ശ്രീമദ്വാല്മീകീയ രാമായണേ ബാലകാംഡമ് ।
അഥ ഷഡ്വിംശസ്സര്ഗഃ ।
മുനേർവചനമക്ലീബം ശ്രുത്വാ നരവരാത്മജഃ ।
രാഘവഃ പ്രാംജലിര്ഭൂത്വാ പ്രത്യുവാച ദൃഢവ്രതഃ ॥ 1 ॥
പിതുർവചനനിര്ദേശാത്പിതുർവചനഗൌരവാത് ।
വചനം കൌശികസ്യേതി കര്തവ്യമവിശംകയാ ॥ 2 ॥
അനുശിഷ്ടോഽസ്മ്യയോധ്യായാം ഗുരുമധ്യേ മഹാത്മനാ ।
പിത്രാ ദശരഥേനാഹം നാവജ്ഞേയം ഹി തദ്വചഃ ॥ 3 ॥
സോഽഹം പിതുർവചശ്ശ്രുത്വാ ശാസനാദ്ബ്രഹ്മവാദിനഃ ।
കരിഷ്യാമി ന സംദേഹസ്താടകാവധമുത്തമമ് ॥ 4 ॥
ഗോബ്രാഹ്മണഹിതാര്ഥായ ദേശസ്യാസ്യ സുഖായ ച ।
തവ ചൈവാപ്രമേയസ്യ വചനം കര്തുമുദ്യതഃ ॥ 5 ॥
ഏവമുക്ത്വാ ധനുര്മധ്യേ ബധ്വാ മുഷ്ടിമരിംദമഃ ।
ജ്യാശബ്ദമകരോത്തീവ്രം ദിശശ്ശബ്ദേന നാദയന് ॥ 6 ॥
തേന ശബ്ദേന വിത്രസ്താസ്താടകാവനവാസിനഃ ।
താടകാ ച സുസംക്രുദ്ധാ തേന ശബ്ദേന മോഹിതാ ॥ 7 ॥
തം ശബ്ദമഭിനിധ്യായ രാക്ഷസീ ക്രോധമൂര്ഛിതാ ।
ശ്രുത്വാ ചാഭ്യദ്രവദ്വേഗാദ്യതശ്ശബ്ദോ വിനിസ്സൃതഃ ॥ 8 ॥
താം ദൃഷ്ട്വാ രാഘവഃ ക്രുദ്ധാം വികൃതാം വികൃതാനനാമ് ।
പ്രമാണേനാതിവൃദ്ധാം ച ലക്ഷ്മണം സോഽഭ്യഭാഷത ॥ 9 ॥
പശ്യ ലക്ഷ്മണ യക്ഷിണ്യാ ഭൈരവം ദാരുണം വപുഃ ।
ഭിദ്യേരന് ദര്ശനാദസ്യാ ഭീരൂണാം ഹൃദയാനി ച ॥ 10 ॥
ഏനാം പശ്യ ദുരാധര്ഷാം മായാബലസമന്വിതാമ് ।
വിനിവൃത്താം കരോമ്യദ്യ ഹൃതകര്ണാഗ്രനാസികാമ് ॥ 11 ॥
ന ഹ്യേനാമുത്സഹേ ഹംതും സ്ത്രീസ്വഭാവേന രക്ഷിതാമ് ।
വീര്യം ചാസ്യാം ഗതിം ചാപി ഹനിഷ്യാമീതി മേ മതിഃ ॥ 12 ॥
ഏവം ബ്രുവാണേ രാമേ തു താടകാ ക്രോധമൂര്ഛിതാ ।
ഉദ്യമ്യ ബാഹൂ ഗര്ജംതീ രാമമേവാഭ്യധാവത ॥ 13 ॥
വിശ്വാമിത്രസ്തു ബ്രഹ്മര്ഷിര്ഹുംകാരേണാഭിഭര്ത്സ്യതാമ് ।
സ്വസ്തി രാഘവയോരസ്തു ജയം ചൈവാഭ്യഭാഷത ॥ 14 ॥
ഉദ്ധൂന്വാനാ രജോ ഘോരം താടകാ രാഘവാവുഭൌ ।
രജോമോഹേന മഹതാ മുഹൂര്തം സാ വ്യമോഹയത് ॥ 15 ॥
തതോ മായാം സമാസ്ഥായ ശിലാവര്ഷേണ രാഘവൌ ।
അവാകിരത്സുമഹതാ തതശ്ചുക്രോധ രാഘവഃ ॥ 16 ॥
ശിലാവര്ഷം മഹത്തസ്യാശ്ശരവര്ഷേണ രാഘവഃ ।
പ്രതിഹത്യോപധാവംത്യാഃ കരൌ ചിച്ഛേദ പത്രിഭിഃ ॥ 17 ॥
തതശ്ഛിന്നഭുജാം ശ്രാംതാമഭ്യാശേ പരിഗര്ജതീമ് ।
സൌമിത്രിരകരോത്ക്രോധാദ്ധൃതകര്ണാഗ്രനാസികാമ് ॥ 18 ॥
