ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଏକୋନଷଷ୍ଟିତମସ୍ସର୍ଗଃ ।
ଏତଦାଖ୍ୟାୟ ତତ୍ସର୍ଵଂ ହନୁମାନ୍ମାରୁତାତ୍ମଜଃ ।
ଭୂୟସ୍ସମୁପଚକ୍ରାମ ଵଚନଂ ଵକ୍ତୁମୁତ୍ତରମ୍ ॥ 1 ॥
ସଫଲୋ ରାଘଵୋଦ୍ୟୋଗ ସ୍ସୁଗ୍ରୀଵସ୍ୟ ଚ ସଂଭ୍ରମଃ ।
ଶୀଲମାସାଦ୍ୟ ସୀତାୟା ମମ ଚ ପ୍ରଵଣଂ ମନଃ ॥ 2 ॥
ତପସା ନିର୍ଦହେଲ୍ଲୋକାନ୍କ୍ରୁଦ୍ଧୋ ଵା ନିର୍ଦହେଦପି ।
ସର୍ଵଧାତିପ୍ରଵୃଦ୍ଧୋଽସୌ ରାଵଣୋ ରାକ୍ଷସାଧିପଃ ॥ 3 ॥
ତସ୍ୟ ତାଂ ସ୍ପୃଶତୋ ଗାତ୍ରଂ ତପସା ନ ଵିନାଶିତମ୍ ।
ନ ତଦଗ୍ନିଶିଖା କୁର୍ୟାତ୍ସଂସ୍ପୃଷ୍ଟା ପାଣିନା ସତୀ ॥ 4 ॥
ଜନକସ୍ୟାତ୍ମଜା କୁର୍ୟାଦ୍ୟତ୍କ୍ରୋଧକଲୁଷୀକୃତା ।
ଜାଂବଵତ୍ପ୍ରମୁଖାନ୍ ସର୍ଵାନନୁଜ୍ଞାପ୍ୟ ମହାହରୀନ୍ ॥ 5 ॥
ଅସ୍ମିନ୍ନେଵଂ ଗତେ କାର୍ୟେ ଭଵତାଂ ଚ ନିଵେଦିତେ ।
ନ୍ୟାୟ୍ୟଂ ସ୍ମ ସହ ଵୈଦେହ୍ୟା ଦ୍ରଷ୍ଟୁଂ ତୌ ପାର୍ଥିଵାତ୍ମଜୌ ॥ 6 ॥
ଅହମେକୋଽପି ପର୍ୟାପ୍ତସ୍ସରାକ୍ଷସଗଣାଂ ପୁରୀମ୍ ।
ତାଂ ଲଂକାଂ ତରସା ହଂତୁଂ ରାଵଣଂ ଚ ମହାବଲମ୍ ॥ 7 ॥
କିଂ ପୁନ ସ୍ସହିତୋ ଵୀରୈର୍ବଲଵଦ୍ଭିଃ କୃତାତ୍ମଭିଃ ।
କୃତାସ୍ତ୍ରୈଃ ପ୍ଲଵଗୈଶ୍ଶୂରୈର୍ଭଵଦ୍ଭିଵିଜୟୈଷିଭିଃ ॥ 8 ॥
ଅହଂ ତୁ ରାଵଣଂ ୟୁଦ୍ଧେ ସସୈନ୍ୟଂ ସପୁରସ୍ସରମ୍ ।
ସହପୁତ୍ତ୍ରଂ ଵଧିଷ୍ୟାମି ସହୋଦରୟୁତଂ ୟୁଧି ॥ 9 ॥
ବ୍ରାହ୍ମମୈଂଦ୍ରଂ ଚ ରୌଦ୍ରଂ ଚ ଵାୟଵ୍ୟଂ ଵାରଣଂ ତଥା ।
ୟଦି ଶକ୍ରଜିତୋଽସ୍ତ୍ରାଣି ଦୁର୍ନିରୀକ୍ଷାଣି ସଂୟୁଗେ ॥ 10 ॥
ତାନ୍ୟହଂ ଵଧିଷ୍ୟାମି ହନିଷ୍ୟାମି ଚ ରାକ୍ଷସାନ୍ ।
ଭଵତାମଭ୍ୟନୁଜ୍ଞାତୋ ଵିକ୍ରମୋ ମେ ରୁଣଦ୍ଧି ତମ୍ ॥ 11 ॥
