শ্রীমদ্বাল্মীকীয় রামাযণে বালকাংডম্ ।
অথ ত্রযস্ত্রিংশস্সর্গঃ ।
তস্য় তদ্বচনং শ্রুত্বা কুশনাভস্য় ধীমতঃ ।
শিরোভিশ্চরণৌ স্পৃষ্ট্বা কন্য়াশতমভাষত ॥ 1 ॥
বায়ুস্সর্বাত্মকো রাজন্ প্রধর্ষয়িতুমিচ্ছতি ।
অশুভং মার্গমাস্থায় ন ধর্মং প্রত্যবেক্ষতে ॥ 2 ॥
পিতৃমত্যস্স্ম ভদ্রং তে স্বচ্ছংদে ন বয়ং স্থিতাঃ ।
পিতরং নো বৃণীষ্ব ত্বং যদি নো দাস্যতে তব ॥ 3 ॥
তেন পাপানুবংধেন বচনং ন প্রতীচ্ছতা ।
এবং ব্রুবংত্যস্সর্বাস্স্ম বায়ুনা নিহতা ভৃশম্ ॥ 4 ॥
তাসাং তদ্বচনং শ্রুত্বা রাজা পরমধার্মিকঃ ।
প্রত্য়ুবাচ মহাতেজাঃ কন্য়াশতমনুত্তমম্ ॥ 5 ॥
ক্ষাংতং ক্ষমাবতাং পুত্র্য়ঃ কর্তব্য়ং সুমহত্কৃতম্ ।
ঐকমত্যমুপাগম্য় কুলং চাবেক্ষিতং মম ॥ 6 ॥
অলংকারো হি নারীণাং ক্ষমা তু পুরুষস্য় বা ।
দুষ্করং তচ্চ যত্ ক্ষাংতং ত্রিদশেষু বিশেষতঃ ॥ 7 ॥
যাদৃশী বঃ ক্ষমা পুত্র্যস্সর্বাসামবিশেষতঃ ।
ক্ষমা দানং ক্ষমা যজ্ঞঃ ক্ষমা সত্য়ং হি পুত্রিকাঃ ॥ 8 ॥
ক্ষমা যশঃ ক্ষমা ধর্মঃ ক্ষময়া নিষ্ঠিতং জগত্ ।
বিসৃজ্য় কন্য়াঃ কাকুত্স্থ রাজা ত্রিদশবিক্রমঃ ॥ 9 ॥
মংত্রজ্ঞো মংত্রয়ামাস প্রদানং সহ মংত্রিভিঃ ।
দেশকালৌ প্রদানস্য় সদৃশে প্রতিপাদনম্ ॥ 10 ॥
এতস্মিন্নেব কালে তু চূলী নাম মহাতপাঃ ।
ঊর্ধ্বরেতাশ্শুভাচারো ব্রাহ্মং তপ উপাগমত্ ॥ 11 ॥
তপ্য়ংতং তমৃষিং তত্র গংধর্বী পর্য়ুপাসতে ।
সোমদা নাম ভদ্রং তে ঊর্মিলা তনয়া তদা ॥ 12 ॥
সা চ তং প্রণতা ভূত্বা শুশ্রূষণপরাযণা ।
উবাস কালে ধর্মিষ্ঠা তস্য়াস্তুষ্টোঽভবদ্গুরুঃ ॥ 13 ॥
স চ তাং কালয়োগেন প্রোবাচ রঘুনংদন ।
পরিতুষ্টোঽস্মি ভদ্রং তে কিং করোমি তব প্রিযম্ ॥ 14 ॥
পরিতুষ্টং মুনিং জ্ঞাত্বা গংধর্বী মধুরস্বরা ।
উবাচ পরমপ্রীতা বাক্যজ্ঞা বাক্যকোবিদম্ ॥ 15 ॥
লক্ষ্ম্য়া সমুদিতো ব্রাহ্ম্য়া ব্রহ্মভূতো মহাতপাঃ ।
ব্রাহ্মেণ তপসা যুক্তং পুত্রমিচ্ছামি ধার্মিক ॥ 16 ॥
অপতিশ্চাস্মি ভদ্রং তে ভার্য়া চাস্মি ন কস্যচিত্ ।
ব্রাহ্মেণোপগতায়াশ্চ দাতুমর্হসি মে সুতম্ ॥ 17 ॥
তস্য়াঃ প্রসন্নো ব্রহ্মর্ষির্দদৌ পুত্রমনুত্তমম্ ।
ব্রহ্মদত্ত ইতি খ্য়াতং মানসং চূলিনস্সুতম্ ॥ 18 ॥
স রাজা সৌমদেযস্তু পুরীমধ্যবসত্তদা ।
কাংপিল্য়াং পরয়া লক্ষ্ম্য়া দেবরাজো যথা দিবম্ ॥ 19 ॥
স বুদ্ধিং কৃতবান্ রাজা কুশনাভস্সুধার্মিকঃ ।
ব্রহ্মদত্তায় কাকুত্স্থ দাতুং কন্য়াশতং তদা ॥ 20 ॥
তমাহূয় মহাতেজা ব্রহ্মদত্তং মহীপতিঃ ।
দদৌ কন্য়াশতং রাজা সুপ্রীতেনাংতরাত্মনা ॥ 21 ॥
যথাক্রমং ততঃ পাণীন্ জগ্রাহ রঘুনংদন ।
ব্রহ্মদত্তো মহীপালস্তাসাং দেবপতির্যথা ॥ 22 ॥
স্পৃষ্টমাত্রে ততঃ পাণৌ বিকুব্জা বিগতজ্বরাঃ ।
যুক্তাঃ পরময়া লক্ষ্ম্য়া বভুঃ কন্য়াশতং তদা ॥ 23 ॥
স দৃষ্ট্বা বায়ুনা মুক্তাঃ কুশনাভো মহীপতিঃ ।
বভূব পরমপ্রীতো হর্ষং লেভে পুনঃপুনঃ ॥ 24 ॥
কৃতোদ্বাহং তু রাজানং ব্রহ্মদত্তং মহীপতিঃ ।
সদারং প্রেষয়ামাস সোপাধ্য়াযগণং তদা ॥ 25 ॥
সোমদাঽপি সুসংহৃষ্টা পুত্রস্য় সদৃশীং ক্রিয়াম্ ।
যথান্য়ায়ং চ গংধর্বী স্নুষাস্তাঃ প্রত্যনংদত ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে ত্রযস্ত্রিংশস্সর্গঃ ॥
