শ্রীমদ্বাল্মীকীয় রামাযণে বালকাংডম্ ।
অথ অষ্টত্রিংশস্সর্গঃ ।
তাং কথাং কৌশিকো রামে নিবেদ্য় কুশিকাত্মজঃ ।
পুনরেবাপরং বাক্য়ং কাকুত্স্থ মিদমব্রবীত্ ॥ 1 ॥
অয়োধ্য়াধিপতি শ্শূরঃ পূর্বমাসীন্নরাধিপঃ ।
সগরো নাম ধর্মাত্মা প্রজাকামস্স চাপ্রজঃ ॥ 2 ॥
বৈদর্ভদুহিতা রাম কেশিনী নাম নামতঃ ।
জ্য়েষ্ঠা সগরপত্নী সা ধর্মিষ্ঠা সত্যবাদিনী ॥ 3 ॥
অরিষ্টনেমের্দুহিতা রূপেণাপ্রতিমা ভুবি ।
দ্বিতীয়া সগরস্য়াসীত্পত্নী সুমতিসংজ্ঞিতা ॥ 4 ॥
তাভ্য়াং সহ মহারাজঃ পত্নীভ্য়াং তপ্তবাংস্তপঃ ।
হিমবংতং সমাসাদ্য় ভৃগুপ্রস্রবণে গিরৌ ॥ 5 ॥
অথ বর্ষশতে পূর্ণে তপসাঽরাধিতো মুনিঃ ।
সগরায় বরং প্রাদাদ্ভৃগুস্সত্যবতাং বরঃ ॥ 6 ॥
অপত্যলাভস্সুমহান্ ভবিষ্যতি তবানঘ ।
কীর্তিং চাপ্রতিমাং লোকে প্রাপ্স্যসে পুরুষর্ষভ ॥ 7 ॥
একা জনয়িতা তাত পুত্রং বংশকরং তব ।
ষষ্ঠিং পুত্রসহস্রাণি অপরা জনয়িষ্যতি ॥ 8 ॥
ভাষমাণং মহাত্মানং রাজপুত্র্য়ৌ প্রসাদ্য় তম্ ।
ঊচতুঃ পরমপ্রীতে কৃতাংজলিপুটে তদা ॥ 9 ॥
একঃ কস্য়াস্সুতো ব্রহ্মন্ কা বহূন্ জনয়িষ্যতি ।
শ্রোতুমিচ্ছাবহে ব্রহ্মন্ সত্যমস্তু বচস্তব ॥ 10 ॥
তয়োস্তদ্বচনং শ্রুত্বা ভৃগুঃ পরমধার্মিকঃ ।
উবাচ পরমাং বাণীং স্বচ্ছংদোঽত্র বিধীযতাম্ ॥ 11 ॥
একো বংশকরো বাঽস্তু বহবো বা মহাবলাঃ ।
কীর্তিমংতো মহোত্সাহাঃ কা বা কং বরমিচ্ছতি ॥ 12 ॥
মুনেস্তু বচনং শ্রুত্বা কেশিনী রঘুনংদন ।
পুত্রং বংশকরং রাম জগ্রাহ নৃপসন্নিধৌ ॥ 13 ॥
ষষ্ঠিং পুত্রসহস্রাণি সুপর্ণভগিনী তদা ।
মহোত্সাহান্ কীর্তিমতো জগ্রাহ সুমতিঃ সুতান্ ॥ 14 ॥
প্রদক্ষিণমৃষিং কৃত্বা শিরসাঽভিপ্রণম্য় চ ।
জগাম স্বপুরং রাজা সভার্য়ো রঘুনংদন ॥ 15 ॥
অথ কালে গতে তস্মিন্ জ্য়েষ্ঠা পুত্রং ব্যজাযত ।
অসমংজ ইতি খ্য়াতং কেশিনী সগরাত্মজম্ ॥ 16 ॥
সুমতিস্তু নরব্য়াঘ্র গর্ভতুংবং ব্যজাযত ।
ষষ্ঠিঃ পুত্রসহস্রাণি তুংবভেদাদ্বিনিঃসৃতাঃ ॥ 17 ॥
ঘৃতপূর্ণেষু কুংভেষু ধাত্র্যস্তান্ সমবর্ধযন্ ।
কালেন মহতা সর্বে যৌবনং প্রতিপেদিরে ॥ 18 ॥
অথ দীর্ঘেণ কালেন রূপয়ৌবনশালিনঃ ।
ষষ্টিঃ পুত্রসহস্রাণি সগরস্য়াভবংস্তদা ॥ 19 ॥
স চ জ্য়েষ্ঠো নরশ্রেষ্ঠ সগরস্য়াত্মসংভবঃ ।
বালান্ গৃহীত্বা তু জলে সরয়্বা রঘুনংদন ॥ 20 ॥
প্রক্ষিপ্য় প্রহসন্নিত্য়ং মজ্জতস্তান্ সমীক্ষ্য় বৈ ।
এবং পাপসমাচারস্সজ্জনপ্রতিবাধকঃ ॥ 21 ॥
পৌরাণামহিতে যুক্তঃ পুত্রো নির্বাসিতঃ পুরাত্ ।
তস্য় পুত্রোংঽশুমান্নাম অসমংজস্য় বীর্যবান্ ॥ 22 ॥
সম্মত স্সর্বলোকস্য় সর্বস্য়াপি প্রিয়ংবদঃ ।
ততঃ কালেন মহতা মতিস্সমভিজাযত ॥ 23 ॥
সগরস্য় নরশ্রেষ্ঠ যজেযমিতি নিশ্চিতা ।
স কৃত্বা নিশ্চয়ং রাম সোপাধ্য়াযগণস্তদা ॥ 24 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে অষ্টত্রিংশস্সর্গঃ ॥
