ශ්රීමද්වාල්මීකීය රාමායණේ බාලකාංඩම් ।
අථ ෂඩ්විංශස්සර්ගඃ ।
මුනේර්වචනමක්ලීබං ශ්රුත්වා නරවරාත්මජඃ ।
රාඝවඃ ප්රාංජලිර්භූත්වා ප්රත්යුවාච දෘඪව්රතඃ ॥ 1 ॥
පිතුර්වචනනිර්දේශාත්පිතුර්වචනගෞරවාත් ।
වචනං කෞශිකස්යේති කර්තව්යමවිශංකයා ॥ 2 ॥
අනුශිෂ්ටෝऽස්ම්යයෝධ්යායාං ගුරුමධ්යේ මහාත්මනා ।
පිත්රා දශරථේනාහං නාවජ්ඤේයං හි තද්වචඃ ॥ 3 ॥
සෝऽහං පිතුර්වචශ්ශ්රුත්වා ශාසනාද්බ්රහ්මවාදිනඃ ।
කරිෂ්යාමි න සංදේහස්තාටකාවධමුත්තමම් ॥ 4 ॥
ගෝබ්රාහ්මණහිතාර්ථාය දේශස්යාස්ය සුඛාය ච ।
තව චෛවාප්රමේයස්ය වචනං කර්තුමුද්යතඃ ॥ 5 ॥
ඒවමුක්ත්වා ධනුර්මධ්යේ බධ්වා මුෂ්ටිමරිංදමඃ ।
ජ්යාශබ්දමකරෝත්තීව්රං දිශශ්ශබ්දේන නාදයන් ॥ 6 ॥
තේන ශබ්දේන විත්රස්තාස්තාටකාවනවාසිනඃ ।
තාටකා ච සුසංක්රුද්ධා තේන ශබ්දේන මෝහිතා ॥ 7 ॥
තං ශබ්දමභිනිධ්යාය රාක්ෂසී ක්රෝධමූර්ඡිතා ।
ශ්රුත්වා චාභ්යද්රවද්වේගාද්යතශ්ශබ්දෝ විනිස්සෘතඃ ॥ 8 ॥
තාං දෘෂ්ට්වා රාඝවඃ ක්රුද්ධාං විකෘතාං විකෘතානනාම් ।
ප්රමාණේනාතිවෘද්ධාං ච ලක්ෂ්මණං සෝऽභ්යභාෂත ॥ 9 ॥
පශ්ය ලක්ෂ්මණ යක්ෂිණ්යා භෛරවං දාරුණං වපුඃ ।
භිද්යේරන් දර්ශනාදස්යා භීරූණාං හෘදයානි ච ॥ 10 ॥
ඒනාං පශ්ය දුරාධර්ෂාං මායාබලසමන්විතාම් ।
විනිවෘත්තාං කරෝම්යද්ය හෘතකර්ණාග්රනාසිකාම් ॥ 11 ॥
න හ්යේනාමුත්සහේ හංතුං ස්ත්රීස්වභාවේන රක්ෂිතාම් ।
වීර්යං චාස්යාං ගතිං චාපි හනිෂ්යාමීති මේ මතිඃ ॥ 12 ॥
ඒවං බ්රුවාණේ රාමේ තු තාටකා ක්රෝධමූර්ඡිතා ।
උද්යම්ය බාහූ ගර්ජංතී රාමමේවාභ්යධාවත ॥ 13 ॥
විශ්වාමිත්රස්තු බ්රහ්මර්ෂිර්හුංකාරේණාභිභර්ත්ස්යතාම් ।
ස්වස්ති රාඝවයෝරස්තු ජයං චෛවාභ්යභාෂත ॥ 14 ॥
උද්ධූන්වානා රජෝ ඝෝරං තාටකා රාඝවාවුභෞ ।
රජෝමෝහේන මහතා මුහූර්තං සා ව්යමෝහයත් ॥ 15 ॥
තතෝ මායාං සමාස්ථාය ශිලාවර්ෂේණ රාඝවෞ ।
අවාකිරත්සුමහතා තතශ්චුක්රෝධ රාඝවඃ ॥ 16 ॥
ශිලාවර්ෂං මහත්තස්යාශ්ශරවර්ෂේණ රාඝවඃ ।
ප්රතිහත්යෝපධාවංත්යාඃ කරෞ චිච්ඡේද පත්රිභිඃ ॥ 17 ॥
තතශ්ඡින්නභුජාං ශ්රාංතාමභ්යාශේ පරිගර්ජතීම් ।
සෞමිත්රිරකරෝත්ක්රෝධාද්ධෘතකර්ණාග්රනාසිකාම් ॥ 18 ॥
