ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକୋନଚତ୍ଵାରିଂଶସ୍ସର୍ଗଃ ।
ଵିଶ୍ଵାମିତ୍ରଵଚଶ୍ଶ୍ରୁତ୍ଵା କଥାଽଂତେ ରଘୁନଂଦନଃ ।
ଉଵାଚ ପରମପ୍ରୀତୋ ମୁନିଂ ଦୀପ୍ତମିଵାନଲମ୍ ॥ 1 ॥
ଶ୍ରୋତୁମିଚ୍ଛାମି ଭଦ୍ରଂ ତେ ଵିସ୍ତରେଣ କଥାମିମାମ୍ ।
ପୂର୍ଵକୋ ମେ କଥଂ ବ୍ରହ୍ମନ୍ ୟଜ୍ଞଂ ଵୈ ସମୁପାହରତ୍ ॥ 2 ॥
ଵିଶ୍ଵାମିତ୍ରସ୍ତୁ କାକୁତ୍ସ୍ଥମୁଵାଚ ପ୍ରହସନ୍ନିଵ ।
ଶ୍ରୂୟତାଂ ଵିସ୍ତରୋ ରାମ ସଗରସ୍ୟ ମହାତ୍ମନଃ ॥ 3 ॥
ଶଂକରଶ୍ଵଶୁରୋ ନାମ ହିମଵାନଚଲୋତ୍ତମଃ ।
ଵିଂଧ୍ୟପର୍ଵତମାସାଦ୍ୟ ନିରୀକ୍ଷେତେ ପରସ୍ପରମ୍ ॥ 4 ॥
ତୟୋର୍ମଧ୍ୟେ ପ୍ରଵୃତ୍ତୋଽଭୂଦ୍ୟଜ୍ଞ ସ୍ସପୁରୁଷୋତ୍ତମ ।
ସ ହି ଦେଶୋ ନରଵ୍ୟାଘ୍ର ପ୍ରଶସ୍ତୋ ୟଜ୍ଞକର୍ମଣି ॥ 5 ॥
ତସ୍ୟାଶ୍ଵଚର୍ୟାଂ କାକୁତ୍ସ୍ଥ ଦୃଢଧନ୍ଵା ମହାରଥଃ ।
ଅଂଶୁମାନକରୋତ୍ତାତ ସଗରସ୍ୟ ମତେ ସ୍ଥିତଃ ॥ 6 ॥
ତସ୍ୟ ପର୍ଵଣି ତଂ ୟଜ୍ଞଂ ୟଜମାନସ୍ୟ ଵାସଵଃ ।
ରାକ୍ଷସୀଂ ତନୁମାସ୍ଥାୟ ୟଜ୍ଞୀୟାଶ୍ଵମପାହରତ୍ ॥ 7 ॥
ହ୍ରିୟମାଣେ ତୁ କାକୁତ୍ସ୍ଥ ତସ୍ମିନ୍ନଶ୍ଵେ ମହାତ୍ମନଃ ।
ଉପାଧ୍ୟାୟଗଣାସ୍ସର୍ଵେ ୟଜମାନମଥାବ୍ରୁଵନ୍ ॥ 8 ॥
ଅୟଂ ପର୍ଵଣି ଵେଗେନ ୟଜ୍ଞିୟାଶ୍ଵୋଽପନୀୟତେ ।
ହର୍ତାରଂ ଜହି କାକୁତ୍ସ୍ଥ ହୟଶ୍ଚୈଵୋପନୀୟତାମ୍ ॥ 9 ॥
ୟଜ୍ଞଚ୍ଛିଦ୍ରଂ ଭଵତ୍ୟେତତ୍ସର୍ଵେଷାମଶିଵାୟ ନଃ ।
ତତ୍ତଥା କ୍ରିୟତାଂ ରାଜନ୍ ୟଥାଽଚ୍ଛିଦ୍ରଃ କ୍ରତୁର୍ଭଵେତ୍ ॥ 10 ॥
ଉପାଧ୍ୟାୟଵଚ ଶ୍ଶ୍ରୁତ୍ଵା ତସ୍ମିନ୍ ସଦସି ପାର୍ଥିଵଃ ।
ଷଷ୍ଟିଂ ପୁତ୍ରସହସ୍ରାଣି ଵାକ୍ୟମେତଦୁଵାଚ ହ ॥ 11 ॥
ଗତିଂ ପୁତ୍ରାଃ ନ ପଶ୍ୟାମି ରକ୍ଷସାଂ ପରୁଷର୍ଷଭାଃ ।
ମଂତ୍ରପୂତୈର୍ମହାଭାଗୈରାସ୍ଥିତୋ ହି ମହାକ୍ରତୁଃ ॥ 12 ॥
ତଦ୍ଗଚ୍ଛତ ଵିଚିନ୍ଵଧ୍ଵଂ ପୁତ୍ରକାଃ ଭଦ୍ରମସ୍ତୁ ଵଃ ।
