ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକୋନତ୍ରିଂଶସ୍ସର୍ଗଃ ।
ଅଥ ତସ୍ୟାପ୍ରମେୟସ୍ୟ ତଦ୍ଵନଂ ପରିପୃଚ୍ଛତଃ ।
ଵିଶ୍ଵାମିତ୍ରୋ ମହାତେଜା ଵ୍ୟାଖ୍ୟାତୁମୁପଚକ୍ରମେ ॥ 1 ॥
ଇହ ରାମ ମହାବାହୋ ଵିଷ୍ଣୁର୍ଦେଵଵରଃ ପ୍ରଭୁଃ ।
ଵର୍ଷାଣି ସୁବହୂନୀହ ତଥା ୟୁଗଶତାନି ଚ ॥ 2 ॥
ତପଶ୍ଚରଣୟୋଗାର୍ଥମୁଵାସ ସୁମହାତପାଃ ।
ଏଷ ପୂର୍ଵାଶ୍ରମୋ ରାମ ଵାମନସ୍ୟ ମହାତ୍ମନଃ ॥ 3 ॥
ସିଦ୍ଧାଶ୍ରମ ଇତି ଖ୍ୟାତସ୍ସିଦ୍ଧୋ ହ୍ୟତ୍ର ମହାତପାଃ ।
ଏତସ୍ମିନ୍ନେଵ କାଲେ ତୁ ରାଜା ଵୈରୋଚନିର୍ବଲିଃ ॥ 4 ॥
ନିର୍ଜିତ୍ୟ ଦୈଵତଗଣାନ୍ ସେଂଦ୍ରାଂଶ୍ଚ ସମରୁଦ୍ଗଣାନ୍ ।
କାରୟାମାସ ତଦ୍ରାଜ୍ୟଂ ତ୍ରିଷୁ ଲୋକେଷୁ ଵିଶ୍ରୁତଃ ॥ 5 ॥
ବଲେସ୍ତୁ ୟଜମାନସ୍ୟ ଦେଵାସ୍ସାଗ୍ନିପୁରୋଗମାଃ ।
ସମାଗମ୍ୟ ସ୍ଵୟଂ ଚୈଵ ଵିଷ୍ଣୁମୂଚୁରିହାଶ୍ରମେ ॥ 6 ॥
ବଲିର୍ଵୈରୋଚନିର୍ଵିଷ୍ଣୋ ୟଜତେ ୟଜ୍ଞମୁତ୍ତମମ୍ ।
ଅସମାପ୍ତେ କ୍ରତୌ ତସ୍ମିନ୍ ସ୍ଵକାର୍ୟମଭିପଦ୍ୟତାମ୍ ॥ 7 ॥
ୟେ ଚୈନମଭିଵର୍ତଂତେ ୟାଚିତାର ଇତସ୍ତତଃ ।
ୟଚ୍ଚ ୟତ୍ର ୟଥାଵଚ୍ଚ ସର୍ଵଂ ତେଭ୍ୟଃ ପ୍ରୟଚ୍ଛତି ॥ 8 ॥
ସ ତ୍ଵଂ ସୁରହିତାର୍ଥାୟ ମାୟାୟୋଗମୁପାଗତଃ ।
ଵାମନତ୍ଵଂ ଗତୋ ଵିଷ୍ଣୋ କୁରୁ କଲ୍ୟାଣମୁତ୍ତମମ୍ ॥ 9 ॥
ଏତସ୍ମିନ୍ନଂତରେ ରାମ କଶ୍ୟପୋଽଗ୍ନିସମପ୍ରଭଃ ।
ଅଦିତ୍ୟା ସହିତୋ ରାମ ଦୀପ୍ୟମାନ ଇଵୌଜସା ॥ 10 ॥
ଦେଵୀସହାୟୋ ଭଗଵାନ୍ ଦିଵ୍ୟଂ ଵର୍ଷସହସ୍ରକମ୍ ।
