ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଡ୍ଵିଂଶସ୍ସର୍ଗଃ ।
ମୁନେର୍ଵଚନମକ୍ଲୀବଂ ଶ୍ରୁତ୍ଵା ନରଵରାତ୍ମଜଃ ।
ରାଘଵଃ ପ୍ରାଂଜଲିର୍ଭୂତ୍ଵା ପ୍ରତ୍ୟୁଵାଚ ଦୃଢଵ୍ରତଃ ॥ 1 ॥
ପିତୁର୍ଵଚନନିର୍ଦେଶାତ୍ପିତୁର୍ଵଚନଗୌରଵାତ୍ ।
ଵଚନଂ କୌଶିକସ୍ୟେତି କର୍ତଵ୍ୟମଵିଶଂକୟା ॥ 2 ॥
ଅନୁଶିଷ୍ଟୋଽସ୍ମ୍ୟୟୋଧ୍ୟାୟାଂ ଗୁରୁମଧ୍ୟେ ମହାତ୍ମନା ।
ପିତ୍ରା ଦଶରଥେନାହଂ ନାଵଜ୍ଞେୟଂ ହି ତଦ୍ଵଚଃ ॥ 3 ॥
ସୋଽହଂ ପିତୁର୍ଵଚଶ୍ଶ୍ରୁତ୍ଵା ଶାସନାଦ୍ବ୍ରହ୍ମଵାଦିନଃ ।
କରିଷ୍ୟାମି ନ ସଂଦେହସ୍ତାଟକାଵଧମୁତ୍ତମମ୍ ॥ 4 ॥
ଗୋବ୍ରାହ୍ମଣହିତାର୍ଥାୟ ଦେଶସ୍ୟାସ୍ୟ ସୁଖାୟ ଚ ।
ତଵ ଚୈଵାପ୍ରମେୟସ୍ୟ ଵଚନଂ କର୍ତୁମୁଦ୍ୟତଃ ॥ 5 ॥
ଏଵମୁକ୍ତ୍ଵା ଧନୁର୍ମଧ୍ୟେ ବଧ୍ଵା ମୁଷ୍ଟିମରିଂଦମଃ ।
ଜ୍ୟାଶବ୍ଦମକରୋତ୍ତୀଵ୍ରଂ ଦିଶଶ୍ଶବ୍ଦେନ ନାଦୟନ୍ ॥ 6 ॥
ତେନ ଶବ୍ଦେନ ଵିତ୍ରସ୍ତାସ୍ତାଟକାଵନଵାସିନଃ ।
ତାଟକା ଚ ସୁସଂକ୍ରୁଦ୍ଧା ତେନ ଶବ୍ଦେନ ମୋହିତା ॥ 7 ॥
ତଂ ଶବ୍ଦମଭିନିଧ୍ୟାୟ ରାକ୍ଷସୀ କ୍ରୋଧମୂର୍ଛିତା ।
ଶ୍ରୁତ୍ଵା ଚାଭ୍ୟଦ୍ରଵଦ୍ଵେଗାଦ୍ୟତଶ୍ଶବ୍ଦୋ ଵିନିସ୍ସୃତଃ ॥ 8 ॥
ତାଂ ଦୃଷ୍ଟ୍ଵା ରାଘଵଃ କ୍ରୁଦ୍ଧାଂ ଵିକୃତାଂ ଵିକୃତାନନାମ୍ ।
ପ୍ରମାଣେନାତିଵୃଦ୍ଧାଂ ଚ ଲକ୍ଷ୍ମଣଂ ସୋଽଭ୍ୟଭାଷତ ॥ 9 ॥
ପଶ୍ୟ ଲକ୍ଷ୍ମଣ ୟକ୍ଷିଣ୍ୟା ଭୈରଵଂ ଦାରୁଣଂ ଵପୁଃ ।
ଭିଦ୍ୟେରନ୍ ଦର୍ଶନାଦସ୍ୟା ଭୀରୂଣାଂ ହୃଦୟାନି ଚ ॥ 10 ॥
ଏନାଂ ପଶ୍ୟ ଦୁରାଧର୍ଷାଂ ମାୟାବଲସମନ୍ଵିତାମ୍ ।
ଵିନିଵୃତ୍ତାଂ କରୋମ୍ୟଦ୍ୟ ହୃତକର୍ଣାଗ୍ରନାସିକାମ୍ ॥ 11 ॥
ନ ହ୍ୟେନାମୁତ୍ସହେ ହଂତୁଂ ସ୍ତ୍ରୀସ୍ଵଭାଵେନ ରକ୍ଷିତାମ୍ ।
