ශ්රීමද්වාල්මීකීය රාමායණේ බාලකාංඩම් ।
අථ ඒකෝනපංචාශස්සර්ගඃ ।
අඵලස්තු තතශ්ශක්රෝ දේවානග්නිපුරෝගමාන් ।
අබ්රවීත්ත්රස්තවදනස්සර්ෂිස්සංඝාන් සචාරණාන් ॥ 1 ॥
කුර්වතා තපසෝ විඝ්නං ගෞතමස්ය මහාත්මනඃ ।
ක්රෝධමුත්පාද්ය හි මයා සුරකාර්යමිදං කෘතම් ॥ 2 ॥
අඵලෝऽස්මි කෘතස්තේන ක්රෝධාත්සා ච නිරාකෘතා ।
ශාපමෝක්ෂේණ මහතා තපෝऽස්යාපහෘතං මයා ॥ 3 ॥
තස්මාත්සුරවරාස්සර්වේ සර්ෂිස්සංඝාස්සචාරණාඃ ।
සුරසාහ්යකරං සර්වේ සඵලං කර්තුමර්හථ ॥ 4 ॥
ශතක්රතෝර්වචශ්ශ්රුත්වා දේවාස්සාග්නිපුරෝගමාඃ ।
පිතෘදේවානුපේත්යාහු ස්සහ සර්වෛර්මරුද්ගණෛඃ ॥ 5 ॥
අයං මේෂස්සවෘෂණශ්ශක්රෝ හ්යවෘෂණඃ කෘතඃ ।
මේෂස්ය වෘෂණෞ ගෘහ්ය ශක්රායාऽශු ප්රයච්ඡථ ॥ 6 ॥
අඵලස්තු කෘතෝ මේෂඃ පරාං තුෂ්ටිං ප්රදාස්යති ।
භවතාං හර්ෂණාර්ථාය යේ ච දාස්යංති මානවාඃ ॥ 7 ॥
අග්නේස්තු වචනං ශ්රුත්වා පිතෘදේවාස්සමාගතාඃ ।
උත්පාට්ය මේෂවෘෂණෞ සහස්රාක්ෂේ න්යවේශයන් ॥ 8 ॥
තදා ප්රභෘති කාකුත්ස්ථ පිතෘදේවාස්සමාගතාඃ ।
අඵලාන් භුංජතේ මේෂාන් ඵලෛස්තේෂාමයෝජයන් ॥ 9 ॥
ඉංද්රස්තු මේෂවෘෂණස්තදාප්රභෘති රාඝව ।
ගෞතමස්ය ප්රභාවේන තපසශ්ච මහාත්මනඃ ॥ 10 ॥
තදාගච්ඡ මහාතේජ ආශ්රමං පුණ්යකර්මණඃ ।
තාරයෛනාං මහාභාගාමහල්යාං දේවරූපිණීම් ॥ 11 ॥
විශ්වාමිත්රවචශ්ශ්රුත්වා රාඝවස්සහලක්ෂ්මණඃ ।
විශ්වාමිත්රං පුරස්කෘත්ය තමාශ්රමමථාවිශත් ॥ 12 ॥
දදර්ශ ච මහාභාගාං තපසා ද්යෝතිතප්රභාම් ।
ලෝකෛරපි සමාගම්ය දුර්නිරීක්ෂ්යාං සුරාසුරෛඃ ॥ 13 ॥
ප්රයත්නාන්නිර්මිතාං ධාත්රා දිව්යාං මායාමයීමිව ।
ස තුෂාරාවෘතාං සාභ්රාං පූර්ණචංද්රප්රභාමිව ॥ 14 ॥
මධ්යේංऽභසෝ දුරාධර්ෂාං දීප්තාං සූර්යප්රභාමිව ।
සා හි ගෞතමවාක්යේන දුර්නිරීක්ෂ්යා බභූව හ ॥ 15 ॥
ත්රයාණාමපි ලෝකානාං යාවද්රාමස්ය දර්ශනම් ।
ශාපස්යාංතමුපාගම්ය තේෂාං දර්ශනමාගතා ॥ 16 ॥
රාඝවෞ තු තතස්තස්යාඃ පාදෞ ජගෘහතුස්තදා ।
ස්මරංතී ගෞතමවචඃ ප්රතිජග්රාහ සා ච තෞ ॥ 17 ॥
පාද්යමර්ඝ්යං තථාऽऽතිථ්යං චකාර සුසමාහිතා ।
ප්රතිජග්රාහ කාකුත්ස්ථෝ විධිදෘෂ්ටේන කර්මණා ॥ 18 ॥
පුෂ්පවෘෂ්ටිර්මහත්යාසීද්දේවදුංදුභිනිස්වනෛඃ ।
ගංධර්වාප්සරසාං චෛව මහානාසීත්සමාගමඃ ॥ 19 ॥
සාධු සාධ්විති දේවාස්තාමහල්යාං සමපූජයන් ।
තපෝබලවිශුද්ධාංගී ගෞතමස්ය වශානුගාම් ॥ 20 ॥
ගෞතමෝऽපි මහාතේජා අහල්යාසහිතස්සුඛී ।
රාමං සංපූජ්ය විධිවත්තපස්තේපේ මහාතපාඃ ॥ 21 ॥
රාමෝऽපි පරමාං පූජාං ගෞතමස්ය මහාමුනේඃ ।
සකාශාද්විධිවත්ප්රාප්ය ජගාම මිථිලාං තතඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකෝනපංචාශස්සර්ගඃ ॥