ଵ୍ରତଂ ସମାପ୍ୟ ଵରଦଂ ତୁଷ୍ଟାଵ ମଧୁସୂଦନମ୍ ॥ 11 ॥
ତପୋମୟଂ ତପୋରାଶିଂ ତପୋମୂର୍ତିଂ ତପାତ୍ମକମ୍ ।
ତପସା ତ୍ଵାଂ ସୁତପ୍ତେନ ପଶ୍ୟାମି ପୁରୁଷୋତ୍ତମମ୍ ॥ 12 ॥
ଶରୀରେ ତଵ ପଶ୍ୟାମି ଜଗତ୍ସର୍ଵମିଦଂ ପ୍ରଭୋ ।
ତ୍ଵମନାଦିରନିର୍ଦେଶ୍ୟସ୍ତ୍ଵାମହଂ ଶରଣଂ ଗତଃ ॥ 13 ॥
ତମୁଵାଚ ହରିଃ ପ୍ରୀତଃ କଶ୍ୟପଂ ଧୂତକଲ୍ମଷମ୍ ।
ଵରଂ ଵରୟ ଭଦ୍ରଂ ତେ ଵରାର୍ହୋଽସି ମତୋ ମମ ॥ 14 ॥
ତଚ୍ଛ୍ରୁତ୍ଵା ଵଚନଂ ତସ୍ୟ ମାରୀଚଃ କଶ୍ୟପୋଽବ୍ରଵୀତ୍ ।
ଅଦିତ୍ୟା ଦେଵତାନାଂ ଚ ମମ ଚୈଵାନୁୟାଚତଃ ॥ 15 ॥
ଵରଂ ଵରଦ ସୁପ୍ରୀତୋ ଦାତୁମର୍ହସି ସୁଵ୍ରତ ।
ପୁତ୍ରତ୍ଵଂ ଗଚ୍ଛ ଭଗଵନ୍ନଦିତ୍ୟା ମମ ଚାନଘ ॥ 16 ॥
ଭ୍ରାତା ଭଵ ୟଵୀୟାଂସ୍ତ୍ଵଂ ଶକ୍ରସ୍ୟାସୁରସୂଦନ ।
ଶୋକାର୍ତାନାଂ ତୁ ଦେଵାନାଂ ସାହାୟ୍ୟଂ କର୍ତୁମର୍ହସି ॥ 17 ॥
ଅୟଂ ସିଦ୍ଧାଶ୍ରମୋ ନାମ ପ୍ରସାଦା ତ୍ତେ ଭଵିଷ୍ୟତି ।
ସିଦ୍ଧେ କର୍ମଣି ଦେଵେଶ ଉତ୍ତିଷ୍ଠ ଭଗଵନ୍ନିତଃ ॥ 18 ॥
ଅଥ ଵିଷ୍ଣୁର୍ମହାତେଜା ଅଦିତ୍ୟାଂ ସମଜାୟତ ।
ଵାମନଂ ରୂପମାସ୍ଥାୟ ଵୈରୋଚନିମୁପାଗମତ୍ ॥ 19 ॥
ତ୍ରୀନ୍ କ୍ରମାନଥ ଭିକ୍ଷିତ୍ଵା ପ୍ରତିଗୃହ୍ୟ ଚ ମାନଦଃ ।
ଆକ୍ରମ୍ୟ ଲୋକାନ୍ ଲୋକାତ୍ମା ସର୍ଵଭୂତହିତେ ରତଃ ॥ 20 ॥
ମହେଂଦ୍ରାୟ ପୁନଃ ପ୍ରାଦାନ୍ନିୟମ୍ୟ ବଲିମୋଜସା ।
ତ୍ରୈଲୋକ୍ୟଂ ସ ମହାତେଜାଶ୍ଚକ୍ରେ ଶକ୍ରଵଶଂ ପୁନଃ ॥ 21 ॥
ତେନୈଷ ପୂର୍ଵମାକ୍ରାଂତ ଆଶ୍ରମଶ୍ଶ୍ରମନାଶନଃ ।
ମୟାପି ଭକ୍ତୟ ତସ୍ୟୈଷ ଵାମନସ୍ୟୋପଭୁଜ୍ୟତେ ॥ 22 ॥
