ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകോനത്രിംശസ്സര്ഗഃ ।
അഥ തസ്യാപ്രമേയസ്യ തദ്വനം പരിപൃച്ഛതഃ ।
വിശ്വാമിത്രോ മഹാതേജാ വ്യാഖ്യാതുമുപചക്രമേ ॥ 1 ॥
ഇഹ രാമ മഹാബാഹോ വിഷ്ണുര്ദേവവരഃ പ്രഭുഃ ।
വര്ഷാണി സുബഹൂനീഹ തഥാ യുഗശതാനി ച ॥ 2 ॥
തപശ്ചരണയോഗാര്ഥമുവാസ സുമഹാതപാഃ ।
ഏഷ പൂർവാശ്രമോ രാമ വാമനസ്യ മഹാത്മനഃ ॥ 3 ॥
സിദ്ധാശ്രമ ഇതി ഖ്യാതസ്സിദ്ധോ ഹ്യത്ര മഹാതപാഃ ।
ഏതസ്മിന്നേവ കാലേ തു രാജാ വൈരോചനിര്ബലിഃ ॥ 4 ॥
നിര്ജിത്യ ദൈവതഗണാന് സേംദ്രാംശ്ച സമരുദ്ഗണാന് ।
കാരയാമാസ തദ്രാജ്യം ത്രിഷു ലോകേഷു വിശ്രുതഃ ॥ 5 ॥
ബലേസ്തു യജമാനസ്യ ദേവാസ്സാഗ്നിപുരോഗമാഃ ।
സമാഗമ്യ സ്വയം ചൈവ വിഷ്ണുമൂചുരിഹാശ്രമേ ॥ 6 ॥
ബലിർവൈരോചനിർവിഷ്ണോ യജതേ യജ്ഞമുത്തമമ് ।
അസമാപ്തേ ക്രതൌ തസ്മിന് സ്വകാര്യമഭിപദ്യതാമ് ॥ 7 ॥
യേ ചൈനമഭിവര്തംതേ യാചിതാര ഇതസ്തതഃ ।
യച്ച യത്ര യഥാവച്ച സർവം തേഭ്യഃ പ്രയച്ഛതി ॥ 8 ॥
സ ത്വം സുരഹിതാര്ഥായ മായായോഗമുപാഗതഃ ।
വാമനത്വം ഗതോ വിഷ്ണോ കുരു കല്യാണമുത്തമമ് ॥ 9 ॥
ഏതസ്മിന്നംതരേ രാമ കശ്യപോഽഗ്നിസമപ്രഭഃ ।
അദിത്യാ സഹിതോ രാമ ദീപ്യമാന ഇവൌജസാ ॥ 10 ॥
ദേവീസഹായോ ഭഗവാന് ദിവ്യം വര്ഷസഹസ്രകമ് ।
വ്രതം സമാപ്യ വരദം തുഷ്ടാവ മധുസൂദനമ് ॥ 11 ॥
തപോമയം തപോരാശിം തപോമൂര്തിം തപാത്മകമ് ।
തപസാ ത്വാം സുതപ്തേന പശ്യാമി പുരുഷോത്തമമ് ॥ 12 ॥
ശരീരേ തവ പശ്യാമി ജഗത്സർവമിദം പ്രഭോ ।
ത്വമനാദിരനിര്ദേശ്യസ്ത്വാമഹം ശരണം ഗതഃ ॥ 13 ॥
തമുവാച ഹരിഃ പ്രീതഃ കശ്യപം ധൂതകല്മഷമ് ।
വരം വരയ ഭദ്രം തേ വരാര്ഹോഽസി മതോ മമ ॥ 14 ॥
തച്ഛ്രുത്വാ വചനം തസ്യ മാരീചഃ കശ്യപോഽബ്രവീത് ।
അദിത്യാ ദേവതാനാം ച മമ ചൈവാനുയാചതഃ ॥ 15 ॥
വരം വരദ സുപ്രീതോ ദാതുമര്ഹസി സുവ്രത ।
പുത്രത്വം ഗച്ഛ ഭഗവന്നദിത്യാ മമ ചാനഘ ॥ 16 ॥
ഭ്രാതാ ഭവ യവീയാംസ്ത്വം ശക്രസ്യാസുരസൂദന ।
