ශ්රීමද්වාල්මීකීය රාමායණේ සුංදරකාංඩම් ।
අථ ත්රිෂෂ්ටිතමස්සර්ගඃ ।
තතෝ මූර්ධ්නා නිපතිතං වානරං වානරර්ෂභඃ ।
දෘෂ්ට්වෛවෝද්විග්නහෘදයෝ වාක්යමේතදුවාච හ ॥ 1 ॥
උත්තිෂ්ඨෝත්තිෂ්ඨ කස්මාත්ත්වං පාදයෝඃ පතිතෝ මම ।
අභයං තේ භවේද්වීර සර්වමේවාභිධීයතාම් ॥ 2 ॥
ස තු විශ්වාසිතස්තේන සුග්රීවේණ මහාත්මනා ।
උත්ථාය සුමහාප්රාජ්ඤෝ වාක්යං දධිමුඛෝऽබ්රවීත් ॥ 3 ॥
නෛවර්ක්ෂරජසා රාජන්න ත්වයා නාපි වාලිනා ।
වනං නිසෘෂ්ටපූර්වං හි භක්ෂිතං තච්ච වානරෛඃ ॥ 4 ॥
ඒභිඃ ප්රධර්ෂිතාශ්චෛව වානරා වනරක්ෂිභිඃ ।
මධූන්යචිංතයිත්වේමාන් භක්ෂයංති පිබංති ච ॥ 5 ॥
ශිෂ්ටමත්රාපවිධ්යංති භක්ෂයංති තථාපරේ ।
නිවාර්යමාණාස්තේ සර්වේ භ්රුවෝ වෛ දර්ශයංති හි ॥ 6 ॥
ඉමේ හි සංරබ්ධතරාස්තථා තෛස්සංප්රධර්ෂිතාඃ ।
වාරයංතෝ වනාත්තස්මාත්ක්රුද්ධෛර්වානරපුංගවෛඃ ॥ 7 ॥
තතස්තෛර්බහුභිර්වීරෛර්වානරෛර්වානරර්ෂභ ।
සංරක්තනයනෛඃ ක්රෝධාද්ධරයඃ ප්රවිචාලිතාඃ ॥ 8 ॥
පාණිභිර්නිහතාඃ කේචිත්කේචිජ්ජානුභිරාහතාඃ ।
ප්රකෘෂ්ටාශ්ච යථාකාමං දේවමාර්ගං ච දර්ශිතාඃ ॥ 9 ॥
ඒවමේතේ හතාශ්ශූරාස්ත්වයි තිෂ්ඨති භර්තරි ।
කෘත්ස්නං මධුවනං චෛව ප්රකාමං තෛඃ ප්රභක්ෂ්යතේ ॥ 10 ॥
ඒවං විජ්ඤාප්යමානං තං සුග්රීවං වානරර්ෂභම් ।
අපෘච්ඡත්තං මහාප්රාජ්ඤෝ ලක්ෂ්මණඃ පරවීරහා ॥ 11 ॥
කිමයං වානරෝ රාජන් වනපඃ ප්රත්යුපස්ථිතඃ ।
කං චාර්ථමභිනිර්දිශ්ය දුඃඛිතෝ වාක්යමබ්රවීත් ॥ 12 ॥
ඒවමුක්තස්තු සුග්රීවෝ ලක්ෂ්මණේන මහාත්මනා ।
ලක්ෂ්මණං ප්රත්යුවාචේදං වාක්යං වාක්යවිශාරදඃ ॥ 13 ॥
ආර්ය ලක්ෂ්මණ සංප්රාහ වීරෝ දධිමුඛඃ කපිඃ ।
අංගදප්රමුඛෛර්වීරෛර්භක්ෂිතං මධු වානරෛඃ ॥ 14 ॥
විචිත්ය දක්ෂිණාමාශාමාගතෛර්හරිපුංගවෛඃ ।
නෛෂාමකෘත්යානාමීදෘශස්ස්යාදුපක්රමඃ ॥ 15 ॥
ආගතෛශ්ච ප්රමථිතං යථා මධුවනං හි තෛඃ ।
