ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକୋନପଂଚାଶସ୍ସର୍ଗଃ ।
ଅଫଲସ୍ତୁ ତତଶ୍ଶକ୍ରୋ ଦେଵାନଗ୍ନିପୁରୋଗମାନ୍ ।
ଅବ୍ରଵୀତ୍ତ୍ରସ୍ତଵଦନସ୍ସର୍ଷିସ୍ସଂଘାନ୍ ସଚାରଣାନ୍ ॥ 1 ॥
କୁର୍ଵତା ତପସୋ ଵିଘ୍ନଂ ଗୌତମସ୍ୟ ମହାତ୍ମନଃ ।
କ୍ରୋଧମୁତ୍ପାଦ୍ୟ ହି ମୟା ସୁରକାର୍ୟମିଦଂ କୃତମ୍ ॥ 2 ॥
ଅଫଲୋଽସ୍ମି କୃତସ୍ତେନ କ୍ରୋଧାତ୍ସା ଚ ନିରାକୃତା ।
ଶାପମୋକ୍ଷେଣ ମହତା ତପୋଽସ୍ୟାପହୃତଂ ମୟା ॥ 3 ॥
ତସ୍ମାତ୍ସୁରଵରାସ୍ସର୍ଵେ ସର୍ଷିସ୍ସଂଘାସ୍ସଚାରଣାଃ ।
ସୁରସାହ୍ୟକରଂ ସର୍ଵେ ସଫଲଂ କର୍ତୁମର୍ହଥ ॥ 4 ॥
ଶତକ୍ରତୋର୍ଵଚଶ୍ଶ୍ରୁତ୍ଵା ଦେଵାସ୍ସାଗ୍ନିପୁରୋଗମାଃ ।
ପିତୃଦେଵାନୁପେତ୍ୟାହୁ ସ୍ସହ ସର୍ଵୈର୍ମରୁଦ୍ଗଣୈଃ ॥ 5 ॥
ଅୟଂ ମେଷସ୍ସଵୃଷଣଶ୍ଶକ୍ରୋ ହ୍ୟଵୃଷଣଃ କୃତଃ ।
ମେଷସ୍ୟ ଵୃଷଣୌ ଗୃହ୍ୟ ଶକ୍ରାୟାଽଶୁ ପ୍ରୟଚ୍ଛଥ ॥ 6 ॥
ଅଫଲସ୍ତୁ କୃତୋ ମେଷଃ ପରାଂ ତୁଷ୍ଟିଂ ପ୍ରଦାସ୍ୟତି ।
ଭଵତାଂ ହର୍ଷଣାର୍ଥାୟ ୟେ ଚ ଦାସ୍ୟଂତି ମାନଵାଃ ॥ 7 ॥
ଅଗ୍ନେସ୍ତୁ ଵଚନଂ ଶ୍ରୁତ୍ଵା ପିତୃଦେଵାସ୍ସମାଗତାଃ ।
ଉତ୍ପାଟ୍ୟ ମେଷଵୃଷଣୌ ସହସ୍ରାକ୍ଷେ ନ୍ୟଵେଶୟନ୍ ॥ 8 ॥
ତଦା ପ୍ରଭୃତି କାକୁତ୍ସ୍ଥ ପିତୃଦେଵାସ୍ସମାଗତାଃ ।
ଅଫଲାନ୍ ଭୁଂଜତେ ମେଷାନ୍ ଫଲୈସ୍ତେଷାମୟୋଜୟନ୍ ॥ 9 ॥
ଇଂଦ୍ରସ୍ତୁ ମେଷଵୃଷଣସ୍ତଦାପ୍ରଭୃତି ରାଘଵ ।
ଗୌତମସ୍ୟ ପ୍ରଭାଵେନ ତପସଶ୍ଚ ମହାତ୍ମନଃ ॥ 10 ॥
ତଦାଗଚ୍ଛ ମହାତେଜ ଆଶ୍ରମଂ ପୁଣ୍ୟକର୍ମଣଃ ।
ତାରୟୈନାଂ ମହାଭାଗାମହଲ୍ୟାଂ ଦେଵରୂପିଣୀମ୍ ॥ 11 ॥
