ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଅଷ୍ଟତ୍ରିଂଶସ୍ସର୍ଗଃ ।
ତାଂ କଥାଂ କୌଶିକୋ ରାମେ ନିଵେଦ୍ୟ କୁଶିକାତ୍ମଜଃ ।
ପୁନରେଵାପରଂ ଵାକ୍ୟଂ କାକୁତ୍ସ୍ଥ ମିଦମବ୍ରଵୀତ୍ ॥ 1 ॥
ଅୟୋଧ୍ୟାଧିପତି ଶ୍ଶୂରଃ ପୂର୍ଵମାସୀନ୍ନରାଧିପଃ ।
ସଗରୋ ନାମ ଧର୍ମାତ୍ମା ପ୍ରଜାକାମସ୍ସ ଚାପ୍ରଜଃ ॥ 2 ॥
ଵୈଦର୍ଭଦୁହିତା ରାମ କେଶିନୀ ନାମ ନାମତଃ ।
ଜ୍ୟେଷ୍ଠା ସଗରପତ୍ନୀ ସା ଧର୍ମିଷ୍ଠା ସତ୍ୟଵାଦିନୀ ॥ 3 ॥
ଅରିଷ୍ଟନେମେର୍ଦୁହିତା ରୂପେଣାପ୍ରତିମା ଭୁଵି ।
ଦ୍ଵିତୀୟା ସଗରସ୍ୟାସୀତ୍ପତ୍ନୀ ସୁମତିସଂଜ୍ଞିତା ॥ 4 ॥
ତାଭ୍ୟାଂ ସହ ମହାରାଜଃ ପତ୍ନୀଭ୍ୟାଂ ତପ୍ତଵାଂସ୍ତପଃ ।
ହିମଵଂତଂ ସମାସାଦ୍ୟ ଭୃଗୁପ୍ରସ୍ରଵଣେ ଗିରୌ ॥ 5 ॥
ଅଥ ଵର୍ଷଶତେ ପୂର୍ଣେ ତପସାଽରାଧିତୋ ମୁନିଃ ।
ସଗରାୟ ଵରଂ ପ୍ରାଦାଦ୍ଭୃଗୁସ୍ସତ୍ୟଵତାଂ ଵରଃ ॥ 6 ॥
ଅପତ୍ୟଲାଭସ୍ସୁମହାନ୍ ଭଵିଷ୍ୟତି ତଵାନଘ ।
କୀର୍ତିଂ ଚାପ୍ରତିମାଂ ଲୋକେ ପ୍ରାପ୍ସ୍ୟସେ ପୁରୁଷର୍ଷଭ ॥ 7 ॥
ଏକା ଜନୟିତା ତାତ ପୁତ୍ରଂ ଵଂଶକରଂ ତଵ ।
ଷଷ୍ଠିଂ ପୁତ୍ରସହସ୍ରାଣି ଅପରା ଜନୟିଷ୍ୟତି ॥ 8 ॥
ଭାଷମାଣଂ ମହାତ୍ମାନଂ ରାଜପୁତ୍ର୍ୟୌ ପ୍ରସାଦ୍ୟ ତମ୍ ।
ଊଚତୁଃ ପରମପ୍ରୀତେ କୃତାଂଜଲିପୁଟେ ତଦା ॥ 9 ॥
ଏକଃ କସ୍ୟାସ୍ସୁତୋ ବ୍ରହ୍ମନ୍ କା ବହୂନ୍ ଜନୟିଷ୍ୟତି ।
ଶ୍ରୋତୁମିଚ୍ଛାଵହେ ବ୍ରହ୍ମନ୍ ସତ୍ୟମସ୍ତୁ ଵଚସ୍ତଵ ॥ 10 ॥
ତୟୋସ୍ତଦ୍ଵଚନଂ ଶ୍ରୁତ୍ଵା ଭୃଗୁଃ ପରମଧାର୍ମିକଃ ।
ଉଵାଚ ପରମାଂ ଵାଣୀଂ ସ୍ଵଚ୍ଛଂଦୋଽତ୍ର ଵିଧୀୟତାମ୍ ॥ 11 ॥
ଏକୋ ଵଂଶକରୋ ଵାଽସ୍ତୁ ବହଵୋ ଵା ମହାବଲାଃ ।
କୀର୍ତିମଂତୋ ମହୋତ୍ସାହାଃ କା ଵା କଂ ଵରମିଚ୍ଛତି ॥ 12 ॥