ଵୀର୍ୟଂ ଚାସ୍ୟାଂ ଗତିଂ ଚାପି ହନିଷ୍ୟାମୀତି ମେ ମତିଃ ॥ 12 ॥
ଏଵଂ ବ୍ରୁଵାଣେ ରାମେ ତୁ ତାଟକା କ୍ରୋଧମୂର୍ଛିତା ।
ଉଦ୍ୟମ୍ୟ ବାହୂ ଗର୍ଜଂତୀ ରାମମେଵାଭ୍ୟଧାଵତ ॥ 13 ॥
ଵିଶ୍ଵାମିତ୍ରସ୍ତୁ ବ୍ରହ୍ମର୍ଷିର୍ହୁଂକାରେଣାଭିଭର୍ତ୍ସ୍ୟତାମ୍ ।
ସ୍ଵସ୍ତି ରାଘଵୟୋରସ୍ତୁ ଜୟଂ ଚୈଵାଭ୍ୟଭାଷତ ॥ 14 ॥
ଉଦ୍ଧୂନ୍ଵାନା ରଜୋ ଘୋରଂ ତାଟକା ରାଘଵାଵୁଭୌ ।
ରଜୋମୋହେନ ମହତା ମୁହୂର୍ତଂ ସା ଵ୍ୟମୋହୟତ୍ ॥ 15 ॥
ତତୋ ମାୟାଂ ସମାସ୍ଥାୟ ଶିଲାଵର୍ଷେଣ ରାଘଵୌ ।
ଅଵାକିରତ୍ସୁମହତା ତତଶ୍ଚୁକ୍ରୋଧ ରାଘଵଃ ॥ 16 ॥
ଶିଲାଵର୍ଷଂ ମହତ୍ତସ୍ୟାଶ୍ଶରଵର୍ଷେଣ ରାଘଵଃ ।
ପ୍ରତିହତ୍ୟୋପଧାଵଂତ୍ୟାଃ କରୌ ଚିଚ୍ଛେଦ ପତ୍ରିଭିଃ ॥ 17 ॥
ତତଶ୍ଛିନ୍ନଭୁଜାଂ ଶ୍ରାଂତାମଭ୍ୟାଶେ ପରିଗର୍ଜତୀମ୍ ।
ସୌମିତ୍ରିରକରୋତ୍କ୍ରୋଧାଦ୍ଧୃତକର୍ଣାଗ୍ରନାସିକାମ୍ ॥ 18 ॥
କାମରୂପଧରା ସଦ୍ୟଃ କୃତ୍ଵା ରୂପାଣ୍ୟନେକଶଃ ।
ଅଂତର୍ଧାନଂ ଗତା ୟକ୍ଷୀ ମୋହୟଂତୀଵ ମାୟୟା ॥ 19 ॥
ଅଶ୍ମଵର୍ଷଂ ଵିମୁଂଚଂତୀ ଭୈରଵଂ ଵିଚଚାର ହ ।
ତତସ୍ତାଵଶ୍ମଵର୍ଷେଣ କୀର୍ୟମାଣୌ ସମଂତତଃ ॥ 20 ॥
ଦୃଷ୍ଟ୍ଵା ଗାଧିସୁତଶ୍ଶ୍ରୀମାନିଦଂ ଵଚନମବ୍ରଵୀତ୍ ।
ଅଲଂ ତେ ଘୃଣୟା ରାମ ପାପୈଷା ଦୁଷ୍ଟଚାରିଣୀ ॥ 21 ॥
ୟଜ୍ଞଵିଘ୍ନକରୀ ୟକ୍ଷୀ ପୁରାଵର୍ଧତି ମାୟୟା ।
ଵଧ୍ୟତାଂ ତାଵଦେଵୈଷା ପୁରା ସଂଧ୍ୟା ପ୍ରଵର୍ତତେ ॥ 22 ॥
ରକ୍ଷାଂସି ସଂଧ୍ୟାକାଲେଷୁ ଦୁର୍ଧର୍ଷାଣି ଭଵଂତି ଵୈ ।
ଇତ୍ୟୁକ୍ତସ୍ତୁ ତଦା ୟକ୍ଷୀ ଅଶ୍ମଵୃଷ୍ଟ୍ୟାଭିଵର୍ଷତୀମ୍ ॥ 23 ॥
ଦର୍ଶୟନ୍ ଶବ୍ଦଵେଧିତ୍ଵଂ ତାଂ ରୁରୋଧ ସ ସାୟକୈଃ ।
ସା ରୁଦ୍ଧା ଶରଜାଲେନ ମାୟାବଲସମନ୍ଵିତା ॥ 24 ॥
ଅଭିଦୁଦ୍ରାଵ କାକୁତ୍ସ୍ଥଂ ଲକ୍ଷ୍ମଣଂ ଚ ଵିନେଦୁଷୀ ।