ମୟାତୁଲା ଵିସୃଷ୍ଟା ହି ଶୈଲଵୃଷ୍ଟିର୍ନିରଂତରା ।
ଦେଵାନପି ରଣେ ହନ୍ୟାତ୍କିଂ ପୁନସ୍ତାନ୍ନିଶାଚରାନ୍ ॥ 12 ॥
ସାଗରୋଽପ୍ୟତିୟାଦ୍ଵେଲାଂ ମଂଦରଃ ପ୍ରଚଲେଦପି ।
ନ ଜାଂବଵଂତଂ ସମରେ କଂପୟେଦରିଵାହିନୀ ॥ 13 ॥
ସର୍ଵରାକ୍ଷସସଂଘାନାଂ ରାକ୍ଷସା ୟେ ଚ ପୂର୍ଵକାଃ ।
ଅଲମେକୋ ଵିନାଶାୟ ଵୀରୋ ଵାଲିସୁତଃ କପିଃ ॥ 14 ॥
ପନସସ୍ୟୋରୁଵେଗେନ ନୀଲସ୍ୟ ଚ ମହାତ୍ମନଃ ।
ମଂଦରୋଽପ୍ୟଵଶୀର୍ୟେତ କିଂପୁନର୍ୟୁଧି ରାକ୍ଷସାଃ ॥ 15 ॥
ସଦେଵାସୁରୟକ୍ଷେଷୁ ଗଂଧର୍ଵୋରଗପକ୍ଷିଷୁ ।
ମୈଂଦସ୍ୟ ପ୍ରତିୟୋଦ୍ଧାରଂ ଶଂସତ ଦ୍ଵିଵିଦସ୍ୟ ଵା ॥ 16 ॥
ଅଶ୍ଵିପୁତ୍ରୌ ମହାଭାଗାଵେତୌ ପ୍ଲଵଗସତ୍ତମୌ ।
ଏତୟୋଃ ପ୍ରତିୟୋଦ୍ଦାରଂ ନ ପଶ୍ୟାମି ରଣାଜିରେ ॥ 17 ॥
ପିତାମହଵରୋତ୍ସେକାତ୍ପରମଂ ଦର୍ପମାସ୍ଥିତୌ ।
ଅମୃତପ୍ରାଶିନାଵେତୌ ସର୍ଵଵାନରସତ୍ତମୌ ॥ 18 ॥
ଅଶ୍ଵିନୋର୍ମାନନାର୍ଥଂ ହି ସର୍ଵଲୋକପିତାମହଃ ।
ସର୍ଵାଵଧ୍ୟତ୍ଵମତୁଲମନୟୋର୍ଦତ୍ତଵାନ୍ପୁରା ॥ 19 ॥
ଵରୋତ୍ସେକେନ ମତ୍ତୌ ଚ ପ୍ରମଥ୍ୟ ମହତୀଂ ଚମୂମ୍ ।
ସୁରାଣାମମୃତଂ ଵୀରୌ ପୀତଵଂତୌ ପ୍ଲଵଂଗମୌ ॥ 20 ॥
ଏତାଵେଵ ହି ସଂକୃଦ୍ଧୌ ସଵାଜିରଥକୁଂଜରାମ୍ ।
ଲଂକାଂ ନାଶୟିତୁଂ ଶକ୍ତୌ ସର୍ଵେ ତିଷ୍ଠଂତୁ ଵାନରାଃ ॥ 21 ॥
ମୟୈଵ ନିହତା ଲଂକା ଦଗ୍ଧା ଭସ୍ମୀକୃତା ପୁନଃ ।
ରାଜମାର୍ଗେଷୁ ସର୍ଵତ୍ର ନାମ ଵିଶ୍ରାଵିତଂ ମୟା ॥ 22 ॥
ଜୟତ୍ୟତିବଲୋ ରାମୋ ଲକ୍ଷ୍ମଣଶ୍ଚ ମହାବଲଃ ।
ରାଜା ଜୟତି ସୁଗ୍ରୀଵୋ ରାଘଵେଣାଭିପାଲିତଃ ॥ 23 ॥
ଅହଂ କୋସଲରାଜସ୍ୟ ଦାସଃ ପଵନସଂଭଵଃ ।
ହନୁମାନିତି ସର୍ଵତ୍ର ନାମ ଵିଶ୍ରାଵିତଂ ମୟା ॥ 24 ॥
