ශ්රීමද්වාල්මීකීය රාමායණේ සුංදරකාංඩම් ।
අථ ඒකෝනෂෂ්ටිතමස්සර්ගඃ ।
ඒතදාඛ්යාය තත්සර්වං හනුමාන්මාරුතාත්මජඃ ।
භූයස්සමුපචක්රාම වචනං වක්තුමුත්තරම් ॥ 1 ॥
සඵලෝ රාඝවෝද්යෝග ස්සුග්රීවස්ය ච සංභ්රමඃ ।
ශීලමාසාද්ය සීතායා මම ච ප්රවණං මනඃ ॥ 2 ॥
තපසා නිර්දහේල්ලෝකාන්ක්රුද්ධෝ වා නිර්දහේදපි ।
සර්වධාතිප්රවෘද්ධෝऽසෞ රාවණෝ රාක්ෂසාධිපඃ ॥ 3 ॥
තස්ය තාං ස්පෘශතෝ ගාත්රං තපසා න විනාශිතම් ।
න තදග්නිශිඛා කුර්යාත්සංස්පෘෂ්ටා පාණිනා සතී ॥ 4 ॥
ජනකස්යාත්මජා කුර්යාද්යත්ක්රෝධකලුෂීකෘතා ।
ජාංබවත්ප්රමුඛාන් සර්වානනුජ්ඤාප්ය මහාහරීන් ॥ 5 ॥
අස්මින්නේවං ගතේ කාර්යේ භවතාං ච නිවේදිතේ ।
න්යාය්යං ස්ම සහ වෛදේහ්යා ද්රෂ්ටුං තෞ පාර්ථිවාත්මජෞ ॥ 6 ॥
අහමේකෝऽපි පර්යාප්තස්සරාක්ෂසගණාං පුරීම් ।
තාං ලංකාං තරසා හංතුං රාවණං ච මහාබලම් ॥ 7 ॥
කිං පුන ස්සහිතෝ වීරෛර්බලවද්භිඃ කෘතාත්මභිඃ ।
කෘතාස්ත්රෛඃ ප්ලවගෛශ්ශූරෛර්භවද්භිවිජයෛෂිභිඃ ॥ 8 ॥
අහං තු රාවණං යුද්ධේ සසෛන්යං සපුරස්සරම් ।
සහපුත්ත්රං වධිෂ්යාමි සහෝදරයුතං යුධි ॥ 9 ॥
බ්රාහ්මමෛංද්රං ච රෞද්රං ච වායව්යං වාරණං තථා ।
යදි ශක්රජිතෝऽස්ත්රාණි දුර්නිරීක්ෂාණි සංයුගේ ॥ 10 ॥
තාන්යහං වධිෂ්යාමි හනිෂ්යාමි ච රාක්ෂසාන් ।
භවතාමභ්යනුජ්ඤාතෝ වික්රමෝ මේ රුණද්ධි තම් ॥ 11 ॥
මයාතුලා විසෘෂ්ටා හි ශෛලවෘෂ්ටිර්නිරංතරා ।
දේවානපි රණේ හන්යාත්කිං පුනස්තාන්නිශාචරාන් ॥ 12 ॥
සාගරෝऽප්යතියාද්වේලාං මංදරඃ ප්රචලේදපි ।
න ජාංබවංතං සමරේ කංපයේදරිවාහිනී ॥ 13 ॥
සර්වරාක්ෂසසංඝානාං රාක්ෂසා යේ ච පූර්වකාඃ ।
අලමේකෝ විනාශාය වීරෝ වාලිසුතඃ කපිඃ ॥ 14 ॥
පනසස්යෝරුවේගේන නීලස්ය ච මහාත්මනඃ ।
මංදරෝऽප්යවශීර්යේත කිංපුනර්යුධි රාක්ෂසාඃ ॥ 15 ॥
සදේවාසුරයක්ෂේෂු ගංධර්වෝරගපක්ෂිෂු ।
මෛංදස්ය ප්රතියෝද්ධාරං ශංසත ද්විවිදස්ය වා ॥ 16 ॥
අශ්විපුත්රෞ මහාභාගාවේතෞ ප්ලවගසත්තමෞ ।
ඒතයෝඃ ප්රතියෝද්දාරං න පශ්යාමි රණාජිරේ ॥ 17 ॥
පිතාමහවරෝත්සේකාත්පරමං දර්පමාස්ථිතෞ ।
