ശ്രീമദ്വാല്മീകീയ രാമായണേ ബാലകാംഡമ് ।
അഥ ത്രയസ്ത്രിംശസ്സര്ഗഃ ।
തസ്യ തദ്വചനം ശ്രുത്വാ കുശനാഭസ്യ ധീമതഃ ।
ശിരോഭിശ്ചരണൌ സ്പൃഷ്ട്വാ കന്യാശതമഭാഷത ॥ 1 ॥
വായുസ്സർവാത്മകോ രാജന് പ്രധര്ഷയിതുമിച്ഛതി ।
അശുഭം മാര്ഗമാസ്ഥായ ന ധര്മം പ്രത്യവേക്ഷതേ ॥ 2 ॥
പിതൃമത്യസ്സ്മ ഭദ്രം തേ സ്വച്ഛംദേ ന വയം സ്ഥിതാഃ ।
പിതരം നോ വൃണീഷ്വ ത്വം യദി നോ ദാസ്യതേ തവ ॥ 3 ॥
തേന പാപാനുബംധേന വചനം ന പ്രതീച്ഛതാ ।
ഏവം ബ്രുവംത്യസ്സർവാസ്സ്മ വായുനാ നിഹതാ ഭൃശമ് ॥ 4 ॥
താസാം തദ്വചനം ശ്രുത്വാ രാജാ പരമധാര്മികഃ ।
പ്രത്യുവാച മഹാതേജാഃ കന്യാശതമനുത്തമമ് ॥ 5 ॥
ക്ഷാംതം ക്ഷമാവതാം പുത്ര്യഃ കര്തവ്യം സുമഹത്കൃതമ് ।
ഐകമത്യമുപാഗമ്യ കുലം ചാവേക്ഷിതം മമ ॥ 6 ॥
അലംകാരോ ഹി നാരീണാം ക്ഷമാ തു പുരുഷസ്യ വാ ।
ദുഷ്കരം തച്ച യത് ക്ഷാംതം ത്രിദശേഷു വിശേഷതഃ ॥ 7 ॥
യാദൃശീ വഃ ക്ഷമാ പുത്ര്യസ്സർവാസാമവിശേഷതഃ ।
ക്ഷമാ ദാനം ക്ഷമാ യജ്ഞഃ ക്ഷമാ സത്യം ഹി പുത്രികാഃ ॥ 8 ॥
ക്ഷമാ യശഃ ക്ഷമാ ധര്മഃ ക്ഷമയാ നിഷ്ഠിതം ജഗത് ।
വിസൃജ്യ കന്യാഃ കാകുത്സ്ഥ രാജാ ത്രിദശവിക്രമഃ ॥ 9 ॥
മംത്രജ്ഞോ മംത്രയാമാസ പ്രദാനം സഹ മംത്രിഭിഃ ।
ദേശകാലൌ പ്രദാനസ്യ സദൃശേ പ്രതിപാദനമ് ॥ 10 ॥
ഏതസ്മിന്നേവ കാലേ തു ചൂലീ നാമ മഹാതപാഃ ।
ഊര്ധ്വരേതാശ്ശുഭാചാരോ ബ്രാഹ്മം തപ ഉപാഗമത് ॥ 11 ॥
തപ്യംതം തമൃഷിം തത്ര ഗംധർവീ പര്യുപാസതേ ।
സോമദാ നാമ ഭദ്രം തേ ഊര്മിലാ തനയാ തദാ ॥ 12 ॥
സാ ച തം പ്രണതാ ഭൂത്വാ ശുശ്രൂഷണപരായണാ ।
ഉവാസ കാലേ ധര്മിഷ്ഠാ തസ്യാസ്തുഷ്ടോഽഭവദ്ഗുരുഃ ॥ 13 ॥
സ ച താം കാലയോഗേന പ്രോവാച രഘുനംദന ।
പരിതുഷ്ടോഽസ്മി ഭദ്രം തേ കിം കരോമി തവ പ്രിയമ് ॥ 14 ॥
പരിതുഷ്ടം മുനിം ജ്ഞാത്വാ ഗംധർവീ മധുരസ്വരാ ।
ഉവാച പരമപ്രീതാ വാക്യജ്ഞാ വാക്യകോവിദമ് ॥ 15 ॥
ലക്ഷ്മ്യാ സമുദിതോ ബ്രാഹ്മ്യാ ബ്രഹ്മഭൂതോ മഹാതപാഃ ।
ബ്രാഹ്മേണ തപസാ യുക്തം പുത്രമിച്ഛാമി ധാര്മിക ॥ 16 ॥
അപതിശ്ചാസ്മി ഭദ്രം തേ ഭാര്യാ ചാസ്മി ന കസ്യചിത് ।
ബ്രാഹ്മേണോപഗതായാശ്ച ദാതുമര്ഹസി മേ സുതമ് ॥ 17 ॥
തസ്യാഃ പ്രസന്നോ ബ്രഹ്മര്ഷിര്ദദൌ പുത്രമനുത്തമമ് ।
ബ്രഹ്മദത്ത ഇതി ഖ്യാതം മാനസം ചൂലിനസ്സുതമ് ॥ 18 ॥
സ രാജാ സൌമദേയസ്തു പുരീമധ്യവസത്തദാ ।
കാംപില്യാം പരയാ ലക്ഷ്മ്യാ ദേവരാജോ യഥാ ദിവമ് ॥ 19 ॥
സ ബുദ്ധിം കൃതവാന് രാജാ കുശനാഭസ്സുധാര്മികഃ ।
ബ്രഹ്മദത്തായ കാകുത്സ്ഥ ദാതും കന്യാശതം തദാ ॥ 20 ॥
തമാഹൂയ മഹാതേജാ ബ്രഹ്മദത്തം മഹീപതിഃ ।
ദദൌ കന്യാശതം രാജാ സുപ്രീതേനാംതരാത്മനാ ॥ 21 ॥
യഥാക്രമം തതഃ പാണീന് ജഗ്രാഹ രഘുനംദന ।
ബ്രഹ്മദത്തോ മഹീപാലസ്താസാം ദേവപതിര്യഥാ ॥ 22 ॥
സ്പൃഷ്ടമാത്രേ തതഃ പാണൌ വികുബ്ജാ വിഗതജ്വരാഃ ।
യുക്താഃ പരമയാ ലക്ഷ്മ്യാ ബഭുഃ കന്യാശതം തദാ ॥ 23 ॥
സ ദൃഷ്ട്വാ വായുനാ മുക്താഃ കുശനാഭോ മഹീപതിഃ ।
ബഭൂവ പരമപ്രീതോ ഹര്ഷം ലേഭേ പുനഃപുനഃ ॥ 24 ॥
കൃതോദ്വാഹം തു രാജാനം ബ്രഹ്മദത്തം മഹീപതിഃ ।
സദാരം പ്രേഷയാമാസ സോപാധ്യായഗണം തദാ ॥ 25 ॥
സോമദാഽപി സുസംഹൃഷ്ടാ പുത്രസ്യ സദൃശീം ക്രിയാമ് ।
യഥാന്യായം ച ഗംധർവീ സ്നുഷാസ്താഃ പ്രത്യനംദത ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ത്രയസ്ത്രിംശസ്സര്ഗഃ ॥
