śrīmadvālmīkīya rāmāyaṇē bālakāṇḍam ।
atha trayastriṃśassargaḥ ।
tasya tadvachanaṃ śrutvā kuśanābhasya dhīmataḥ ।
śirōbhiścharaṇau spṛṣṭvā kanyāśatamabhāṣata ॥ 1 ॥
vāyussarvātmakō rājan pradharṣayitumichChati ।
aśubhaṃ mārgamāsthāya na dharmaṃ pratyavēkṣatē ॥ 2 ॥
pitṛmatyassma bhadraṃ tē svachChandē na vayaṃ sthitāḥ ।
pitaraṃ nō vṛṇīṣva tvaṃ yadi nō dāsyatē tava ॥ 3 ॥
tēna pāpānubandhēna vachanaṃ na pratīchChatā ।
ēvaṃ bruvantyassarvāssma vāyunā nihatā bhṛśam ॥ 4 ॥
tāsāṃ tadvachanaṃ śrutvā rājā paramadhārmikaḥ ।
pratyuvācha mahātējāḥ kanyāśatamanuttamam ॥ 5 ॥
kṣāntaṃ kṣamāvatāṃ putryaḥ kartavyaṃ sumahatkṛtam ।
aikamatyamupāgamya kulaṃ chāvēkṣitaṃ mama ॥ 6 ॥
alaṅkārō hi nārīṇāṃ kṣamā tu puruṣasya vā ।
duṣkaraṃ tachcha yat kṣāntaṃ tridaśēṣu viśēṣataḥ ॥ 7 ॥
yādṛśī vaḥ kṣamā putryassarvāsāmaviśēṣataḥ ।
kṣamā dānaṃ kṣamā yajñaḥ kṣamā satyaṃ hi putrikāḥ ॥ 8 ॥
kṣamā yaśaḥ kṣamā dharmaḥ kṣamayā niṣṭhitaṃ jagat ।
visṛjya kanyāḥ kākutstha rājā tridaśavikramaḥ ॥ 9 ॥
mantrajñō mantrayāmāsa pradānaṃ saha mantribhiḥ ।
dēśakālau pradānasya sadṛśē pratipādanam ॥ 10 ॥
ētasminnēva kālē tu chūlī nāma mahātapāḥ ।
ūrdhvarētāśśubhāchārō brāhmaṃ tapa upāgamat ॥ 11 ॥
tapyantaṃ tamṛṣiṃ tatra gandharvī paryupāsatē ।
sōmadā nāma bhadraṃ tē ūrmilā tanayā tadā ॥ 12 ॥
sā cha taṃ praṇatā bhūtvā śuśrūṣaṇaparāyaṇā ।
uvāsa kālē dharmiṣṭhā tasyāstuṣṭō'bhavadguruḥ ॥ 13 ॥
sa cha tāṃ kālayōgēna prōvācha raghunandana ।
parituṣṭō'smi bhadraṃ tē kiṃ karōmi tava priyam ॥ 14 ॥
parituṣṭaṃ muniṃ jñātvā gandharvī madhurasvarā ।
uvācha paramaprītā vākyajñā vākyakōvidam ॥ 15 ॥
lakṣmyā samuditō brāhmyā brahmabhūtō mahātapāḥ ।
brāhmēṇa tapasā yuktaṃ putramichChāmi dhārmika ॥ 16 ॥
apatiśchāsmi bhadraṃ tē bhāryā chāsmi na kasyachit ।
brāhmēṇōpagatāyāścha dātumarhasi mē sutam ॥ 17 ॥
tasyāḥ prasannō brahmarṣirdadau putramanuttamam ।
brahmadatta iti khyātaṃ mānasaṃ chūlinassutam ॥ 18 ॥
sa rājā saumadēyastu purīmadhyavasattadā ।
kāmpilyāṃ parayā lakṣmyā dēvarājō yathā divam ॥ 19 ॥
sa buddhiṃ kṛtavān rājā kuśanābhassudhārmikaḥ ।
brahmadattāya kākutstha dātuṃ kanyāśataṃ tadā ॥ 20 ॥
tamāhūya mahātējā brahmadattaṃ mahīpatiḥ ।
dadau kanyāśataṃ rājā suprītēnāntarātmanā ॥ 21 ॥
yathākramaṃ tataḥ pāṇīn jagrāha raghunandana ।
brahmadattō mahīpālastāsāṃ dēvapatiryathā ॥ 22 ॥
spṛṣṭamātrē tataḥ pāṇau vikubjā vigatajvarāḥ ।
yuktāḥ paramayā lakṣmyā babhuḥ kanyāśataṃ tadā ॥ 23 ॥
sa dṛṣṭvā vāyunā muktāḥ kuśanābhō mahīpatiḥ ।
babhūva paramaprītō harṣaṃ lēbhē punaḥpunaḥ ॥ 24 ॥
kṛtōdvāhaṃ tu rājānaṃ brahmadattaṃ mahīpatiḥ ।
sadāraṃ prēṣayāmāsa sōpādhyāyagaṇaṃ tadā ॥ 25 ॥
sōmadā'pi susaṃhṛṣṭā putrasya sadṛśīṃ kriyām ।
yathānyāyaṃ cha gandharvī snuṣāstāḥ pratyanandata ॥ 26 ॥
ityārṣē śrīmadrāmāyaṇē vālmīkīya ādikāvyē bālakāṇḍē trayastriṃśassargaḥ ॥