ଅଶୋକଵନିକାମଧ୍ୟେ ରାଵଣସ୍ୟ ଦୁରାତ୍ମନଃ ।
ଅଧ ସ୍ତାଚ୍ଛିଂଶୁପାଵୃକ୍ଷେ ସାଧ୍ଵୀ କରୁଣମାସ୍ଥିତା ॥ 25 ॥
ରାକ୍ଷସୀଭିଃ ପରିଵୃତା ଶୋକସଂତାପକର୍ଶିତା ।
ମେଘଲେଖାପରିଵୃତା ଚଂଦ୍ରଲେଖେଵ ନିଷ୍ପ୍ରଭା ॥ 26 ॥
ଅଚିଂତୟଂତୀ ଵୈଦେହୀ ରାଵଣଂ ବଲଦର୍ପିତମ୍ ।
ପତିଵ୍ରତା ଚ ସୁଶ୍ରୋଣୀ ଅଵଷ୍ଟବ୍ଧା ଚ ଜାନକୀ ॥ 27 ॥
ଅନୁରକ୍ତା ହି ଵୈଦେହୀ ରାମଂ ସର୍ଵାତ୍ମନା ଶୁଭା ।
ଅନନ୍ୟଚିତ୍ତା ରାମେ ଚ ପୌଲୋମୀଵ ପୁରଂଦରେ ॥ 28 ॥
ତଦେକଵାସସ୍ସଂଵୀତା ରଜୋଧ୍ଵସ୍ତା ତଥୈଵ ଚ ।
ଶୋକସଂତାପଦୀନାଂଗୀ ସୀତା ଭର୍ତୃହିତେ ରତା ॥ 29 ॥
ସା ମୟା ରାକ୍ଷସୀମଧ୍ୟେ ତର୍ଜ୍ୟମାନା ମୁହୁର୍ମୁହୁଃ ।
ରାକ୍ଷସୀଭିର୍ଵିରୂପାଭିର୍ଦୃଷ୍ଟା ହି ପ୍ରମଦାଵନେ ॥ 30 ॥
ଏକଵେଣୀଧରା ଦୀନା ଭର୍ତୃଚିଂତାପରାୟଣା ।
ଅଧଶ୍ଶୟ୍ୟା ଵିଵର୍ଣାଂଗୀ ପଦ୍ମିନୀଵ ହିମାଗମେ ॥ 31 ॥
ରାଵଣାଦ୍ଵିନିଵୃତ୍ତାର୍ଥା ମର୍ତଵ୍ୟକୃତନିଶ୍ଚୟା ।
କଥଂଚିନ୍ମୃଗଶାବାକ୍ଷୀ ଵିଶ୍ଵାସମୁପପାଦିତା ॥ 32 ॥
ତତଃ ସଂଭାଷିତା ଚୈଵ ସର୍ଵମର୍ଥଂ ଚ ଦର୍ଶିତା ।
ରାମସୁଗ୍ରୀଵସଖ୍ୟଂ ଚ ଶ୍ରୁତ୍ଵା ପ୍ରୀତିମୁପାଗତା ॥ 33 ॥
ନିୟତସ୍ସମୁଦାଚାରୋ ଭକ୍ତିର୍ଭର୍ତରି ଚୋତ୍ତମା ।
ୟନ୍ନ ହଂତି ଦଶଗ୍ରୀଵଂ ସା ମହାତ୍ମା କୃତାଗସମ୍ ॥ 34 ॥
ନିମିତ୍ତମାତ୍ରଂ ରାମସ୍ତୁ ଵଧେ ତସ୍ୟ ଭଵିଷ୍ୟତି ।
ସା ପ୍ରକୃତ୍ୟୈଵ ତନ୍ଵଂଗୀ ତଦ୍ଵିୟୋଗାଚ୍ଚ କର୍ଶିତା ॥ 35 ॥
ପ୍ରତିପତ୍ପାଠଶୀଲସ୍ୟ ଵିଦ୍ୟେଵ ତନୁମତାଂ ଗତା ।
ଏଵମାସ୍ତେ ମହାଭାଗା ସୀତା ଶୋକପରାୟଣା ॥ 36 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଏକୋନଷଷ୍ଟିତମସ୍ସର୍ଗଃ ॥
