുമാനിതി സർവത്ര നാമ വിശ്രാവിതം മയാ ॥ 24 ॥
അശോകവനികാമധ്യേ രാവണസ്യ ദുരാത്മനഃ ।
അധ സ്താച്ഛിംശുപാവൃക്ഷേ സാധ്വീ കരുണമാസ്ഥിതാ ॥ 25 ॥
രാക്ഷസീഭിഃ പരിവൃതാ ശോകസംതാപകര്ശിതാ ।
മേഘലേഖാപരിവൃതാ ചംദ്രലേഖേവ നിഷ്പ്രഭാ ॥ 26 ॥
അചിംതയംതീ വൈദേഹീ രാവണം ബലദര്പിതമ് ।
പതിവ്രതാ ച സുശ്രോണീ അവഷ്ടബ്ധാ ച ജാനകീ ॥ 27 ॥
അനുരക്താ ഹി വൈദേഹീ രാമം സർവാത്മനാ ശുഭാ ।
അനന്യചിത്താ രാമേ ച പൌലോമീവ പുരംദരേ ॥ 28 ॥
തദേകവാസസ്സംവീതാ രജോധ്വസ്താ തഥൈവ ച ।
ശോകസംതാപദീനാംഗീ സീതാ ഭര്തൃഹിതേ രതാ ॥ 29 ॥
സാ മയാ രാക്ഷസീമധ്യേ തര്ജ്യമാനാ മുഹുര്മുഹുഃ ।
രാക്ഷസീഭിർവിരൂപാഭിര്ദൃഷ്ടാ ഹി പ്രമദാവനേ ॥ 30 ॥
ഏകവേണീധരാ ദീനാ ഭര്തൃചിംതാപരായണാ ।
അധശ്ശയ്യാ വിവര്ണാംഗീ പദ്മിനീവ ഹിമാഗമേ ॥ 31 ॥
രാവണാദ്വിനിവൃത്താര്ഥാ മര്തവ്യകൃതനിശ്ചയാ ।
കഥംചിന്മൃഗശാബാക്ഷീ വിശ്വാസമുപപാദിതാ ॥ 32 ॥
തതഃ സംഭാഷിതാ ചൈവ സർവമര്ഥം ച ദര്ശിതാ ।
രാമസുഗ്രീവസഖ്യം ച ശ്രുത്വാ പ്രീതിമുപാഗതാ ॥ 33 ॥
നിയതസ്സമുദാചാരോ ഭക്തിര്ഭര്തരി ചോത്തമാ ।
യന്ന ഹംതി ദശഗ്രീവം സാ മഹാത്മാ കൃതാഗസമ് ॥ 34 ॥
നിമിത്തമാത്രം രാമസ്തു വധേ തസ്യ ഭവിഷ്യതി ।
സാ പ്രകൃത്യൈവ തന്വംഗീ തദ്വിയോഗാച്ച കര്ശിതാ ॥ 35 ॥
പ്രതിപത്പാഠശീലസ്യ വിദ്യേവ തനുമതാം ഗതാ ।
ഏവമാസ്തേ മഹാഭാഗാ സീതാ ശോകപരായണാ ॥ 36 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ഏകോനഷഷ്ടിതമസ്സര്ഗഃ ॥