ശോകാര്താനാം തു ദേവാനാം സാഹായ്യം കര്തുമര്ഹസി ॥ 17 ॥
അയം സിദ്ധാശ്രമോ നാമ പ്രസാദാ ത്തേ ഭവിഷ്യതി ।
സിദ്ധേ കര്മണി ദേവേശ ഉത്തിഷ്ഠ ഭഗവന്നിതഃ ॥ 18 ॥
അഥ വിഷ്ണുര്മഹാതേജാ അദിത്യാം സമജായത ।
വാമനം രൂപമാസ്ഥായ വൈരോചനിമുപാഗമത് ॥ 19 ॥
ത്രീന് ക്രമാനഥ ഭിക്ഷിത്വാ പ്രതിഗൃഹ്യ ച മാനദഃ ।
ആക്രമ്യ ലോകാന് ലോകാത്മാ സർവഭൂതഹിതേ രതഃ ॥ 20 ॥
മഹേംദ്രായ പുനഃ പ്രാദാന്നിയമ്യ ബലിമോജസാ ।
ത്രൈലോക്യം സ മഹാതേജാശ്ചക്രേ ശക്രവശം പുനഃ ॥ 21 ॥
തേനൈഷ പൂർവമാക്രാംത ആശ്രമശ്ശ്രമനാശനഃ ।
മയാപി ഭക്തയ തസ്യൈഷ വാമനസ്യോപഭുജ്യതേ ॥ 22 ॥
ഏതമാശ്രമമായാംതി രാക്ഷസാ വിഘ്നകാരിണഃ ।
അത്രൈവ പുരുഷവ്യാഘ്ര ഹംതവ്യാ ദുഷ്ടചാരിണഃ ॥ 23 ॥
അദ്യ ഗച്ഛാമഹേ രാമ സിദ്ധാശ്രമമനുത്തമമ് ।
തദാശ്രമപദം താത തവാപ്യേതദ്യഥാ മമ ॥ 24 ॥
പ്രവിശന്നാശ്രമപദം വ്യരോചത മഹാമുനിഃ ।
ശശീവ ഗതനീഹാരഃ പുനർവസുസമന്വിതഃ ॥ 25 ॥
തം ദൃഷ്ട്വാ മുനയസ്സർവേ സിദ്ധാശ്രമനിവാസിനഃ ।
ഉത്പത്ത്യോത്പത്ത്യ സഹസാ വിശ്വാമിത്രമപൂജയന് ॥ 26 ॥
യഥാര്ഹം ചക്രിരേ പൂജാം വിശ്വാമിത്രായ ധീമതേ ।
തഥൈവ രാജപുത്രാഭ്യാമകുർവന്നതിഥിക്രിയാമ് ॥ 27 ॥
മുഹൂര്തമഥ വിശ്രാംതൌ രാജപുത്രാവരിംദമൌ ।
പ്രാംജലീ മുനിശാര്ദൂലമൂചതൂ രഘുനംദനൌ ॥ 28 ॥
അദ്യൈവ ദീക്ഷാം പ്രവിശ ഭദ്രം തേ മുനിപുംഗവ ।
സിദ്ധാശ്രമോഽയം സിദ്ധസ്സ്യാത് സത്യമസ്തു വചസ്തവ ॥ 29 ॥
ഏവമുക്തോ മഹാതേജാ വിശ്വാമിത്രോ മഹാന് ഋഷിഃ ।
പ്രവിവേശ തദാ ദീക്ഷാം നിയതോ നിയതേംദ്രിയഃ ॥ 30 ॥
കുമാരാവപി താം രാത്രിമുഷിത്വാ സുസമാഹിതൌ ।
പ്രഭാതകാലേ ചോത്ഥായ പൂർവാം സംധ്യാമുപാസ്യ ച ॥ 31 ॥
സ്പൃഷ്ടോദകൌ ശുചീ ജപ്യം സമാപ്യ നിയമേന ച ।
ഹുതാഗ്നിഹോത്രമാസീനം വിശ്വാമിത്രമവംദതാമ് ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകോനത്രിംശസ്സര്ഗഃ ॥
