ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ତ୍ରୟସ୍ତ୍ରିଂଶସ୍ସର୍ଗଃ ।
ତସ୍ୟ ତଦ୍ଵଚନଂ ଶ୍ରୁତ୍ଵା କୁଶନାଭସ୍ୟ ଧୀମତଃ ।
ଶିରୋଭିଶ୍ଚରଣୌ ସ୍ପୃଷ୍ଟ୍ଵା କନ୍ୟାଶତମଭାଷତ ॥ 1 ॥
ଵାୟୁସ୍ସର୍ଵାତ୍ମକୋ ରାଜନ୍ ପ୍ରଧର୍ଷୟିତୁମିଚ୍ଛତି ।
ଅଶୁଭଂ ମାର୍ଗମାସ୍ଥାୟ ନ ଧର୍ମଂ ପ୍ରତ୍ୟଵେକ୍ଷତେ ॥ 2 ॥
ପିତୃମତ୍ୟସ୍ସ୍ମ ଭଦ୍ରଂ ତେ ସ୍ଵଚ୍ଛଂଦେ ନ ଵୟଂ ସ୍ଥିତାଃ ।
ପିତରଂ ନୋ ଵୃଣୀଷ୍ଵ ତ୍ଵଂ ୟଦି ନୋ ଦାସ୍ୟତେ ତଵ ॥ 3 ॥
ତେନ ପାପାନୁବଂଧେନ ଵଚନଂ ନ ପ୍ରତୀଚ୍ଛତା ।
ଏଵଂ ବ୍ରୁଵଂତ୍ୟସ୍ସର୍ଵାସ୍ସ୍ମ ଵାୟୁନା ନିହତା ଭୃଶମ୍ ॥ 4 ॥
ତାସାଂ ତଦ୍ଵଚନଂ ଶ୍ରୁତ୍ଵା ରାଜା ପରମଧାର୍ମିକଃ ।
ପ୍ରତ୍ୟୁଵାଚ ମହାତେଜାଃ କନ୍ୟାଶତମନୁତ୍ତମମ୍ ॥ 5 ॥
କ୍ଷାଂତଂ କ୍ଷମାଵତାଂ ପୁତ୍ର୍ୟଃ କର୍ତଵ୍ୟଂ ସୁମହତ୍କୃତମ୍ ।
ଐକମତ୍ୟମୁପାଗମ୍ୟ କୁଲଂ ଚାଵେକ୍ଷିତଂ ମମ ॥ 6 ॥
ଅଲଂକାରୋ ହି ନାରୀଣାଂ କ୍ଷମା ତୁ ପୁରୁଷସ୍ୟ ଵା ।
ଦୁଷ୍କରଂ ତଚ୍ଚ ୟତ୍ କ୍ଷାଂତଂ ତ୍ରିଦଶେଷୁ ଵିଶେଷତଃ ॥ 7 ॥
ୟାଦୃଶୀ ଵଃ କ୍ଷମା ପୁତ୍ର୍ୟସ୍ସର୍ଵାସାମଵିଶେଷତଃ ।
କ୍ଷମା ଦାନଂ କ୍ଷମା ୟଜ୍ଞଃ କ୍ଷମା ସତ୍ୟଂ ହି ପୁତ୍ରିକାଃ ॥ 8 ॥
କ୍ଷମା ୟଶଃ କ୍ଷମା ଧର୍ମଃ କ୍ଷମୟା ନିଷ୍ଠିତଂ ଜଗତ୍ ।
ଵିସୃଜ୍ୟ କନ୍ୟାଃ କାକୁତ୍ସ୍ଥ ରାଜା ତ୍ରିଦଶଵିକ୍ରମଃ ॥ 9 ॥
ମଂତ୍ରଜ୍ଞୋ ମଂତ୍ରୟାମାସ ପ୍ରଦାନଂ ସହ ମଂତ୍ରିଭିଃ ।
ଦେଶକାଲୌ ପ୍ରଦାନସ୍ୟ ସଦୃଶେ ପ୍ରତିପାଦନମ୍ ॥ 10 ॥
ଏତସ୍ମିନ୍ନେଵ କାଲେ ତୁ ଚୂଲୀ ନାମ ମହାତପାଃ ।
ଊର୍ଧ୍ଵରେତାଶ୍ଶୁଭାଚାରୋ ବ୍ରାହ୍ମଂ ତପ ଉପାଗମତ୍ ॥ 11 ॥
ତପ୍ୟଂତଂ ତମୃଷିଂ ତତ୍ର ଗଂଧର୍ଵୀ ପର୍ୟୁପାସତେ ।
ସୋମଦା ନାମ ଭଦ୍ରଂ ତେ ଊର୍ମିଲା ତନୟା ତଦା ॥ 12 ॥
ସା ଚ ତଂ ପ୍ରଣତା ଭୂତ୍ଵା ଶୁଶ୍ରୂଷଣପରାୟଣା ।
ଉଵାସ କାଲେ ଧର୍ମିଷ୍ଠା ତସ୍ୟାସ୍ତୁଷ୍ଟୋଽଭଵଦ୍ଗୁରୁଃ ॥ 13 ॥