අමෘතප්රාශිනාවේතෞ සර්වවානරසත්තමෞ ॥ 18 ॥
අශ්විනෝර්මානනාර්ථං හි සර්වලෝකපිතාමහඃ ।
සර්වාවධ්යත්වමතුලමනයෝර්දත්තවාන්පුරා ॥ 19 ॥
වරෝත්සේකේන මත්තෞ ච ප්රමථ්ය මහතීං චමූම් ।
සුරාණාමමෘතං වීරෞ පීතවංතෞ ප්ලවංගමෞ ॥ 20 ॥
ඒතාවේව හි සංකෘද්ධෞ සවාජිරථකුංජරාම් ।
ලංකාං නාශයිතුං ශක්තෞ සර්වේ තිෂ්ඨංතු වානරාඃ ॥ 21 ॥
මයෛව නිහතා ලංකා දග්ධා භස්මීකෘතා පුනඃ ।
රාජමාර්ගේෂු සර්වත්ර නාම විශ්රාවිතං මයා ॥ 22 ॥
ජයත්යතිබලෝ රාමෝ ලක්ෂ්මණශ්ච මහාබලඃ ।
රාජා ජයති සුග්රීවෝ රාඝවේණාභිපාලිතඃ ॥ 23 ॥
අහං කෝසලරාජස්ය දාසඃ පවනසංභවඃ ।
හනුමානිති සර්වත්ර නාම විශ්රාවිතං මයා ॥ 24 ॥
අශෝකවනිකාමධ්යේ රාවණස්ය දුරාත්මනඃ ।
අධ ස්තාච්ඡිංශුපාවෘක්ෂේ සාධ්වී කරුණමාස්ථිතා ॥ 25 ॥
රාක්ෂසීභිඃ පරිවෘතා ශෝකසංතාපකර්ශිතා ।
මේඝලේඛාපරිවෘතා චංද්රලේඛේව නිෂ්ප්රභා ॥ 26 ॥
අචිංතයංතී වෛදේහී රාවණං බලදර්පිතම් ।
පතිව්රතා ච සුශ්රෝණී අවෂ්ටබ්ධා ච ජානකී ॥ 27 ॥
අනුරක්තා හි වෛදේහී රාමං සර්වාත්මනා ශුභා ।
අනන්යචිත්තා රාමේ ච පෞලෝමීව පුරංදරේ ॥ 28 ॥
තදේකවාසස්සංවීතා රජෝධ්වස්තා තථෛව ච ।
ශෝකසංතාපදීනාංගී සීතා භර්තෘහිතේ රතා ॥ 29 ॥
සා මයා රාක්ෂසීමධ්යේ තර්ජ්යමානා මුහුර්මුහුඃ ।
රාක්ෂසීභිර්විරූපාභිර්දෘෂ්ටා හි ප්රමදාවනේ ॥ 30 ॥
ඒකවේණීධරා දීනා භර්තෘචිංතාපරායණා ।
අධශ්ශය්යා විවර්ණාංගී පද්මිනීව හිමාගමේ ॥ 31 ॥
රාවණාද්විනිවෘත්තාර්ථා මර්තව්යකෘතනිශ්චයා ।
කථංචින්මෘගශාබාක්ෂී විශ්වාසමුපපාදිතා ॥ 32 ॥
තතඃ සංභාෂිතා චෛව සර්වමර්ථං ච දර්ශිතා ।
රාමසුග්රීවසඛ්යං ච ශ්රුත්වා ප්රීතිමුපාගතා ॥ 33 ॥
නියතස්සමුදාචාරෝ භක්තිර්භර්තරි චෝත්තමා ।
යන්න හංති දශග්රීවං සා මහාත්මා කෘතාගසම් ॥ 34 ॥
නිමිත්තමාත්රං රාමස්තු වධේ තස්ය භවිෂ්යති ।
සා ප්රකෘත්යෛව තන්වංගී තද්වියෝගාච්ච කර්ශිතා ॥ 35 ॥
ප්රතිපත්පාඨශීලස්ය විද්යේව තනුමතාං ගතා ।
ඒවමාස්තේ මහාභාගා සීතා ශෝකපරායණා ॥ 36 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකෝනෂෂ්ටිතමස්සර්ගඃ ॥