ධර්ෂිතං ච වනං කෘත්ස්නමුපයුක්තං ච වානරෛඃ ॥ 16 ॥
වනං යදාऽභිපන්නාස්තේ සාධිතං කර්ම වානරෛඃ ।
දෘෂ්ටා දේවී න සංදේහෝ න චාන්යේන හනූමතා ॥ 17 ॥
න හ්යන්යස්සාධනේ හේතුඃ කර්මණෝऽස්ය හනූමතඃ ।
කාර්යසිද්ධිර්මතිශ්චෛව තස්මින්වානරපුංගවේ ॥ 18 ॥
ව්යවසායශ්ච වීර්යං ච ශ්රුතං චාපි ප්රතිෂ්ඨිතම් ।
ජාංබවාන්යත්ර නේතා ස්යාදංගදශ්ච මහාබලඃ ॥ 19 ॥
හනුමාංශ්චාප්යධිෂ්ඨාතා න තස්ය ගතිරන්යථා ।
අංගදප්රමුඛෛර්වීරෛර්හතං මධුවනං කිල ॥ 20 ॥
වාරයංතශ්ච සහිතාස්තදා ජානුභිරාහතාඃ ।
ඒතදර්ථමයං ප්රාප්තෝ වක්තුං මධුරවාගිහ ॥ 21 ॥
නාම්නා දධිමුඛෝ නාම හරිඃ ප්රඛ්යාතවික්රමඃ ।
දෘෂ්ටා සීතා මහාබාහෝ සෞමිත්රේ පශ්ය තත්ත්වතඃ ॥ 22 ॥
අභිගම්ය තථා සර්වේ පිබංති මධු වානරාඃ ।
න චාප්යදෘෂ්ට්වා වෛදේහීං විශ්රුතාඃ පුරුෂර්ෂභ ॥ 23 ॥
වනං දත්තවරං දිව්යං ධර්ෂයේයුර්වනෞකසඃ ।
තතඃ ප්රහෘෂ්ටෝ ධර්මාත්මා ලක්ෂ්මණස්සහ රාඝවඃ ॥ 24 ॥
ශ්රුත්වා කර්ණසුඛාං වාණීං සුග්රීවවදනාච්ච්යුතාම් ।
ප්රාහෘෂ්යත භෘශං රාමෝ ලක්ෂ්මණශ්ච මහාබලඃ ॥ 25 ॥
ශ්රුත්වා දධිමුඛස්යේදං සුග්රීවස්සංප්රහෘෂ්ය ච ।
වනපාලං පුනර්වාක්යං සුග්රීවඃ ප්රත්යභාෂත ॥ 26 ॥
ප්රීතෝऽස්මි සෝऽහං යද්භුක්තං වනං තෛඃ කෘතකර්මභිඃ ।
මර්ෂිතං මර්ෂණීයං ච චේෂ්ටිතං කෘතකර්මණාම් ॥ 27 ॥
ඉච්ඡාමි ශීඝ්රං හනුමත්ප්රධානාන් ශාඛාමෘගාංස්තාන් මෘගරාජදර්පාන් ।
ද්රෂ්ටුං කෘතාර්ථාන් සහ රාඝවාභ්යාං ශ්රෝතුං ච සීතාධිගමේ ප්රයත්නම් ॥ 28 ॥
ප්රීතිස්ඵීතාක්ෂෞ සංප්රහෘෂ්ටෞ කුමාරෞ දෘෂ්ට්වා සිද්ධාර්ථෞ වානරාණාං ච රාජා ।
අංගෛඃ සංහෘෂ්ටෛඃ කර්මසිද්ධිං විදිත්වා බාහ්වෝරාසන්නාං සෝऽතිමාත්රං නනංද ॥ 29 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ත්රිෂෂ්ටිතමස්සර්ගඃ ॥
