ശ്രീമദ്വാല്മീകീയ രാമായണേ ബാലകാംഡമ് ।
അഥ അഷ്ടത്രിംശസ്സര്ഗഃ ।
താം കഥാം കൌശികോ രാമേ നിവേദ്യ കുശികാത്മജഃ ।
പുനരേവാപരം വാക്യം കാകുത്സ്ഥ മിദമബ്രവീത് ॥ 1 ॥
അയോധ്യാധിപതി ശ്ശൂരഃ പൂർവമാസീന്നരാധിപഃ ।
സഗരോ നാമ ധര്മാത്മാ പ്രജാകാമസ്സ ചാപ്രജഃ ॥ 2 ॥
വൈദര്ഭദുഹിതാ രാമ കേശിനീ നാമ നാമതഃ ।
ജ്യേഷ്ഠാ സഗരപത്നീ സാ ധര്മിഷ്ഠാ സത്യവാദിനീ ॥ 3 ॥
അരിഷ്ടനേമേര്ദുഹിതാ രൂപേണാപ്രതിമാ ഭുവി ।
ദ്വിതീയാ സഗരസ്യാസീത്പത്നീ സുമതിസംജ്ഞിതാ ॥ 4 ॥
താഭ്യാം സഹ മഹാരാജഃ പത്നീഭ്യാം തപ്തവാംസ്തപഃ ।
ഹിമവംതം സമാസാദ്യ ഭൃഗുപ്രസ്രവണേ ഗിരൌ ॥ 5 ॥
അഥ വര്ഷശതേ പൂര്ണേ തപസാഽരാധിതോ മുനിഃ ।
സഗരായ വരം പ്രാദാദ്ഭൃഗുസ്സത്യവതാം വരഃ ॥ 6 ॥
അപത്യലാഭസ്സുമഹാന് ഭവിഷ്യതി തവാനഘ ।
കീര്തിം ചാപ്രതിമാം ലോകേ പ്രാപ്സ്യസേ പുരുഷര്ഷഭ ॥ 7 ॥
ഏകാ ജനയിതാ താത പുത്രം വംശകരം തവ ।
ഷഷ്ഠിം പുത്രസഹസ്രാണി അപരാ ജനയിഷ്യതി ॥ 8 ॥
ഭാഷമാണം മഹാത്മാനം രാജപുത്ര്യൌ പ്രസാദ്യ തമ് ।
ഊചതുഃ പരമപ്രീതേ കൃതാംജലിപുടേ തദാ ॥ 9 ॥
ഏകഃ കസ്യാസ്സുതോ ബ്രഹ്മന് കാ ബഹൂന് ജനയിഷ്യതി ।
ശ്രോതുമിച്ഛാവഹേ ബ്രഹ്മന് സത്യമസ്തു വചസ്തവ ॥ 10 ॥
തയോസ്തദ്വചനം ശ്രുത്വാ ഭൃഗുഃ പരമധാര്മികഃ ।
ഉവാച പരമാം വാണീം സ്വച്ഛംദോഽത്ര വിധീയതാമ് ॥ 11 ॥
ഏകോ വംശകരോ വാഽസ്തു ബഹവോ വാ മഹാബലാഃ ।
കീര്തിമംതോ മഹോത്സാഹാഃ കാ വാ കം വരമിച്ഛതി ॥ 12 ॥
മുനേസ്തു വചനം ശ്രുത്വാ കേശിനീ രഘുനംദന ।
പുത്രം വംശകരം രാമ ജഗ്രാഹ നൃപസന്നിധൌ ॥ 13 ॥
ഷഷ്ഠിം പുത്രസഹസ്രാണി സുപര്ണഭഗിനീ തദാ ।
മഹോത്സാഹാന് കീര്തിമതോ ജഗ്രാഹ സുമതിഃ സുതാന് ॥ 14 ॥
പ്രദക്ഷിണമൃഷിം കൃത്വാ ശിരസാഽഭിപ്രണമ്യ ച ।
ജഗാമ സ്വപുരം രാജാ സഭാര്യോ രഘുനംദന ॥ 15 ॥
അഥ കാലേ ഗതേ തസ്മിന് ജ്യേഷ്ഠാ പുത്രം വ്യജായത ।
അസമംജ ഇതി ഖ്യാതം കേശിനീ സഗരാത്മജമ് ॥ 16 ॥
സുമതിസ്തു നരവ്യാഘ്ര ഗര്ഭതുംബം വ്യജായത ।
ഷഷ്ഠിഃ പുത്രസഹസ്രാണി തുംബഭേദാദ്വിനിഃസൃതാഃ ॥ 17 ॥
ഘൃതപൂര്ണേഷു കുംഭേഷു ധാത്ര്യസ്താന് സമവര്ധയന് ।
കാലേന മഹതാ സർവേ യൌവനം പ്രതിപേദിരേ ॥ 18 ॥
അഥ ദീര്ഘേണ കാലേന രൂപയൌവനശാലിനഃ ।
ഷഷ്ടിഃ പുത്രസഹസ്രാണി സഗരസ്യാഭവംസ്തദാ ॥ 19 ॥
സ ച ജ്യേഷ്ഠോ നരശ്രേഷ്ഠ സഗരസ്യാത്മസംഭവഃ ।
ബാലാന് ഗൃഹീത്വാ തു ജലേ സരയ്വാ രഘുനംദന ॥ 20 ॥
പ്രക്ഷിപ്യ പ്രഹസന്നിത്യം മജ്ജതസ്താന് സമീക്ഷ്യ വൈ ।
ഏവം പാപസമാചാരസ്സജ്ജനപ്രതിബാധകഃ ॥ 21 ॥
പൌരാണാമഹിതേ യുക്തഃ പുത്രോ നിർവാസിതഃ പുരാത് ।
തസ്യ പുത്രോംഽശുമാന്നാമ അസമംജസ്യ വീര്യവാന് ॥ 22 ॥
സമ്മത സ്സർവലോകസ്യ സർവസ്യാപി പ്രിയംവദഃ ।
തതഃ കാലേന മഹതാ മതിസ്സമഭിജായത ॥ 23 ॥
സഗരസ്യ നരശ്രേഷ്ഠ യജേയമിതി നിശ്ചിതാ ।
സ കൃത്വാ നിശ്ചയം രാമ സോപാധ്യായഗണസ്തദാ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ അഷ്ടത്രിംശസ്സര്ഗഃ ॥
