ශ්රීමද්වාල්මීකීය රාමායණේ බාලකාංඩම් ।
අථ ඒකෝනත්රිංශස්සර්ගඃ ।
අථ තස්යාප්රමේයස්ය තද්වනං පරිපෘච්ඡතඃ ।
විශ්වාමිත්රෝ මහාතේජා ව්යාඛ්යාතුමුපචක්රමේ ॥ 1 ॥
ඉහ රාම මහාබාහෝ විෂ්ණුර්දේවවරඃ ප්රභුඃ ।
වර්ෂාණි සුබහූනීහ තථා යුගශතානි ච ॥ 2 ॥
තපශ්චරණයෝගාර්ථමුවාස සුමහාතපාඃ ।
ඒෂ පූර්වාශ්රමෝ රාම වාමනස්ය මහාත්මනඃ ॥ 3 ॥
සිද්ධාශ්රම ඉති ඛ්යාතස්සිද්ධෝ හ්යත්ර මහාතපාඃ ।
ඒතස්මින්නේව කාලේ තු රාජා වෛරෝචනිර්බලිඃ ॥ 4 ॥
නිර්ජිත්ය දෛවතගණාන් සේංද්රාංශ්ච සමරුද්ගණාන් ।
කාරයාමාස තද්රාජ්යං ත්රිෂු ලෝකේෂු විශ්රුතඃ ॥ 5 ॥
බලේස්තු යජමානස්ය දේවාස්සාග්නිපුරෝගමාඃ ।
සමාගම්ය ස්වයං චෛව විෂ්ණුමූචුරිහාශ්රමේ ॥ 6 ॥
බලිර්වෛරෝචනිර්විෂ්ණෝ යජතේ යජ්ඤමුත්තමම් ।
අසමාප්තේ ක්රතෞ තස්මින් ස්වකාර්යමභිපද්යතාම් ॥ 7 ॥
යේ චෛනමභිවර්තංතේ යාචිතාර ඉතස්තතඃ ।
යච්ච යත්ර යථාවච්ච සර්වං තේභ්යඃ ප්රයච්ඡති ॥ 8 ॥
ස ත්වං සුරහිතාර්ථාය මායායෝගමුපාගතඃ ।
වාමනත්වං ගතෝ විෂ්ණෝ කුරු කල්යාණමුත්තමම් ॥ 9 ॥
ඒතස්මින්නංතරේ රාම කශ්යපෝऽග්නිසමප්රභඃ ।
අදිත්යා සහිතෝ රාම දීප්යමාන ඉවෞජසා ॥ 10 ॥
දේවීසහායෝ භගවාන් දිව්යං වර්ෂසහස්රකම් ।
ව්රතං සමාප්ය වරදං තුෂ්ටාව මධුසූදනම් ॥ 11 ॥
තපෝමයං තපෝරාශිං තපෝමූර්තිං තපාත්මකම් ।
තපසා ත්වාං සුතප්තේන පශ්යාමි පුරුෂෝත්තමම් ॥ 12 ॥
ශරීරේ තව පශ්යාමි ජගත්සර්වමිදං ප්රභෝ ।
ත්වමනාදිරනිර්දේශ්යස්ත්වාමහං ශරණං ගතඃ ॥ 13 ॥
තමුවාච හරිඃ ප්රීතඃ කශ්යපං ධූතකල්මෂම් ।
වරං වරය භද්රං තේ වරාර්හෝऽසි මතෝ මම ॥ 14 ॥
තච්ඡ්රුත්වා වචනං තස්ය මාරීචඃ කශ්යපෝऽබ්රවීත් ।
අදිත්යා දේවතානාං ච මම චෛවානුයාචතඃ ॥ 15 ॥
වරං වරද සුප්රීතෝ දාතුමර්හසි සුව්රත ।
පුත්රත්වං ගච්ඡ භගවන්නදිත්යා මම චානඝ ॥ 16 ॥
භ්රාතා භව යවීයාංස්ත්වං ශක්රස්යාසුරසූදන ।
