ශ්රීමද්වාල්මීකීය රාමායණේ බාලකාංඩම් ।
අථ ඒකෝනචත්වාරිංශස්සර්ගඃ ।
විශ්වාමිත්රවචශ්ශ්රුත්වා කථාऽංතේ රඝුනංදනඃ ।
උවාච පරමප්රීතෝ මුනිං දීප්තමිවානලම් ॥ 1 ॥
ශ්රෝතුමිච්ඡාමි භද්රං තේ විස්තරේණ කථාමිමාම් ।
පූර්වකෝ මේ කථං බ්රහ්මන් යජ්ඤං වෛ සමුපාහරත් ॥ 2 ॥
විශ්වාමිත්රස්තු කාකුත්ස්ථමුවාච ප්රහසන්නිව ।
ශ්රූයතාං විස්තරෝ රාම සගරස්ය මහාත්මනඃ ॥ 3 ॥
ශංකරශ්වශුරෝ නාම හිමවානචලෝත්තමඃ ।
විංධ්යපර්වතමාසාද්ය නිරීක්ෂේතේ පරස්පරම් ॥ 4 ॥
තයෝර්මධ්යේ ප්රවෘත්තෝऽභූද්යජ්ඤ ස්සපුරුෂෝත්තම ।
ස හි දේශෝ නරව්යාඝ්ර ප්රශස්තෝ යජ්ඤකර්මණි ॥ 5 ॥
තස්යාශ්වචර්යාං කාකුත්ස්ථ දෘඪධන්වා මහාරථඃ ।
අංශුමානකරෝත්තාත සගරස්ය මතේ ස්ථිතඃ ॥ 6 ॥
තස්ය පර්වණි තං යජ්ඤං යජමානස්ය වාසවඃ ।
රාක්ෂසීං තනුමාස්ථාය යජ්ඤීයාශ්වමපාහරත් ॥ 7 ॥
හ්රියමාණේ තු කාකුත්ස්ථ තස්මින්නශ්වේ මහාත්මනඃ ।
උපාධ්යායගණාස්සර්වේ යජමානමථාබ්රුවන් ॥ 8 ॥
අයං පර්වණි වේගේන යජ්ඤියාශ්වෝऽපනීයතේ ।
හර්තාරං ජහි කාකුත්ස්ථ හයශ්චෛවෝපනීයතාම් ॥ 9 ॥
යජ්ඤච්ඡිද්රං භවත්යේතත්සර්වේෂාමශිවාය නඃ ।
තත්තථා ක්රියතාං රාජන් යථාऽච්ඡිද්රඃ ක්රතුර්භවේත් ॥ 10 ॥
උපාධ්යායවච ශ්ශ්රුත්වා තස්මින් සදසි පාර්ථිවඃ ।
ෂෂ්ටිං පුත්රසහස්රාණි වාක්යමේතදුවාච හ ॥ 11 ॥
ගතිං පුත්රාඃ න පශ්යාමි රක්ෂසාං පරුෂර්ෂභාඃ ।
මංත්රපූතෛර්මහාභාගෛරාස්ථිතෝ හි මහාක්රතුඃ ॥ 12 ॥
තද්ගච්ඡත විචින්වධ්වං පුත්රකාඃ භද්රමස්තු වඃ ।
සමුද්රමාලිනීං සර්වාං පෘථිවීමනුගච්ඡත ॥ 13 ॥
ඒකෛකයෝජනං පුත්රා විස්තාරමධිගච්ඡත ।
යාවත්තුරගසංදර්ශඃ තාවත් ඛනත මේදිනීම් ।
තං චෛව හයහර්තාරං මාර්ගමාණා මමාජ්ඤයා ॥ 14 ॥
දීක්ෂිතඃ පෞත්රසහිතස්සෝපාධ්යායගණෝ හ්යහම් ।
ඉහ ස්ථාස්යාමි භද්රං වෝ යාවත්තුරගදර්ශනම් ॥ 15 ॥
ඉත්යුක්තා හෘෂ්ටමනසෝ රාජපුත්රා මහාබලාඃ ।
ජග්මුර්මහීතලං රාම පිතුර්වචනයංත්රිතාඃ ॥ 16 ॥
යෝජනායාමවිස්තාරමේකෛකෝ ධරණීතලම් ।
බිභිදුඃ පරුෂව්යාඝ්ර වජ්රස්පර්ශසමෛර්නඛෛඃ ॥ 17 ॥
ශූලෛරශනිකල්පෛශ්ච හලෛශ්චාපි සුදාරුණෛඃ ।
භිද්යමානා වසුමතී නනාද රඝුනංදන ॥ 18 ॥
නාගානාං මථ්යමානානාමසුරාණාං ච රාඝව ।
රාක්ෂසානාං ච දුර්ධර්ෂස්සත්ත්වානාං නිනදෝऽභවත් ॥ 19 ॥
යෝජනානාං සහස්රාණි ෂෂ්ටිං තු රඝුනංදන ।
බිභිදුර්ධරණීං වීරාඃ රසාතලමනුත්තමම් ॥ 20 ॥
ඒවං පර්වතසංබාධං ජංබූද්වීපං නෘපාත්මජාඃ ।
ඛනංතෝ නරශාර්දූල සර්වතඃ පරිචක්රමුඃ ॥ 21 ॥
තතෝ දේවාස්සගංධර්වාස්සාසුරාස්සහපන්නගාඃ ।
සංභ්රාංතමනසස්සර්වේ පිතාමහමුපාගමන් ॥ 22 ॥
තේ ප්රසාද්ය මහාත්මානං විෂණ්ණවදනාස්තදා ।
ඌචුඃ පරමසංත්රස්තා පිතාමහමිදං වචඃ ॥ 23 ॥
භගවන් පෘථිවී සර්වා ඛන්යතේ සගරාත්මජෛඃ ।
බහවශ්ච මහාත්මානෝ හන්යංතේ තලවාසිනඃ ॥ 24 ॥
අයං යජ්ඤහරෝऽස්මාකමනේනාශ්වෝऽපනීයතේ ।
ඉති තේ සර්වභූතානි නිඝ්නංති සගරාත්මජාඃ ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකෝනචත්වාරිංශස්සර්ගඃ ॥