ତାମାପତଂତୀଂ ଵେଗେନ ଵିକ୍ରାଂତାମଶନୀମିଵ ॥ 25 ॥
ଶରେଣୋରସି ଵିଵ୍ୟାଥ ସା ପପାତ ମମାର ଚ ।
ତାଂ ହତାଂ ଭୀମସଂକାଶାଂ ଦୃଷ୍ଟ୍ଵା ସୁରପତିସ୍ତଦା ॥ 26 ॥
ସାଧୁ ସାଧ୍ଵିତି କାକୁତ୍ସ୍ଥଂ ସୁରାଶ୍ଚ ସମପୂଜୟନ୍ ।
ଉଵାଚ ପରମପ୍ରୀତ ସ୍ସହସ୍ରାକ୍ଷଃ ପୁରଂଦରଃ ॥ 27 ॥
ସୁରାଶ୍ଚ ସର୍ଵେ ସଂହୃଷ୍ଟା ଵିଶ୍ଵାମିତ୍ରମଥାବ୍ରୁଵନ୍ ।
ମୁନେ କୌଶିକ ଭଦ୍ରଂ ତେ ସେଂଦ୍ରାସ୍ସର୍ଵେ ମରୁଦ୍ଗଣାଃ ॥ 28 ॥
ତୋଷିତାଃ କର୍ମଣାଽନେନ ସ୍ନେହଂ ଦର୍ଶୟ ରାଘଵେ ।
ପ୍ରଜାପତେର୍ଭୃଶାଶ୍ଵସ୍ୟ ପୁତ୍ରାନ୍ ସତ୍ୟପରାକ୍ରମାନ୍ ॥ 29 ॥
ତପୋବଲଭୃତୋ ବ୍ରହ୍ମନ୍ ରାଘଵାୟ ନିଵେଦୟ ।
ପାତ୍ରଭୂତଶ୍ଚ ତେ ବ୍ରହ୍ମଂସ୍ତଵାନୁଗମନେ ଧୃତଃ ॥ 30 ॥
କର୍ତଵ୍ୟଂ ଚ ମହତ୍କର୍ମ ସୁରାଣାଂ ରାଜସୂନୁନା ।
ଏଵମୁକ୍ତ୍ଵା ସୁରାସ୍ସର୍ଵେ ହୃଷ୍ଟା ଜଗ୍ମୁର୍ୟଥାଗତମ୍ ॥ 31 ॥
ଵିଶ୍ଵାମିତ୍ରଂ ପୁରସ୍କୃତ୍ୟ ତତସ୍ସଂଧ୍ୟା ପ୍ରଵର୍ତତେ ।
ତତୋ ମୁନିଵରଃ ପ୍ରୀତସ୍ତାଟକାଵଧତୋଷିତଃ ॥ 32 ॥
ମୂର୍ଧ୍ନି ରାମମୁପାଘ୍ରାୟ ଇଦଂ ଵଚନମବ୍ରଵୀତ୍ ।
ଇହାଦ୍ୟ ରଜନୀଂ ରାମ ଵସେମ ଶୁଭଦର୍ଶନ ॥ 33 ॥
ଶ୍ଵଃ ପ୍ରଭାତେ ଗମିଷ୍ୟାମସ୍ତଦାଶ୍ରମପଦଂ ମମ ।
ଵିଶ୍ଵାମିତ୍ରଵଚଃ ଶ୍ରୁତ୍ଵା ହୃଷ୍ଟୋ ଦଶରଥାତ୍ମଜଃ ॥ 34 ॥
ଉଵାସ ରଜନୀଂ ତତ୍ର ତାଟକାୟା ଵନେ ସୁଖମ୍ ।
ମୁକ୍ତଶାପଂ ଵନଂ ତଚ୍ଚ ତସ୍ମିନ୍ନେଵ ତଦାହନି ॥ 35 ॥
ରମଣୀୟଂ ଵିବଭ୍ରାଜ ୟଥା ଚୈତ୍ରରଥଂ ଵନମ୍ ।
ନିହତ୍ୟ ତାଂ ୟକ୍ଷସୁତାଂ ସ ରାମଃ ପ୍ରଶସ୍ୟମାନସ୍ସୁରସିଦ୍ଧସଂଘୈଃ ।
ଉଵାସ ତସ୍ମିନ୍ମୁନିନା ସହୈଵ ପ୍ରଭାତଵେଲାଂ ପ୍ରତିବୋଧ୍ୟମାନଃ ॥ 36 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଡ୍ଵିଂଶସ୍ସର୍ଗଃ ॥
