શ્રીમદ્વાલ્મીકીય રામાયણે બાલકાંડમ્ ।
અથ ત્રયસ્ત્રિંશસ્સર્ગઃ ।
તસ્ય તદ્વચનં શ્રુત્વા કુશનાભસ્ય ધીમતઃ ।
શિરોભિશ્ચરણૌ સ્પૃષ્ટ્વા કન્યાશતમભાષત ॥ 1 ॥
વાયુસ્સર્વાત્મકો રાજન્ પ્રધર્ષયિતુમિચ્છતિ ।
અશુભં માર્ગમાસ્થાય ન ધર્મં પ્રત્યવેક્ષતે ॥ 2 ॥
પિતૃમત્યસ્સ્મ ભદ્રં તે સ્વચ્છંદે ન વયં સ્થિતાઃ ।
પિતરં નો વૃણીષ્વ ત્વં યદિ નો દાસ્યતે તવ ॥ 3 ॥
તેન પાપાનુબંધેન વચનં ન પ્રતીચ્છતા ।
એવં બ્રુવંત્યસ્સર્વાસ્સ્મ વાયુના નિહતા ભૃશમ્ ॥ 4 ॥
તાસાં તદ્વચનં શ્રુત્વા રાજા પરમધાર્મિકઃ ।
પ્રત્યુવાચ મહાતેજાઃ કન્યાશતમનુત્તમમ્ ॥ 5 ॥
ક્ષાંતં ક્ષમાવતાં પુત્ર્યઃ કર્તવ્યં સુમહત્કૃતમ્ ।
ઐકમત્યમુપાગમ્ય કુલં ચાવેક્ષિતં મમ ॥ 6 ॥
અલંકારો હિ નારીણાં ક્ષમા તુ પુરુષસ્ય વા ।
દુષ્કરં તચ્ચ યત્ ક્ષાંતં ત્રિદશેષુ વિશેષતઃ ॥ 7 ॥
યાદૃશી વઃ ક્ષમા પુત્ર્યસ્સર્વાસામવિશેષતઃ ।
ક્ષમા દાનં ક્ષમા યજ્ઞઃ ક્ષમા સત્યં હિ પુત્રિકાઃ ॥ 8 ॥
ક્ષમા યશઃ ક્ષમા ધર્મઃ ક્ષમયા નિષ્ઠિતં જગત્ ।
વિસૃજ્ય કન્યાઃ કાકુત્સ્થ રાજા ત્રિદશવિક્રમઃ ॥ 9 ॥
મંત્રજ્ઞો મંત્રયામાસ પ્રદાનં સહ મંત્રિભિઃ ।
દેશકાલૌ પ્રદાનસ્ય સદૃશે પ્રતિપાદનમ્ ॥ 10 ॥
એતસ્મિન્નેવ કાલે તુ ચૂલી નામ મહાતપાઃ ।
ઊર્ધ્વરેતાશ્શુભાચારો બ્રાહ્મં તપ ઉપાગમત્ ॥ 11 ॥
તપ્યંતં તમૃષિં તત્ર ગંધર્વી પર્યુપાસતે ।
સોમદા નામ ભદ્રં તે ઊર્મિલા તનયા તદા ॥ 12 ॥
સા ચ તં પ્રણતા ભૂત્વા શુશ્રૂષણપરાયણા ।
ઉવાસ કાલે ધર્મિષ્ઠા તસ્યાસ્તુષ્ટોઽભવદ્ગુરુઃ ॥ 13 ॥
સ ચ તાં કાલયોગેન પ્રોવાચ રઘુનંદન ।
પરિતુષ્ટોઽસ્મિ ભદ્રં તે કિં કરોમિ તવ પ્રિયમ્ ॥ 14 ॥
પરિતુષ્ટં મુનિં જ્ઞાત્વા ગંધર્વી મધુરસ્વરા ।
ઉવાચ પરમપ્રીતા વાક્યજ્ઞા વાક્યકોવિદમ્ ॥ 15 ॥
લક્ષ્મ્યા સમુદિતો બ્રાહ્મ્યા બ્રહ્મભૂતો મહાતપાઃ ।
બ્રાહ્મેણ તપસા યુક્તં પુત્રમિચ્છામિ ધાર્મિક ॥ 16 ॥
અપતિશ્ચાસ્મિ ભદ્રં તે ભાર્યા ચાસ્મિ ન કસ્યચિત્ ।
બ્રાહ્મેણોપગતાયાશ્ચ દાતુમર્હસિ મે સુતમ્ ॥ 17 ॥
તસ્યાઃ પ્રસન્નો બ્રહ્મર્ષિર્દદૌ પુત્રમનુત્તમમ્ ।
બ્રહ્મદત્ત ઇતિ ખ્યાતં માનસં ચૂલિનસ્સુતમ્ ॥ 18 ॥
સ રાજા સૌમદેયસ્તુ પુરીમધ્યવસત્તદા ।
કાંપિલ્યાં પરયા લક્ષ્મ્યા દેવરાજો યથા દિવમ્ ॥ 19 ॥
સ બુદ્ધિં કૃતવાન્ રાજા કુશનાભસ્સુધાર્મિકઃ ।
બ્રહ્મદત્તાય કાકુત્સ્થ દાતું કન્યાશતં તદા ॥ 20 ॥
તમાહૂય મહાતેજા બ્રહ્મદત્તં મહીપતિઃ ।
દદૌ કન્યાશતં રાજા સુપ્રીતેનાંતરાત્મના ॥ 21 ॥
યથાક્રમં તતઃ પાણીન્ જગ્રાહ રઘુનંદન ।
બ્રહ્મદત્તો મહીપાલસ્તાસાં દેવપતિર્યથા ॥ 22 ॥
સ્પૃષ્ટમાત્રે તતઃ પાણૌ વિકુબ્જા વિગતજ્વરાઃ ।
યુક્તાઃ પરમયા લક્ષ્મ્યા બભુઃ કન્યાશતં તદા ॥ 23 ॥
સ દૃષ્ટ્વા વાયુના મુક્તાઃ કુશનાભો મહીપતિઃ ।
બભૂવ પરમપ્રીતો હર્ષં લેભે પુનઃપુનઃ ॥ 24 ॥
કૃતોદ્વાહં તુ રાજાનં બ્રહ્મદત્તં મહીપતિઃ ।
સદારં પ્રેષયામાસ સોપાધ્યાયગણં તદા ॥ 25 ॥
સોમદાઽપિ સુસંહૃષ્ટા પુત્રસ્ય સદૃશીં ક્રિયામ્ ।
યથાન્યાયં ચ ગંધર્વી સ્નુષાસ્તાઃ પ્રત્યનંદત ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ત્રયસ્ત્રિંશસ્સર્ગઃ ॥