ଵିଶ୍ଵାମିତ୍ରଵଚଶ୍ଶ୍ରୁତ୍ଵା ରାଘଵସ୍ସହଲକ୍ଷ୍ମଣଃ ।
ଵିଶ୍ଵାମିତ୍ରଂ ପୁରସ୍କୃତ୍ୟ ତମାଶ୍ରମମଥାଵିଶତ୍ ॥ 12 ॥
ଦଦର୍ଶ ଚ ମହାଭାଗାଂ ତପସା ଦ୍ୟୋତିତପ୍ରଭାମ୍ ।
ଲୋକୈରପି ସମାଗମ୍ୟ ଦୁର୍ନିରୀକ୍ଷ୍ୟାଂ ସୁରାସୁରୈଃ ॥ 13 ॥
ପ୍ରୟତ୍ନାନ୍ନିର୍ମିତାଂ ଧାତ୍ରା ଦିଵ୍ୟାଂ ମାୟାମୟୀମିଵ ।
ସ ତୁଷାରାଵୃତାଂ ସାଭ୍ରାଂ ପୂର୍ଣଚଂଦ୍ରପ୍ରଭାମିଵ ॥ 14 ॥
ମଧ୍ୟେଂଽଭସୋ ଦୁରାଧର୍ଷାଂ ଦୀପ୍ତାଂ ସୂର୍ୟପ୍ରଭାମିଵ ।
ସା ହି ଗୌତମଵାକ୍ୟେନ ଦୁର୍ନିରୀକ୍ଷ୍ୟା ବଭୂଵ ହ ॥ 15 ॥
ତ୍ରୟାଣାମପି ଲୋକାନାଂ ୟାଵଦ୍ରାମସ୍ୟ ଦର୍ଶନମ୍ ।
ଶାପସ୍ୟାଂତମୁପାଗମ୍ୟ ତେଷାଂ ଦର୍ଶନମାଗତା ॥ 16 ॥
ରାଘଵୌ ତୁ ତତସ୍ତସ୍ୟାଃ ପାଦୌ ଜଗୃହତୁସ୍ତଦା ।
ସ୍ମରଂତୀ ଗୌତମଵଚଃ ପ୍ରତିଜଗ୍ରାହ ସା ଚ ତୌ ॥ 17 ॥
ପାଦ୍ୟମର୍ଘ୍ୟଂ ତଥାଽଽତିଥ୍ୟଂ ଚକାର ସୁସମାହିତା ।
ପ୍ରତିଜଗ୍ରାହ କାକୁତ୍ସ୍ଥୋ ଵିଧିଦୃଷ୍ଟେନ କର୍ମଣା ॥ 18 ॥
ପୁଷ୍ପଵୃଷ୍ଟିର୍ମହତ୍ୟାସୀଦ୍ଦେଵଦୁଂଦୁଭିନିସ୍ଵନୈଃ ।
ଗଂଧର୍ଵାପ୍ସରସାଂ ଚୈଵ ମହାନାସୀତ୍ସମାଗମଃ ॥ 19 ॥
ସାଧୁ ସାଧ୍ଵିତି ଦେଵାସ୍ତାମହଲ୍ୟାଂ ସମପୂଜୟନ୍ ।
ତପୋବଲଵିଶୁଦ୍ଧାଂଗୀ ଗୌତମସ୍ୟ ଵଶାନୁଗାମ୍ ॥ 20 ॥
ଗୌତମୋଽପି ମହାତେଜା ଅହଲ୍ୟାସହିତସ୍ସୁଖୀ ।
ରାମଂ ସଂପୂଜ୍ୟ ଵିଧିଵତ୍ତପସ୍ତେପେ ମହାତପାଃ ॥ 21 ॥
ରାମୋଽପି ପରମାଂ ପୂଜାଂ ଗୌତମସ୍ୟ ମହାମୁନେଃ ।
ସକାଶାଦ୍ଵିଧିଵତ୍ପ୍ରାପ୍ୟ ଜଗାମ ମିଥିଲାଂ ତତଃ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକୋନପଂଚାଶସ୍ସର୍ଗଃ ॥
