শ্রীমদ্বাল্মীকীয় রামাযণে সুংদরকাংডম্ ।
অথ ত্রিষষ্টিতমস্সর্গঃ ।
ততো মূর্ধ্না নিপতিতং বানরং বানরর্ষভঃ ।
দৃষ্ট্বৈবোদ্বিগ্নহৃদয়ো বাক্যমেতদুবাচ হ ॥ 1 ॥
উত্তিষ্ঠোত্তিষ্ঠ কস্মাত্ত্বং পাদয়োঃ পতিতো মম ।
অভয়ং তে ভবেদ্বীর সর্বমেবাভিধীযতাম্ ॥ 2 ॥
স তু বিশ্বাসিতস্তেন সুগ্রীবেণ মহাত্মনা ।
উত্থায় সুমহাপ্রাজ্ঞো বাক্য়ং দধিমুখোঽব্রবীত্ ॥ 3 ॥
নৈবর্ক্ষরজসা রাজন্ন ত্বয়া নাপি বালিনা ।
বনং নিসৃষ্টপূর্বং হি ভক্ষিতং তচ্চ বানরৈঃ ॥ 4 ॥
এভিঃ প্রধর্ষিতাশ্চৈব বানরা বনরক্ষিভিঃ ।
মধূন্যচিংতয়িত্বেমান্ ভক্ষয়ংতি পিবংতি চ ॥ 5 ॥
শিষ্টমত্রাপবিধ্য়ংতি ভক্ষয়ংতি তথাপরে ।
নিবার্যমাণাস্তে সর্বে ভ্রুবো বৈ দর্শয়ংতি হি ॥ 6 ॥
ইমে হি সংরব্ধতরাস্তথা তৈস্সংপ্রধর্ষিতাঃ ।
বারয়ংতো বনাত্তস্মাত্ক্রুদ্ধৈর্বানরপুংগবৈঃ ॥ 7 ॥
ততস্তৈর্বহুভির্বীরৈর্বানরৈর্বানরর্ষভ ।
সংরক্তনযনৈঃ ক্রোধাদ্ধরয়ঃ প্রবিচালিতাঃ ॥ 8 ॥
পাণিভির্নিহতাঃ কেচিত্কেচিজ্জানুভিরাহতাঃ ।
প্রকৃষ্টাশ্চ যথাকামং দেবমার্গং চ দর্শিতাঃ ॥ 9 ॥
এবমেতে হতাশ্শূরাস্ত্বয়ি তিষ্ঠতি ভর্তরি ।
কৃত্স্নং মধুবনং চৈব প্রকামং তৈঃ প্রভক্ষ্যতে ॥ 10 ॥
এবং বিজ্ঞাপ্যমানং তং সুগ্রীবং বানরর্ষভম্ ।
অপৃচ্ছত্তং মহাপ্রাজ্ঞো লক্ষ্মণঃ পরবীরহা ॥ 11 ॥
কিময়ং বানরো রাজন্ বনপঃ প্রত্য়ুপস্থিতঃ ।
কং চার্থমভিনির্দিশ্য় দুঃখিতো বাক্যমব্রবীত্ ॥ 12 ॥
এবমুক্তস্তু সুগ্রীবো লক্ষ্মণেন মহাত্মনা ।
লক্ষ্মণং প্রত্য়ুবাচেদং বাক্য়ং বাক্যবিশারদঃ ॥ 13 ॥
আর্য় লক্ষ্মণ সংপ্রাহ বীরো দধিমুখঃ কপিঃ ।
অংগদপ্রমুখৈর্বীরৈর্ভক্ষিতং মধু বানরৈঃ ॥ 14 ॥
বিচিত্য় দক্ষিণামাশামাগতৈর্হরিপুংগবৈঃ ।
নৈষামকৃত্য়ানামীদৃশস্স্য়াদুপক্রমঃ ॥ 15 ॥
আগতৈশ্চ প্রমথিতং যথা মধুবনং হি তৈঃ ।
ধর্ষিতং চ বনং কৃত্স্নমুপয়ুক্তং চ বানরৈঃ ॥ 16 ॥
বনং যদাঽভিপন্নাস্তে সাধিতং কর্ম বানরৈঃ ।
দৃষ্টা দেবী ন সংদেহো ন চান্য়েন হনূমতা ॥ 17 ॥
ন হ্যন্যস্সাধনে হেতুঃ কর্মণোঽস্য় হনূমতঃ ।
কার্যসিদ্ধির্মতিশ্চৈব তস্মিন্বানরপুংগবে ॥ 18 ॥
ব্যবসাযশ্চ বীর্য়ং চ শ্রুতং চাপি প্রতিষ্ঠিতম্ ।
জাংববান্যত্র নেতা স্য়াদংগদশ্চ মহাবলঃ ॥ 19 ॥
হনুমাংশ্চাপ্যধিষ্ঠাতা ন তস্য় গতিরন্যথা ।
অংগদপ্রমুখৈর্বীরৈর্হতং মধুবনং কিল ॥ 20 ॥
বারয়ংতশ্চ সহিতাস্তদা জানুভিরাহতাঃ ।
এতদর্থময়ং প্রাপ্তো বক্তুং মধুরবাগিহ ॥ 21 ॥
নাম্না দধিমুখো নাম হরিঃ প্রখ্য়াতবিক্রমঃ ।
দৃষ্টা সীতা মহাবাহো সৌমিত্রে পশ্য় তত্ত্বতঃ ॥ 22 ॥
অভিগম্য় তথা সর্বে পিবংতি মধু বানরাঃ ।
ন চাপ্যদৃষ্ট্বা বৈদেহীং বিশ্রুতাঃ পুরুষর্ষভ ॥ 23 ॥
বনং দত্তবরং দিব্য়ং ধর্ষয়েয়ুর্বনৌকসঃ ।
ততঃ প্রহৃষ্টো ধর্মাত্মা লক্ষ্মণস্সহ রাঘবঃ ॥ 24 ॥
শ্রুত্বা কর্ণসুখাং বাণীং সুগ্রীববদনাচ্চ্য়ুতাম্ ।
প্রাহৃষ্যত ভৃশং রামো লক্ষ্মণশ্চ মহাবলঃ ॥ 25 ॥
শ্রুত্বা দধিমুখস্য়েদং সুগ্রীবস্সংপ্রহৃষ্য় চ ।
বনপালং পুনর্বাক্য়ং সুগ্রীবঃ প্রত্যভাষত ॥ 26 ॥
প্রীতোঽস্মি সোঽহং যদ্ভুক্তং বনং তৈঃ কৃতকর্মভিঃ ।
মর্ষিতং মর্ষণীয়ং চ চেষ্টিতং কৃতকর্মণাম্ ॥ 27 ॥
ইচ্ছামি শীঘ্রং হনুমত্প্রধানান্ শাখামৃগাংস্তান্ মৃগরাজদর্পান্ ।
দ্রষ্টুং কৃতার্থান্ সহ রাঘবাভ্য়াং শ্রোতুং চ সীতাধিগমে প্রযত্নম্ ॥ 28 ॥
প্রীতিস্ফীতাক্ষৌ সংপ্রহৃষ্টৌ কুমারৌ দৃষ্ট্বা সিদ্ধার্থৌ বানরাণাং চ রাজা ।
অংগৈঃ সংহৃষ্টৈঃ কর্মসিদ্ধিং বিদিত্বা বাহ্বোরাসন্নাং সোঽতিমাত্রং ননংদ ॥ 29 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে ত্রিষষ্টিতমস্সর্গঃ ॥
