শ্রীমদ্বাল্মীকীয় রামাযণে বালকাংডম্ ।
অথ একোনচত্বারিংশস্সর্গঃ ।
বিশ্বামিত্রবচশ্শ্রুত্বা কথাঽংতে রঘুনংদনঃ ।
উবাচ পরমপ্রীতো মুনিং দীপ্তমিবানলম্ ॥ 1 ॥
শ্রোতুমিচ্ছামি ভদ্রং তে বিস্তরেণ কথামিমাম্ ।
পূর্বকো মে কথং ব্রহ্মন্ যজ্ঞং বৈ সমুপাহরত্ ॥ 2 ॥
বিশ্বামিত্রস্তু কাকুত্স্থমুবাচ প্রহসন্নিব ।
শ্রূযতাং বিস্তরো রাম সগরস্য় মহাত্মনঃ ॥ 3 ॥
শংকরশ্বশুরো নাম হিমবানচলোত্তমঃ ।
বিংধ্যপর্বতমাসাদ্য় নিরীক্ষেতে পরস্পরম্ ॥ 4 ॥
তয়োর্মধ্য়ে প্রবৃত্তোঽভূদ্যজ্ঞ স্সপুরুষোত্তম ।
স হি দেশো নরব্য়াঘ্র প্রশস্তো যজ্ঞকর্মণি ॥ 5 ॥
তস্য়াশ্বচর্য়াং কাকুত্স্থ দৃঢধন্বা মহারথঃ ।
অংশুমানকরোত্তাত সগরস্য় মতে স্থিতঃ ॥ 6 ॥
তস্য় পর্বণি তং যজ্ঞং যজমানস্য় বাসবঃ ।
রাক্ষসীং তনুমাস্থায় যজ্ঞীয়াশ্বমপাহরত্ ॥ 7 ॥
হ্রিযমাণে তু কাকুত্স্থ তস্মিন্নশ্বে মহাত্মনঃ ।
উপাধ্য়াযগণাস্সর্বে যজমানমথাব্রুবন্ ॥ 8 ॥
অয়ং পর্বণি বেগেন যজ্ঞিয়াশ্বোঽপনীযতে ।
হর্তারং জহি কাকুত্স্থ হযশ্চৈবোপনীযতাম্ ॥ 9 ॥
যজ্ঞচ্ছিদ্রং ভবত্য়েতত্সর্বেষামশিবায় নঃ ।
তত্তথা ক্রিযতাং রাজন্ যথাঽচ্ছিদ্রঃ ক্রতুর্ভবেত্ ॥ 10 ॥
উপাধ্য়াযবচ শ্শ্রুত্বা তস্মিন্ সদসি পার্থিবঃ ।
ষষ্টিং পুত্রসহস্রাণি বাক্যমেতদুবাচ হ ॥ 11 ॥
গতিং পুত্রাঃ ন পশ্য়ামি রক্ষসাং পরুষর্ষভাঃ ।
মংত্রপূতৈর্মহাভাগৈরাস্থিতো হি মহাক্রতুঃ ॥ 12 ॥
তদ্গচ্ছত বিচিন্বধ্বং পুত্রকাঃ ভদ্রমস্তু বঃ ।
সমুদ্রমালিনীং সর্বাং পৃথিবীমনুগচ্ছত ॥ 13 ॥
একৈকয়োজনং পুত্রা বিস্তারমধিগচ্ছত ।
যাবত্তুরগসংদর্শঃ তাবত্ খনত মেদিনীম্ ।
তং চৈব হযহর্তারং মার্গমাণা মমাজ্ঞয়া ॥ 14 ॥
দীক্ষিতঃ পৌত্রসহিতস্সোপাধ্য়াযগণো হ্যহম্ ।
ইহ স্থাস্য়ামি ভদ্রং বো যাবত্তুরগদর্শনম্ ॥ 15 ॥
ইত্য়ুক্তা হৃষ্টমনসো রাজপুত্রা মহাবলাঃ ।
জগ্মুর্মহীতলং রাম পিতুর্বচনয়ংত্রিতাঃ ॥ 16 ॥
যোজনায়ামবিস্তারমেকৈকো ধরণীতলম্ ।
বিভিদুঃ পরুষব্য়াঘ্র বজ্রস্পর্শসমৈর্নখৈঃ ॥ 17 ॥
শূলৈরশনিকল্পৈশ্চ হলৈশ্চাপি সুদারুণৈঃ ।
ভিদ্যমানা বসুমতী ননাদ রঘুনংদন ॥ 18 ॥
নাগানাং মথ্যমানানামসুরাণাং চ রাঘব ।
রাক্ষসানাং চ দুর্ধর্ষস্সত্ত্বানাং নিনদোঽভবত্ ॥ 19 ॥
যোজনানাং সহস্রাণি ষষ্টিং তু রঘুনংদন ।
বিভিদুর্ধরণীং বীরাঃ রসাতলমনুত্তমম্ ॥ 20 ॥
এবং পর্বতসংবাধং জংবূদ্বীপং নৃপাত্মজাঃ ।
খনংতো নরশার্দূল সর্বতঃ পরিচক্রমুঃ ॥ 21 ॥
ততো দেবাস্সগংধর্বাস্সাসুরাস্সহপন্নগাঃ ।
সংভ্রাংতমনসস্সর্বে পিতামহমুপাগমন্ ॥ 22 ॥
তে প্রসাদ্য় মহাত্মানং বিষণ্ণবদনাস্তদা ।
ঊচুঃ পরমসংত্রস্তা পিতামহমিদং বচঃ ॥ 23 ॥
ভগবন্ পৃথিবী সর্বা খন্যতে সগরাত্মজৈঃ ।
বহবশ্চ মহাত্মানো হন্য়ংতে তলবাসিনঃ ॥ 24 ॥
অয়ং যজ্ঞহরোঽস্মাকমনেনাশ্বোঽপনীযতে ।
ইতি তে সর্বভূতানি নিঘ্নংতি সগরাত্মজাঃ ॥ 25 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে একোনচত্বারিংশস্সর্গঃ ॥
