ശ്രീമദ്വാല്മീകീയ രാമായണേ ബാലകാംഡമ് ।
അഥ പംചചത്വാരിംശസ്സര്ഗഃ ।
വിശ്വാമിത്രവചശ്ശ്രുത്വാ രാഘവ സ്സഹലക്ഷ്മണഃ ।
വിസ്മയം പരമം ഗത്വാ വിശ്വാമിത്രമഥാബ്രവീത് ॥ 1 ॥
അത്യദ്ഭുതമിദം ബ്രഹ്മന് കഥിതം പരമം ത്വയാ ।
ഗംഗാവതരണം പുണ്യം സാഗരസ്യാപി പൂരണമ് ॥ 2 ॥
തസ്യ സാ ശർവരീ സർവാ സഹ സൌമിത്രിണാ തദാ ।
ജഗാമ ചിംതയാനസ്യ വിശ്വാമിത്രകഥാം ശുഭാമ് ॥ 3 ॥
തതഃ പ്രഭാതേ വിമലേ വിശ്വാമിത്രം മഹാമുനിമ് ।
ഉവാച രാഘവോ വാക്യം കൃതാഹ്നികമരിംദമഃ ॥ 4 ॥
ഗതാ ഭഗവതീ രാത്രിശ്ശ്രോതവ്യം പരമം ശ്രുതമ് ।
ക്ഷണഭൂതേവ നൌ രാത്രി സ്സമ്വൃത്തേയം മഹാതപഃ ॥ 5 ॥
ഇമാം ചിംതയതസ്സർവാം നിഖിലേന കഥാം തവ ।
തരാമ സരിതാം ശ്രേഷ്ഠാം പുണ്യാം ത്രിപഥഗാം നദീമ് ॥ 6 ॥
നൌരേഷാ ഹി സുഖാസ്തീര്ണാ ഋഷീണാം പുണ്യകര്മണാമ് ।
ഭഗവംതമിഹ പ്രാപ്തം ജ്ഞാത്വാ ത്വരിതമാഗതാ ॥ 7 ॥
തസ്യ തദ്വചനം ശ്രുത്വാ രാഘവസ്യ മഹാത്മനഃ ।
സംതാരം കാരയാമാസ സര്ഷിസംഘ സ്സരാഘവഃ ॥ 8 ॥
ഉത്തരം തീരമാസാദ്യ സംപൂജ്യര്ഷിഗണം തദാ ।
ഗംഗാകൂലേ നിവിഷ്ടാസ്തേ വിശാലാം ദദൃശുഃ പുരീമ് ॥ 9 ॥
തതോ മുനിവരസ്തൂര്ണം ജഗാമ സഹ രാഘവഃ ।
വിശാലാം നഗരീം രമ്യാം ദിവ്യാം സ്വര്ഗോപമാം തദാ ॥ 10 ॥
അഥ രാമോ മഹാപ്രാജ്ഞോ വിശ്വാമിത്രം മഹാമുനിമ് ।
പപ്രച്ഛ പ്രാംജലിര്ഭൂത്വാ വിശാലാമുത്തമാം പുരീമ് ॥ 11 ॥
കതരോ രാജവംശോഽയം വിശാലായാം മഹാമുനേ ।
ശ്രോതുമിച്ഛാമി ഭദ്രം തേ പരം കൌതൂഹലം ഹി മേ ॥ 12 ॥
തസ്യ തദ്വചനം ശ്രുത്വാ രാമസ്യ മുനിപുംഗവഃ ।
ആഖ്യാതും തത്സമാരേഭേ വിശാലസ്യ പുരാതനമ് ॥ 13 ॥
ശ്രൂയതാം രാമ ശക്രസ്യ കഥാം കഥയതശ്ശുഭാമ് ।
അസ്മിന് ദേശേ തു യദ്വൃത്തം തദപി ശൃണു രാഘവ ॥ 14 ॥
പൂർവം കൃതയുഗേ രാമ ദിതേഃ പുത്രാ മഹാബലാഃ ।