കാമരൂപധരാ സദ്യഃ കൃത്വാ രൂപാണ്യനേകശഃ ।
അംതര്ധാനം ഗതാ യക്ഷീ മോഹയംതീവ മായയാ ॥ 19 ॥
അശ്മവര്ഷം വിമുംചംതീ ഭൈരവം വിചചാര ഹ ।
തതസ്താവശ്മവര്ഷേണ കീര്യമാണൌ സമംതതഃ ॥ 20 ॥
ദൃഷ്ട്വാ ഗാധിസുതശ്ശ്രീമാനിദം വചനമബ്രവീത് ।
അലം തേ ഘൃണയാ രാമ പാപൈഷാ ദുഷ്ടചാരിണീ ॥ 21 ॥
യജ്ഞവിഘ്നകരീ യക്ഷീ പുരാവര്ധതി മായയാ ।
വധ്യതാം താവദേവൈഷാ പുരാ സംധ്യാ പ്രവര്തതേ ॥ 22 ॥
രക്ഷാംസി സംധ്യാകാലേഷു ദുര്ധര്ഷാണി ഭവംതി വൈ ।
ഇത്യുക്തസ്തു തദാ യക്ഷീ അശ്മവൃഷ്ട്യാഭിവര്ഷതീമ് ॥ 23 ॥
ദര്ശയന് ശബ്ദവേധിത്വം താം രുരോധ സ സായകൈഃ ।
സാ രുദ്ധാ ശരജാലേന മായാബലസമന്വിതാ ॥ 24 ॥
അഭിദുദ്രാവ കാകുത്സ്ഥം ലക്ഷ്മണം ച വിനേദുഷീ ।
താമാപതംതീം വേഗേന വിക്രാംതാമശനീമിവ ॥ 25 ॥
ശരേണോരസി വിവ്യാഥ സാ പപാത മമാര ച ।
താം ഹതാം ഭീമസംകാശാം ദൃഷ്ട്വാ സുരപതിസ്തദാ ॥ 26 ॥
സാധു സാധ്വിതി കാകുത്സ്ഥം സുരാശ്ച സമപൂജയന് ।
ഉവാച പരമപ്രീത സ്സഹസ്രാക്ഷഃ പുരംദരഃ ॥ 27 ॥
സുരാശ്ച സർവേ സംഹൃഷ്ടാ വിശ്വാമിത്രമഥാബ്രുവന് ।
മുനേ കൌശിക ഭദ്രം തേ സേംദ്രാസ്സർവേ മരുദ്ഗണാഃ ॥ 28 ॥
തോഷിതാഃ കര്മണാഽനേന സ്നേഹം ദര്ശയ രാഘവേ ।
പ്രജാപതേര്ഭൃശാശ്വസ്യ പുത്രാന് സത്യപരാക്രമാന് ॥ 29 ॥
തപോബലഭൃതോ ബ്രഹ്മന് രാഘവായ നിവേദയ ।
പാത്രഭൂതശ്ച തേ ബ്രഹ്മംസ്തവാനുഗമനേ ധൃതഃ ॥ 30 ॥
കര്തവ്യം ച മഹത്കര്മ സുരാണാം രാജസൂനുനാ ।
ഏവമുക്ത്വാ സുരാസ്സർവേ ഹൃഷ്ടാ ജഗ്മുര്യഥാഗതമ് ॥ 31 ॥
വിശ്വാമിത്രം പുരസ്കൃത്യ തതസ്സംധ്യാ പ്രവര്തതേ ।
തതോ മുനിവരഃ പ്രീതസ്താടകാവധതോഷിതഃ ॥ 32 ॥
മൂര്ധ്നി രാമമുപാഘ്രായ ഇദം വചനമബ്രവീത് ।
ഇഹാദ്യ രജനീം രാമ വസേമ ശുഭദര്ശന ॥ 33 ॥
ശ്വഃ പ്രഭാതേ ഗമിഷ്യാമസ്തദാശ്രമപദം മമ ।
വിശ്വാമിത്രവചഃ ശ്രുത്വാ ഹൃഷ്ടോ ദശരഥാത്മജഃ ॥ 34 ॥
ഉവാസ രജനീം തത്ര താടകായാ വനേ സുഖമ് ।
മുക്തശാപം വനം തച്ച തസ്മിന്നേവ തദാഹനി ॥ 35 ॥
രമണീയം വിബഭ്രാജ യഥാ ചൈത്രരഥം വനമ് ।
നിഹത്യ താം യക്ഷസുതാം സ രാമഃ പ്രശസ്യമാനസ്സുരസിദ്ധസംഘൈഃ ।
ഉവാസ തസ്മിന്മുനിനാ സഹൈവ പ്രഭാതവേലാം പ്രതിബോധ്യമാനഃ ॥ 36 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷഡ്വിംശസ്സര്ഗഃ ॥
