ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകോനചത്വാരിംശസ്സര്ഗഃ ।
വിശ്വാമിത്രവചശ്ശ്രുത്വാ കഥാഽംതേ രഘുനംദനഃ ।
ഉവാച പരമപ്രീതോ മുനിം ദീപ്തമിവാനലമ് ॥ 1 ॥
ശ്രോതുമിച്ഛാമി ഭദ്രം തേ വിസ്തരേണ കഥാമിമാമ് ।
പൂർവകോ മേ കഥം ബ്രഹ്മന് യജ്ഞം വൈ സമുപാഹരത് ॥ 2 ॥
വിശ്വാമിത്രസ്തു കാകുത്സ്ഥമുവാച പ്രഹസന്നിവ ।
ശ്രൂയതാം വിസ്തരോ രാമ സഗരസ്യ മഹാത്മനഃ ॥ 3 ॥
ശംകരശ്വശുരോ നാമ ഹിമവാനചലോത്തമഃ ।
വിംധ്യപർവതമാസാദ്യ നിരീക്ഷേതേ പരസ്പരമ് ॥ 4 ॥
തയോര്മധ്യേ പ്രവൃത്തോഽഭൂദ്യജ്ഞ സ്സപുരുഷോത്തമ ।
സ ഹി ദേശോ നരവ്യാഘ്ര പ്രശസ്തോ യജ്ഞകര്മണി ॥ 5 ॥
തസ്യാശ്വചര്യാം കാകുത്സ്ഥ ദൃഢധന്വാ മഹാരഥഃ ।
അംശുമാനകരോത്താത സഗരസ്യ മതേ സ്ഥിതഃ ॥ 6 ॥
തസ്യ പർവണി തം യജ്ഞം യജമാനസ്യ വാസവഃ ।
രാക്ഷസീം തനുമാസ്ഥായ യജ്ഞീയാശ്വമപാഹരത് ॥ 7 ॥
ഹ്രിയമാണേ തു കാകുത്സ്ഥ തസ്മിന്നശ്വേ മഹാത്മനഃ ।
ഉപാധ്യായഗണാസ്സർവേ യജമാനമഥാബ്രുവന് ॥ 8 ॥
അയം പർവണി വേഗേന യജ്ഞിയാശ്വോഽപനീയതേ ।
ഹര്താരം ജഹി കാകുത്സ്ഥ ഹയശ്ചൈവോപനീയതാമ് ॥ 9 ॥
യജ്ഞച്ഛിദ്രം ഭവത്യേതത്സർവേഷാമശിവായ നഃ ।
തത്തഥാ ക്രിയതാം രാജന് യഥാഽച്ഛിദ്രഃ ക്രതുര്ഭവേത് ॥ 10 ॥
ഉപാധ്യായവച ശ്ശ്രുത്വാ തസ്മിന് സദസി പാര്ഥിവഃ ।
ഷഷ്ടിം പുത്രസഹസ്രാണി വാക്യമേതദുവാച ഹ ॥ 11 ॥
ഗതിം പുത്രാഃ ന പശ്യാമി രക്ഷസാം പരുഷര്ഷഭാഃ ।
മംത്രപൂതൈര്മഹാഭാഗൈരാസ്ഥിതോ ഹി മഹാക്രതുഃ ॥ 12 ॥
തദ്ഗച്ഛത വിചിന്വധ്വം പുത്രകാഃ ഭദ്രമസ്തു വഃ ।
സമുദ്രമാലിനീം സർവാം പൃഥിവീമനുഗച്ഛത ॥ 13 ॥
ഏകൈകയോജനം പുത്രാ വിസ്താരമധിഗച്ഛത ।
യാവത്തുരഗസംദര്ശഃ താവത് ഖനത മേദിനീമ് ।
തം ചൈവ ഹയഹര്താരം മാര്ഗമാണാ മമാജ്ഞയാ ॥ 14 ॥
ദീക്ഷിതഃ പൌത്രസഹിതസ്സോപാധ്യായഗണോ ഹ്യഹമ് ।
ഇഹ സ്ഥാസ്യാമി ഭദ്രം വോ യാവത്തുരഗദര്ശനമ് ॥ 15 ॥
ഇത്യുക്താ ഹൃഷ്ടമനസോ രാജപുത്രാ മഹാബലാഃ ।
ജഗ്മുര്മഹീതലം രാമ പിതുർവചനയംത്രിതാഃ ॥ 16 ॥
യോജനായാമവിസ്താരമേകൈകോ ധരണീതലമ് ।
ബിഭിദുഃ പരുഷവ്യാഘ്ര വജ്രസ്പര്ശസമൈര്നഖൈഃ ॥ 17 ॥
ശൂലൈരശനികല്പൈശ്ച ഹലൈശ്ചാപി സുദാരുണൈഃ ।
ഭിദ്യമാനാ വസുമതീ നനാദ രഘുനംദന ॥ 18 ॥
നാഗാനാം മഥ്യമാനാനാമസുരാണാം ച രാഘവ ।
രാക്ഷസാനാം ച ദുര്ധര്ഷസ്സത്ത്വാനാം നിനദോഽഭവത് ॥ 19 ॥
യോജനാനാം സഹസ്രാണി ഷഷ്ടിം തു രഘുനംദന ।
ബിഭിദുര്ധരണീം വീരാഃ രസാതലമനുത്തമമ് ॥ 20 ॥
ഏവം പർവതസംബാധം ജംബൂദ്വീപം നൃപാത്മജാഃ ।
ഖനംതോ നരശാര്ദൂല സർവതഃ പരിചക്രമുഃ ॥ 21 ॥
തതോ ദേവാസ്സഗംധർവാസ്സാസുരാസ്സഹപന്നഗാഃ ।
സംഭ്രാംതമനസസ്സർവേ പിതാമഹമുപാഗമന് ॥ 22 ॥
തേ പ്രസാദ്യ മഹാത്മാനം വിഷണ്ണവദനാസ്തദാ ।
ഊചുഃ പരമസംത്രസ്താ പിതാമഹമിദം വചഃ ॥ 23 ॥
ഭഗവന് പൃഥിവീ സർവാ ഖന്യതേ സഗരാത്മജൈഃ ।
ബഹവശ്ച മഹാത്മാനോ ഹന്യംതേ തലവാസിനഃ ॥ 24 ॥
അയം യജ്ഞഹരോഽസ്മാകമനേനാശ്വോഽപനീയതേ ।
ഇതി തേ സർവഭൂതാനി നിഘ്നംതി സഗരാത്മജാഃ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകോനചത്വാരിംശസ്സര്ഗഃ ॥