ସ ଚ ତାଂ କାଲୟୋଗେନ ପ୍ରୋଵାଚ ରଘୁନଂଦନ ।
ପରିତୁଷ୍ଟୋଽସ୍ମି ଭଦ୍ରଂ ତେ କିଂ କରୋମି ତଵ ପ୍ରିୟମ୍ ॥ 14 ॥
ପରିତୁଷ୍ଟଂ ମୁନିଂ ଜ୍ଞାତ୍ଵା ଗଂଧର୍ଵୀ ମଧୁରସ୍ଵରା ।
ଉଵାଚ ପରମପ୍ରୀତା ଵାକ୍ୟଜ୍ଞା ଵାକ୍ୟକୋଵିଦମ୍ ॥ 15 ॥
ଲକ୍ଷ୍ମ୍ୟା ସମୁଦିତୋ ବ୍ରାହ୍ମ୍ୟା ବ୍ରହ୍ମଭୂତୋ ମହାତପାଃ ।
ବ୍ରାହ୍ମେଣ ତପସା ୟୁକ୍ତଂ ପୁତ୍ରମିଚ୍ଛାମି ଧାର୍ମିକ ॥ 16 ॥
ଅପତିଶ୍ଚାସ୍ମି ଭଦ୍ରଂ ତେ ଭାର୍ୟା ଚାସ୍ମି ନ କସ୍ୟଚିତ୍ ।
ବ୍ରାହ୍ମେଣୋପଗତାୟାଶ୍ଚ ଦାତୁମର୍ହସି ମେ ସୁତମ୍ ॥ 17 ॥
ତସ୍ୟାଃ ପ୍ରସନ୍ନୋ ବ୍ରହ୍ମର୍ଷିର୍ଦଦୌ ପୁତ୍ରମନୁତ୍ତମମ୍ ।
ବ୍ରହ୍ମଦତ୍ତ ଇତି ଖ୍ୟାତଂ ମାନସଂ ଚୂଲିନସ୍ସୁତମ୍ ॥ 18 ॥
ସ ରାଜା ସୌମଦେୟସ୍ତୁ ପୁରୀମଧ୍ୟଵସତ୍ତଦା ।
କାଂପିଲ୍ୟାଂ ପରୟା ଲକ୍ଷ୍ମ୍ୟା ଦେଵରାଜୋ ୟଥା ଦିଵମ୍ ॥ 19 ॥
ସ ବୁଦ୍ଧିଂ କୃତଵାନ୍ ରାଜା କୁଶନାଭସ୍ସୁଧାର୍ମିକଃ ।
ବ୍ରହ୍ମଦତ୍ତାୟ କାକୁତ୍ସ୍ଥ ଦାତୁଂ କନ୍ୟାଶତଂ ତଦା ॥ 20 ॥
ତମାହୂୟ ମହାତେଜା ବ୍ରହ୍ମଦତ୍ତଂ ମହୀପତିଃ ।
ଦଦୌ କନ୍ୟାଶତଂ ରାଜା ସୁପ୍ରୀତେନାଂତରାତ୍ମନା ॥ 21 ॥
ୟଥାକ୍ରମଂ ତତଃ ପାଣୀନ୍ ଜଗ୍ରାହ ରଘୁନଂଦନ ।
ବ୍ରହ୍ମଦତ୍ତୋ ମହୀପାଲସ୍ତାସାଂ ଦେଵପତିର୍ୟଥା ॥ 22 ॥
ସ୍ପୃଷ୍ଟମାତ୍ରେ ତତଃ ପାଣୌ ଵିକୁବ୍ଜା ଵିଗତଜ୍ଵରାଃ ।
ୟୁକ୍ତାଃ ପରମୟା ଲକ୍ଷ୍ମ୍ୟା ବଭୁଃ କନ୍ୟାଶତଂ ତଦା ॥ 23 ॥
ସ ଦୃଷ୍ଟ୍ଵା ଵାୟୁନା ମୁକ୍ତାଃ କୁଶନାଭୋ ମହୀପତିଃ ।
ବଭୂଵ ପରମପ୍ରୀତୋ ହର୍ଷଂ ଲେଭେ ପୁନଃପୁନଃ ॥ 24 ॥
କୃତୋଦ୍ଵାହଂ ତୁ ରାଜାନଂ ବ୍ରହ୍ମଦତ୍ତଂ ମହୀପତିଃ ।
ସଦାରଂ ପ୍ରେଷୟାମାସ ସୋପାଧ୍ୟାୟଗଣଂ ତଦା ॥ 25 ॥
ସୋମଦାଽପି ସୁସଂହୃଷ୍ଟା ପୁତ୍ରସ୍ୟ ସଦୃଶୀଂ କ୍ରିୟାମ୍ ।
ୟଥାନ୍ୟାୟଂ ଚ ଗଂଧର୍ଵୀ ସ୍ନୁଷାସ୍ତାଃ ପ୍ରତ୍ୟନଂଦତ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ତ୍ରୟସ୍ତ୍ରିଂଶସ୍ସର୍ଗଃ ॥