ଏତମାଶ୍ରମମାୟାଂତି ରାକ୍ଷସା ଵିଘ୍ନକାରିଣଃ ।
ଅତ୍ରୈଵ ପୁରୁଷଵ୍ୟାଘ୍ର ହଂତଵ୍ୟା ଦୁଷ୍ଟଚାରିଣଃ ॥ 23 ॥
ଅଦ୍ୟ ଗଚ୍ଛାମହେ ରାମ ସିଦ୍ଧାଶ୍ରମମନୁତ୍ତମମ୍ ।
ତଦାଶ୍ରମପଦଂ ତାତ ତଵାପ୍ୟେତଦ୍ୟଥା ମମ ॥ 24 ॥
ପ୍ରଵିଶନ୍ନାଶ୍ରମପଦଂ ଵ୍ୟରୋଚତ ମହାମୁନିଃ ।
ଶଶୀଵ ଗତନୀହାରଃ ପୁନର୍ଵସୁସମନ୍ଵିତଃ ॥ 25 ॥
ତଂ ଦୃଷ୍ଟ୍ଵା ମୁନୟସ୍ସର୍ଵେ ସିଦ୍ଧାଶ୍ରମନିଵାସିନଃ ।
ଉତ୍ପତ୍ତ୍ୟୋତ୍ପତ୍ତ୍ୟ ସହସା ଵିଶ୍ଵାମିତ୍ରମପୂଜୟନ୍ ॥ 26 ॥
ୟଥାର୍ହଂ ଚକ୍ରିରେ ପୂଜାଂ ଵିଶ୍ଵାମିତ୍ରାୟ ଧୀମତେ ।
ତଥୈଵ ରାଜପୁତ୍ରାଭ୍ୟାମକୁର୍ଵନ୍ନତିଥିକ୍ରିୟାମ୍ ॥ 27 ॥
ମୁହୂର୍ତମଥ ଵିଶ୍ରାଂତୌ ରାଜପୁତ୍ରାଵରିଂଦମୌ ।
ପ୍ରାଂଜଲୀ ମୁନିଶାର୍ଦୂଲମୂଚତୂ ରଘୁନଂଦନୌ ॥ 28 ॥
ଅଦ୍ୟୈଵ ଦୀକ୍ଷାଂ ପ୍ରଵିଶ ଭଦ୍ରଂ ତେ ମୁନିପୁଂଗଵ ।
ସିଦ୍ଧାଶ୍ରମୋଽୟଂ ସିଦ୍ଧସ୍ସ୍ୟାତ୍ ସତ୍ୟମସ୍ତୁ ଵଚସ୍ତଵ ॥ 29 ॥
ଏଵମୁକ୍ତୋ ମହାତେଜା ଵିଶ୍ଵାମିତ୍ରୋ ମହାନ୍ ଋଷିଃ ।
ପ୍ରଵିଵେଶ ତଦା ଦୀକ୍ଷାଂ ନିୟତୋ ନିୟତେଂଦ୍ରିୟଃ ॥ 30 ॥
କୁମାରାଵପି ତାଂ ରାତ୍ରିମୁଷିତ୍ଵା ସୁସମାହିତୌ ।
ପ୍ରଭାତକାଲେ ଚୋତ୍ଥାୟ ପୂର୍ଵାଂ ସଂଧ୍ୟାମୁପାସ୍ୟ ଚ ॥ 31 ॥
ସ୍ପୃଷ୍ଟୋଦକୌ ଶୁଚୀ ଜପ୍ୟଂ ସମାପ୍ୟ ନିୟମେନ ଚ ।
ହୁତାଗ୍ନିହୋତ୍ରମାସୀନଂ ଵିଶ୍ଵାମିତ୍ରମଵଂଦତାମ୍ ॥ 32 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକୋନତ୍ରିଂଶସ୍ସର୍ଗଃ ॥
