śrīmadvālmīkīya rāmāyaṇē bālakāṇḍam ।
atha ēkōnatriṃśassargaḥ ।
atha tasyāpramēyasya tadvanaṃ paripṛchChataḥ ।
viśvāmitrō mahātējā vyākhyātumupachakramē ॥ 1 ॥
iha rāma mahābāhō viṣṇurdēvavaraḥ prabhuḥ ।
varṣāṇi subahūnīha tathā yugaśatāni cha ॥ 2 ॥
tapaścharaṇayōgārthamuvāsa sumahātapāḥ ।
ēṣa pūrvāśramō rāma vāmanasya mahātmanaḥ ॥ 3 ॥
siddhāśrama iti khyātassiddhō hyatra mahātapāḥ ।
ētasminnēva kālē tu rājā vairōchanirbaliḥ ॥ 4 ॥
nirjitya daivatagaṇān sēndrāṃścha samarudgaṇān ।
kārayāmāsa tadrājyaṃ triṣu lōkēṣu viśrutaḥ ॥ 5 ॥
balēstu yajamānasya dēvāssāgnipurōgamāḥ ।
samāgamya svayaṃ chaiva viṣṇumūchurihāśramē ॥ 6 ॥
balirvairōchanirviṣṇō yajatē yajñamuttamam ।
asamāptē kratau tasmin svakāryamabhipadyatām ॥ 7 ॥
yē chainamabhivartantē yāchitāra itastataḥ ।
yachcha yatra yathāvachcha sarvaṃ tēbhyaḥ prayachChati ॥ 8 ॥
sa tvaṃ surahitārthāya māyāyōgamupāgataḥ ।
vāmanatvaṃ gatō viṣṇō kuru kalyāṇamuttamam ॥ 9 ॥
ētasminnantarē rāma kaśyapō'gnisamaprabhaḥ ।
adityā sahitō rāma dīpyamāna ivaujasā ॥ 10 ॥
dēvīsahāyō bhagavān divyaṃ varṣasahasrakam ।
vrataṃ samāpya varadaṃ tuṣṭāva madhusūdanam ॥ 11 ॥
tapōmayaṃ tapōrāśiṃ tapōmūrtiṃ tapātmakam ।
tapasā tvāṃ sutaptēna paśyāmi puruṣōttamam ॥ 12 ॥
śarīrē tava paśyāmi jagatsarvamidaṃ prabhō ।
tvamanādiranirdēśyastvāmahaṃ śaraṇaṃ gataḥ ॥ 13 ॥
tamuvācha hariḥ prītaḥ kaśyapaṃ dhūtakalmaṣam ।
varaṃ varaya bhadraṃ tē varārhō'si matō mama ॥ 14 ॥
tachChrutvā vachanaṃ tasya mārīchaḥ kaśyapō'bravīt ।
adityā dēvatānāṃ cha mama chaivānuyāchataḥ ॥ 15 ॥
varaṃ varada suprītō dātumarhasi suvrata ।
putratvaṃ gachCha bhagavannadityā mama chānagha ॥ 16 ॥
bhrātā bhava yavīyāṃstvaṃ śakrasyāsurasūdana ।
śōkārtānāṃ tu dēvānāṃ sāhāyyaṃ kartumarhasi ॥ 17 ॥
ayaṃ siddhāśramō nāma prasādā ttē bhaviṣyati ।
siddhē karmaṇi dēvēśa uttiṣṭha bhagavannitaḥ ॥ 18 ॥
atha viṣṇurmahātējā adityāṃ samajāyata ।
vāmanaṃ rūpamāsthāya vairōchanimupāgamat ॥ 19 ॥
trīn kramānatha bhikṣitvā pratigṛhya cha mānadaḥ ।
ākramya lōkān lōkātmā sarvabhūtahitē rataḥ ॥ 20 ॥
mahēndrāya punaḥ prādānniyamya balimōjasā ।
trailōkyaṃ sa mahātējāśchakrē śakravaśaṃ punaḥ ॥ 21 ॥
tēnaiṣa pūrvamākrānta āśramaśśramanāśanaḥ ।
mayāpi bhaktaya tasyaiṣa vāmanasyōpabhujyatē ॥ 22 ॥
ētamāśramamāyānti rākṣasā vighnakāriṇaḥ ।
atraiva puruṣavyāghra hantavyā duṣṭachāriṇaḥ ॥ 23 ॥
adya gachChāmahē rāma siddhāśramamanuttamam ।
tadāśramapadaṃ tāta tavāpyētadyathā mama ॥ 24 ॥
praviśannāśramapadaṃ vyarōchata mahāmuniḥ ।
śaśīva gatanīhāraḥ punarvasusamanvitaḥ ॥ 25 ॥
taṃ dṛṣṭvā munayassarvē siddhāśramanivāsinaḥ ।
utpattyōtpattya sahasā viśvāmitramapūjayan ॥ 26 ॥
yathārhaṃ chakrirē pūjāṃ viśvāmitrāya dhīmatē ।
tathaiva rājaputrābhyāmakurvannatithikriyām ॥ 27 ॥
muhūrtamatha viśrāntau rājaputrāvarindamau ।
prāñjalī muniśārdūlamūchatū raghunandanau ॥ 28 ॥
adyaiva dīkṣāṃ praviśa bhadraṃ tē munipuṅgava ।
siddhāśramō'yaṃ siddhassyāt satyamastu vachastava ॥ 29 ॥
ēvamuktō mahātējā viśvāmitrō mahān ṛṣiḥ ।
pravivēśa tadā dīkṣāṃ niyatō niyatēndriyaḥ ॥ 30 ॥
kumārāvapi tāṃ rātrimuṣitvā susamāhitau ।
prabhātakālē chōtthāya pūrvāṃ sandhyāmupāsya cha ॥ 31 ॥
spṛṣṭōdakau śuchī japyaṃ samāpya niyamēna cha ।
hutāgnihōtramāsīnaṃ viśvāmitramavandatām ॥ 32 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkōnatriṃśassargaḥ ॥
