শ্রীমদ্বাল্মীকীয় রামাযণে বালকাংডম্ ।
অথ পংচচত্বারিংশস্সর্গঃ ।
বিশ্বামিত্রবচশ্শ্রুত্বা রাঘব স্সহলক্ষ্মণঃ ।
বিস্ময়ং পরমং গত্বা বিশ্বামিত্রমথাব্রবীত্ ॥ 1 ॥
অত্যদ্ভুতমিদং ব্রহ্মন্ কথিতং পরমং ত্বয়া ।
গংগাবতরণং পুণ্য়ং সাগরস্য়াপি পূরণম্ ॥ 2 ॥
তস্য় সা শর্বরী সর্বা সহ সৌমিত্রিণা তদা ।
জগাম চিংতয়ানস্য় বিশ্বামিত্রকথাং শুভাম্ ॥ 3 ॥
ততঃ প্রভাতে বিমলে বিশ্বামিত্রং মহামুনিম্ ।
উবাচ রাঘবো বাক্য়ং কৃতাহ্নিকমরিংদমঃ ॥ 4 ॥
গতা ভগবতী রাত্রিশ্শ্রোতব্য়ং পরমং শ্রুতম্ ।
ক্ষণভূতেব নৌ রাত্রি স্সম্বৃত্তেয়ং মহাতপঃ ॥ 5 ॥
ইমাং চিংতযতস্সর্বাং নিখিলেন কথাং তব ।
তরাম সরিতাং শ্রেষ্ঠাং পুণ্য়াং ত্রিপথগাং নদীম্ ॥ 6 ॥
নৌরেষা হি সুখাস্তীর্ণা ঋষীণাং পুণ্যকর্মণাম্ ।
ভগবংতমিহ প্রাপ্তং জ্ঞাত্বা ত্বরিতমাগতা ॥ 7 ॥
তস্য় তদ্বচনং শ্রুত্বা রাঘবস্য় মহাত্মনঃ ।
সংতারং কারয়ামাস সর্ষিসংঘ স্সরাঘবঃ ॥ 8 ॥
উত্তরং তীরমাসাদ্য় সংপূজ্যর্ষিগণং তদা ।
গংগাকূলে নিবিষ্টাস্তে বিশালাং দদৃশুঃ পুরীম্ ॥ 9 ॥
ততো মুনিবরস্তূর্ণং জগাম সহ রাঘবঃ ।
বিশালাং নগরীং রম্য়াং দিব্য়াং স্বর্গোপমাং তদা ॥ 10 ॥
অথ রামো মহাপ্রাজ্ঞো বিশ্বামিত্রং মহামুনিম্ ।
পপ্রচ্ছ প্রাংজলির্ভূত্বা বিশালামুত্তমাং পুরীম্ ॥ 11 ॥
কতরো রাজবংশোঽয়ং বিশালায়াং মহামুনে ।
শ্রোতুমিচ্ছামি ভদ্রং তে পরং কৌতূহলং হি মে ॥ 12 ॥
তস্য় তদ্বচনং শ্রুত্বা রামস্য় মুনিপুংগবঃ ।
আখ্য়াতুং তত্সমারেভে বিশালস্য় পুরাতনম্ ॥ 13 ॥
শ্রূযতাং রাম শক্রস্য় কথাং কথযতশ্শুভাম্ ।
অস্মিন্ দেশে তু যদ্বৃত্তং তদপি শৃণু রাঘব ॥ 14 ॥
পূর্বং কৃতয়ুগে রাম দিতেঃ পুত্রা মহাবলাঃ ।
অদিতেশ্চ মহাভাগ বীর্যবংতস্সুধার্মিকাঃ ॥ 15 ॥
ততস্তেষাং নরশ্রেষ্ঠ বুদ্ধিরাসীন্মহাত্মনাম্ ।
অমরা অজরাশ্চৈব কথং স্য়াম নিরাময়াঃ ॥ 16 ॥
তেষাং চিংতযতাং রাম বুদ্ধিরাসীন্মহাত্মনাম্ ।
ক্ষীরোদমথনং কৃত্বা রসং প্রাপ্স্য়াম তত্র বৈ ॥ 17 ॥
ততো নিশ্চিত্য় মথনং যোক্ত্রং কৃত্বা চ বাসুকিম্ ।
মংথানং মংদরং কৃত্বা মমংথুরমিতৌজসঃ ॥ 18 ॥
অথ বর্ষসহস্রেণ যোক্ত্রসর্পশিরাংসি চ ।
বমংত্যতি বিষং তত্র দদংশুর্দশনৈশ্শিলাঃ ॥ 19 ॥
উত্পপাতাগ্নিসংকাশং হালাহলমহাবিষম্ ।
তেন দগ্ধং জগত্সর্বং সদেবাসুরমানুষম্ ॥ 20 ॥
অথ দেবা মহাদেবং শংকরং শরণার্থিনঃ ।
জগ্মুঃ পশুপতিং রুদ্রং ত্রাহি ত্রাহীতি তুষ্টুবুঃ ॥ 21 ॥
এবমুক্তস্ততো দেবৈর্দেবদেবেশ্বরঃ প্রভুঃ ।
প্রাদুরাসীত্ততোঽত্রৈব শংখচক্রধরো হরিঃ ॥ 22 ॥
উবাচৈনং স্মিতং কৃত্বা রুদ্রং শূলভৃতং হরিঃ ।
