శ్రీమద్వాల్మీకీయ రామాయణే బాలకాండమ్ ।
అథ త్రయస్త్రింశస్సర్గః ।
తస్య తద్వచనం శ్రుత్వా కుశనాభస్య ధీమతః ।
శిరోభిశ్చరణౌ స్పృష్ట్వా కన్యాశతమభాషత ॥ 1 ॥
వాయుస్సర్వాత్మకో రాజన్ ప్రధర్షయితుమిచ్ఛతి ।
అశుభం మార్గమాస్థాయ న ధర్మం ప్రత్యవేక్షతే ॥ 2 ॥
పితృమత్యస్స్మ భద్రం తే స్వచ్ఛందే న వయం స్థితాః ।
పితరం నో వృణీష్వ త్వం యది నో దాస్యతే తవ ॥ 3 ॥
తేన పాపానుబంధేన వచనం న ప్రతీచ్ఛతా ।
ఏవం బ్రువంత్యస్సర్వాస్స్మ వాయునా నిహతా భృశమ్ ॥ 4 ॥
తాసాం తద్వచనం శ్రుత్వా రాజా పరమధార్మికః ।
ప్రత్యువాచ మహాతేజాః కన్యాశతమనుత్తమమ్ ॥ 5 ॥
క్షాంతం క్షమావతాం పుత్ర్యః కర్తవ్యం సుమహత్కృతమ్ ।
ఐకమత్యముపాగమ్య కులం చావేక్షితం మమ ॥ 6 ॥
అలంకారో హి నారీణాం క్షమా తు పురుషస్య వా ।
దుష్కరం తచ్చ యత్ క్షాంతం త్రిదశేషు విశేషతః ॥ 7 ॥
యాదృశీ వః క్షమా పుత్ర్యస్సర్వాసామవిశేషతః ।
క్షమా దానం క్షమా యజ్ఞః క్షమా సత్యం హి పుత్రికాః ॥ 8 ॥
క్షమా యశః క్షమా ధర్మః క్షమయా నిష్ఠితం జగత్ ।
విసృజ్య కన్యాః కాకుత్స్థ రాజా త్రిదశవిక్రమః ॥ 9 ॥
మంత్రజ్ఞో మంత్రయామాస ప్రదానం సహ మంత్రిభిః ।
దేశకాలౌ ప్రదానస్య సదృశే ప్రతిపాదనమ్ ॥ 10 ॥
ఏతస్మిన్నేవ కాలే తు చూలీ నామ మహాతపాః ।
ఊర్ధ్వరేతాశ్శుభాచారో బ్రాహ్మం తప ఉపాగమత్ ॥ 11 ॥
తప్యంతం తమృషిం తత్ర గంధర్వీ పర్యుపాసతే ।
సోమదా నామ భద్రం తే ఊర్మిలా తనయా తదా ॥ 12 ॥
సా చ తం ప్రణతా భూత్వా శుశ్రూషణపరాయణా ।
ఉవాస కాలే ధర్మిష్ఠా తస్యాస్తుష్టోఽభవద్గురుః ॥ 13 ॥
స చ తాం కాలయోగేన ప్రోవాచ రఘునందన ।
పరితుష్టోఽస్మి భద్రం తే కిం కరోమి తవ ప్రియమ్ ॥ 14 ॥
పరితుష్టం మునిం జ్ఞాత్వా గంధర్వీ మధురస్వరా ।
ఉవాచ పరమప్రీతా వాక్యజ్ఞా వాక్యకోవిదమ్ ॥ 15 ॥
లక్ష్మ్యా సముదితో బ్రాహ్మ్యా బ్రహ్మభూతో మహాతపాః ।
బ్రాహ్మేణ తపసా యుక్తం పుత్రమిచ్ఛామి ధార్మిక ॥ 16 ॥
అపతిశ్చాస్మి భద్రం తే భార్యా చాస్మి న కస్యచిత్ ।
బ్రాహ్మేణోపగతాయాశ్చ దాతుమర్హసి మే సుతమ్ ॥ 17 ॥
తస్యాః ప్రసన్నో బ్రహ్మర్షిర్దదౌ పుత్రమనుత్తమమ్ ।
బ్రహ్మదత్త ఇతి ఖ్యాతం మానసం చూలినస్సుతమ్ ॥ 18 ॥
స రాజా సౌమదేయస్తు పురీమధ్యవసత్తదా ।
కాంపిల్యాం పరయా లక్ష్మ్యా దేవరాజో యథా దివమ్ ॥ 19 ॥
స బుద్ధిం కృతవాన్ రాజా కుశనాభస్సుధార్మికః ।
బ్రహ్మదత్తాయ కాకుత్స్థ దాతుం కన్యాశతం తదా ॥ 20 ॥
తమాహూయ మహాతేజా బ్రహ్మదత్తం మహీపతిః ।
దదౌ కన్యాశతం రాజా సుప్రీతేనాంతరాత్మనా ॥ 21 ॥
యథాక్రమం తతః పాణీన్ జగ్రాహ రఘునందన ।
బ్రహ్మదత్తో మహీపాలస్తాసాం దేవపతిర్యథా ॥ 22 ॥
స్పృష్టమాత్రే తతః పాణౌ వికుబ్జా విగతజ్వరాః ।
యుక్తాః పరమయా లక్ష్మ్యా బభుః కన్యాశతం తదా ॥ 23 ॥
స దృష్ట్వా వాయునా ముక్తాః కుశనాభో మహీపతిః ।
బభూవ పరమప్రీతో హర్షం లేభే పునఃపునః ॥ 24 ॥
కృతోద్వాహం తు రాజానం బ్రహ్మదత్తం మహీపతిః ।
సదారం ప్రేషయామాస సోపాధ్యాయగణం తదా ॥ 25 ॥
సోమదాఽపి సుసంహృష్టా పుత్రస్య సదృశీం క్రియామ్ ।
యథాన్యాయం చ గంధర్వీ స్నుషాస్తాః ప్రత్యనందత ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే త్రయస్త్రింశస్సర్గః ॥
