ශ්රීමද්වාල්මීකීය රාමායණේ බාලකාංඩම් ।
අථ පංචචත්වාරිංශස්සර්ගඃ ।
විශ්වාමිත්රවචශ්ශ්රුත්වා රාඝව ස්සහලක්ෂ්මණඃ ।
විස්මයං පරමං ගත්වා විශ්වාමිත්රමථාබ්රවීත් ॥ 1 ॥
අත්යද්භුතමිදං බ්රහ්මන් කථිතං පරමං ත්වයා ।
ගංගාවතරණං පුණ්යං සාගරස්යාපි පූරණම් ॥ 2 ॥
තස්ය සා ශර්වරී සර්වා සහ සෞමිත්රිණා තදා ।
ජගාම චිංතයානස්ය විශ්වාමිත්රකථාං ශුභාම් ॥ 3 ॥
තතඃ ප්රභාතේ විමලේ විශ්වාමිත්රං මහාමුනිම් ।
උවාච රාඝවෝ වාක්යං කෘතාහ්නිකමරිංදමඃ ॥ 4 ॥
ගතා භගවතී රාත්රිශ්ශ්රෝතව්යං පරමං ශ්රුතම් ।
ක්ෂණභූතේව නෞ රාත්රි ස්සම්වෘත්තේයං මහාතපඃ ॥ 5 ॥
ඉමාං චිංතයතස්සර්වාං නිඛිලේන කථාං තව ।
තරාම සරිතාං ශ්රේෂ්ඨාං පුණ්යාං ත්රිපථගාං නදීම් ॥ 6 ॥
නෞරේෂා හි සුඛාස්තීර්ණා ඍෂීණාං පුණ්යකර්මණාම් ।
භගවංතමිහ ප්රාප්තං ජ්ඤාත්වා ත්වරිතමාගතා ॥ 7 ॥
තස්ය තද්වචනං ශ්රුත්වා රාඝවස්ය මහාත්මනඃ ।
සංතාරං කාරයාමාස සර්ෂිසංඝ ස්සරාඝවඃ ॥ 8 ॥
උත්තරං තීරමාසාද්ය සංපූජ්යර්ෂිගණං තදා ।
ගංගාකූලේ නිවිෂ්ටාස්තේ විශාලාං දදෘශුඃ පුරීම් ॥ 9 ॥
තතෝ මුනිවරස්තූර්ණං ජගාම සහ රාඝවඃ ।
විශාලාං නගරීං රම්යාං දිව්යාං ස්වර්ගෝපමාං තදා ॥ 10 ॥
අථ රාමෝ මහාප්රාජ්ඤෝ විශ්වාමිත්රං මහාමුනිම් ।
පප්රච්ඡ ප්රාංජලිර්භූත්වා විශාලාමුත්තමාං පුරීම් ॥ 11 ॥
කතරෝ රාජවංශෝऽයං විශාලායාං මහාමුනේ ।
ශ්රෝතුමිච්ඡාමි භද්රං තේ පරං කෞතූහලං හි මේ ॥ 12 ॥
තස්ය තද්වචනං ශ්රුත්වා රාමස්ය මුනිපුංගවඃ ।
ආඛ්යාතුං තත්සමාරේභේ විශාලස්ය පුරාතනම් ॥ 13 ॥
ශ්රූයතාං රාම ශක්රස්ය කථාං කථයතශ්ශුභාම් ।
අස්මින් දේශේ තු යද්වෘත්තං තදපි ශෘණු රාඝව ॥ 14 ॥
පූර්වං කෘතයුගේ රාම දිතේඃ පුත්රා මහාබලාඃ ।
අදිතේශ්ච මහාභාග වීර්යවංතස්සුධාර්මිකාඃ ॥ 15 ॥
තතස්තේෂාං නරශ්රේෂ්ඨ බුද්ධිරාසීන්මහාත්මනාම් ।
අමරා අජරාශ්චෛව කථං ස්යාම නිරාමයාඃ ॥ 16 ॥
තේෂාං චිංතයතාං රාම බුද්ධිරාසීන්මහාත්මනාම් ।
ක්ෂීරෝදමථනං කෘත්වා රසං ප්රාප්ස්යාම තත්ර වෛ ॥ 17 ॥
තතෝ නිශ්චිත්ය මථනං යෝක්ත්රං කෘත්වා ච වාසුකිම් ।
මංථානං මංදරං කෘත්වා මමංථුරමිතෞජසඃ ॥ 18 ॥
අථ වර්ෂසහස්රේණ යෝක්ත්රසර්පශිරාංසි ච ।
වමංත්යති විෂං තත්ර දදංශුර්දශනෛශ්ශිලාඃ ॥ 19 ॥
උත්පපාතාග්නිසංකාශං හාලාහලමහාවිෂම් ।
තේන දග්ධං ජගත්සර්වං සදේවාසුරමානුෂම් ॥ 20 ॥
අථ දේවා මහාදේවං ශංකරං ශරණාර්ථිනඃ ।
ජග්මුඃ පශුපතිං රුද්රං ත්රාහි ත්රාහීති තුෂ්ටුවුඃ ॥ 21 ॥
ඒවමුක්තස්තතෝ දේවෛර්දේවදේවේශ්වරඃ ප්රභුඃ ।
ප්රාදුරාසීත්තතෝऽත්රෛව ශංඛචක්රධරෝ හරිඃ ॥ 22 ॥
උවාචෛනං ස්මිතං කෘත්වා රුද්රං ශූලභෘතං හරිඃ ।
