శ్రీమద్వాల్మీకీయ రామాయణే బాలకాండమ్ ।
అథ ఏకోనత్రింశస్సర్గః ।
అథ తస్యాప్రమేయస్య తద్వనం పరిపృచ్ఛతః ।
విశ్వామిత్రో మహాతేజా వ్యాఖ్యాతుముపచక్రమే ॥ 1 ॥
ఇహ రామ మహాబాహో విష్ణుర్దేవవరః ప్రభుః ।
వర్షాణి సుబహూనీహ తథా యుగశతాని చ ॥ 2 ॥
తపశ్చరణయోగార్థమువాస సుమహాతపాః ।
ఏష పూర్వాశ్రమో రామ వామనస్య మహాత్మనః ॥ 3 ॥
సిద్ధాశ్రమ ఇతి ఖ్యాతస్సిద్ధో హ్యత్ర మహాతపాః ।
ఏతస్మిన్నేవ కాలే తు రాజా వైరోచనిర్బలిః ॥ 4 ॥
నిర్జిత్య దైవతగణాన్ సేంద్రాంశ్చ సమరుద్గణాన్ ।
కారయామాస తద్రాజ్యం త్రిషు లోకేషు విశ్రుతః ॥ 5 ॥
బలేస్తు యజమానస్య దేవాస్సాగ్నిపురోగమాః ।
సమాగమ్య స్వయం చైవ విష్ణుమూచురిహాశ్రమే ॥ 6 ॥
బలిర్వైరోచనిర్విష్ణో యజతే యజ్ఞముత్తమమ్ ।
అసమాప్తే క్రతౌ తస్మిన్ స్వకార్యమభిపద్యతామ్ ॥ 7 ॥
యే చైనమభివర్తంతే యాచితార ఇతస్తతః ।
యచ్చ యత్ర యథావచ్చ సర్వం తేభ్యః ప్రయచ్ఛతి ॥ 8 ॥
స త్వం సురహితార్థాయ మాయాయోగముపాగతః ।
వామనత్వం గతో విష్ణో కురు కల్యాణముత్తమమ్ ॥ 9 ॥
ఏతస్మిన్నంతరే రామ కశ్యపోఽగ్నిసమప్రభః ।
అదిత్యా సహితో రామ దీప్యమాన ఇవౌజసా ॥ 10 ॥
దేవీసహాయో భగవాన్ దివ్యం వర్షసహస్రకమ్ ।
వ్రతం సమాప్య వరదం తుష్టావ మధుసూదనమ్ ॥ 11 ॥
తపోమయం తపోరాశిం తపోమూర్తిం తపాత్మకమ్ ।
తపసా త్వాం సుతప్తేన పశ్యామి పురుషోత్తమమ్ ॥ 12 ॥
శరీరే తవ పశ్యామి జగత్సర్వమిదం ప్రభో ।
త్వమనాదిరనిర్దేశ్యస్త్వామహం శరణం గతః ॥ 13 ॥
తమువాచ హరిః ప్రీతః కశ్యపం ధూతకల్మషమ్ ।
వరం వరయ భద్రం తే వరార్హోఽసి మతో మమ ॥ 14 ॥
తచ్ఛ్రుత్వా వచనం తస్య మారీచః కశ్యపోఽబ్రవీత్ ।
అదిత్యా దేవతానాం చ మమ చైవానుయాచతః ॥ 15 ॥
వరం వరద సుప్రీతో దాతుమర్హసి సువ్రత ।
పుత్రత్వం గచ్ఛ భగవన్నదిత్యా మమ చానఘ ॥ 16 ॥
భ్రాతా భవ యవీయాంస్త్వం శక్రస్యాసురసూదన ।
శోకార్తానాం తు దేవానాం సాహాయ్యం కర్తుమర్హసి ॥ 17 ॥
అయం సిద్ధాశ్రమో నామ ప్రసాదా త్తే భవిష్యతి ।
సిద్ధే కర్మణి దేవేశ ఉత్తిష్ఠ భగవన్నితః ॥ 18 ॥
అథ విష్ణుర్మహాతేజా అదిత్యాం సమజాయత ।
వామనం రూపమాస్థాయ వైరోచనిముపాగమత్ ॥ 19 ॥
త్రీన్ క్రమానథ భిక్షిత్వా ప్రతిగృహ్య చ మానదః ।
ఆక్రమ్య లోకాన్ లోకాత్మా సర్వభూతహితే రతః ॥ 20 ॥
మహేంద్రాయ పునః ప్రాదాన్నియమ్య బలిమోజసా ।
త్రైలోక్యం స మహాతేజాశ్చక్రే శక్రవశం పునః ॥ 21 ॥
తేనైష పూర్వమాక్రాంత ఆశ్రమశ్శ్రమనాశనః ।
మయాపి భక్తయ తస్యైష వామనస్యోపభుజ్యతే ॥ 22 ॥
ఏతమాశ్రమమాయాంతి రాక్షసా విఘ్నకారిణః ।
అత్రైవ పురుషవ్యాఘ్ర హంతవ్యా దుష్టచారిణః ॥ 23 ॥
అద్య గచ్ఛామహే రామ సిద్ధాశ్రమమనుత్తమమ్ ।
తదాశ్రమపదం తాత తవాప్యేతద్యథా మమ ॥ 24 ॥
ప్రవిశన్నాశ్రమపదం వ్యరోచత మహామునిః ।
శశీవ గతనీహారః పునర్వసుసమన్వితః ॥ 25 ॥
తం దృష్ట్వా మునయస్సర్వే సిద్ధాశ్రమనివాసినః ।
ఉత్పత్త్యోత్పత్త్య సహసా విశ్వామిత్రమపూజయన్ ॥ 26 ॥
యథార్హం చక్రిరే పూజాం విశ్వామిత్రాయ ధీమతే ।
తథైవ రాజపుత్రాభ్యామకుర్వన్నతిథిక్రియామ్ ॥ 27 ॥
ముహూర్తమథ విశ్రాంతౌ రాజపుత్రావరిందమౌ ।
ప్రాంజలీ మునిశార్దూలమూచతూ రఘునందనౌ ॥ 28 ॥
అద్యైవ దీక్షాం ప్రవిశ భద్రం తే మునిపుంగవ ।
సిద్ధాశ్రమోఽయం సిద్ధస్స్యాత్ సత్యమస్తు వచస్తవ ॥ 29 ॥
ఏవముక్తో మహాతేజా విశ్వామిత్రో మహాన్ ఋషిః ।
ప్రవివేశ తదా దీక్షాం నియతో నియతేంద్రియః ॥ 30 ॥
కుమారావపి తాం రాత్రిముషిత్వా సుసమాహితౌ ।
ప్రభాతకాలే చోత్థాయ పూర్వాం సంధ్యాముపాస్య చ ॥ 31 ॥
స్పృష్టోదకౌ శుచీ జప్యం సమాప్య నియమేన చ ।
హుతాగ్నిహోత్రమాసీనం విశ్వామిత్రమవందతామ్ ॥ 32 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే ఏకోనత్రింశస్సర్గః ॥