അദിതേശ്ച മഹാഭാഗ വീര്യവംതസ്സുധാര്മികാഃ ॥ 15 ॥
തതസ്തേഷാം നരശ്രേഷ്ഠ ബുദ്ധിരാസീന്മഹാത്മനാമ് ।
അമരാ അജരാശ്ചൈവ കഥം സ്യാമ നിരാമയാഃ ॥ 16 ॥
തേഷാം ചിംതയതാം രാമ ബുദ്ധിരാസീന്മഹാത്മനാമ് ।
ക്ഷീരോദമഥനം കൃത്വാ രസം പ്രാപ്സ്യാമ തത്ര വൈ ॥ 17 ॥
തതോ നിശ്ചിത്യ മഥനം യോക്ത്രം കൃത്വാ ച വാസുകിമ് ।
മംഥാനം മംദരം കൃത്വാ മമംഥുരമിതൌജസഃ ॥ 18 ॥
അഥ വര്ഷസഹസ്രേണ യോക്ത്രസര്പശിരാംസി ച ।
വമംത്യതി വിഷം തത്ര ദദംശുര്ദശനൈശ്ശിലാഃ ॥ 19 ॥
ഉത്പപാതാഗ്നിസംകാശം ഹാലാഹലമഹാവിഷമ് ।
തേന ദഗ്ധം ജഗത്സർവം സദേവാസുരമാനുഷമ് ॥ 20 ॥
അഥ ദേവാ മഹാദേവം ശംകരം ശരണാര്ഥിനഃ ।
ജഗ്മുഃ പശുപതിം രുദ്രം ത്രാഹി ത്രാഹീതി തുഷ്ടുവുഃ ॥ 21 ॥
ഏവമുക്തസ്തതോ ദേവൈര്ദേവദേവേശ്വരഃ പ്രഭുഃ ।
പ്രാദുരാസീത്തതോഽത്രൈവ ശംഖചക്രധരോ ഹരിഃ ॥ 22 ॥
ഉവാചൈനം സ്മിതം കൃത്വാ രുദ്രം ശൂലഭൃതം ഹരിഃ ।
ദൈവതൈര്മഥ്യമാനേ തു യത്പൂർവം സമുപസ്ഥിതമ് ॥ 23 ॥
ത്വദീയംഹി സുരശ്രേഷ്ഠ സുരാണാമഗ്രജോഽസി യത് ।
അഗ്രപൂജാമിമാം മത്വാ ഗൃഹാണേദം വിഷം പ്രഭോ ॥ 24 ॥
ഇത്യുക്ത്വാ ച സുരശ്രേഷ്ഠസ്തത്രൈവാംതരധീയത ।
ദേവതാനാം ഭയം ദൃഷ്ടവാശ്രുത്വാ വാക്യം തു ശാരംഗിണഃ ।
ഹാലാഹലവിഷം ഘോരം സ ജഗ്രാഹാമൃതോപമമ് ॥ 25 ॥
ദേവാന്വിസൃജ്യ ദേവേശോ ജഗാമ ഭഗവാന് ഹരഃ ।
തതോ ദേവാസുരാസ്സർവേ മമംഥൂ രഘുനംദന ॥ 26 ॥
പ്രവിവേശാഥ പാതാലം മംഥാനഃ പർവതോഽനഘ ।
തതോ ദേവാസ്സഗംധർവാസ്തുഷ്ടുവുര്മധുസൂദനമ് ॥ 27 ॥
ത്വം ഗതിഃ സർവഭൂതാനാം വിശേഷേണ ദിവൌകസാമ് ।
പാലയാസ്മാന്മഹാബാഹോ ഗിരിമുദ്ധര്തുമര്ഹസി ॥ 28 ॥
ഇതി ശ്രുത്വാ ഹൃഷീകേശഃ കാമഠം രൂപമാസ്ഥിതഃ ।
പർവതം പൃഷ്ഠതഃ കൃത്വാ ശിശ്യേ തത്രോദധൌ ഹരിഃ ॥ 29 ॥
പർവതാഗ്രേ തു ലോകാത്മാ ഹസ്തേനാക്രമ്യ കേശവഃ ।
ദേവാനാം മധ്യതഃ സ്ഥിത്വാ മമംഥ പുരുഷോത്തമഃ ॥ 30 ॥