කාමරූපධරා සද්යඃ කෘත්වා රූපාණ්යනේකශඃ ।
අංතර්ධානං ගතා යක්ෂී මෝහයංතීව මායයා ॥ 19 ॥
අශ්මවර්ෂං විමුංචංතී භෛරවං විචචාර හ ।
තතස්තාවශ්මවර්ෂේණ කීර්යමාණෞ සමංතතඃ ॥ 20 ॥
දෘෂ්ට්වා ගාධිසුතශ්ශ්රීමානිදං වචනමබ්රවීත් ।
අලං තේ ඝෘණයා රාම පාපෛෂා දුෂ්ටචාරිණී ॥ 21 ॥
යජ්ඤවිඝ්නකරී යක්ෂී පුරාවර්ධති මායයා ।
වධ්යතාං තාවදේවෛෂා පුරා සංධ්යා ප්රවර්තතේ ॥ 22 ॥
රක්ෂාංසි සංධ්යාකාලේෂු දුර්ධර්ෂාණි භවංති වෛ ।
ඉත්යුක්තස්තු තදා යක්ෂී අශ්මවෘෂ්ට්යාභිවර්ෂතීම් ॥ 23 ॥
දර්ශයන් ශබ්දවේධිත්වං තාං රුරෝධ ස සායකෛඃ ।
සා රුද්ධා ශරජාලේන මායාබලසමන්විතා ॥ 24 ॥
අභිදුද්රාව කාකුත්ස්ථං ලක්ෂ්මණං ච විනේදුෂී ।
තාමාපතංතීං වේගේන වික්රාංතාමශනීමිව ॥ 25 ॥
ශරේණෝරසි විව්යාථ සා පපාත මමාර ච ।
තාං හතාං භීමසංකාශාං දෘෂ්ට්වා සුරපතිස්තදා ॥ 26 ॥
සාධු සාධ්විති කාකුත්ස්ථං සුරාශ්ච සමපූජයන් ।
උවාච පරමප්රීත ස්සහස්රාක්ෂඃ පුරංදරඃ ॥ 27 ॥
සුරාශ්ච සර්වේ සංහෘෂ්ටා විශ්වාමිත්රමථාබ්රුවන් ।
මුනේ කෞශික භද්රං තේ සේංද්රාස්සර්වේ මරුද්ගණාඃ ॥ 28 ॥
තෝෂිතාඃ කර්මණාऽනේන ස්නේහං දර්ශය රාඝවේ ।
ප්රජාපතේර්භෘශාශ්වස්ය පුත්රාන් සත්යපරාක්රමාන් ॥ 29 ॥
තපෝබලභෘතෝ බ්රහ්මන් රාඝවාය නිවේදය ।
පාත්රභූතශ්ච තේ බ්රහ්මංස්තවානුගමනේ ධෘතඃ ॥ 30 ॥
කර්තව්යං ච මහත්කර්ම සුරාණාං රාජසූනුනා ।
ඒවමුක්ත්වා සුරාස්සර්වේ හෘෂ්ටා ජග්මුර්යථාගතම් ॥ 31 ॥
විශ්වාමිත්රං පුරස්කෘත්ය තතස්සංධ්යා ප්රවර්තතේ ।
තතෝ මුනිවරඃ ප්රීතස්තාටකාවධතෝෂිතඃ ॥ 32 ॥
මූර්ධ්නි රාමමුපාඝ්රාය ඉදං වචනමබ්රවීත් ।
ඉහාද්ය රජනීං රාම වසේම ශුභදර්ශන ॥ 33 ॥
ශ්වඃ ප්රභාතේ ගමිෂ්යාමස්තදාශ්රමපදං මම ।
විශ්වාමිත්රවචඃ ශ්රුත්වා හෘෂ්ටෝ දශරථාත්මජඃ ॥ 34 ॥
උවාස රජනීං තත්ර තාටකායා වනේ සුඛම් ।
මුක්තශාපං වනං තච්ච තස්මින්නේව තදාහනි ॥ 35 ॥
රමණීයං විබභ්රාජ යථා චෛත්රරථං වනම් ।
නිහත්ය තාං යක්ෂසුතාං ස රාමඃ ප්රශස්යමානස්සුරසිද්ධසංඝෛඃ ।
උවාස තස්මින්මුනිනා සහෛව ප්රභාතවේලාං ප්රතිබෝධ්යමානඃ ॥ 36 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ෂඩ්විංශස්සර්ගඃ ॥