দৈবতৈর্মথ্যমানে তু যত্পূর্বং সমুপস্থিতম্ ॥ 23 ॥
ত্বদীয়ংহি সুরশ্রেষ্ঠ সুরাণামগ্রজোঽসি যত্ ।
অগ্রপূজামিমাং মত্বা গৃহাণেদং বিষং প্রভো ॥ 24 ॥
ইত্য়ুক্ত্বা চ সুরশ্রেষ্ঠস্তত্রৈবাংতরধীযত ।
দেবতানাং ভয়ং দৃষ্টবাশ্রুত্বা বাক্য়ং তু শারংগিণঃ ।
হালাহলবিষং ঘোরং স জগ্রাহামৃতোপমম্ ॥ 25 ॥
দেবান্বিসৃজ্য় দেবেশো জগাম ভগবান্ হরঃ ।
ততো দেবাসুরাস্সর্বে মমংথূ রঘুনংদন ॥ 26 ॥
প্রবিবেশাথ পাতালং মংথানঃ পর্বতোঽনঘ ।
ততো দেবাস্সগংধর্বাস্তুষ্টুবুর্মধুসূদনম্ ॥ 27 ॥
ত্বং গতিঃ সর্বভূতানাং বিশেষেণ দিবৌকসাম্ ।
পালয়াস্মান্মহাবাহো গিরিমুদ্ধর্তুমর্হসি ॥ 28 ॥
ইতি শ্রুত্বা হৃষীকেশঃ কামঠং রূপমাস্থিতঃ ।
পর্বতং পৃষ্ঠতঃ কৃত্বা শিশ্য়ে তত্রোদধৌ হরিঃ ॥ 29 ॥
পর্বতাগ্রে তু লোকাত্মা হস্তেনাক্রম্য় কেশবঃ ।
দেবানাং মধ্যতঃ স্থিত্বা মমংথ পুরুষোত্তমঃ ॥ 30 ॥
অথ বর্ষসহস্রেণ সদংডস্সকমংডলুঃ ।
পূর্বং ধন্বংতরির্নাম অপ্সরাশ্চ সুবর্চসঃ ॥ 31 ॥
অপ্সু নির্মথনাদেব রসাস্তস্মাদ্বরস্ত্রিয়ঃ ।
উত্পেতুর্মনুজশ্রেষ্ঠ তস্মাদপ্সরসোঽভবন্ ॥ 32 ॥
ষষ্টিঃ কোট্য়োঽভবংস্তাসাং অপ্সরাণাং সুবর্চসাম্ ।
অসংখ্য়েয়াস্তু কাকুত্স্থ যাস্তাসাং পরিচারিকাঃ ॥ 33 ॥
ন তাস্স্ম পরিগৃহ্ণংতি সর্বে তে দেবদানবাঃ ।
অপ্রতিগ্রহণাত্তাশ্চ সর্বাস্সাধারণাস্স্মৃতাঃ ॥ 34 ॥
বরুণস্য় ততঃ কন্য়া বারুণী রঘুনংদন ।
উত্পপাত মহাভাগা মার্গমাণা পরিগ্রহম্ ॥ 35 ॥
দিতেঃ পুত্রা ন তাং রাম জগৃহুর্বরুণাত্মজাম্ ।
অদিতেস্তু সুতা বীর জগৃহুস্তামনিংদিতাম্ ॥ 36 ॥
অসুরাস্তেন দৈতেয়াস্সুরাস্তেনাদিতেস্সুতাঃ ।
হৃষ্টাঃ প্রমুদিতাশ্চাসন্ বারুণীগ্রহণাত্সুরাঃ ॥ 37 ॥
উচ্চৈশ্শ্রবা হযশ্রেষ্ঠো মণিরত্নং চ কৌস্তুভম্ ।
উদতিষ্ঠন্নরশ্রেষ্ঠ তথৈবামৃতমুত্তমম্ ॥ 38 ॥
অথ তস্য় কৃতে রাম মহানাসীত্কুলক্ষয়ঃ ।
অদিতেস্তু ততঃ পুত্রা দিতেঃ পুত্রানসূদযন্ ॥ 39 ॥
একতোঽভ্য়াগমন্ সর্বে হ্যসুরা রাক্ষসৈস্সহ ।
যুদ্ধমাসীন্মহাঘোরং বীর ত্রৈলোক্যমোহনম্ ॥ 40 ॥
যদা ক্ষয়ং গতং সর্বং তদা বিষ্ণুর্মহাবলঃ ।
অমৃতং সোঽহরত্ত্তূর্ণং মায়ামাস্থায় মোহিনীম্ ॥ 41 ॥
যে গতাঽভিমুখং বিষ্ণুমক্ষয়ং পুরুষোত্তমম্ ।
সংপিষ্টাস্তে তদা যুদ্ধে বিষ্ণুনা প্রভবিষ্ণুনা ॥ 42 ॥
অদিতেরাত্মজা বীরা দিতেঃ পুত্রান্নিজঘ্নিরে ।
তস্মিন্ ঘোরে মহায়ুদ্ধে দৈতেয়াদিত্যয়োর্ভৃশম্ ॥ 43 ॥
নিহত্য় দিতিপুত্রাংশ্চ রাজ্য়ং প্রাপ্য় পুরংদরঃ ।
শশাস মুদিতো লোকান্ সর্ষিসংঘান্ সচারণান্ ॥ 44 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে পংচচত্বারিংশস্সর্গঃ ॥
