ශ්රීමද්වාල්මීකීය රාමායණේ බාලකාංඩම් ।
අථ අෂ්ටත්රිංශස්සර්ගඃ ।
තාං කථාං කෞශිකෝ රාමේ නිවේද්ය කුශිකාත්මජඃ ।
පුනරේවාපරං වාක්යං කාකුත්ස්ථ මිදමබ්රවීත් ॥ 1 ॥
අයෝධ්යාධිපති ශ්ශූරඃ පූර්වමාසීන්නරාධිපඃ ।
සගරෝ නාම ධර්මාත්මා ප්රජාකාමස්ස චාප්රජඃ ॥ 2 ॥
වෛදර්භදුහිතා රාම කේශිනී නාම නාමතඃ ।
ජ්යේෂ්ඨා සගරපත්නී සා ධර්මිෂ්ඨා සත්යවාදිනී ॥ 3 ॥
අරිෂ්ටනේමේර්දුහිතා රූපේණාප්රතිමා භුවි ।
ද්විතීයා සගරස්යාසීත්පත්නී සුමතිසංජ්ඤිතා ॥ 4 ॥
තාභ්යාං සහ මහාරාජඃ පත්නීභ්යාං තප්තවාංස්තපඃ ।
හිමවංතං සමාසාද්ය භෘගුප්රස්රවණේ ගිරෞ ॥ 5 ॥
අථ වර්ෂශතේ පූර්ණේ තපසාऽරාධිතෝ මුනිඃ ।
සගරාය වරං ප්රාදාද්භෘගුස්සත්යවතාං වරඃ ॥ 6 ॥
අපත්යලාභස්සුමහාන් භවිෂ්යති තවානඝ ।
කීර්තිං චාප්රතිමාං ලෝකේ ප්රාප්ස්යසේ පුරුෂර්ෂභ ॥ 7 ॥
ඒකා ජනයිතා තාත පුත්රං වංශකරං තව ।
ෂෂ්ඨිං පුත්රසහස්රාණි අපරා ජනයිෂ්යති ॥ 8 ॥
භාෂමාණං මහාත්මානං රාජපුත්ර්යෞ ප්රසාද්ය තම් ।
ඌචතුඃ පරමප්රීතේ කෘතාංජලිපුටේ තදා ॥ 9 ॥
ඒකඃ කස්යාස්සුතෝ බ්රහ්මන් කා බහූන් ජනයිෂ්යති ।
ශ්රෝතුමිච්ඡාවහේ බ්රහ්මන් සත්යමස්තු වචස්තව ॥ 10 ॥
තයෝස්තද්වචනං ශ්රුත්වා භෘගුඃ පරමධාර්මිකඃ ।
උවාච පරමාං වාණීං ස්වච්ඡංදෝऽත්ර විධීයතාම් ॥ 11 ॥
ඒකෝ වංශකරෝ වාऽස්තු බහවෝ වා මහාබලාඃ ।
කීර්තිමංතෝ මහෝත්සාහාඃ කා වා කං වරමිච්ඡති ॥ 12 ॥
මුනේස්තු වචනං ශ්රුත්වා කේශිනී රඝුනංදන ।
පුත්රං වංශකරං රාම ජග්රාහ නෘපසන්නිධෞ ॥ 13 ॥
ෂෂ්ඨිං පුත්රසහස්රාණි සුපර්ණභගිනී තදා ।
මහෝත්සාහාන් කීර්තිමතෝ ජග්රාහ සුමතිඃ සුතාන් ॥ 14 ॥
ප්රදක්ෂිණමෘෂිං කෘත්වා ශිරසාऽභිප්රණම්ය ච ।
ජගාම ස්වපුරං රාජා සභාර්යෝ රඝුනංදන ॥ 15 ॥
අථ කාලේ ගතේ තස්මින් ජ්යේෂ්ඨා පුත්රං ව්යජායත ।
අසමංජ ඉති ඛ්යාතං කේශිනී සගරාත්මජම් ॥ 16 ॥
සුමතිස්තු නරව්යාඝ්ර ගර්භතුංබං ව්යජායත ।
ෂෂ්ඨිඃ පුත්රසහස්රාණි තුංබභේදාද්විනිඃසෘතාඃ ॥ 17 ॥
ඝෘතපූර්ණේෂු කුංභේෂු ධාත්ර්යස්තාන් සමවර්ධයන් ।
කාලේන මහතා සර්වේ යෞවනං ප්රතිපේදිරේ ॥ 18 ॥
අථ දීර්ඝේණ කාලේන රූපයෞවනශාලිනඃ ।
ෂෂ්ටිඃ පුත්රසහස්රාණි සගරස්යාභවංස්තදා ॥ 19 ॥
ස ච ජ්යේෂ්ඨෝ නරශ්රේෂ්ඨ සගරස්යාත්මසංභවඃ ।
බාලාන් ගෘහීත්වා තු ජලේ සරය්වා රඝුනංදන ॥ 20 ॥
ප්රක්ෂිප්ය ප්රහසන්නිත්යං මජ්ජතස්තාන් සමීක්ෂ්ය වෛ ।
ඒවං පාපසමාචාරස්සජ්ජනප්රතිබාධකඃ ॥ 21 ॥
පෞරාණාමහිතේ යුක්තඃ පුත්රෝ නිර්වාසිතඃ පුරාත් ।
තස්ය පුත්රෝංऽශුමාන්නාම අසමංජස්ය වීර්යවාන් ॥ 22 ॥
සම්මත ස්සර්වලෝකස්ය සර්වස්යාපි ප්රියංවදඃ ।
තතඃ කාලේන මහතා මතිස්සමභිජායත ॥ 23 ॥
සගරස්ය නරශ්රේෂ්ඨ යජේයමිති නිශ්චිතා ।
ස කෘත්වා නිශ්චයං රාම සෝපාධ්යායගණස්තදා ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ අෂ්ටත්රිංශස්සර්ගඃ ॥