ମୁନେସ୍ତୁ ଵଚନଂ ଶ୍ରୁତ୍ଵା କେଶିନୀ ରଘୁନଂଦନ ।
ପୁତ୍ରଂ ଵଂଶକରଂ ରାମ ଜଗ୍ରାହ ନୃପସନ୍ନିଧୌ ॥ 13 ॥
ଷଷ୍ଠିଂ ପୁତ୍ରସହସ୍ରାଣି ସୁପର୍ଣଭଗିନୀ ତଦା ।
ମହୋତ୍ସାହାନ୍ କୀର୍ତିମତୋ ଜଗ୍ରାହ ସୁମତିଃ ସୁତାନ୍ ॥ 14 ॥
ପ୍ରଦକ୍ଷିଣମୃଷିଂ କୃତ୍ଵା ଶିରସାଽଭିପ୍ରଣମ୍ୟ ଚ ।
ଜଗାମ ସ୍ଵପୁରଂ ରାଜା ସଭାର୍ୟୋ ରଘୁନଂଦନ ॥ 15 ॥
ଅଥ କାଲେ ଗତେ ତସ୍ମିନ୍ ଜ୍ୟେଷ୍ଠା ପୁତ୍ରଂ ଵ୍ୟଜାୟତ ।
ଅସମଂଜ ଇତି ଖ୍ୟାତଂ କେଶିନୀ ସଗରାତ୍ମଜମ୍ ॥ 16 ॥
ସୁମତିସ୍ତୁ ନରଵ୍ୟାଘ୍ର ଗର୍ଭତୁଂବଂ ଵ୍ୟଜାୟତ ।
ଷଷ୍ଠିଃ ପୁତ୍ରସହସ୍ରାଣି ତୁଂବଭେଦାଦ୍ଵିନିଃସୃତାଃ ॥ 17 ॥
ଘୃତପୂର୍ଣେଷୁ କୁଂଭେଷୁ ଧାତ୍ର୍ୟସ୍ତାନ୍ ସମଵର୍ଧୟନ୍ ।
କାଲେନ ମହତା ସର୍ଵେ ୟୌଵନଂ ପ୍ରତିପେଦିରେ ॥ 18 ॥
ଅଥ ଦୀର୍ଘେଣ କାଲେନ ରୂପୟୌଵନଶାଲିନଃ ।
ଷଷ୍ଟିଃ ପୁତ୍ରସହସ୍ରାଣି ସଗରସ୍ୟାଭଵଂସ୍ତଦା ॥ 19 ॥
ସ ଚ ଜ୍ୟେଷ୍ଠୋ ନରଶ୍ରେଷ୍ଠ ସଗରସ୍ୟାତ୍ମସଂଭଵଃ ।
ବାଲାନ୍ ଗୃହୀତ୍ଵା ତୁ ଜଲେ ସରୟ୍ଵା ରଘୁନଂଦନ ॥ 20 ॥
ପ୍ରକ୍ଷିପ୍ୟ ପ୍ରହସନ୍ନିତ୍ୟଂ ମଜ୍ଜତସ୍ତାନ୍ ସମୀକ୍ଷ୍ୟ ଵୈ ।
ଏଵଂ ପାପସମାଚାରସ୍ସଜ୍ଜନପ୍ରତିବାଧକଃ ॥ 21 ॥
ପୌରାଣାମହିତେ ୟୁକ୍ତଃ ପୁତ୍ରୋ ନିର୍ଵାସିତଃ ପୁରାତ୍ ।
ତସ୍ୟ ପୁତ୍ରୋଂଽଶୁମାନ୍ନାମ ଅସମଂଜସ୍ୟ ଵୀର୍ୟଵାନ୍ ॥ 22 ॥
ସମ୍ମତ ସ୍ସର୍ଵଲୋକସ୍ୟ ସର୍ଵସ୍ୟାପି ପ୍ରିୟଂଵଦଃ ।
ତତଃ କାଲେନ ମହତା ମତିସ୍ସମଭିଜାୟତ ॥ 23 ॥
ସଗରସ୍ୟ ନରଶ୍ରେଷ୍ଠ ୟଜେୟମିତି ନିଶ୍ଚିତା ।
ସ କୃତ୍ଵା ନିଶ୍ଚୟଂ ରାମ ସୋପାଧ୍ୟାୟଗଣସ୍ତଦା ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଅଷ୍ଟତ୍ରିଂଶସ୍ସର୍ଗଃ ॥