ସମୁଦ୍ରମାଲିନୀଂ ସର୍ଵାଂ ପୃଥିଵୀମନୁଗଚ୍ଛତ ॥ 13 ॥
ଏକୈକୟୋଜନଂ ପୁତ୍ରା ଵିସ୍ତାରମଧିଗଚ୍ଛତ ।
ୟାଵତ୍ତୁରଗସଂଦର୍ଶଃ ତାଵତ୍ ଖନତ ମେଦିନୀମ୍ ।
ତଂ ଚୈଵ ହୟହର୍ତାରଂ ମାର୍ଗମାଣା ମମାଜ୍ଞୟା ॥ 14 ॥
ଦୀକ୍ଷିତଃ ପୌତ୍ରସହିତସ୍ସୋପାଧ୍ୟାୟଗଣୋ ହ୍ୟହମ୍ ।
ଇହ ସ୍ଥାସ୍ୟାମି ଭଦ୍ରଂ ଵୋ ୟାଵତ୍ତୁରଗଦର୍ଶନମ୍ ॥ 15 ॥
ଇତ୍ୟୁକ୍ତା ହୃଷ୍ଟମନସୋ ରାଜପୁତ୍ରା ମହାବଲାଃ ।
ଜଗ୍ମୁର୍ମହୀତଲଂ ରାମ ପିତୁର୍ଵଚନୟଂତ୍ରିତାଃ ॥ 16 ॥
ୟୋଜନାୟାମଵିସ୍ତାରମେକୈକୋ ଧରଣୀତଲମ୍ ।
ବିଭିଦୁଃ ପରୁଷଵ୍ୟାଘ୍ର ଵଜ୍ରସ୍ପର୍ଶସମୈର୍ନଖୈଃ ॥ 17 ॥
ଶୂଲୈରଶନିକଲ୍ପୈଶ୍ଚ ହଲୈଶ୍ଚାପି ସୁଦାରୁଣୈଃ ।
ଭିଦ୍ୟମାନା ଵସୁମତୀ ନନାଦ ରଘୁନଂଦନ ॥ 18 ॥
ନାଗାନାଂ ମଥ୍ୟମାନାନାମସୁରାଣାଂ ଚ ରାଘଵ ।
ରାକ୍ଷସାନାଂ ଚ ଦୁର୍ଧର୍ଷସ୍ସତ୍ତ୍ଵାନାଂ ନିନଦୋଽଭଵତ୍ ॥ 19 ॥
ୟୋଜନାନାଂ ସହସ୍ରାଣି ଷଷ୍ଟିଂ ତୁ ରଘୁନଂଦନ ।
ବିଭିଦୁର୍ଧରଣୀଂ ଵୀରାଃ ରସାତଲମନୁତ୍ତମମ୍ ॥ 20 ॥
ଏଵଂ ପର୍ଵତସଂବାଧଂ ଜଂବୂଦ୍ଵୀପଂ ନୃପାତ୍ମଜାଃ ।
ଖନଂତୋ ନରଶାର୍ଦୂଲ ସର୍ଵତଃ ପରିଚକ୍ରମୁଃ ॥ 21 ॥
ତତୋ ଦେଵାସ୍ସଗଂଧର୍ଵାସ୍ସାସୁରାସ୍ସହପନ୍ନଗାଃ ।
ସଂଭ୍ରାଂତମନସସ୍ସର୍ଵେ ପିତାମହମୁପାଗମନ୍ ॥ 22 ॥
ତେ ପ୍ରସାଦ୍ୟ ମହାତ୍ମାନଂ ଵିଷଣ୍ଣଵଦନାସ୍ତଦା ।
ଊଚୁଃ ପରମସଂତ୍ରସ୍ତା ପିତାମହମିଦଂ ଵଚଃ ॥ 23 ॥
ଭଗଵନ୍ ପୃଥିଵୀ ସର୍ଵା ଖନ୍ୟତେ ସଗରାତ୍ମଜୈଃ ।
ବହଵଶ୍ଚ ମହାତ୍ମାନୋ ହନ୍ୟଂତେ ତଲଵାସିନଃ ॥ 24 ॥
ଅୟଂ ୟଜ୍ଞହରୋଽସ୍ମାକମନେନାଶ୍ଵୋଽପନୀୟତେ ।
ଇତି ତେ ସର୍ଵଭୂତାନି ନିଘ୍ନଂତି ସଗରାତ୍ମଜାଃ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକୋନଚତ୍ଵାରିଂଶସ୍ସର୍ଗଃ ॥