അഥ വര്ഷസഹസ്രേണ സദംഡസ്സകമംഡലുഃ ।
പൂർവം ധന്വംതരിര്നാമ അപ്സരാശ്ച സുവര്ചസഃ ॥ 31 ॥
അപ്സു നിര്മഥനാദേവ രസാസ്തസ്മാദ്വരസ്ത്രിയഃ ।
ഉത്പേതുര്മനുജശ്രേഷ്ഠ തസ്മാദപ്സരസോഽഭവന് ॥ 32 ॥
ഷഷ്ടിഃ കോട്യോഽഭവംസ്താസാം അപ്സരാണാം സുവര്ചസാമ് ।
അസംഖ്യേയാസ്തു കാകുത്സ്ഥ യാസ്താസാം പരിചാരികാഃ ॥ 33 ॥
ന താസ്സ്മ പരിഗൃഹ്ണംതി സർവേ തേ ദേവദാനവാഃ ।
അപ്രതിഗ്രഹണാത്താശ്ച സർവാസ്സാധാരണാസ്സ്മൃതാഃ ॥ 34 ॥
വരുണസ്യ തതഃ കന്യാ വാരുണീ രഘുനംദന ।
ഉത്പപാത മഹാഭാഗാ മാര്ഗമാണാ പരിഗ്രഹമ് ॥ 35 ॥
ദിതേഃ പുത്രാ ന താം രാമ ജഗൃഹുർവരുണാത്മജാമ് ।
അദിതേസ്തു സുതാ വീര ജഗൃഹുസ്താമനിംദിതാമ് ॥ 36 ॥
അസുരാസ്തേന ദൈതേയാസ്സുരാസ്തേനാദിതേസ്സുതാഃ ।
ഹൃഷ്ടാഃ പ്രമുദിതാശ്ചാസന് വാരുണീഗ്രഹണാത്സുരാഃ ॥ 37 ॥
ഉച്ചൈശ്ശ്രവാ ഹയശ്രേഷ്ഠോ മണിരത്നം ച കൌസ്തുഭമ് ।
ഉദതിഷ്ഠന്നരശ്രേഷ്ഠ തഥൈവാമൃതമുത്തമമ് ॥ 38 ॥
അഥ തസ്യ കൃതേ രാമ മഹാനാസീത്കുലക്ഷയഃ ।
അദിതേസ്തു തതഃ പുത്രാ ദിതേഃ പുത്രാനസൂദയന് ॥ 39 ॥
ഏകതോഽഭ്യാഗമന് സർവേ ഹ്യസുരാ രാക്ഷസൈസ്സഹ ।
യുദ്ധമാസീന്മഹാഘോരം വീര ത്രൈലോക്യമോഹനമ് ॥ 40 ॥
യദാ ക്ഷയം ഗതം സർവം തദാ വിഷ്ണുര്മഹാബലഃ ।
അമൃതം സോഽഹരത്ത്തൂര്ണം മായാമാസ്ഥായ മോഹിനീമ് ॥ 41 ॥
യേ ഗതാഽഭിമുഖം വിഷ്ണുമക്ഷയം പുരുഷോത്തമമ് ।
സംപിഷ്ടാസ്തേ തദാ യുദ്ധേ വിഷ്ണുനാ പ്രഭവിഷ്ണുനാ ॥ 42 ॥
അദിതേരാത്മജാ വീരാ ദിതേഃ പുത്രാന്നിജഘ്നിരേ ।
തസ്മിന് ഘോരേ മഹായുദ്ധേ ദൈതേയാദിത്യയോര്ഭൃശമ് ॥ 43 ॥
നിഹത്യ ദിതിപുത്രാംശ്ച രാജ്യം പ്രാപ്യ പുരംദരഃ ।
ശശാസ മുദിതോ ലോകാന് സര്ഷിസംഘാന് സചാരണാന് ॥ 44 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചചത്വാരിംശസ്സര്ഗഃ ॥