ශෝකාර්තානාං තු දේවානාං සාහාය්යං කර්තුමර්හසි ॥ 17 ॥
අයං සිද්ධාශ්රමෝ නාම ප්රසාදා ත්තේ භවිෂ්යති ।
සිද්ධේ කර්මණි දේවේශ උත්තිෂ්ඨ භගවන්නිතඃ ॥ 18 ॥
අථ විෂ්ණුර්මහාතේජා අදිත්යාං සමජායත ।
වාමනං රූපමාස්ථාය වෛරෝචනිමුපාගමත් ॥ 19 ॥
ත්රීන් ක්රමානථ භික්ෂිත්වා ප්රතිගෘහ්ය ච මානදඃ ।
ආක්රම්ය ලෝකාන් ලෝකාත්මා සර්වභූතහිතේ රතඃ ॥ 20 ॥
මහේංද්රාය පුනඃ ප්රාදාන්නියම්ය බලිමෝජසා ।
ත්රෛලෝක්යං ස මහාතේජාශ්චක්රේ ශක්රවශං පුනඃ ॥ 21 ॥
තේනෛෂ පූර්වමාක්රාංත ආශ්රමශ්ශ්රමනාශනඃ ।
මයාපි භක්තය තස්යෛෂ වාමනස්යෝපභුජ්යතේ ॥ 22 ॥
ඒතමාශ්රමමායාංති රාක්ෂසා විඝ්නකාරිණඃ ।
අත්රෛව පුරුෂව්යාඝ්ර හංතව්යා දුෂ්ටචාරිණඃ ॥ 23 ॥
අද්ය ගච්ඡාමහේ රාම සිද්ධාශ්රමමනුත්තමම් ।
තදාශ්රමපදං තාත තවාප්යේතද්යථා මම ॥ 24 ॥
ප්රවිශන්නාශ්රමපදං ව්යරෝචත මහාමුනිඃ ।
ශශීව ගතනීහාරඃ පුනර්වසුසමන්විතඃ ॥ 25 ॥
තං දෘෂ්ට්වා මුනයස්සර්වේ සිද්ධාශ්රමනිවාසිනඃ ।
උත්පත්ත්යෝත්පත්ත්ය සහසා විශ්වාමිත්රමපූජයන් ॥ 26 ॥
යථාර්හං චක්රිරේ පූජාං විශ්වාමිත්රාය ධීමතේ ।
තථෛව රාජපුත්රාභ්යාමකුර්වන්නතිථික්රියාම් ॥ 27 ॥
මුහූර්තමථ විශ්රාංතෞ රාජපුත්රාවරිංදමෞ ।
ප්රාංජලී මුනිශාර්දූලමූචතූ රඝුනංදනෞ ॥ 28 ॥
අද්යෛව දීක්ෂාං ප්රවිශ භද්රං තේ මුනිපුංගව ।
සිද්ධාශ්රමෝऽයං සිද්ධස්ස්යාත් සත්යමස්තු වචස්තව ॥ 29 ॥
ඒවමුක්තෝ මහාතේජා විශ්වාමිත්රෝ මහාන් ඍෂිඃ ।
ප්රවිවේශ තදා දීක්ෂාං නියතෝ නියතේංද්රියඃ ॥ 30 ॥
කුමාරාවපි තාං රාත්රිමුෂිත්වා සුසමාහිතෞ ।
ප්රභාතකාලේ චෝත්ථාය පූර්වාං සංධ්යාමුපාස්ය ච ॥ 31 ॥
ස්පෘෂ්ටෝදකෞ ශුචී ජප්යං සමාප්ය නියමේන ච ।
හුතාග්නිහෝත්රමාසීනං විශ්වාමිත්රමවංදතාම් ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකෝනත්රිංශස්සර්ගඃ ॥