දෛවතෛර්මථ්යමානේ තු යත්පූර්වං සමුපස්ථිතම් ॥ 23 ॥
ත්වදීයංහි සුරශ්රේෂ්ඨ සුරාණාමග්රජෝऽසි යත් ।
අග්රපූජාමිමාං මත්වා ගෘහාණේදං විෂං ප්රභෝ ॥ 24 ॥
ඉත්යුක්ත්වා ච සුරශ්රේෂ්ඨස්තත්රෛවාංතරධීයත ।
දේවතානාං භයං දෘෂ්ටවාශ්රුත්වා වාක්යං තු ශාරංගිණඃ ।
හාලාහලවිෂං ඝෝරං ස ජග්රාහාමෘතෝපමම් ॥ 25 ॥
දේවාන්විසෘජ්ය දේවේශෝ ජගාම භගවාන් හරඃ ।
තතෝ දේවාසුරාස්සර්වේ මමංථූ රඝුනංදන ॥ 26 ॥
ප්රවිවේශාථ පාතාලං මංථානඃ පර්වතෝऽනඝ ।
තතෝ දේවාස්සගංධර්වාස්තුෂ්ටුවුර්මධුසූදනම් ॥ 27 ॥
ත්වං ගතිඃ සර්වභූතානාං විශේෂේණ දිවෞකසාම් ।
පාලයාස්මාන්මහාබාහෝ ගිරිමුද්ධර්තුමර්හසි ॥ 28 ॥
ඉති ශ්රුත්වා හෘෂීකේශඃ කාමඨං රූපමාස්ථිතඃ ।
පර්වතං පෘෂ්ඨතඃ කෘත්වා ශිශ්යේ තත්රෝදධෞ හරිඃ ॥ 29 ॥
පර්වතාග්රේ තු ලෝකාත්මා හස්තේනාක්රම්ය කේශවඃ ।
දේවානාං මධ්යතඃ ස්ථිත්වා මමංථ පුරුෂෝත්තමඃ ॥ 30 ॥
අථ වර්ෂසහස්රේණ සදංඩස්සකමංඩලුඃ ।
පූර්වං ධන්වංතරිර්නාම අප්සරාශ්ච සුවර්චසඃ ॥ 31 ॥
අප්සු නිර්මථනාදේව රසාස්තස්මාද්වරස්ත්රියඃ ।
උත්පේතුර්මනුජශ්රේෂ්ඨ තස්මාදප්සරසෝऽභවන් ॥ 32 ॥
ෂෂ්ටිඃ කෝට්යෝऽභවංස්තාසාං අප්සරාණාං සුවර්චසාම් ।
අසංඛ්යේයාස්තු කාකුත්ස්ථ යාස්තාසාං පරිචාරිකාඃ ॥ 33 ॥
න තාස්ස්ම පරිගෘහ්ණංති සර්වේ තේ දේවදානවාඃ ।
අප්රතිග්රහණාත්තාශ්ච සර්වාස්සාධාරණාස්ස්මෘතාඃ ॥ 34 ॥
වරුණස්ය තතඃ කන්යා වාරුණී රඝුනංදන ।
උත්පපාත මහාභාගා මාර්ගමාණා පරිග්රහම් ॥ 35 ॥
දිතේඃ පුත්රා න තාං රාම ජගෘහුර්වරුණාත්මජාම් ।
අදිතේස්තු සුතා වීර ජගෘහුස්තාමනිංදිතාම් ॥ 36 ॥
අසුරාස්තේන දෛතේයාස්සුරාස්තේනාදිතේස්සුතාඃ ।
හෘෂ්ටාඃ ප්රමුදිතාශ්චාසන් වාරුණීග්රහණාත්සුරාඃ ॥ 37 ॥
උච්චෛශ්ශ්රවා හයශ්රේෂ්ඨෝ මණිරත්නං ච කෞස්තුභම් ।
උදතිෂ්ඨන්නරශ්රේෂ්ඨ තථෛවාමෘතමුත්තමම් ॥ 38 ॥
අථ තස්ය කෘතේ රාම මහානාසීත්කුලක්ෂයඃ ।
අදිතේස්තු තතඃ පුත්රා දිතේඃ පුත්රානසූදයන් ॥ 39 ॥
ඒකතෝऽභ්යාගමන් සර්වේ හ්යසුරා රාක්ෂසෛස්සහ ।
යුද්ධමාසීන්මහාඝෝරං වීර ත්රෛලෝක්යමෝහනම් ॥ 40 ॥
යදා ක්ෂයං ගතං සර්වං තදා විෂ්ණුර්මහාබලඃ ।
අමෘතං සෝऽහරත්ත්තූර්ණං මායාමාස්ථාය මෝහිනීම් ॥ 41 ॥
යේ ගතාऽභිමුඛං විෂ්ණුමක්ෂයං පුරුෂෝත්තමම් ।
සංපිෂ්ටාස්තේ තදා යුද්ධේ විෂ්ණුනා ප්රභවිෂ්ණුනා ॥ 42 ॥
අදිතේරාත්මජා වීරා දිතේඃ පුත්රාන්නිජඝ්නිරේ ।
තස්මින් ඝෝරේ මහායුද්ධේ දෛතේයාදිත්යයෝර්භෘශම් ॥ 43 ॥
නිහත්ය දිතිපුත්රාංශ්ච රාජ්යං ප්රාප්ය පුරංදරඃ ।
ශශාස මුදිතෝ ලෝකාන් සර්ෂිසංඝාන් සචාරණාන් ॥ 44 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ පංචචත්වාරිංශස්සර්ගඃ ॥
